Jénesii̱s 44

Bi̱ tsꞌén tsanguínjo̱ chi̱tsen to̱ntiboaa̱ Kosiee̱

1-2Ngui̱chí sájín nguije kamá kui nii̱, Kosiee̱ tsíchji̱a̱a̱ nda̱ xi tikóntjoón ndiꞌaa̱, kó bo̱a̱ katsoó nga ku̱i̱ꞌíkitsié maá ni chinie koxtaa̱ kui jaá ta̱ xikó kjiꞌi ska̱rií, kó nga tsꞌoa koxtaa̱ ku̱i̱ꞌíyá to̱n xi íchjíní to ndso̱ko̱a̱n ṉño̱paa̱n, kó ti̱ bo̱a̱ katsoó nga kui chi̱tsen to̱ntiboaa̱ ki̱a̱ ku̱i̱ꞌíyaá koxtaa̱ nda̱ xi kjindií ko̱jo to̱n xi íchjíní to ndso̱ko̱a̱n ṉño̱paa̱n.

Kó kui nda̱a̱ bo̱a̱ katsꞌén xikó kiꞌmií. 3Nga kamánguindyiojón nga ꞌniú ta̱jño̱ó, kui jaá iskjíbé bórroó kó kijí. 4Nde kji̱e̱ kjinjín fochó kui jaá nga Kosiee̱, bi̱ katsoó nda̱ xi tikóntjoón ndiꞌaa̱:

«Ti̱sítji̱n ji kó tsá tꞌentji̱nguìi̱ kui jaá, kó nga kjóchítji̱nguìi̱ bi̱ tꞌíi̱n: “Ánní nga ndajín ikꞌíchjíjnúu̱ ni nda xi katsꞌénjo̱jnú ndi̱a̱na. 5¡A yajínjnú nga kuí chi̱tse̱én xi ꞌbiyá ni ndi̱a̱na ko̱jo nga kuí boá xi tsꞌénkjién nga kotꞌasón ni xi jaskan ka̱ma! ¡Ja̱koxi̱ boá nga ndajínkjiꞌi ni xi kiniꞌánjo̱jnú kui!”»

6Nga jachótji̱nguii̱ kui jaá, kui nda̱ xi tikóntjoón ndiꞌaa̱ Kosiee̱, xikó má kiꞌmií bo̱a̱ má katsoó kui jaá. 7Kó kui jaá bi̱ katsó:

—Ánní nga bo̱a̱ kjiꞌi ni xi se kon ji̱n. ¡Ji̱n jmí ni̱xtjin si̱ꞌanjne̱ kui nii̱! 8Ji ye ji nga kui to̱n xi tjiyá koxta̱jne̱ tsie ꞌne̱ kjindiboájoꞌoyá nguiníjne̱ ndeskande nangui Kanaa̱n, kó kótsꞌén nga ni to̱nsinieé ko̱jo tsi ni to̱ntiboaa̱ ndi̱a̱ tse̱ si̱ꞌanchejéjne̱ ngotꞌe̱. 9Tsi ngo ji̱n xi yaꞌa kui chi̱tsen to̱ntiboaa̱, nga niꞌánkꞌién, kó ngayeje ji̱n, moso̱ xi kastiñaá ndi̱a̱a̱ ngatama ji̱n.

10Kó bi̱ katsó kui nda̱ xi tikóntjoón ndiꞌaa̱ Kosiee̱:

—Ndakjíꞌí, ja̱ bo̱a̱ ngatama xikó kiꞌmíjnú, ta̱nga ta̱ kuí tsí nda̱ xi yaꞌa kui chi̱tsen to̱ntiboaa̱ xi moso̱na ngatama, kó xi ngasee̱ jmí jé kꞌuiéjiín.

11Kósꞌe̱ kui jaá xi tsá xi boaꞌa tsꞌenje̱ngui koxtaa̱, kó nga ngo nga ngo iskjíxꞌaá xi tsi̱ꞌe̱. 12Kósꞌe̱ nda̱ xi tikóntjoón ndiꞌaa̱ Kosiee̱ tsangase kui chi̱tse̱én, tjón má tsi̱ꞌe̱ nda xi xchá ngasee̱ askotꞌa, sꞌe̱ jetꞌani xi tsi̱ꞌe̱ nda̱ xi kjindií, kó ki̱a̱ kasako kui chi̱tsen to̱ntiboaa̱ ngu̱i̱ya koxta̱ xi tsi̱ꞌe̱ Benjaa̱. 13Kó nga kamábe kui nii̱ kui jaá, achichí katsakjónní kó ndasen kamaá, kósꞌe̱ ísón nguinií bórroó chꞌia xí ndyi̱yaꞌa, sꞌe̱ kijíꞌoyá nguiní na̱xi̱ńdá nínga tikón Kosiee̱.

14Nga jachó Judáa̱ ko̱jo já ntsꞌi̱e̱ ki̱a̱ ndiꞌaa̱ Kosiee̱, kui nda̱a̱ ta̱kó tikón ngase ndiꞌaa̱, kó kui jaá kixindyiańña ngaskande nga kisitꞌaa̱ kje̱n tꞌananguii̱, 15ta̱nga Kosiee̱ bi̱ katsó:

—Ánní nga bo̱a̱ kiniꞌánjo̱jnúꞌun. A yajínjnú nga an mana kotꞌasón an.

16Kósꞌe̱ Judáa̱ bi̱ katsó:

—Ja̱ kó mí ni xi ka̱ma kꞌuinjne̱ ji ndi̱a̱. Ka̱májín ko̱kójne̱ nga bo̱a̱jín kjiꞌi kui nii̱. Néná jè kamábe nga ji̱n xi konnijne̱, kó ngotꞌe̱ ꞌne̱ moso̱ tse̱ ji ngatamajne̱, ko̱jo kui nda̱ xi yaꞌa chi̱tsen to̱ntiboaa̱ nga.

