Chhóng-sṳ Ki 19

Só-tô-mâ ke Chhui-ok

1Thiên-am ke sṳ̀, ke lióng-ke thiên-sṳ́ lòi-to Só-tô-mâ; Lò-tet chhô chhai sàng-mùn héu. Kì yit khon-tó ke lióng-sà chhiu khî hí-lòi ngiàng-chiap kì-têu, phu̍k chhai kì-têu mien-chhièn, 2kóng: “Ngài chú â, chhiáng ngì-têu to phu̍k-ngìn vuk-hâ lòi, pûn ngài chêu-thai. Ngì-têu sé yit-ha kiok, hiet yit am-pû, thiên-kông chêu-sṳ̀n chang kha-chó têu-é chhut-mùn.”

Chúng-he kì-têu kóng: “Cho-m̀-tet, ngài-têu oi chhai kiê-hong ko-ya.”

3Lò-tet chhin-liù kì-têu, kì-têu chang thèn kì ngi̍p-hi kiâ vuk-hâ. Lò-tet vi kì-têu chún-phi sṳ̍t-vu̍t, phoi vù-kau-piáng, kì-têu chhiu sṳ̍t.

4Ngìn-hak hàn-màng soi, Só-tô-mâ-sàng ke nàm-ngìn, mò-lun ló-nun thai-se, lûng-chúng lòi pâu-vì Lò-tet ke vuk. 5Kì-têu thai-sâng hêm Lò-tet, mun kì: “Kîm-am-pû he̍t chhai ngì vuk-hâ ke-têu ngìn chhai nai? Chiông kì-têu tai chhut-lòi, yù-chhai ngài-têu met-sa!”

6Lò-tet chhiu chhut-lòi, chiông mùn koân hí-lòi, to chung-ngìn ke-vi, 7tui kì-têu kóng: “Kok-vi hiông-chhîn, khiù ngì-têu m̀-hó cho liá-chúng fái-sṳ! 8Ngài lâu ngì-têu kóng, ngài yû lióng-ke moi-é, hàn-he ngìn-kâ-ńg; ngài chiông kì-têu kâu-pûn ngì-têu, yù-chhai ngì-têu oi ngióng-pân tui-thai kì-têu. Chúng-he ngì-têu chhiên-van m̀-hó vì-nàn liá lióng-sà; kì lióng-sà lòi-to ngài vuk-hâ, chhiu-he ngài ke ngìn-hak.”

9Chúng-he chung-ngìn en-kóng: “Ngì liá-ke ngoi-chhu̍k ngìn, sám-khôi! Ngì son má-ke, sióng-oi chṳ́-fî ngài-têu! Na-mò, ngài-têu oi tui-fu ngì, pí tui-fu kì lióng-sà hàn-kha li-hoi ô!” Kì-têu súng-khôi Lò-tet, chiâm-tén oi chhong-mùn ngi̍p-hi. 10Chúng-he, ke lióng-ke ngìn chhûn-sú chiông Lò-tet lâi-ngi̍p vuk-tú, chiông mùn koân hí-lòi, 11yu pûn ngoi-poi ke-têu nàm-ngìn, mò-fûn ló-nun, chhiòn-phu muk-chû khon m̀-tó, miâ-lòi miâ-hi, chhìm m̀-tó mùn.

Lò-tet Lì-khôi Só-tô-mâ

12Ke lióng-ke ngìn tui Lò-tet kóng: “Sàng-tú hàn-yû ngì ke ngìn mò? Lai-é, moi-é, se-lòng, ya-he khì-thâ ke chhîn-ngìn? Ham kì-têu lì-khôi! 13Ngài-têu oi fí-me̍t liá-sàng; yîn-vi liá-sàng tú fam-chhui ke sâng-yîm, Song-chú yí-kîn thâng-tó, só-yî phai ngài-têu lòi-me̍t liá-sàng.”

14Lò-tet chhiu chhut-hi, chhìm kì ke se-lòng, tui kì-têu kóng: “Ngì-têu oi kiak-kiak lì-khôi, Song-chú oi fí-me̍t liá-sàng lé.” Chúng-he kì-têu chhiòn-phu láu-tó kì he kóng-seu.

15Thiên-kông ke sṳ̀, thiên-sṳ́ chhin chhûi Lò-tet kóng: “Kiak-kiak tai ngiâ pû-ngiòng lâu lióng-ke moi-é lì-khôi liá só-chhai, miên-tet thùng liá-sàng khiung-ha me̍t-mòng.” 16Lò-tet hàn-mò sióng-oi chéu. Chúng-he Song-ti lìn-mén kì; ke lióng-ke ngìn chhiu khiên-tén kì lâu kiâ pû-ngiòng ke sú, pin kì lióng-ke moi-é ke sú, tai kì-têu lì-khôi ke-sàng. 17To sàng-ngoi, khì-chûng yit-ke thiên-sṳ́ kóng: “Ngì-têu thò-miang yeu-kín, m̀-hó vat-thèu khon, ya m̀-hó thìn-liù chhai phìn-ngièn. Oi chéu-to sân-táng, chang m̀-voi su fí-me̍t.”

