MALKU 10

1E SỌ fọ́n sọn finẹ bo wá Judé dali to Jọdani godo; agùndaho lẹ sọ vó wá plidopọ do e de; le walọ etọn te, é sọ to yé plón. 2Falesi lẹ sọ wá e de to finẹ, bo to whiwhle e pọ́n, bo kanbiọ ẹ dọmọ, Be é jẹ na sunnu de nado jo asi etọn dai? 3E sọ gblọn bo dọ hlan yé, dọmọ, Etẹ Moṣe degbèna mì? 4Yé dọmọ, Moṣe dike nado wlan owé gbédai tọn nẹ̃, bo sọ gbé ẹ dai. 5Jesu sọ gblọn bo dọ hlan yé, dọmọ, Na sinsinyẹn ayiha mìtọn tọn wutu wẹ é wlan osén he na mì. 6Ṣigba sọn whéwhéwhenu dida tọn asú po asi po wẹ é basi yé. 7Na ehe wutu wẹ sunnu na jo otọ́ etọn po onọ po dai, bo nasọ sẹbọ do asi etọn de; 2 8yé awe lẹ na sọ yín agbasalan dopo; enẹwutu yé ma sọ yín awe ba gba, adavo agbasalan dopo. 9Enẹwutu onú he Jiwheyẹwhe síndopọ mì dike gbẹtọ klán ẹn blo. 10Nuplọntọ etọn lẹ sọ vó onú doponẹ kanbiọ ẹ to owhé gbè. 11E sọ dọ hlan yé, dọmọ, Mẹdepope he na gbé asi etọn dai bo wlealọhẹ devo, é deayò hẹ ẹ. 12Eyín yọnnu de sọ gbé asú etọn dai, bo sọ wlealọhẹ mẹdevo, é deayò.

13Yé sọ hẹn yọpọvu lẹ wá e de na é nido doalọ yé ji: nuplọntọ etọn lẹ sọ wọhẹ yé mehe hẹn yé wá lẹ. 14Ṣigba whenuena Jesu mọ ẹn, homẹ etọn gble talala, é sọ dọ hlan yé, dọmọ, Mì gbọ yọpọvu lẹ ni wá dẽ, mì sọ kóna, yé blo: na yé omẹ mọhunkọ lẹ tọn wẹ ahọludu Jiwheyẹwhe tọn. 15Nugbo wẹ yẹn dọ hlan mì, Mẹdepope he ma yí ahọludu Jiwheyẹwhe tọn di yọpovu, é ma to na biọ é mẹ. 16E so ze ye daga to awà etọn lẹmẹ, bo yí alọ etọn le do yé ji, bo dona yé.

17Le é tọn je to aliho etọn ji, mẹde dowezun wá e de, bo sọ jẹklo nè, bo kanbiọ ẹ dọ, Mẹplọntọ dagbe, etẹwẹ yẹn na wà, bọ yẹn nado dugu ogbé madopodo tọn? 18Jesu sọ dọ hlan ẹn, dọmọ, Etẹwutu hiẹ ylọ mi mẹdagbe? mẹdagbe de ma tin, adavo omẹ dopo, enẹ wẹ Jiwheyẹwhe. 19Hiẹ yón osén lẹ, A deayò blo; À hùmẹ blo; A fìnnúyi blo; A dekunnu lalo tọn blo; A klọ omẹ blo; Gbògbéna otọ́ towe po onọ towe po. 20E sọ dọ hlan ẹn dọ, Mẹplọntọ, onú he lẹpo go wẹ yẹn ko tunnukun sọn ovu ṣie. 21Whenẹnu wẹ Jesu pọn ẹn, bo yiwan nè, bo dọ hlan ẹn, dọmọ, Onú dopo wẹ pò na we; yì, bo sà onú depope he hiẹ tindo, bo yí na wamọnọ lẹ, hiẹ nasọ tindo adọkunnú to olọn mẹ: bo wá, zé satin, bo hodo mi. 22Nukunmẹ etọn gble na ohó nẹ wutu, é sọ tọ́njegbonu to awúbla mẹ; na ewọ yín mẹde he tindo adọkun susu wutu.

23Jesu sọ pọ́n lédo, bo dọ hlan nuplọntọ etọn lẹ, dọ, Na wẹ é na sinyenawú na mẹhe tindo adọkun lẹ do nado biọ ahọludu Jiwheyẹwhe tọn mẹ 24Avò sọ vò nuplọntọ lẹ na ohó etọn wutu. Ṣigba Jesu sọ vó gblọn bo dọ hlan yé, dọ, Mì ovi emi, nawẹ é na sinyẹnawú do na mẹhe dotu to adọkun mẹ lẹ do nado biọ ahọludu Jiwheyẹwhe tọn mẹ 25E bọawú na kanklosọ-pòawenọ de nado gbọn nuvo yẹnvi tọn mẹ lùntón, hú na adọkunnọ nado biọ ahọludu Jiwheyẹwhe tọn mẹ. 26Awu sọ ji yé gbahúgbahú, yé sọ to didọ hẹ yénọzo, dọmọ, Be menu wẹ sọgan yín whinwhlengan? 27Jesu sọ pọn yé, bo dọmọ, Gbẹtọ de wẹ ehe glo te, ṣigba é ma yín to Jiwheyẹwhe de gba: na onú lẹpo wẹ wiwà na Jiwheyẹwhe. 28Whenẹnu wẹ Pita ṣẹ̀ didọ hlan ẹn, dọ, Pọn, mìwlẹ ko gbé onú lẹpo dai, bo to hihodo we. 29Jesu sọ dọmọ, Nugbo wẹ yẹn dọ hlan mì, Mẹde ma tin ehe jo owhé kavi mẹmẹsunnu lẹ, kavi mẹmẹyọnnu lẹ, kavi otọ́, kavi onọ, kavi asi, kavi ovi lẹ, kavi aigba lẹ dai, na yẹn tọn wutu, podọ na wẹndagbe tọn wutu, 30ṣigba é na mọ yí to dinvie to ojlẹ he mẹ, kanweko donu kanweko owhé lẹ, mẹmẹsunnu lẹ, mẹmẹyọnnu lẹ onọ lẹ, ovi lẹ, po aigba lẹ po po homẹkẹn lẹpo, podọ to aihọn he ja mẹ ogbẹ̀ madopodo. 31Ṣigba omẹ susu he yín tintan na yín godotọ; podọ godotọ lẹ nasọ yín tintan.

