Éksondo̱ 4

1Ta̱nga Moisee̱ bi̱ katsoó Néná:

—Nguito̱ko̱o̱ xota̱ Israee̱l sꞌi̱jinjiín nga je kamábee̱ ji, kó ti̱ nde ku̱i̱ntꞌiéꞌénjínna nga.

2Kósꞌe̱ Néná bi̱ katsoó Moisee̱:

—Mí nii̱ bo̱a̱ xi katsjayindse̱ ji.

—Yánisié boá —katsó Moisee̱.

3—Tjajmi ji tꞌananguii̱ —katsó Néná.

Kó Moisee̱ tsꞌajmi tꞌanangui yánisieé, kó ye̱ kamá. Kó Moisee̱ tsangandikoón kui ye̱e̱, 4ta̱nga Néná bi̱ katsoó:

—Ngotꞌe ꞌne̱ tjintie ji ndse̱ kó ńtsꞌen ye̱e̱ chjábéní ji.

Kó Moisee̱ bo̱a̱ katsꞌén, yejéntie tsja kó iskjíbéní ńtsꞌen kui ye̱e̱, kó yánisié kamá nguiní kui yee̱ ngu̱i̱ya tsja Moisee̱. Kósꞌe̱ Néná bi̱ katsoó:

5—Kui nii̱ ti̱ꞌin ji nguindyi̱ko̱n nguito̱ko̱o̱ xota̱ Israee̱l nga. Nguije sku̱i̱e̱ nga yánisieé ye̱ kamá, kjiꞌá boá nga sꞌi̱jii̱n nga je kamáyéní án, kó nga án boá xi Nee̱ xota̱ xi xchaá. 6-8Ta̱nga tsi sa̱ꞌínsꞌijinjiín, kó tsi ti̱ nde ku̱i̱ntꞌiéꞌénjiín, teꞌée̱ ingo chi̱bo̱a̱: Nanguísꞌín ji ndse̱ nguindie chi̱ngàa̱ xtji̱e̱e̱n ni̱se̱e̱n, kósꞌe̱ ꞌna̱xié nguiní ndse̱.

Kó Moisee̱ bo̱a̱ katsꞌén, kó nguije tsꞌaxié tsja, kisꞌijña tiboa tiboa nga kisꞌiee̱ chiꞌin xi tsꞌenkjátsón tji̱xin yojoná. Kósꞌe̱ Néná bi̱ katsó nguinií:

—Nanguísꞌín nguiní ji ndse̱ nguindie chi̱ngàa̱ xtji̱e̱e̱n ni̱se̱e̱n.

Kó Moisee̱ katsꞌen ni xi kiꞌmií, kó nguije tsꞌaxié tsja, jè nguiti̱ jmí nijiín. Kó Néná bi̱ katsó nguinií Moisee̱:

9—Tsi nguije kamábe kui xotaa̱ nga jó kui chi̱bo̱a̱a̱, kó tsi sꞌi̱jinjiín ko̱jo tsi ku̱i̱ntꞌiéꞌénjiín, tꞌen ji nínga tikón ndejé Niloo̱, kó ꞌna̱xié chií ji ndójoaa̱ ndejeé kó chjatjén ji nga̱són tꞌananguii̱, kó tji̱e̱nmá jín kamá kui ndójoaa̱.

10Ta̱nga Moisee̱ bi̱ katsoó Néná:

—¡Ji Ndi̱a̱! Ta̱nga jmí tsi nda chjiá an, ngatsjé ni̱xtjin nga chjiá an, tsájín chji̱a̱ an, kó ngongá stinguí najen án, kuíni nga jmíjín xi tsꞌensénna, ngatꞌa̱ ngaskande koó nga chichí an nga bo̱a̱ mana.

