MALAKI 3
3
1DAYI e go, Yẹn do liznyítọ ṣie hlan, ewọ bo na sọ wleawuna aliho lọ to nukọn ṣie: podọ OKLUNỌ, mẹhe mì to dindinyì, na wá jẹ tẹmpli etọn mẹ ajiji; yèdọ wẹzangun alẹ́nù tọn lọ, mẹhe mẹ họmẹvivi mì te, dayi e go, é ja, wẹ OKLUNỌ awhànpa lẹ tọn dọ. 2Ṣigba mẹnu wẹ sọgan nọtepọ́n azán wiwá etọn tọn? podọ mẹnu wẹ na nọte whenuena é sọawuhia? na ewọ tin taidi miyọn gànkọ̀ntọ de tọn, podọ taidi adi avọ̀yàntọ tọn: 3podọ ewọ na sinai di gànkòntọ de po kiklọtọ fataka tọn po, ewọ bo na sọ klọ visunnu Levi tọn lẹ, bo sọ klọ yé wé di sika po fataka po; yé bo na sọ nọ na avọ nunina lẹ hlan OKLUNỌ to dódó mẹ. 4Whenẹnu wẹ avọ́ nunina Juda po Jelusalẹm po tọn na yín whànpẹnọ hlan OKLUNỌ, di to azán hóhó tọn lẹ mẹ, podọ di owhè hóhótọn lẹ mẹ. 5Podọ yẹn na wá sẹpọ̀ mì jẹ whẹ̀dida kọ̀n; podọ yẹn na yín kunnudetọ awuyanọ de to owọntọ lẹ ji, podọ to ayọdetọ lẹ ji, podọ to whiwhletọ lalanọ lẹ ji; podọ to enẹlẹ he nọ bianukunna gbànumẹ to azónkuẹ etọn lẹ mẹ, asusiọsi, po tòṣiọvi po, podọ he lẹ́ ojonọ jẹpadopo sọn aliho jlọjẹ etọn mẹ, bo ma dibusi mi gba, wẹ OKLUNỌ awhànpa lẹ tọn dọ. 6Na yẹn OKLUNỌ lọ ma diọ; enẹwutu wẹ yè ma hù mì súdo gba, Mì visunnu Jakob tọn emi.
7Sọn azán otọ̀ mìtọn lẹ tọn lẹ mẹ wẹ mì ko lẹ́ jẹpadopo sọn gbèdai ṣie lẹ mẹ, bo ma ko yìn yé gba. Mì lẹ́gọ̀ do dẽ, yẹn na sọ lẹ́gọ̀ do mì de, wẹ OKLUNỌ awhànpa lẹ tọn dọ. Ṣigba mìwlẹ dọmọ, Etẹ́ mẹ míwlẹ na lẹ́gọ̀ te? 8Bé gbẹtọ de na jẹajodo Jiwheyẹwhe wẹ? gãnṣo mìwlẹ jẹajodo mi. Ṣigba mìto didọmọ, Etẹ́ mẹ wẹ míwlẹ ko jẹajodo we te? To madaotọ lẹ mẹ po avọ́ nunina zédlanga tọn lẹ po. 9Yè yí odẹ̀hodo do hodẹ̀do mì; na mìwlẹ jẹajodo mi, yèdọ akọta he pete. 10Mì hẹn madaotọ lọ pete wá biọ agbànhọ̀ lọ mẹ, na núdùdù nido tin finẹ to ohọ̀ ṣie mẹ, bo yí do tẹ́n mi pọn dinvie, wẹ OKLUNỌ awhànpa lẹ tọn dọ, eyín yẹn ma na hùn ovẹ́sẹ olọn tọn lẹ na mì, bo sọ kọ̀n dona de jẹgbonu na mì, he otẹn ma na tin finẹ sù nado hẹn ẹn. 11Podọ yẹn na sọ dowhẹ̀ jawlanọ lọ na mìtọn wutu, ewọ ma to na sọ và osinsẹ́n aigba mìtọn tọn lẹ súdo gba; mọ ovẹntin mìtọn ma sọ to osinsẹ́n etọn na jà kọ̀nyingbé jẹnukọnna ojlẹ to ogle mẹ gba, wẹ OKLUNỌ awhànpa lẹ tọn dọ. 12Akọta lẹpo na sọ nọ ylọ mì jijọhonọ: na mìwlẹ na yín aigba homẹhùnnọdaho de, wẹ OKLUNỌ awhànpa lẹ tọn dọ.
13Ohó mìtọn lẹ ko yín sinsinyẹn do ogo e, wẹ OKLUNỌ dọ. Gãnṣo mìwlẹ dọmọ, Etẹ́ mẹ wẹ mìwlẹ ko dọhó do ogo we te? 14Mìwlẹ ko dọmọ, Ovò wẹ é yín nado nọ sẹ̀n Jiwheyẹwhe: podọ alẹ tẹ́ é yín dọ míwlẹ ko yìn aṣẹ etọn, podọ na mìwlẹ ko zinzọnlin to avọ̀ awubla tọn mẹ to OKLUNỌ awhànpa lẹ tọn nukọn? 15Podọ dinvie mìwlẹ ylọ osaklanọ dọ jijọhonọ; mọwẹ, yè to yé he to azọ́n kanyinylan tọn wà lẹ do daga; mọwẹ, yé to Jiwheyẹwhe whlepón, yè bo sọ to yé whlẹn. 16Whenẹnu wẹ yé he dibusi OKLUNỌ lẹ to hódọ ode po awetọ po: OKLUNỌ sọ tuntóai, bo sè, podọ yè sọ wlan owé oflin tọn de to ewọ nukọn, na yé he dibusi OKLUNỌ lẹ, podọ he to oyín etọn tọn lẹnpọ̀n lẹ. 17Yé na sọ yín ṣie, wẹ OKLUNỌ awhànpa lẹ tọn dọ, to azán lọ mẹ ehe mẹ yẹn basi adọkunnu alọpade he te; yẹn na hla yé dai, dile omẹ de nọ hla visunnu etọn titi he to sinsẹ́n ẹn dai do. 18Whenẹnu wẹ mìwlẹ na lẹ́gọ̀ bo sọ yọ́nvògbingbọn to dódónọ po mẹylankan po ṣẹnṣẹn, to ewọ he to Jiwheyẹwhe sẹ̀n po ewọ he ma to sinsẹ́n ẹn po ṣẹnṣẹn.
Currently Selected:
MALAKI 3: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
