Jénesii̱s 20

Bi̱ kamaá Abraa̱n, na̱ Saraa̱ ko̱jo Abimelee̱k

1Kó Abraa̱n jatjoni kui ngu̱i̱ndiee̱ kó kijí xtji̱e̱e̱n nangui kixí xi tikón xtji̱e̱e̱n na̱nguii̱, kó ki̱a̱ kisꞌijña ki̱a̱ nangui Ngueraa̱r, kui ngu̱i̱ndie xi tikón ngamasiee̱n na̱xi̱ńdá Kadee̱ ko̱jo na̱xi̱ńdá Suu̱r. 2Kui ngu̱i̱ndiee̱ Abraa̱n katsóya nga na̱ Saraa̱ ndichja boá, jmí tsi chjo̱ón, kuíni nga Abimelee̱k nda̱ re xi botixómaá nangui Ngueraa̱r, katsanguiyakjaꞌá na̱ Saraa̱ tsi̱ꞌe̱ nga chjo̱ón sa̱ꞌín nga.

3Ngo ni̱xtji̱e̱n, Néná tsíchji̱a̱jo ngu̱i̱jin ńjñaá Abimelee̱k, kó bi̱ katsoó:

—Ko̱ye ji ki, ngatꞌa̱ ngo na̱ xi je tjiín xi̱ꞌin mejeén si̱ꞌin ji chjóo̱n.

4Ta̱nga Abimelee̱k kji̱e̱ fojñajo̱jín na̱ Saraa̱, kó bi̱ katsó:

—Ne tsa̱ꞌa̱n, a si̱ꞌinkjié jí ngo na̱xi̱ńdá xí kji̱e̱ tsꞌénjín ngo ni xi ndajín. 5Ti̱ kuíní Abraa̱n xi ndichja xó má na̱ Saraa̱ katsóna, kó na̱ Saraa̱, ntsꞌié án má Abraa̱n katsó kui nga. Nda tsꞌén tikón kjo̱a̱kjíntakónna, ngatꞌa̱ jmí ni xi ndajínkjiꞌi katsꞌénjín an.

6Kó kui ngu̱i̱jin ńjñáján Néná, bi̱ katsoó Abimelee̱k:

—Jè be an nga kji̱e̱ niꞌínjín ji ni xi ndajín, kuíni nga katsjandiéjín an nga tsjajníje̱ ji kui naa̱, ko̱jo nga si̱ꞌin jé jí kondra̱ tsa̱ꞌa̱n. 7Ta̱nga ngotꞌe̱ ꞌne̱, teꞌéꞌoyé nguiníi̱ chjo̱ón kui ndaa̱, ngatꞌa̱ nda̱ chji̱ni̱e̱ꞌénna boá, kó kuí boá xi ku̱i̱ꞌatjeé jí tsi̱ꞌe̱ nga ku̱i̱ndyin ra ji nga̱sondie. Kó tsi bo̱a̱jín si̱ꞌin, ja̱koxi̱ nga ko̱ye jí, ko̱jo ngayeje xota̱ tse̱.

8Nga kamánguindyiojón nga ꞌniú ta̱jño̱ó Abimelee̱k tsíchji̱a̱a̱ ngayeje já mosoo̱, kó katsóyaá ngayeje ni xi kamá ngu̱i̱jin ńjñaá, kó nga tsintꞌié kuí nii̱, kui jaá achichí katsakjónní. 9Kósꞌe̱ Abimelee̱k tsíchji̱a̱a̱ Abraa̱n, kó bi̱ katsoó:

—Ánní nga bo̱a̱ kjiꞌi ni xi kiniꞌínje̱jne̱. A tjín ni xi ndajínkjiꞌi xi katsꞌenjoo ji, nga kꞌi̱e̱ jéꞌe̱jejne̱ ngo jé xí ꞌniú je nínga botixoma an. Ni xi kiniꞌínje̱ní, májín bo̱a̱ niꞌánjo̱ ngo xota̱. 10Ánní nga bo̱a̱ kiniꞌín kon ji. Mí ni xi kiniꞌínkjé ji nga bo̱a̱ kjiꞌi ni xi kiniꞌín.

11Kó Abraa̱n bi̱ katsó:

—Ngatꞌa̱ katsꞌenkjó an nga kui ngu̱i̱ndiee̱ jmíjín xota̱ xi bendikón Néná, kó kixian án nga ta̱ngatꞌanii̱ chjo̱ónna nga si̱ꞌankꞌienna. 12Kó nga ja̱koxi̱ ndichja án boá, ta̱nga katseꞌéndiéna nga ixánjo̱ an, ngatꞌa̱ ndií na̱ꞌmina boá, ta̱nga kje̱ꞌe na̱an boá. 13Kó kjiꞌa nga Néná tsíꞌána nga kꞌuijñámasien an ndiꞌaa̱ na̱ꞌmina, na̱ Saraa̱ bo̱a̱ kixiáa̱n nga ta̱ nínga kjóchó ñá, ntsꞌié án boá Abraa̱n tꞌín ji.

14Kósꞌe̱ Abimelee̱k iskjíbé cho̱tsa̱nga̱, cho̱yojo, moso̱ xi chjo̱on ko̱jo xi xi̱ꞌin, kó katsjaá Abraa̱n, sꞌe̱ katsjáꞌóyá nguinií na̱ Sara̱ chjo̱ón Abraa̱n. 15Kó bi̱ katsó Abimelee̱k:

—Jéꞌe̱n kꞌi̱e̱ tikón na̱xi̱ńdána kꞌi̱e̱e̱, ka̱machje̱ꞌéjin ji ta̱ nínga mejeénri kó ki̱a̱ ka̱ma ku̱i̱ndyin ji.

16Kó Abimelee̱k, bi̱ katsoó na̱ Saraa̱:

—Jéꞌe̱n ngo mi̱ ma to̱ntiboa xi je katsjáa̱ ntsꞌie ji. Kuí chjií xi ko̱kó nga jmí ni chꞌokjiꞌi kiniꞌínjín ji, kó nga ngojín xota̱ xi chꞌo tsꞌén ku̱i̱chji̱a̱ kjo̱a̱a̱ ji.

17Kósꞌe̱ Abraa̱n tsíchji̱a̱a̱ Néná, kósꞌe̱ Néná katsꞌéndaya Abimelee̱k, kó chjo̱ón ko̱jo ínchjín mosoo̱ kamá kisꞌie nguinií ndí. 18Ngatꞌa̱ ta̱ngatꞌanii̱ na̱ Saraa̱ nga Néná ndi̱ katsꞌén kui ínchjiín katsaki.

Currently Selected:

Jénesii̱s 20: MAIX

Highlight

Copy