11Kó Néná bi̱ katsoó:

—Ndaꞌyéní Moisee̱, ¡Án boá xi sa̱ꞌinkíchji̱a̱a̱ ko̱jo tsi sa̱ꞌinkíchji̱a̱jaán! ¡Án boá xi sa̱ꞌin an nga ko̱ndaꞌyé ji, ko̱jo tsi ko̱ndaꞌyejín ji! ¡Án boá xi sa̱ꞌintsijeen ko̱jo tsi ka̱matsijenjiín! 12Ngotꞌe̱ ꞌne̱, tꞌen ji nangui Ejipto̱, ngatꞌa̱ án boá xi kosiko̱joo̱ nga nda ko̱ndókjo̱e̱ ji, kó án boá xi xiyaá mí ni xi ko̱ndókjo̱e̱ ji.

13Ta̱nga Moisee̱ bi̱ katsó nguiní:

—¡Ji Ndi̱a̱! ꞌNiú míꞌaá ta̱sá kje̱ꞌe xí nanguíyé ji.

14Kósꞌe̱ Néná katsꞌénxchánjo̱ Moisee̱ nga bi̱ katsoó:

—¡Ja̱ ki̱a̱ tikón ntsꞌie ji xi ꞌmí Aaroo̱n, kui chináꞌmi xi chji̱a̱ni xota̱ tji̱e̱e̱ Lebii̱! Achichí nda maa̱ chji̱a̱ kui, kó maa̱ tsꞌenꞌíndakon xotaa̱, jè tsꞌenfíkjaꞌáyíndi̱ya̱á, kó achichí tsjá ka̱maa̱ nga sku̱i̱e̱e̱ ji. 15-16Ndokjo̱e̱je ji Aaroo̱n, kó tꞌíyée̱ ngayeje ni xi je kixiaa̱n, tsi̱ꞌe̱ nga kui xi ku̱i̱chji̱a̱jo xota̱ na̱xi̱ńdaá ngajo tse̱, xikó maá tsi ji xi tindokjo̱e̱, xikótsꞌen ji ndokjo̱e̱je ji xikó maá tsi an xi tsꞌénchji̱a̱ an, kó an kosiko̱jojnúꞌun nga ko̱ndókjo̱a̱jnú ko̱jo kokojnúꞌun ni xi si̱ꞌánjnú. 17Tꞌen, kó chjábé jí yánisiée̱, kó ti̱ꞌin ji ni xi je atixomaa nga si̱ꞌin ji.

18Kó Moisee̱ kijí nguiní ndiꞌaa̱ Jetroo̱ kui xi chiꞌyaá, kó bi̱ katsoó:

—Teꞌéndiéní nga kjuín nguiñá an nangui Ejipto̱, mejénna sku̱i̱e̱ an tsi ta̱kó síndo ngase nga̱sondie xota̱ Israee̱l.

Kó Jetroo̱ bi̱ katsoó:

—Tꞌen xió xió ji. Kó nda ngatjií nínga tiꞌmi ji.

Bi̱ tsꞌén kijí nguiní Moisee̱ nangui Ejipto̱

19Nga to̱kó tikón ra ngase Moisee̱ ki̱a̱ nangui Madiaa̱n, Néná bi̱ katsoó:

—Tꞌen nguiní ji nangui Ejipto̱, ngatꞌa̱ jè jesón ngayeje xota̱ xi kamámejeén katsꞌénkꞌieén ngasꞌe̱.

20Kósꞌe̱ Moisee̱ iskjíbé ngo bórró kó katsꞌénkꞌíndosón chjo̱ón ko̱jo ndií, kó kijí xtji̱e̱e̱n nangui Ejipto̱. Kó ti̱ iskjíbé yánisié xi Néná katsjaá nga. 21Néná ja̱ bo̱a̱ jè bi̱ katsoó Moisee̱:

