Jénesii̱s 42

Bi̱ tsꞌén jachókꞌatsie ni chinie já ntsꞌi̱e̱ Kosiee̱ nangui Ejipto̱

1-2Kó nga tsintꞌie Jakoo̱b nga nangui Ejipto̱ tjín to ndso̱ko̱a̱n ṉño̱pan, bi̱ katsoó ndií:

«Mí xí ndyi̱niꞌánjnú kꞌi̱e̱e̱, ánní nga ta̱ ndyi̱chaꞌá xingu̱i̱ konjnú. Jè kiꞌmíyána nga tjín xó to ndso̱ko̱a̱n ṉño̱pan nangui Ejipto̱, tanguínjnú ki̱a̱, kó tsꞌi̱tsiéjnú to ndso̱ko̱a̱n ṉño̱pan tsi mejénjnú nga ku̱i̱ndyion ra ngase nga̱sondie, tsájmi ko̱ya ñá».

3-5Kó kui kjindiaá kamáꞌniú ngase nangui Kanaa̱n, kó achichí kamá xota̱ xi kijíkꞌatsie to ndso̱ko̱a̱n ṉño̱pan nangui Ejipto̱, kó ti̱ kijí nga tie já ntsꞌi̱e̱ Kosiee̱ nga. Ta̱nga Jakoo̱b katsꞌénkjíjín Benjaa̱, kui xi ntsꞌi̱e̱ ma Kosiee̱ nga ngo na̱ꞌmi ngo na̱an, ngatꞌa̱ kamámejénjiín nga tjín ni xi ndajín ka̱maa̱.

6Nga jachó já ntsꞌi̱e̱ Kosiee̱ ki̱a̱ nangui Ejipto̱, kixindyiańña ngaskande nga kisitꞌaa̱ kje̱n tꞌananguii̱ nga kamábendikón Kosiee̱, ngatꞌa̱ kuí boá xi xtitjoón kui na̱xi̱ńdaá, kó kuí boá xi atíñaá to ndso̱ko̱a̱n ṉño̱pan ngayeje na̱xi̱ńdá xí tjín nga̱sondiee̱. 7-8Kó Kosiee̱ tji̱e̱nmá kamábe já ntsꞌi̱e̱, ta̱nga kui jaá kamábejín nga Kosiee̱ xi̱ꞌba̱. Kó jmí ni katsójiín tsi̱ꞌe̱ nga sꞌi̱jin raa̱ nga nda̱ Ejipto̱ boá Kosiee̱, sꞌe̱ ꞌniú tsíchji̱a̱jo já ntsꞌi̱e̱ nga bi̱ katsoó:

—Kó jún, ñá kjindiboánijnú.

Kó kui jaá bi̱ katsó:

—Nangui Kanaa̱n kjindiboánijne̱, kó to ndso̱ko̱a̱n ṉño̱pan kjindiboá tsꞌítsiéjne̱.

9Kósꞌe̱ Kosiee̱ jaꞌátsjiee̱n ni xi katsoó chi̱ni kjo̱a̱a̱ kui jaá, kó bi̱ katsoó já ntsꞌi̱e̱:

—Bee̱ko̱n an nga jún ta̱ ndyi̱foéꞌe̱tsitsienjenꞌmá tsijnú kótsꞌén nga ka̱ma ku̱i̱xkánjo̱jnú kui na̱xi̱ńdaá.

10Ta̱nga kui jaá bi̱ katsoó:

—¡Jmí ndi̱a̱! Moso̱ tse̱ boá ji̱n, kó ta̱ to ndso̱ko̱a̱n ṉño̱pan tsí boá xi ndyi̱foéꞌe̱tsꞌítsiéjne̱. 11Ngayeje ji̱n xota̱ nda boá ji̱n, ta̱ ngo na̱ꞌmi má ji̱n, jmí tsi xota̱ xi ndyi̱foeꞌekatsienjenꞌmá.

12Ta̱nga Kosiee̱ bi̱ katsó ngasee̱:

—¡Sꞌijinjín mána kui nii̱! Jún ta̱ ndyi̱foéꞌe̱tsitsienjenꞌmá tsijnú kótsꞌén nga ka̱ma ku̱i̱xkánjo̱jnú xotaa̱ kui na̱xi̱ńdaá.

13Kó bi̱ katsó ngase kui jaá:

—Ji̱n, tiejó ntsꞌie májne̱, kó ta̱ ngo na̱ꞌmi májne̱ ngayejejne̱, kó kui nda̱ xi ꞌniú kjindií, na̱ꞌmijne̱ tikónjo̱ ngotꞌe̱ ki̱a̱ nangui Kanaa̱n, kó ngo ntsꞌiejne̱ xi je kꞌien.

