Chhóng-sṳ Ki 40

Yok-sit vi Siù-fam Kié-mung

1Liá-sṳ yî-heu, Âi-khi̍p-vòng ke chiú-chṳn lâu san-chóng tet-chhui vòng; 2Âi-khi̍p-vòng fî-sòng fat-khién, 3ha-lin chiông liá lióng-ke kôn-yèn koân-ngi̍p sṳ-ví-chóng fú-nui ke kâm-ngiu̍k, chhiu-he koân Yok-sit ke só-chhai. 4Sṳ-ví-chóng phai Yok-sit fu̍k-sṳ liá lióng-ke kôn-yèn; kì-têu chhai kâm-ngiu̍k tú koân chhin-kiú.

5Yû yit am-pû, Âi-khi̍p-vòng ke chiú-chṳn lâu san-chóng chhai kâm-ngiu̍k tú, tak-sà pot yit-ke mung, lióng-sà ke mung mò khiung-yong. 6Thi-ngi ngit chêu-sṳ̀n, Yok-sit lòi-khon kì-têu, khon-tó kì-têu sîm-sṳ̀n mò-thin, 7chhiu mun kì-têu: “Ngì-têu kîm-pû-ngit cho-má-ke án yù-sèu nè?”

8Kì-têu en-kóng: “Ngài-têu tak-sà pot yit-ke mung, chúng-he mò-ngìn nèn thoi ngài-têu kié-mung.”

Yok-sit kóng: “Kié-mung ke nèn-li̍t kám m̀-he Song-ti só-su ke! Chhiáng chiông ngì-têu ke mung lâu ngài kóng.”

9Chiú-chṳn chhiu chiông kì ke mung lâu Yok-sit kóng: “Ngài pot-mung khon-tó ngài mien-chhièn yû yit-thèu phù-thò su, 10su-táng fûn-cho sâm kî-khoá. Su yit pau-ngà chhiu khôi-fâ, phù-thò thèn-tén ya siuk lé. 11Ngài sú-hong nâ-tén vòng ke chiú-pî; ngài chak phù-thò, chiông phù-thò-chṳp ngién-lo̍k chiú-pî, chiông chiú-pî têu-pûn vòng.”

12Yok-sit tui kì kóng: “Liá mung ke yi-sṳ he án-ngiòng: Sâm kî-khoá thoi-péu sâm-ngit. 13Sâm-ngit heu, vòng voi piong ngì chhut-hi, sa-miên ngì, fî-fu̍k ngì ngièn-lòi ke chṳt-vi; ngì voi thùng thèu-pái cho chiú-chṳn yit-yong, lâu vòng têu-chiú. 14Chúng-he ngì yit-chhiet sun-li ke sṳ̀, chhiáng ngì ki-tet ngài, hó khoán-thai ngài, chhai vòng mien-chhièn thoi ngài kóng hó-fa, pông-chhu ngài chhut liá-ke kâm-ngiu̍k. 15Ngài sṳ̍t-chhai he chhai Hî-pak-lòi-ngìn ke thi-fông pûn-ngìn chok-lòi ke; ngài chhai Âi-khi̍p ya-mò cho-ko má-ke fái-sṳ, mò yin-kôi pûn-ngìn koân hí-lòi.”

16San-chóng khon Yok-sit chiông chiú-chṳn ke mung kié-sṳt án-hó, chhiu tui Yok-sit kóng: “Ngài ya pot yit-ke mung, chhai mung-chûng khon-tó chhṳ-kâ thèu-nà táng piong-tén sâm-chak chông-mân mien-pâu ke làm-è. 17Chui táng-kô ke làm-è chông-mân oi pûn vòng sṳ̍t ke kok-chúng mien-pâu; yû tiâu-é lòi-sṳ̍t liá-têu mien-pâu.”

18Yok-sit kóng: “Liá-mung ke yi-sṳ he án-ngiòng: Sâm-chak làm-è thoi-péu sâm-ngit. 19Sâm-ngit heu, vòng voi chám ngì ke thèu-nà, chiông ngì tiau chhai su-tún táng, fî-niâu oi-lòi sṳ̍t ngì ke ngiuk.”

20Chai-ko sâm-ngit he vòng ke sâng-ngit. Ke-ngit, vòng vi kì só-yû ke kôn-yèn pái yèn-si̍t, chiông chiú-chṳn lâu san-chóng piong chhut-lòi, tai-to kôn-yèn mien-chhièn. 21Kì fî-fu̍k chiú-chṳn ke chṳt-vi, sṳ́ kì yu chiông chiú-pî têu-pûn vòng; 22chúng-he vòng chiông san-chóng tiau-sí. Liá-têu sṳ vàn-chhiòn cheu Yok-sit ke kié-sṳt sṳ̍t-hien lé. 23Chúng-he chiú-chṳn sa m̀ ki-tet Yok-sit, chiông kì m̀ ki-tet chhiang-chhiang.

Currently Selected:

Chhóng-sṳ Ki 40: THV12Rdb

Highlight

Copy