Chhóng-sṳ Ki 34

Tí-nâ Pûn-ngìn Khiòng-kiên

1Yû yit-ngit, Ngâ-kok lâu Li-â kiung ke moi-é Tí-nâ chhut-hi fóng-mun ke thi-fông ke se-moi-é. 2Ke-thi ke chhu̍k-chóng Hî-vi-ngìn Ha̍p-mat yû yit-ke lai-é ôn-to Sṳ-kiam; kì khon-tó Tí-nâ, chhiu lâi kì lòi khiòng-kiên. 3Sṳ-kiam yîn-vi Tí-nâ án-chiâng, chhin-oi kì, chhiu tui kì kóng hó-fa, sióng tet-tó kì ke fôn-hí#34:3 “tui kì kóng ... fôn-hí” ya-he yi̍t-cho “ôn-ví kì”.. 4Sṳ-kiam tui kiâ-pâ Ha̍p-mat khiù kóng: “Sióng phan-fap pûn ngài thó liá se-moi-é cho pû-ngiòng.”

5Ngâ-kok thâng-tó Sṳ-kiam vú-yu̍k kiâ moi-é Tí-nâ. Ke-sṳ̀, kì ke-têu lai-é chhai yâ-ngoi chóng thèu-sâng, só-yî kì tiâm-tiâm, tén kì-têu chón-lòi. 6Sṳ-kiam ke â-pâ Ha̍p-mat lòi-kien Ngâ-kok, thoi kiâ lai-é thì-chhîn. 7Ngâ-kok ke-têu lai-é yí-kîn thâng-tó sêu-sit, tui yâ-ngoi chón-lòi. Kì-têu fî-sòng thung-sîm, chhiu thai fat-khién, yîn-vi Sṳ-kiam khiòng-kiên Ngâ-kok ke moi-é he yit-khien vú-yu̍k Yî-set-lie̍t-kâ ke sṳ, liá pún-lòi he cho m̀-tet ke sṳ.

8Ha̍p-mat lâu kì-têu kóng: “Ngâ lai-é Sṳ-kiam tông kak-yi ngì-têu vuk-hâ ke moi-é, chhiáng ngì-têu chún ngâ lai-é lâu kì kiet-fûn. 9Ngài-têu lòi thùng-yi lióng-chhu̍k thûng-fûn: Ngài-têu thó ngì-têu ke se-moi-é, ngì-têu ya thó ngài-têu ke se-moi-é. 10Án-ngiòng ngì-têu cho-tet lâu ngài-têu khiung-ha he̍t chhai liá-ke só-chhai, sùi-yi chhìm thi-fông he̍t, chhṳ-yù cho sên-lî, mâi sán-ngia̍p.”

11Chiap-tén, Sṳ-kiam chhṳ-kâ ya tui Tí-nâ ke â-pâ lâu ke-têu hiûng-thi kóng: “Khiù ngì-têu pûn ngài mien-chṳ́; ngì-têu yêu-khiù má-ke, ngài chhiòn-phu tap-yin. 12Ngì-têu na hén ngài lâu liá se-moi-é kiet-fûn, ngì-têu oi má-ke phín-kîm lâu lî-vu̍t, ngài chhiòn-phu voi pûn ngì-têu.”

13Ngâ-kok ke-têu lai-é, yîn-vi Sṳ-kiam vú-yu̍k kì-têu ke ló-moi Tí-nâ, chhiu yung kúi-cha ke fa en Sṳ-kiam lâu kiâ-pâ Ha̍p-mat, 14tui kì-têu kóng: “Ngài-têu cho m̀-tet chiông ló-moi ka-pûn mò su kot-lî ke ngìn, liá tui ngài-têu lòi-kóng he fî-sòng kien-seu ke sṳ. 15Na-he ngì-têu chiap-su liá-ke thiàu-khien, ngài-têu chhiu thùng-yi ngì-têu ke yêu-khiù: ngì-têu oi chhiong ngài-têu khiung-yong, tak-ke se-lai-é chhiòn-phu oi-su kot-lî; 16án-ngiòng, ngài-têu chhiu thùng-yi lâu ngì-têu thûng-fûn, he̍t chhai ngì-têu tông-chûng, sàng-cho yit-ke mìn-chhu̍k. 17Na-he ngì-têu m̀ chiap-su ngài-têu ke thiàu-khien su kot-lî, ngài-têu chhiu oi chiông ló-moi tai-chéu, lì-khôi liá-vi.”

