LUKU 16

1E SỌ do hlan nuplọntọ etọn lẹ ga, dọ, Dawe adọkunnọ de ko tin, he do hònkọnsi de: dopolọ wẹ yè jewhè etọn hlan ẹn dọ é to agbàn etọn hen gú. 2E sọ ylọ ẹ, bo dọ hlan ẹn, dọ, Etẹ wẹ Onu he yẹn sè do ogo we he? Jo linlen hònkọnsi tọn towe; na hie ma sọgan sọ yín hònkọnsi dẹn ba gba 3Whenenu wẹ hònkọnsi lọ dọ to ede homẹ, dọmọ, Be etẹ yẹn na wà? na Oklunọ ṣie yí azón hònkọnsi tọn sọn dè wutu yen ma tindo huhlọn nado kùnkó; na biọnupé é hù winyanna mi. 4Yen yón onu he yén na wà, na whenuena yè yàn mi sọn hònkọnsizọn ṣie kọn, na yé nido yí mi do owhé yetọn gbè. 5E ylọ ahótọnọ klunọ etọn tọn lẹ dopodopo, bo dọ hlan tintan, dọ, Akuẹ nẹmu wẹ hie dù do klunọ ṣie? 6E sọ dọmọ, Ojlẹ kanweko amì tọn. E so dọ hlan ẹn, dọmọ, Yí owé towe bo yawu sinai, bo wlanwe kandeao tọn. 7Whenẹnu wẹ é sọ dọ hlan òmẹ devo, dọ, Nemu wẹ hiẹ dù? E sọ dọmọ, Ojlẹ kanweko likun tọn. E sọ dọ hlan ẹn, dọmọ, Yí owé towe, bo wlanwe kanwe tọn. 8Oklunọ sọ pa hònkọnsi mawànugbonọ lọ, na é yí nuyọnẹn do wà ẹ wutu: na ovi whenu he tọn lẹ yín nuyọnẹntọ na whẹndo yetọn titi hú ovi hinhọ́n tọn iẹ 9Yẹn sọ dọ hlan mì, dọmọ, Mì ni yí mamọni mawàdódó tọn do basi họntọn sọn mìde de; dọ, whenuena é fé, yé nido mọ mì yí do gohọtúntún madopodo lẹ lọ mẹ. 10Ewọ he yín nugbonọ to onú pẹvi talala de mẹ, é yín nugbonọ to onú susu mẹ ga: podọ ewọ he yín mawàdódónọ to onú pẹvi talala de mẹ, sọ yín mawàdódónọ to onú susu mẹ ga. 11Enẹwutu, eyín mìwlẹ ma yín nugbonọ to mamoni mawàdódónọ mẹ, mẹnu ka wẹ na yí adọkun nugbo lọ na mì? 12Eyín mìwlẹ ma sọ yín nugbonọ to onú he yín mẹdevo tọn mẹ, mẹnu ka wẹ na na onú he yín mìwlọsu tọn mì? 13Devi de ma sọgan sén klunọ awe; adavo é gbẹwanna ode, bo yiwanna awetọ; kavi yín é ma yín mọ, é na joawu na ode, bo gbẹkọ awetọ go. Mìwlẹ ma sọgan sèn Jiwheyẹwhe po mamọni po gba.

14Falesi lẹ ga, he yín wanyinọ akuẹ tọn sè onú helẹ pó: yé yẹnawọnlin do e. 15E sọ dọ hlan yé, domọ, Mìwlẹ wẹ mẹhe nọ sùwhẹna mìde to gbẹtọ lẹ nukọn; ṣigba Jiwheyẹwhe yón ayiha mìtọn: na onú he yè zé daga to gbẹtọ lẹ; ṣẹnṣẹn, osùnú de wẹ to Jiwheyẹwhe nukon. 16Osén po yẹwhegán lẹ po tin kaka jẹ Johanu whenu; sọn ojlẹ nẹ mẹ gbọn wẹ yè to yewheho ahọludu Jiwheyẹwhe tọn tọn dọ, omẹ dopodopo sọ yí vivẹnu do to e mẹ biọ. 17Ṣigba é bọawú na olọn po aihọn po nado juwayì, hú na yọwhi dopo osén tọn nado fé. 18Mẹdepope he gbé asi etọn dai, bo wlealọhẹ devo de, deayò; mẹdepope he sọ wlealọhẹ mẹhe yè gbẹdai sọn asú de, é deayò.

19Dinvie dawe adọkunnò de tin, he nọ ṣinyọn avọ̀ ogefunwunme, po ala dagbedágbe po, bo sọ tin to ajogidi po osàngùn po mẹ egbésọ-egbésọ: 20nubiọdùtọ de sọ tin, he yè nọ ylọ Lazalọsi, he yè nọ zé do họngbo etọn ji, he gó na agada, 21bo to jijlo yè ni yí jaja; he flẹ́ sọn tafo adọkunnọ tọn ji nẹ̃ dù; mọwẹ, yèdọ avun le sọ wá, bo didó agada etọn 22E sọ wá jọ, nubiọdùtọ kú, yè sọ zé e yì akónnu Ablaham tọn gbọn alọ angẹli le tọn me: adọkunnọ sọ kú ga, yè sọ di i; 23to osiọtòmẹ wẹ é zé nukun etọn daga, tintin to awufiẹsa mẹ, bo mọ Ablaham to aganu, po Lazalọsi po to akónnu eton mẹ. 24E dawhá bo dọmọ, Otọ́ Ablaham, wàlẹblanuna mi, bo do Lazalọsi hlan, na ewọ nido ylọn obénu alọviyẹyẹ etọn tọn osìn mẹ bo do miọn odé na mi; na yen tin to awufiẹsa mẹ to miyọn he mẹ. 25Ṣigba Ablaham, dọmọ, Ovi, flin dọ, to gbéwhenu towe me, hiẹ ko mọ onú dagbe towe yí, podọ Lazalọsi di mọkẹdẹ onú ylanylan lẹ: ṣigba to ofi dinvie, agbasa miọn ewọ, hiẹ sọ tin to awufiẹsa mẹ. 26Podọ to onú helẹ pó mẹ, odògbó de wẹ yè do gbò mí po mì po to ṣẹnṣẹn; sọmọ bọ mẹhe jlo ma sọgan sọn ofi wá mì de, mọ mẹhe sọjlo ma sọgan sọn finẹ wá mí de. 27E sọ dọmọ, Be enẹwutu yẹn vẹ we, oto, na hie ni do e hlan òwhe otọ́ ṣie tọn gbè; 28na yẹn tindo nọvisunnu atọn, na é nido dekunnu hlan yé, yewlẹ ga nikã wá biọ otẹn awufiẹsa ton he mẹ. 29Ṣigba Ablaham, dọmọ, Yé tindo Moṣe po yẹ-whegán le po: ṣigba ye ni sè yé. 30Ewọ sọ, dọmọ, Lala, otọ́ Ablaham; ṣigba eyín mẹde sọn osiọ lẹ mẹ yì yé de, yé na lẹnvọjọ. 31Ewọ sọ dọ hlan ẹn, dọmọ, Eyín ye ma sè Moṣe po yẹwhegán lẹ po, ye ma to na diọ ayiha, eyín mẹde tlẹ fọ́n sọn osiọ lẹ mẹ.

Currently Selected:

LUKU 16: BWL23

Highlight

Copy