Jénesii̱s 33

Bi̱ tsꞌén yíndaa̱ xkjín Jakoo̱b ko̱jo Esauu̱

1Nga kamábe Jakoo̱b nga ta̱ kjin tsꞌéndibá Esauu̱, kó nga nijón úchán má já xí tji̱e̱njo, akjángá xikó tjín má ndií nga katsjaá na̱ Líaa̱ ko̱jo na̱ Rakee̱l ko̱jo nga jó chji̱ni̱e̱ꞌboo̱. 2Nga tjón tjón índo nga jó chji̱ni̱e̱ꞌboo̱ ko̱jo ndií, jaskan índo na̱ Líaa̱ ko̱jo ndií, sꞌe̱ ngaskande nga fetꞌa índo na̱ Rakee̱l ko̱jo Kosiee̱. 3Sꞌe̱ Jakoo̱b kisꞌijñatjón, kó tji̱e̱nga tsꞌénfikón tiñaa̱ ntsꞌi̱e̱, yito ndi̱ya asién tikoó Jakoo̱b nga kisitꞌa maá xtjien tꞌananguii̱ nga kamábendikón Esauu̱.

4Ta̱nga Esauu̱ tsanga má nga kijíkoón Jakoo̱b, kó janíkjá xkjín, katsjaá ngo ndsó tꞌanijon, kó nga joó nga askjandá. 5Kó nga kamábe Esauu̱ ínchjiín ko̱jo jákjíndií, bi̱ katsoó Jakoo̱b:

—ꞌYá xota̱ bo̱a̱ xi̱ꞌbi̱.

Kó Jakoo̱b bi̱ katsó:

—Achichí nda katsꞌénjo̱na Néná, kó kuí boá xi katsjána kui ndií.

6Sꞌe̱ jaskan ínchjín chji̱ni̱e̱ꞌboo̱, ko̱jo ndií jachókón tiñaa̱ Esauu̱, kó ti̱ kisꞌińdoxtien nga kisitꞌa maá xtjien tꞌananguii̱ nga. 7Ti̱ bo̱a̱ ti̱ katsꞌén na̱ Líaa̱ ko̱jo ndií, kó bo̱a̱ katsꞌén Kosiee̱ ko̱jo na̱ Rakee̱l nga. 8Kósꞌe̱ Esauu̱ bi̱ katsó:

—Mí ni xi kiniꞌínkjé jí kjo̱a̱a̱ kui xtín xota̱ ko̱jo cho̱ xi je kamábe an ndi̱ya̱á.

—Tsi̱ꞌe̱ nga si̱ꞌinjetakínní boá ko̱jo nga nda si̱ꞌinje̱ní —katsó Jakoo̱b.

9Ta̱nga Esauu̱ bi̱ katsó:

—¡Jmí ntsꞌie, chjábé ra ji ni xi tse̱, jè tsie má ni xi tjínna nga!

10Kó Jakoo̱b bi̱ katsó:

—Jmí ntsꞌie, ꞌniú míꞌaá, chjábé jí kui nii̱ xi tsꞌéntsjaa, ngatꞌa̱ achichí ndaxota̱ tiniꞌínje̱ní, kó nga je kamábee̱ ji, xikó maá tsi kje̱n Néná xí kamábe an. 11Ngo kjo̱a̱nda míꞌaá chjábé jí kui ni xi yaꞌaa̱ ngotꞌe̱, ngatꞌa̱ Néná achichí ni je katsjána, kó jè tikónna ngayeje ni xi chjiénna.

Kó nga ꞌniú ꞌniú katsꞌén Jakoo̱b, tichaa̱n Esauu̱ katsꞌénjo̱ꞌo nga iskjíbé kuí nii̱. 12Sꞌe̱ jaskan bi̱ katsó Esauu̱:

—Ndakjíꞌí tsobo̱a̱, tjián ra ndi̱yaná, kó an kjuínjóo̱.

13Ta̱nga Jakoo̱b bi̱ katsó:

Jmí ntsꞌie, jè ye ji nga jákjíndí xi̱xi̱i̱ tsá fenda, kó ti̱ chjiéngá skóo̱n cho̱tsa̱nga̱a̱ ko̱jo cho̱yojo ínchjiín xi sꞌe̱ katsen má ndií, ngatꞌa̱ tsi ingo ni̱xtjin si̱ꞌankjí ngase, ngayejee̱ nga ko̱ya tsobo̱a̱. 14Tasá nda tsi kꞌuíntjén ra ji, kó án inda inda kjuín án, xikótsꞌen ndyi̱fí jákjíndína ko̱jo cho̱na, ngaskande nga kjóchótji̱nguii̱ ki̱a̱ nangui Endoo̱n.

15Kó Esauu̱ bi̱ katsó:

—Teꞌéndiéní nga kꞌuindo an chiboa xota̱ xi tsoꞌbájo̱ an kꞌi̱e̱e̱ tsi̱ꞌe̱ nga nijan kjo̱joo̱ ji.

Ta̱nga Jakoo̱b bi̱ katsó:

—Ánní nga bo̱a̱ si̱ꞌin kon ji. ¡Jè ndakjiꞌi nga nda tiniꞌínje̱ní!

16Kósꞌe̱ Esauu̱ ti̱ kuii̱ ni̱xtjin kijí nguiní nangui Endoo̱n. 17Kó Jakoo̱b kijí xtji̱e̱e̱n Sukoo̱t, kó ki̱a̱ katsꞌénda ngo ndiꞌa nínga kisꞌijña kui, kó ti̱ katsꞌénda ngo ngu̱i̱ndie nínga kisꞌińdo cho̱o̱, kuíni nga kui ngu̱i̱ndiee̱ Sukoo̱t ítꞌa jaꞌén.

18-20Kjiꞌa nga Jakoo̱b kijíꞌoyá nguiní nangui Padan Araa̱n, nda jachó ngo na̱xi̱ńdá nínga tikón ngo nda̱ xi ꞌmí Sikee̱n, kui xi ndií Jamoo̱r. Kui nguindiee̱ ki̱a̱ tikón nangui Kanaa̱n, kó Jakoo̱b ki̱a̱ tsꞌatsie chií tꞌanangui xi úchán to̱ntiboa íchjínií ndií Jamoo̱r, kui tꞌananguii̱ ki̱a̱ kisꞌijña kje̱n na̱xi̱ńdaá, kó ki̱a̱ katsꞌénda Jakoo̱b ndiꞌaa̱ kui xi tji̱xi̱ín cho̱ kamándani. Kó ki̱a̱ katsꞌénda ngo ṉchandikón kui xi, Néná xí tsi̱ꞌe̱ Israee̱l, ítꞌa jaꞌén.

Currently Selected:

Jénesii̱s 33: MAIX

Highlight

Copy