Jénesii̱s 39

Bi̱ kamaá Kosiee̱ ko̱jo chjo̱ón Potifaa̱r

1Kjiꞌa nga kui já xí botiñá nii̱ kijíjo̱ Kosiee̱ ki̱a̱ nangui Ejipto̱, nda̱ xi ꞌmí Potifaa̱r tsꞌatsie, kui nda̱ xi nguito̱ko̱o̱ já xí koón nda̱ ree̱. 2Achichí nda kisꞌijña Kosiee̱ ndiꞌaa̱ nda̱ Ejiptoo̱ xi ndi̱a̱a̱ kamá, ngatꞌa̱ Néná tikónjo̱. 3Kó Potifaa̱r kamábe nga Néná asíko̱jo Kosiee̱, kuíni nga ngayeje ni xi katsꞌén nda kamaá. 4-6Kó bo̱a̱ tsꞌén Potifaa̱r nda katsꞌénjo̱ Kosiee̱, kó katsjáxaá nga kui kisꞌijñatjoón ndiꞌaa̱, ko̱jo nga Kosiee̱ xi skoón ngayeje ni xi tjiín Potifaa̱r. Kó ndeskande koó kjiꞌa ta̱ngatꞌanii̱ Kosiee̱ nga Néná katsꞌénchikonñé Potifaa̱r, kó nguiti̱ ingojín ni xi nda̱ kamaá ta̱ kuí tsí ni xi iskjinie.

Kó Kosiee̱ achichí tsjákisꞌie nga taꞌyaní xi kamátsjaá, 7kó chjo̱ón Potifaa̱r katsꞌénmején Kosiee̱, kó bi̱ katsoó:

—¡Ja̱bítsjanije̱ní!

8Kó kamámejénjiín Kosiee̱, kó bi̱ katsoó chjo̱ón ndi̱a̱a̱:

—Ndi̱a̱na achichí ꞌniátakónna kuíni nga ngu̱i̱ya ndsa̱ án katsꞌénkꞌasꞌien ngayeje ni xi tjiín, kó nga an tikóntjóo̱n ngayeje ni xi tjiín, jmíjín ni xi nda̱ maa̱ kui. 9Ngojín ni xi íchjána, kꞌi̱e̱ kui ndiꞌaa̱ jmíjín ingo xi nkꞌa ngase xaá, ta̱nga ji chjo̱ón má ji, kó tsi an kjojñajoo̱, sa̱ꞌin jé an nguindyi̱ko̱n Néná.

10Kó nda tsi chjo̱ón Potifaa̱r ndyiojón ndyiojón tsíꞌaá Kosiee̱ nga kjojñájo̱, ta̱nga Kosiee̱ ngongá jmí katsó. 11Tichaa̱n ngo ndi̱ya nga Kosiee̱ tsꞌasꞌien ndiꞌaa̱ Potifaa̱r nga sa̱ꞌín xá xí tsꞌén, kó kjiꞌa nga nde ngojín xi tjín ngu̱i̱ya ndiꞌaa̱, 12chjo̱ón Potifaa̱r yíꞌniú ńjño xi yajá Kosiee̱, kó bi̱ katsoó:

—¡Tsjajnije̱ní!

Kó Kosiee̱ ta̱sá katsjandié nga kui xota̱chjo̱on iskjíbé ńjñoo̱, kó tsanga má nga jataxie kui ndiꞌaa̱. 13Kó nga kamábe kui naa̱ nga ńjñoo̱ Kosiee̱ tjiyá tsja, 14askjandáyá má nga tsíchji̱a̱a̱ moso̱ xi tsꞌénxá ngu̱i̱ya ndiꞌaa̱, kó bi̱ katsoó:

—¡Tsitsíjenjnú, nga kui xota̱ ebreo̱ xi jeꞌejo̱ xi̱ꞌinna ta̱kjo̱a̱ bena! Kꞌi̱e̱ tsꞌasꞌien kꞌi̱e̱e̱, kó kamámejeén kjojñájo̱ kjo̱a̱ꞌniúna katsaki, ta̱nga ꞌniú askjandáyá an, 15kó nga kamábe nga ꞌniú tsꞌénkjandayá an, kꞌi̱e̱ íjñá ńjñoo̱, kósꞌe̱ tsanga má kijí nguijee̱.

16Kó kui naa̱ ki̱a̱ jaꞌátjó ńjñoo̱ Kosiee̱ ngaskande nga jachó xi̱ꞌii̱n. 17Nga jachó Potifaa̱r ti̱ bi̱ ti̱ katsoó nga: «Kui moso̱ ebreo̱ xi jéꞌe̱je ji, kamámejeén nga kjojñájo̱ kjo̱a̱ꞌniúna. 18Ta̱nga nga askjandáyá an, tsi̱ꞌe̱ nga tjín xí ko̱síko̱jona, íjñá ńjñoo̱ tꞌa nínga tikòn an, kósꞌe̱ tsanga má jataxie nguijee̱».

19Nga tsintꞌié Potifaa̱r ni xí tsíchji̱a̱ chjo̱ón, achichí katsꞌénxchán. 20Kósꞌe̱ katsjákjo̱a̱ nga ko̱ndo̱bo̱a̱ Kosiee̱, sꞌe̱ akjaꞌya ndo̱bo̱a̱ya, ki̱a̱ akjaꞌya nínga síndo ndo̱bo̱a̱ya já xí katsanguisꞌien nda̱ ree̱ nga.

Kó nda tsi ngu̱i̱ya ndo̱bo̱a̱yaján kisꞌijña, 21Néná to̱kó asíko̱jo ngase, kó akoó kókjiꞌi tjoó, ngatꞌa̱ Néná xí katsꞌén nga nda̱ nguito̱ko̱ xi tsꞌénkonda ndo̱bo̱a̱ya̱á nda katsꞌénjo̱ Kosiee̱. 22Kó kui nda̱ nguito̱ko̱o̱ katsjaá xá Kosiee̱ nga kui xi skoón ngayeje já xí ndyi̱a̱ ndo̱bo̱a̱ya̱á ko̱jo ngayeje xá xí niꞌán ngu̱i̱ya ndo̱bo̱a̱ya̱á. 23Kó kui nda̱ xi nguito̱ko̱o̱ ndo̱bo̱a̱ya̱á nde chjiénjín nga askotsijee̱n ni xi je ngu̱i̱ya tsja Kosiee̱ tikón, ngatꞌa̱ Néná tikónjo̱ Kosiee̱, kó kuí boá xi bosikójo nga nda kamá ngayeje ni xi katsꞌén.

Currently Selected:

Jénesii̱s 39: MAIX

Highlight

Copy