32Yé sọ tin to aliho jei Jelusalẹm; Jesu kọ jenukọn na ye jei; avọ̀ sọ vò yé; le yé to hihodo e, obu di yé. E sọ vọ yí omẹ wiawe lẹ, bo sọ sẹ̀ didọ na yé onú he tin na jọ do é go le. 33Dọmọ, Pon, mìwlẹ hẹji jei Jelusalẹm, ye nasọ jo Ovi gbẹtọ tọn do alọ ogán yẹwhenọ le tọn tọn me, po wekantọ lẹ po; ye nasọ gblewhé oku tọn do e, bo nasọ jo e do alọ Kosi lẹ tọn mẹ; 34yé na vle ẹ ko, bo túntán do e go, bo hò e bo naso hù i; podọ azán atọ̀ntọ gbè é na fọ́n.

35Jakobu po Johanu po ovisunnu Zẹbedé tọn lẹ sọ wá e de to finẹ, dọmọ, Mẹplọntọ, mìwlẹ jlo na hiẹ ni nọ wà onú depope he mìwlẹ na biọ we na mí 36E sọ dọ hlan yé, dọ, Etẹwẹ mì jlo na yẹn ni wà na mì? 37Yé sọ dọ hlan ẹn, dọmọ, Na mí, na mìwlẹ ni sinaì, dopo to adusilọ towe mẹ, awetọ to amiyọnlo towe me to gigo towe mẹ. 38Ṣigba Jesu dọ hlan yé, dọmọ, Mì ma yón onú he mì to bibiọ gba: be mìwlẹ tin sọgan nado nù kọfo he yẹn nù? kavi nado yín yíyí baptisin he yè do baptizi mi do baptizi mì? 39Yé sọ dọ hlan ẹn, dọ, Mí tin sọgan. Jesu sọ dọ hlan yé, dọ, Kọfo he yẹn nù wẹ mì na nù, podọ baptisin he yè do baptizi mi wẹ yè na do baptizi mì, 40ṣigba nado sinai to adusilọ ṣie mẹ, podọ to amiyọnlo ṣie mẹ ma yín ṣie nado na omẹ gba; ṣigba mẹhe yè wleawu etọn dai na lẹ wẹ yè na na. 41Whenuena omẹ ao lẹ sè, yé sè homẹgble do Jakobu po Johanu po go talala. 42Ṣigba Jesu ylọ yé do ede de, bo dọ hlan yé, dọ, Mìwlẹ yọnẹn dọ mẹhe yè do basi ogán do Kosi lẹ ji, nọ dùklunọ to yé ji; podọ mẹho yetọn lẹ nọ zán asẹ to yé ji. 43Ṣigba é ma yín mọ to mì ṣẹnṣẹn gba: ṣigba mẹdepope he jlo na klo to mì me, na yín lizọnyítọ mìtọn: 44Depope mìtọn he jlo na yín tintan ni yín afànumẹ mì omẹ pó tọn. 45Na nugbo Ovi gbẹtọ tọn ma wá nado yín mẹyilizọnna gba, ṣigba nado yílizọnna omẹ, podọ nado jo ogbé etọn na ofligò na omẹ susu.

46Yé sọ wá Jẹliko: le é tón sọn Jẹliko po nuplọntọ etọn lẹ po, po agùndaho de po, ovisunnu Timé tọn Batimé, nukuntọ́nnọ nuwhetọ de sinai to alihotó. 47Whenuena é sè dọ Jesu Nazaleti tọn wẹ, é só awhádo ogbè lélé, bo dọmọ, Jesu, hiẹ Ovi Davidi tọn, wàlẹblanu na mi. 48Gbẹtọ lẹ sọ wọhẹ ẹ na é nido nabọẹ; ṣigba é sọ dawhá humọ susu dọ, Hiẹ Ovi Davidi tọn, wàlẹblanu na mi. 49Jesu sọ site, bo dọmọ mì ylọ ẹ. Yé sọ ylọ dawe nukuntọ́nnọ lọ, bo dọ hlan ẹn, dọ, Dotu, fọ́n, é to yiylọ we 50E sọ dè awù etọn dlẹn, bo fọ́n, bo wá Jesu de. 51Jesu sọ gblọn bo dọmọ, Etẹwẹ hiẹ jlo na yẹn ni wà hlan we? Dawe nukuntọ́nnọ lọ dọ hlan ẹn, dọ, Laboni, na yẹn ni sọgan mọnú, 52Jesu sọ dọ hlan ẹn, dọ, Yl; yise towe whlen we gán. To afọdoponẹji e mọnukunnu, bo sọ to hihodo e to aliho.

Currently Selected:

MALKU 10: BWL23

Highlight

Copy