1 Samuel 11
11
Saúl noma't jogaa'me Amón laje'
1'Uo ga'me nolo' ca'li ñe'me Nahas, jaliaĝanec di'me Amón, yec'ata di'me noic Jabés jo'ne na'ña di'me 'naleua di'me Galaad, qama'le yiyamaĝateta't gaa'me nalada't lo'ol qaedi quidiñgui jodi'me noic. Qalaĝaja jogaa'me 'lachaqa't di'me Jabés eetac da'me 'laqata'j:
«Qo'mi auanema ga'me at'aqatac jo'ne yataqatelegue jo'ne ja auoqovitac, qama'le am jouoqo'ot qaedi qo'mi adalemaĝaje'te.»
2Qama'le Nahas 'yategueta:
«Ja'uo ga'me 'yaqatac jo'ne ja joqovitac ami janema, qom auacoñiyeguet da'me jo'ne jetaque ami je'eteque, queda'me onolqa'tape ami ñaqa't naa'me at'ai'chidi' jo'ne p'aye na'me qoyayaten, qaedi janema da'me ne'uenague'j jogaa'me Israel laje'pi.»
3Qama'le jogaa'me 'yaĝaicachidi 'lachaqa't di'me Jabés 'yadeteguet:
«Qo'mi auanema ga'me laloqo' nalo'taguet siete gaa'me noloqo'ote qaedi jauoqo'oe gaa'me qadamaĝa's jo'ne quetedaye ga'me 'naleua gaa'me Israel laje'pi, qama'le qom qaya'te naequena ta'le qo'mi yotaua'n, male am qanemenot qaedi qo'mi adalemaĝaje'te.»
4Jogaa'me namaĝa's yovideta di'me Guibeá, jo'ne neta'ña ñe'me Saúl, qama'le t'aqataĝa'tape, 'yaĝatema gaa'me jiyaĝadipi ga'me 'laqatac ca'li ñe'me Nahas, qampaja'a noyena'at jogaa'me. 5Qanach'e jo', joote yovidauo ñe'me Saúl, chiyoĝogue ga'me 'nonaĝa nataq'aen jogaa'me yejidi jo'ne uaca, qama'le denataĝan:
«¿Jach'e ga'me lajouaĝa'j gaa'me jiyaĝadipi? ¿Toqoch'e da'me noyena'at?»
Gaa'me jiyaĝadipi 'yaĝadetem ga'me 'laqataĝanaĝa'j gaa'me jiyaĝa'u jo'ne chiyoĝotegue di'me Jabés. 6Da'me domachiya da'me dojo' ñe'me Saúl, da'me lañoqotaĝanaĝac ñe'me Dios yataqachiñe yemaue joñe'me, qama'le ñe'me Saúl yataqachiñe najaqachigui da'me dalemata. 7Qama'le yaconalo gaa'me dos uaca t'adayaqa qama'le yichaqapiyelo, qama'le yauo'oe gaa'me lamaĝa's yachi'y ga'me yichaqapiye qaedi yeda'alo ena'uaque jodi'me 'naleua gaa'me Israel laje'pi. Qama'le jogaa'me namaĝa's eetac ga'me 'laqata'j:
«Dojo' nach'e ena'am da'me qo'yetema dia'me uaca da'me qoyichaqapiyelo, ga'me jo'ne ja yotauan qama'le nec'ata ñe'me Saúl choqoñe'me Samuel, qama'le equegue.»
Qama'le joñe'me Jaliaĝanec, yataqachiñe t'adaic da'me noqolanaĝa jo'ne e'n tauelo gaa'me jiyaĝadipi, qama'le ena'uaque jogaa'me nalo'ta't da'me qoyec'atalo joñaa'me. 8Ca'li ñe'me Saúl naloqote'n gaa'me nejoĝonaqapi, ua'a di'me Bézec, yemata'a't jogaa'me trescientos mil jiyaĝa'u jo'ne Israel laje'pi, nataq'aen treinta mil jogaa'me chiyoqoda'ña di'me Judá. 9Yem qama'le t'aqataĝanema jogaa'me namaĝa's jo'ne chiyoĝotegue ca'li di'me Jabés, enaac:
«A'uaqataĝañiyema jogaa'me 'lachaqa't di'me Jabés qa'a qom 'yoĝoñi nolo' male qanec'alaĝatedegue.»
Chane'eja jogaa'me namaĝa's yitaĝa eque' qama'le 'yaĝatema da'me dojo' jogaa'me 'lachaqa't di'me Jabés, qama'le jogaa'me yataqachiñe made'tapolqa. 10Qalaĝaja dojedapegue' ñe'me Nahas, eetac ga'me 'laqata'j:
«Qom 'yoĝoñi male am qanemenot, qaedi qo'mi a'ueteque ga'me auepaquetapega ta'le qo'mi a'ueteque.»
11Nete' laqaya, Saúl yiyamaĝateta't gaa'me necoicopi, e'n tres naa'me uapi'ñalo da'me yema'a't, qama'le da'me yamta'le 'yoĝoñi yec'atede'uo, 'notetedalegue gaa'me lomachaqa't jogaa'me laute'upi, nalachidiñe jogaa'me Amón laje'pi, chayovida'a nolo' da'me e'teque jogaa'me. Qama'le jogaa'me 'noquetaque male dajodegue, onolqa'tape naa'me ta'yalo. 12Yem da'me dojo' qama'le uo'oe jogaa'me dojedapegue' ñe'me Samuel, enaa'j:
«Jach'e jogaa'me ja 'yamaqate'n queda'me Saúl nach'eñe da'me qadejaliaĝanec? Qo'mi auañema jogaa'me qaedi jalata'.»
13Qalaĝaja ñe'me Saúl yaneguet da'me lelnataĝa'j, eetac:
«Jenjo' nolo' qaya'te ta'le yeleu, qa'a ñe'me Jaliaĝanec qo'mi nec'alaĝatedegue, qo'mi jo'ne Israel laje'pi.»
14Qama'le Samuel dojapegue'to ena'uaque jogaa'me:
«Jajoĝogue di'me Guilgal, qaedi male yalemaĝañe ga'me nejaliaĝa ua'a jodi'me.»
15Qama'le ena'uaque jogaa'me jiyaĝadipi qodajoyi di'me Guilgal, nach'edi ua'a qodajoya'aguet ñe'me Jaliaĝanec Dios da'me qoyen lejaliaĝane'j ñe'me Saúl. Yem qama'le yate'm ñe'me Jaliaĝanec jogaa'me lajaqaje'j jo'ne yelo'teguet da'me 'viyelaĝadetot joñe'me. Qama'le Saúl choqoga'me Israel laje'pi yataqachiñe najaqachiguilo da'me lamai'j.
Currently Selected:
1 Samuel 11: TDO
Highlight
Share
Copy
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
