ZEKALIA 1

1TO osùn sinatòntọ mẹ, to owhè awetọ Daliusi tọn mẹ, ohó OKLUNỌ tọn wá jẹ Zekalia visunnu Belekia tọn lọ de, visunnu Ido yẹwhegán lọ tọn, dọmọ, 2OKLUNỌ ko yín mahùnhomẹnọ po otọ́ mìtọn lẹ po. 3Enẹwutu hiẹ ni dọ hlan yé dọ, Le wẹ OKLUNỌ awhànpa lẹ tọn dọ: Mì lẹ́gọ̀ do dẽ, wẹ OKLUNỌ awhànpa lẹ tọn dọ, yẹn bo na sọ lẹ́gó do mì de, wẹ OKLUNỌ awhànpa lẹ tọn dọ. 4Mì tin di otọ́ mìtọn lẹ blo, mẹhe yẹwhegán nukọntọn lẹ dawhá hlan, dọmọ, Le wẹ OKLUNỌ awhànpa lẹ tọn dọ, Mì lẹ́gọ̀ dinvie sọn aliho ylanylan mìtọn lẹ mẹ, podọ sọn wiwà ylanylan mìtọn lẹ mẹ: ṣigba yé ma sè, mọ ma sọ tuntóai hlan mi gba, wẹ OKLUNỌ dọ. 5Otọ́ mìton lẹ, fie wẹ yé te? podọ yẹwhegán lẹ lọ, be yé nọgbẹ́ kakadoi? 6Ṣigba ohó ṣie lẹ po oséndoai ṣie lẹ po, he yẹn degbèna devi ṣie yẹwhegán lẹ, bé yé ma pla olọ mìtọn lẹ? bọ yé sọ lẹ́ bo dọmọ, Taidi le OKLUNỌ awhànpa lẹ tọn lẹn do nado wà hlan mí, kẹdẹdi aliho mitọn lẹ, podọ kẹdẹdi wiwà mítọn lẹ, mọwẹ ewọ ko zán hẹ mi do.

7To azán kònukunẹnẹtọ osùn widopotọ tọn mẹ, he yín osùn ṣebati, to owhè awetọ Daliusi tọn mẹ, ohó OKLUNỌ tọn wá jẹ Zekalia de visunnu Belekia tọn, visunnu Ido yẹwhegán lọ tọn, dọmọ, 8Yẹn mọ to ozán mẹ, bo dayi e go dawe de hẹ́ osọ vẹ̀ de ji, é bo sọ ṣite to atin miltili he tin to otẹn oyẹtẹn mẹ lẹ ṣẹnṣẹn; podọ osọ́ lẹ sọ tin finẹ to godo nẹ̃, ovẹ̃, vẹ̃mínímíni, po wéwé po. 9Whenenu wẹ yẹn dọmọ, Klunọ ṣie È, eté wẹ ehelẹ? angẹli he to hódọ hẹ mi lọ sọ dọ hlan mi dọ, Yẹn na do núhe ehelẹ yín hia we. 10Dawe he Site to atin miltili lẹ ṣẹnṣẹn sọ gblọn bo dọmọ, Ehele wẹ yé he OKLUNỌ ko dohlan nado zinzọnlin yìgodo yìnukọn gbọn aigba lọ mẹ. 11Yé sọ gblọnna angẹli OKLUNỌ tọn lọ he ṣite to atin miltili lẹ lọ ṣẹnṣẹn, bo dọmọ, Mí ko zinzọnlin yìgodo yìnukọn gbọn aigba lọ mẹ, bo, dayi e go, wẹ́kẹ lẹpo wẹ sinai abọẹ, bo sọ tin to gbọjẹ mẹ. 12Whenẹnu wẹ angẹli OKLUNỌ tọn lọ, gblọn bo dọmọ, OKLUNỌ awhànpa lẹ tọn E, dẹn sọ nawẹ hiẹ ma na tindo lẹblanu to Jelusalẹm ji podọ to tòdaho Juda tọn lẹ ji, ehe go hiẹ ko tindo homẹgble do to owhè kandegbàn helẹ mẹ? 13OKLUNỌ sọ gblọnna angẹli he to hódọ hẹ mi lọ po ohó dagbe lẹ po, yèdọ ohó homẹmiọnnọ lẹ. 14Mọ wẹ angẹli he to hódọ hẹ mi lọ sọ dọ hlan mi dọ, Hiẹ ni dawhá, dọmọ, Le wẹ OKLUNỌ awhànpa lẹ tọn dọ: Yẹn yi awuwhàn daho de do yín awuwhànnọ na Jelusalẹm podọ na Ziọni. 15Podọ yè hẹn mi yín homẹmahùnnọ po akọta he tin abọẹ lẹ po: na vude wẹ yè hẹn yẹn yín homẹmahùnnọ, yé sọ gọalọ na oylan. 16Enẹwutu le wẹ OKLUNỌ dọ: Yè hẹn mi lẹ́gọ̀ po lẹblanu lẹ po do Jelusalẹm de; ohọ̀ ṣie na yín didó to e mẹ, wẹ OKLUNỌ awhànpa lẹ tọn dọ, podọ okàn de na sọ yín dindlẹn jẹgbonu to Jelusalẹm ta. 17Sọvọ́ awhádo, dọmọ, Le wẹ OKLUNỌ awhànpa lẹ tọn dọ: Tòdaho ṣie lẹ na sọ vọ́ yí oyọ́nna do gọ́fla; podọ OKLUNỌ na sọ vọ́ homẹmìọnna Zioni, bo na sọ vọ́ Jelusalẹm dè.

18Yẹn sọ zé nukun ṣie lẹ daga, bo mọ, bo dayi e go azò ẹnẹ. 19Yẹn bo sọ dọ hlan angẹli he to hódo hẹ mi lọ dọ, Etẹ́ ehelẹ yín? Ewọ sọ gblọnna mi dọ, Èhelẹ wẹ azò he ko vúnvún Juda, Islaeli, po Jelusalẹm po. 20OKLUNỌ sọ do ayátọ ẹnẹ hia mi, 21Whenẹnu wẹ yen dọmọ, Etẹ́ ehelẹ wá nado wà? Ewọ sọ dọhó, dọmọ, Ehelẹ wẹ azò lẹ lọ he vúnvun Juda, mọ bọ omẹ de ma zé ota etọn daga: ṣigba ehelẹ wá nado klọ́n yé sẹ̀, nado zé azò akọta lẹ tọn lẹ lọ dlan ai, he zé azò yetọn daga do aigba Juda tọn ji nado vúnvún in.

Currently Selected:

ZEKALIA 1: BWL23

Highlight

Copy