Chhóng-sṳ Ki 39

Yok-sit lâu Pô-thì-fa̍t ke Pû-ngiòng

1Yî-sṳ̍t-mâ-li-ngìn chiông Yok-sit tai-to Âi-khi̍p, mai-pûn Âi-khi̍p-vòng ke yit-ke kôn-yèn — sṳ-ví-chóng Pô-thì-fa̍t. 2Song-chú lâu Yok-sit khiung-ha, sṳ́ kì sṳ-sṳ sun-li. Kì he̍t chhai Âi-khi̍p chú-ngìn vuk-hâ. 3Chú-ngìn khon-chhut Song-chú lâu kì khiung-ha, pûn kì só-cho ke sṳ chhiòn-phu sun-li. 4Pô-thì-fa̍t chung-yi Yok-sit, phai kì cho chhṳ-kâ ke kón-kâ, kón-lî kâ-vu lâu kì só-yû ke yit-chhiet. 5Tui ke-sṳ̀ khôi-sṳ́, yîn-vi Yok-sit ke yèn-ku, Song-chú chhiu su-fuk pûn ke Âi-khi̍p-ngìn ke vuk-hâ; kiâ vuk-tú lâu thièn-yèn só-yû ke, chhiòn-phu tet-tó Song-chú ke su-fuk. 6Pô-thì-fa̍t chiông yit-chhiet só-yû ke kâu-pûn Yok-sit kón-lî; chhù-liáu kì chhṳ-kâ ke yím-sṳ̍t yî-ngoi, kì má-ke tû m̀-sṳ́ chhap.

Yok-sit sṳ̂n-thí tông-chap, yu chhin yèn-tàu. 7Ko mò kí-kiú, chú-ngìn ke pû-ngiòng chung-yi to Yok-sit, yín-yu kì kóng: “Lòi lâu ngài soi!” 8Yok-sit khî-chhie̍t kì, tui kì kóng: “Ngì khon, yîn-vi yû ngài chhai liá-vi, ngâ thèu-kâ m̀-sṳ́ vi kâ-vu chhâu-sîm; kì yí-kîn chiông só-yû ke yit-chhiet kâu-pûn ngài kón-lî. 9Chhai liá vuk-hâ, mò-ngìn pí ngài kha-thai, thèu-kâ mò má-ke mò kâu-pûn ngài kón-lî, chṳ́-yû ngì li-ngoi, yîn-vi ngì he kì ke pû-ngiòng. Ngài ngióng-pân kám cho liá-chúng mò tho-tet ke sṳ, lòi tet-chhui Song-ti nè?” 10Sûi-yèn thèu-kâ-ngiòng ngit-ngit yín-yu Yok-sit, chúng-he Yok-sit m̀ thâng-chhiùng, m̀-hén lâu kì khiung-ha soi, chhin-liong sám-khôi.

11Yû yit-ngit, Yok-sit to vuk-tú phan-sṳ, ke-sṳ̀ vuk-tú mò pan-ke phu̍k-ngìn. 12Thèu-kâ-ngiòng khiú-tén Yok-sit ke ngoi-sâm kóng: “Lòi lâu ngài soi!” Yok-sit chiông ngoi-sâm liù chhai thèu-kâ-ngiòng sú-chûng, kiak-kiak chéu-to ngoi-poi hi. 13Thèu-kâ-ngiòng khon-tó Yok-sit ke ngoi-sâm liù chhai kiâ sú-chûng, yu khon-tó kì chéu-to ngoi-poi hi, 14chhiu thai-sâng hêm kâ-phu̍k lòi, tui kì-têu kóng: “Ngì-têu khon, ngâ ló-kûng tai chón-lòi ke Hî-pak-lòi-ngìn vú-yu̍k ngài-têu! Kì ngi̍p ngài ke kiên-tú, sióng-oi lâu ngài soi, ngài chhiu thai-sâng hêm. 15Kì thâng-tó ngài thai-sâng hêm, chhiu chiông ngoi-sâm liù chhai ngài sṳ̂n-piên, kiak-kiak chéu chhut-hi.”

16Thèu-kâ-ngiòng liù-tén Yok-sit ke ngoi-sâm, tén-to Yok-sit ke chú-ngìn chón vuk-hâ, 17kì chhiu thèu kiâ ló-kûng liá-khien sṳ: “Ngì tai chón-lòi ke Hî-pak-lòi nù-phu̍k ngi̍p ngài fòng-kiên oi vú-yu̍k ngài. 18Ngài thai-sâng hêm, kì chhiu chiông ngoi-sâm liù chhai ngài sṳ̂n-piên, kiak-kiak chéu chhut-hi.”

19Yok-sit ke chú-ngìn thâng-tó pû-ngiòng kóng “Ngì ke nù-phu̍k án-ngiòng vú-yu̍k ngài” liá-ke fa, kì chhiu thai fat-khién, 20chiông Yok-sit chok hí-lòi, koân-to vòng-sṳt ke kâm-ngiu̍k; Yok-sit chhiu chhai ke-vi chhô-kâm. 21Chúng-he Song-chú lâu Yok-sit khiung-ha, su-fuk pûn kì; só-yî kâm-ngiu̍k-chóng chhin fôn-hí kì, 22phai kì kón-lî só-yû ke fam-ngìn, fu-chit chhú-lî kâm-ngiu̍k tú ke sṳ-vu. 23Yok-sit fu-chit phan-lî ke sṳ, kâm-ngiu̍k-chóng m̀-sṳ́ chhâu-sîm, yîn-vi Song-chú lâu Yok-sit khiung-ha, pûn kì kón-lî ke yit-chhiet chhin sun-li.

Currently Selected:

Chhóng-sṳ Ki 39: THV12Rdb

Highlight

Copy