18Ha̍p-mat lâu kiâ lai-é Sṳ-kiam ngin-vì liá-ke thiàu-khien kûng-tong. 19Ke heu-sâng ngìn he kiâ vuk-hâ chui su khon-chhung ke ngìn; yîn-vi kì oi Ngâ-kok ke moi-é, ngiàm-sṳ̀ chhiu cheu só-thì ke thiàu-khien hi-cho.

20Án-ngiòng, Ha̍p-mat lâu kiâ lai-é Sṳ-kiam to sàng-mùn chhi-fi ke thi-fông, tui kì-têu pún-sàng ke ngìn kóng: 21“Liá-têu ngìn tui ngài-têu chhin fò-mu̍k, cho-tet pûn kì-têu he̍t liá-vi, cho sên-lî; liá-thi án-fat, la-pái yùng-na̍p kì-têu. Ngài-têu cho-tet thó kì-têu ke se-moi-é, kì-têu ya cho-tet thó ngài-têu ke se-moi-é. 22Chúng-he, liá-têu ngìn thì-chhut yit-ke thiàu-khien: chhiu-he ngài-têu ke se-lai-é, yit-thin oi chhiong kì-têu ke se-lai-é khiung-yong su kot-lî, kì-têu chang-hén lâu ngài-têu khiung-ha he̍t, sàng-cho yit-ke mìn-chhu̍k. 23Ngài-têu thùng-yi hó-mò! Pûn kì-têu he̍t chhai ngài-têu tông-chûng. Án-ngiòng kì-têu ke thèu-sâng lâu yit-chhiet chhòi-sán kám m̀-he chhiòn-phu pien-cho ngài-têu ke mâ?” 24Chhiòn-sàng ke ngìn lûng-chúng chan-sṳ̀n Ha̍p-mat lâu kiâ lai-é Sṳ-kiam ke kien-ngi; án-ngiòng, chhiòn-sàng ke se-lai-é chhiu lûng-chúng su kot-lî.

25To thi-sâm ngit, tông-thi ke se-lai-é yîn-vi su kot-lî hàn tông-thung ke sṳ̀, Ngâ-kok ke lióng-ke lai-é, chhiu-he Tí-nâ ke chhîn â-kô Sî-mién lâu Li-vi, tiâm-tiâm tai-tén tô-kiam, chhai kì-têu chhiòn-mò thì-fòng ke sṳ̀, ngi̍p-hi sàng-tú, chiông tông-thi só-yû ke se-lai-é chhṳ̀ chhiang-chhiang, 26yu yung tô-kiam chhṳ̀-thet Ha̍p-mat lâu kì ke lai-é Sṳ-kiam, yèn-heu chiông Tí-nâ tui Sṳ-kiam ke vuk-hâ tai-chéu. 27Ngâ-kok khì-thâ ke lai-é ya lòi-to ke-vi, chiông ke-sàng chhióng-to chhiang-chhiang, lòi vi kì-têu ke ló-moi só-su ke vú-yu̍k po-sù. 28Kì-têu chhióng-chéu yòng-khiùn, ngiù-khiùn, lì-è, pin sàng-tú lâu thièn-yèn só-yû ke tûng-sî. 29Kì-têu chhióng-chéu yit-chhiet kui-chhung ke tûng-sî, chiông só-yû ke fu-ńg lâu se-ngìn-è chok-chéu, sṳm-chṳ pân-chéu vuk-tú só-yû ke tûng-sî.

30Ngâ-kok tui Sî-mién lâu Li-vi kóng: “Ngì-têu voi hoi-sí ngài! Chhiùng-kîm yî-heu, Kâ-nàm-ngìn, Pí-li-sé-ngìn, lâu liá thi-fông khì-thâ ke mìn-chhu̍k chhiòn-phu voi-hen ngài. Ngài-têu ngìn-su mò-tô, na-he kì-têu lièn-ha̍p hí-lòi kûng-kit ngài, ngài lâu chhiòn-kâ vún-sí lé.”

31Chúng-he kì-têu en-kóng: “Kì nai cho-tet tui ngài-têu ke ló-moi chhiong tui chhông-kî yit-yong â!”

Currently Selected:

Chhóng-sṳ Ki 34: THV12Rdb

Highlight

Copy