14Kó Kosiee̱ bi̱ katsó nguinií:

—Kjénní ni xi kixian an nga jún xota̱ xi ndyi̱foeꞌekatsienjenꞌmá boájnú. 15Kó skotꞌa má ra an akjénráa̱ ni xi ndyi̱ꞌmijnú. Kjo̱a̱mindyioo̱n nda ree̱ kꞌuijñánguí an nga jún kjo̱tjójínjnú kui ngu̱i̱ndiee̱ ngaskande nga kjoéꞌe̱jo̱jnú kꞌi̱e̱e̱ ntsꞌiejnú xi kjindií. 16Akjénráa̱ ni xi ndyi̱ꞌmijnú: Nanguíyájnú ngo ntsꞌiejnú, kó ngatjíkjaꞌá kui ntsꞌiejnú xi kjindií, kó xi ngasee̱ ndo̱bo̱a̱ya kꞌuíndo ra an kꞌi̱e̱e̱. Tsi kji̱ndi̱boájo̱jín ntsꞌiejnú, kjo̱a̱mindyioo̱n nda ree̱ kꞌuijñánguí an nga ja̱ kjénní nga xota̱ xi ndyi̱foeꞌekatsienjenꞌmá boá jún.

17Kósꞌe̱ Kosiee̱ ján ni̱xtjin índo kui jaá ndo̱bo̱a̱ya. 18-20Kó xi ma ján ni̱xtjin Kosiee̱ bi̱ katsoó:

«Tsakjon án Néná. Tsi ja̱koxi̱ nga xota̱ xi ndajnú ko̱jo tsi mejénjnú ku̱i̱ndyion ra ngasejnú nga̱sondie, bi̱ ti̱ꞌánjnú: teꞌéndiéjnú nga ngo ntsꞌiejnú xi ngatꞌíjñá ra ndo̱bo̱a̱ya, kó xi ngasee̱ ngatjíjoo̱ to ndso̱ko̱a̱n ṉño̱pan xota̱ xi síndo ndiꞌajnú, ngatꞌa̱ achichí ra je bojoó, ta̱nga ndiboájo̱jnú ntsꞌiejnú xi kjindií, kó bo̱a̱ tsí tsꞌén skuie an tsi ja̱koxi̱ ni xi ndyi̱ꞌmijnú.»

Kó já ntsꞌi̱e̱ Kosiee̱ jo̱ꞌo katsó ni xi kiꞌmií, 21ta̱nga ja̱kꞌi̱e̱ ja̱ngaján bi̱ katsoó xkjín:

«Nga ja̱koxi̱ nda ndyi̱ꞌbíchjí ñá ngotꞌe̱ ni xi kiniꞌánjo̱ ntsꞌié, a foaꞌátsjienjnú nga achichí ꞌniú tsíꞌáná nga si̱ꞌanjetakóo̱n katsaki, kó bo̱a̱jín kiniꞌán, nda tsi kamáyá ñá nga achichí katsakjónní. Ja̱ ngotꞌe̱ ꞌne̱ kꞌi̱e̱ ndyi̱ꞌbíchjí ni xi kiniꞌán».

22Kósꞌe̱ Rubee̱n bi̱ katsoó: «A mí tsí bo̱a̱ kixianjnúꞌun nga jmí ni si̱ꞌanjo̱jínjnú kui nda̱a̱. ¡Ta̱nga jún kiniꞌánjínjnúꞌun xki̱! ¡Ngotꞌe̱ ꞌne̱ chjiéngá kꞌuíchjí nga ñá kiniꞌánkꞌién!»

23Ta̱nga Kosiee̱ nga tsíchji̱a̱jo kui jaá ngo chji̱ni̱e̱ꞌén katsꞌénkjién xi katsꞌénkꞌatioyaa̱, kó kui jaá kamábejín nga Kosiee̱ kamákjiín ni xi ndyi̱tsó. 24Kósꞌe̱ Kosiee̱ kijí boaꞌá chií kó achichí askjandá, sꞌe̱ jaskan jachókón nguinií kó tsíchji̱a̱jo, sꞌe̱ katsjákjo̱a̱ nga ikꞌítaꞌniú Simeoo̱n nguindyi̱ko̱n ngayeje kui jaá. 25Jaskan katsjákjo̱a̱ Kosiee̱ tsi̱ꞌe̱ nga kꞌuikítsie maá to ndso̱ko̱a̱n ṉño̱pan koxtaa̱ kui jaá, kó nga kui to̱n xi íchjíní kui to ndso̱ko̱a̱n ṉño̱paa̱n ko̱e̱ꞌéꞌoyá nguinií, kó nga ki̱a̱ konanguínjin koxtaa̱. Kó ti̱ katsjákjo̱a̱ Kosiee̱ nga ko̱e̱ꞌeé ni chinie tsi̱ꞌe̱ ndi̱ya̱á nga. Kó nguije kamá kui nii̱, 26já ntsꞌie Kosiee̱ katsꞌénkaꞌa bórroó kui to ndso̱ko̱a̱n ṉño̱paa̱n, sꞌe̱ jatjoni kui ngu̱i̱ndiee̱.