18Lò-tet tui kì-têu kóng: “Ngài chú â, m̀-hó án-ngiòng â! 19Ngì ki-yèn sṳ̂-ên hó khoán-thai ngì ke phu̍k-ngìn, kiu ngài ke sin-miang, chhiáng m̀-hó hêm ngài chéu án-yén ke lu. Kiâng-pha ngài màng chéu-to ke-sân, châi-nan chhiu-to, ngài chhiu mò-miang lé! 20Khon â, thèu-chhièn ke-chho sàng lì liá mò-kí yén, kha-kiak chéu to ke-vi; me he se-sàng, khiù ngì pûn ngài thò-to ke se-sàng hó lòi pó-miang.”

21Thiên-sṳ́ tui kì kóng: “Hó, ngài tap-yin ngì. Ngài m̀ me̍t ke se-sàng. 22Chéu kiak têu-é! Ngì hàn-màng to ke-vi, ngài m̀-voi chhut-sú.” (Só-yî ke se-sàng ham-cho Só-ngí#19:22 “Só-ngí” yû “se” ke yi-sṳ..)

Fí-me̍t Só-tô-mâ lâu Ngò-mô-lâ

23Ngit-thèu chhut-lòi ke sṳ̀, Lò-tet to Só-ngí. 24Ke-sṳ̀, Song-chú sṳ́ chho̍k-tén ke liù-vòng fó tui thiên-táng, chhiu-he tui Song-chú ke-vi, kong chhai Só-tô-mâ lâu Ngò-mô-lâ. 25Kì me̍t-thet ke lióng-ke sàng lâu chhiòn phìn-ngièn, lièn ke-têu he̍t chhai sàng-tú yit-chhiet ke ngìn, lâu thi-song só-yû ke chhṳ̍t-vu̍t. 26Lò-tet ke pû-ngiòng vat-thèu khon heu-poi, chhiu pien-cho yit-kî yàm-chhû.

27Thi-ngi ngit tá-chó, Â-pak-lâ-hón hong hí-lòi, to kì chhai Song-chú mien-chhièn khî-ko ke thi-fông, 28hiong Só-tô-mâ, Ngò-mô-lâ lâu chhiòn phìn-ngièn khon. Âi-yô! Khon-tó thi-mien song yû fó-yên chhung-tén sông, chhiong thai fó-lù ke yên yit-yong. 29Song-ti fí-me̍t phìn-ngièn ke lióng-chho sàng ke sṳ̀, Kì ki-ngiam Â-pak-lâ-hón; tông Kì fí-me̍t Lò-tet só-he̍t ke sàng, Kì ya tai-liâng Lò-tet tui fí-me̍t chûng chhut-lòi.

Mô-ap-ngìn lâu Â-mùn-ngìn ke Lòi-ngièn

30Lò-tet m̀-kám he̍t chhai Só-ngí; kì chhiu tai lióng-ke moi-é pân-to sân-táng, he̍t chhai sân-thung tî-poi. 31Â-chí lâu ló-moi kóng: “Â-pâ ló lé! Thi-song ya mò nàm-ngìn cheu sṳ-siu̍k lòi lâu ngài-têu kiet-fûn, pûn ngài-têu kiung se-ngìn-è. 32Lòi! Nâ chiú pûn â-pâ lîm-to chui-chui, ngài-têu hó lâu kì khiung-ha soi, tui kì lòi-liù heu-thoi.” 33Ke am-pû, kì-têu pûn kiâ-pâ lîm-to chui-chui, thai ke moi-é chhiu lâu kiâ-pâ khiung-ha soi. Kiâ moi-é kí-sṳ̀ soi hâ-hi, kí-sṳ̀ hong-hí-lòi, â-pâ vàn-chhiòn m̀-tî.

34Thi-ngi ngit, â-chí lâu ló-moi kóng: “Chhô-am-pû ngài lâu â-pâ soi; kîm-am-pû ên-têu chai nâ chiú pûn kì lîm, von ngì hi lâu kì khiung-ha soi. Án-ngiòng, ngì lâu ngài tû cho-tet tui â-pâ tet-tó heu-thoi.” 35Só-yî ke am-pû, lióng chí-moi yu pûn kiâ-pâ lîm-to chui-chui, ló-moi chhiu lâu kì khiung-ha soi. Kiâ moi-é kí-sṳ̀ soi hâ-hi, kí-sṳ̀ hong-hí-lòi, â-pâ vàn-chhiòn m̀-tî. 36Án-ngiòng, Lò-tet liá lióng-ke moi-é, tui chhṳ-kâ ke â-pâ yû sṳ̂n-yín. 37Â-chí kiung yit-ke lai-é, lâu kì ôn-miàng Mô-ap#19:37 “Mô-ap” yû “tui ngâ pâ” ke yi-sṳ., chhiu-he kîm-pû-ngit Mô-ap-ngìn ke chú-siên. 38Ló-moi ya kiung yit-ke lai-é, lâu kì ôn-miàng Phien-Â-mí#19:38 “Phien-Â-mí” yi-sṳ he “ngài chhîn-ngìn ke lai-é”, lâu Hî-pak-lòi-vùn “Â-mùn-ngìn” fat-yîm tông chhiong., chhiu-he kîm-pû-ngit Â-mùn-ngìn ke chú-siên.

Currently Selected:

Chhóng-sṳ Ki 19: THV12Rdb

Highlight

Copy