«Nguije kjóchí ji nangui Ejipto̱, ti̱ꞌin ji nguindyi̱ko̱n nda̱ ree̱ ngayeje kjo̱a̱ndikón xí kixiaan nga si̱ꞌin ji nga si̱ꞌinkjín jí yánisiée̱. Án boá xi sa̱ꞌintajá án ini̱ma̱a̱ nda̱ ree̱ tsi̱ꞌe̱ nga sa̱ꞌínkjatjójín xota̱ na̱xi̱ńdaá. 22Kósꞌe̱ ji bi̱ sée̱ nda̱ ree̱, bi̱ tsó én xí katsanguiya Néná: “Án boá xi Ne an, kó achichí tjóna xota̱ Israee̱l, kuí boá xi xikoó tsi ndí tjónna. 23Kuíni nga bo̱a̱ tꞌíxiaán jí nga teꞌéndiée̱ nga ko̱e̱je̱ kui xotaa̱ tsi̱ꞌe̱ nga an sa̱ꞌíndikónna. Ta̱nga kó nga tiboeꞌéndiéjíi̱n nga kjo̱tjo, ngotꞌe̱ ꞌne̱ sa̱ꞌinkꞌién an ndí tjóo̱n”».

24Kó nga ndyi̱fí xtji̱e̱e̱n nangui Ejipto̱, Moisee̱ ko̱jo xota̱ ndiꞌaa̱ jachó ngo ngu̱i̱ndie nínga sa̱ꞌínkjaꞌyá kui ni̱xtji̱e̱e̱n, kó ki̱a̱ jatjokjaá Néná, kó Néná kamámejeén katsꞌénkꞌién Moisee̱ katsaki, 25-26ta̱nga na̱ Séforaa̱ iskjíbé ngo kichiro̱ xi yojó, kó katsꞌeén sirkunsisioo̱n ndií ngatꞌa̱ tsatie tji̱xi̱ín yojo ndikoón, kó kui tji̱xi̱ín ítꞌaa̱ yojo ndikoón Moisee̱, kósꞌe̱ bi̱ katsoó: «Jiín ndína boá xi ko̱síko̱joo̱ nga jmí ni ka̱májiín ngotꞌe̱ ꞌne̱».

Kó nga kamábe Néná ni xi katsꞌén na̱ Séforaa̱, katsꞌénkꞌiénjínní Moisee̱.

Moisee̱ ko̱jo Aaroo̱n bi̱ tsꞌén tsíchji̱a̱jo xota̱ na̱xi̱ńdaá

27Kó Néná bi̱ katsoó Aaroo̱n:

—Tꞌen ji nangui kixií, kó ki̱a̱ tꞌenchje̱ꞌéyindi̱ye jí Moisee̱.

Kó kijí Aaroo̱n ki̱a̱ nínga tikón na̱xi̱i̱ Néná, kó nga kasakoo̱ Moisee̱, katsjaá ngo ndsó tꞌanijon. 28Kósꞌe̱ Moisee̱ katsóyaá Aaroo̱n ngayeje chi̱bo̱a̱ yiꞌi ko̱jo kjo̱a̱ndikón xí sa̱ꞌín Néná ki̱a̱ nangui Ejiptoo̱, ko̱jo ngayeje én xí katsóyaá kjo̱a̱a̱ ni xi sa̱ꞌín. 29Kósꞌe̱ nga joó kijí, kó ítikó ngayeje nguito̱ko̱o̱ xota̱ Israee̱l, 30kó Aaroo̱n tsíchji̱a̱jo kui xotaa̱ kjo̱a̱a̱ kui ni xi Néná katsóyaá Moisee̱, kó Moisee̱ katsꞌén kui chi̱bo̱a̱ xi katsjaá Néná nga sa̱ꞌín. 31Kó xota̱ Israee̱l katsꞌénsꞌijii̱n Moisee̱, kó nga tsintꞌié nga Néná ko̱síko̱jo kui xotaa̱, asién tikoó ngaskande nga kisitꞌaa̱ xtjien tꞌananguii̱, kó katsꞌéntsjaá Néná.

Currently Selected:

Éksondo̱ 4: MAIX

Highlight

Copy