27Ta̱nga nga jachó ngo ngu̱i̱ndie nínga sa̱ꞌínkjaꞌyá kui ni̱xtji̱e̱e̱n, ngo kui jaá iskjíxꞌaá ngo koxta̱ xi ndyi̱yaꞌa tsi̱ꞌe̱ nga tsja̱á ni chinie bórroó, kó ki̱a̱ kasako nguinií to̱n xi íchjíní to ndso̱ko̱a̱n ṉño̱paa̱n, kó tji̱e̱nmá bi̱ katsoó já ntsꞌi̱e̱:

28«¡Jéꞌe̱n katseꞌéꞌoyá nguinína to̱nna! ¡Kꞌi̱e̱ tjiyá koxta̱na!»

Nga kamábe kui nii̱ achichí katsakjónní kó ngaskande jatsié má ngayejee̱, kó ja̱kꞌi̱e̱ ja̱ngaján bi̱ katsoó xkjín: «Mí nii̱ bo̱a̱ xi tjitsꞌénjo̱ná Néná.»

29Nga jachó nguiní nangui Kanaa̱n, katsóyaá Jakoo̱b, na̱ꞌmii̱ kui jaá ngayeje ni xi kamaá nga bi̱ katsoó:

30«Nda̱ xtitjoón nanguii̱ Ejipto̱ achichí ꞌniú tsíchji̱a̱jojne̱, kó bo̱a̱ katsó nga ji̱n, xota̱ xi kijíkatsijenꞌmá xó ji̱n. 31Ta̱nga ji̱n bo̱a̱ kiꞌmíjne̱ nga xota̱ nda boá ji̱n, jmí tsi xota̱ xi kijíkatsijenꞌmá. 32Kó bo̱a̱ kiꞌmíjne̱ nga ji̱n tiejó ntsꞌie ma ji̱n, kó nga ta̱ ngo na̱ꞌmi ma ji̱n, kó nga ngo ntsꞌie ji̱n xi je kꞌien ko̱jo nga kui xi kjindií nangui Kanaa̱n tikónjo̱ na̱ꞌmijne̱ ngotꞌe̱.

33»Kósꞌe̱ kui nda̱ xtitjoón bi̱ katsójne̱: “Ngotꞌe̱ ꞌne̱ skuie an tsi kjeén nga xota̱ ndajnú. Kꞌi̱e̱ tꞌíjñájnú ngo ntsꞌiejnú, kó xi ngasee̱ ngatjíjoo̱ ni chinie xota̱ ndiꞌajnú, ngatꞌa̱ je ra kjifesón kjindiá. 34Ta̱nga chjiéngá kji̱ndi̱boájo̱jnú ntsꞌiejnú xi kjindí ngasee̱, ki̱a̱ ka̱maa̱ nga skuie an nga jún jmí tsi xota̱ xi jeꞌe katsienjenꞌmá jún, nga xota̱ nda jún, kó tsja nguiníjnúꞌun ntsꞌiejnú. Kó bo̱a̱ tsí tsꞌén nga ka̱ma ko̱tiñájnú ko̱jo ka̱ma si̱ꞌantsiejnú ni kui na̱xi̱ńdaá”».

35Kó kui jaá nga ítiya koxtaa̱, ki̱a̱ kasakoo̱ to̱n xi íchjí nga ngo nga ngo, kó achichí katsakjónní kui jaá ko̱jo na̱ꞌmii̱. 36Kósꞌe̱ Jakoo̱b na̱ꞌmii̱ kui jaá bi̱ katsoó:

—Jún ndyi̱chjeꞌéxín yejéjnúꞌun ndína. Kosiee̱ ko̱jo Simeoo̱n jè nguiti̱ kꞌi̱e̱jín tikónjo̱ná, kó ngotꞌe̱ ꞌne̱ mejénjnú konguínjo̱jnú Benjaa̱ nga. Tichánní sa̱ꞌínkꞌiénna kui nii̱.

37Ta̱nga Rubee̱n bi̱ katsoó na̱ꞌmii̱:

—Na̱ꞌmi, teꞌéndié ji nga Benjaa̱ ngu̱i̱ya ndsa̱ an kꞌuijñá, kó kjoéꞌe̱jo nguiñaá, ta̱nga tsi nguiti̱ kjoéꞌe̱jojaán, ka̱ma si̱ꞌinkꞌin ji nga jó ndína.

38Kósꞌe̱ Jakoo̱b bi̱ katsó:

—Konguínjo̱jínjnú ndína, ngatꞌa̱ jè kꞌien Kosiee̱, kó ta̱ Benjaa̱ xí tikón ngasena, tsi tjín ni xi ka̱maa̱ ngu̱i̱ya ndi̱ya xí konguínjnú, achichí ndasen kotíjña an ngaskande nga ko̱ya an.

Currently Selected:

Jénesii̱s 42: MAIX

Highlight

Copy