17Kó Kosiee̱ bi̱ katsó:

—¡Jmí ni̱xtjin sa̱ꞌin an kui nii̱! Ta̱ kuí tsí nda̱ xi yaꞌa chi̱tsen to̱ntiboaa̱ xi moso̱na ngatama, xi ngase jún jè ka̱ma xió konguínjnú ndiꞌaa̱ na̱ꞌmijnú.

18Ta̱nga Judáa̱ kijíkón tiñaa̱ Kosiee̱, kó bi̱ katsoó:

—Ji ndi̱a̱, ngata̱ niꞌínxchínjín ji, ꞌniú míꞌaá nga teꞌéndiéní nga kuichjiájo ngotjoón ngo én, jè be an nga kjiꞌa nga ji xi tjindókjo̱a̱joo̱, xikónií tsi nda̱ ree̱ xi tjindókjo̱a̱jo. 19Ji akasíyéjne̱ tsi ta̱kó tikón na̱ꞌmijne̱ ko̱jo xi ingo ntsꞌiejne̱. 20Kó ji̱n bo̱a̱ kiꞌmíjne̱ ji nga na̱ꞌmijne̱ jè xchá, kó nga jó ndí kisꞌiee̱ kui ko̱jo chjo̱ón xi ꞌmí na̱ Rakee̱l, kó nga ngo kui ndií xi je kꞌien, sꞌe̱ ngo xi kjindií xi ta̱kó tikón, kui xi katsen nga je ꞌniú xchá na̱ꞌmijne̱, kuíni nga na̱ꞌmijne̱ achichí tjoó. 21Kó jí bo̱a̱ kasejne̱ nga kji̱ndi̱boájo̱jne̱ kꞌi̱e̱e̱ tsi̱ꞌe̱ nga xche̱ ji. 22Kó ji̱n bo̱a̱ kiꞌmíjne̱ ji nga kui nda̱a̱ ka̱májín ku̱i̱ꞌíjñámasien na̱ꞌmijne̱ ngatꞌa̱ tsi bo̱a̱ ka̱ma, ko̱ya na̱ꞌmijne̱. 23Kó bo̱a̱ kase ji nga tsi kji̱ndi̱boájo̱jínjne̱ kui ntsꞌiejne̱ xi kjindií, nga ta̱sá nga kꞌi̱e̱jín kjoéꞌe̱kindyiajne̱ nguindyikin ji.

24Kó nga jáchójne̱ nínga tikón na̱ꞌmijne̱, kiꞌmíyájne̱ xingaá ngayeje ni xi kasejne̱, 25kó na̱ꞌmijne̱ bo̱a̱ katsójne̱ nga kji̱ndi̱boá tsꞌítsié nguiníjne̱ ngu̱i̱chí ni chinie kꞌi̱e̱e̱, 26kó ji̱n bo̱a̱ kiꞌmíjne̱ kui nga ka̱ma konguín nguiníjne̱, ta̱nga ngototo tsi konguínjo̱jne̱ ntsꞌiejne̱ xi kjindií, bo̱a̱ tsí tsꞌén nga ka̱ma konguinkindyiá nguiníjne̱ nguindyi̱ko̱n xtitjoón nangui Ejipto̱.

27Kó na̱ꞌmijne̱ bi̱ katsójne̱: Jè ya nda ndajnú jún nga chjo̱ónna xi kiꞌmí na̱ Rakee̱l jó ndí katsjána, 28kó nga ngo kui ndií xi yajín nínga kijí, kó nguiti̱ kamábejín an. Bee̱ko̱n an nga ngo ra cho̱ tamá iskjinie. 29Kó tsi ti̱ chja̱ꞌáxínjnúꞌun kui ndína xi̱ꞌbi̱ nga, ko̱jo tsi ngo ni xi ndajín xi ka̱maa̱, achichí ndasen kotíjña ngaskande nga ko̱ya án.

30-31Kó ngotꞌe̱ ꞌne̱ ji nda̱ xtitjón, tsi kjuín nguiñá an ndiꞌaa̱ na̱ꞌmina, kó tsi kjuínjo̱jín an ntsꞌié án, ja̱koxi̱ nga ko̱ya na̱ꞌmina. Achichí ngatꞌaa̱ xkjín, kó ta̱ngatꞌanií kui ndaa̱ nga kꞌuijñá ngase nga̱sondie, kó kuíni nga tsi ko̱ya ndasen na̱ꞌmijne̱, ji̱n boá xi sꞌi̱niéjne̱ kui nii̱. 32Ti̱ ánní xi bo̱a̱ kixiáa̱n nga kui ndií jmí ni ka̱májiín, kó ngaskande bi̱ kixiáa̱n na̱ꞌmina, tsi nguiti̱ kji̱ndi̱boájo̱ꞌoyá jaán, an nga sꞌinié an kui nii̱ ngatsjé ni̱xtjin.

33Kuíni nga ꞌniú míꞌaá nga teꞌéndiéní nga an kotíjña an ngajoo̱ kui ntsꞌié án xi kjindií, kó nga kui nda̱a̱ ngatjíjo̱ nguiní já ntsꞌié án xi ngasee̱. 34Ngatꞌa̱ kótsꞌén kjuín nguiñá an ndiꞌaa̱ na̱ꞌmina nga tsoꞌbájo̱jín an kui nda̱a̱. ¡Mejénjínna skuie an ni ndajín xi ka̱maa̱ na̱ꞌmina!

Currently Selected:

Jénesii̱s 44: MAIX

Highlight

Copy