JUDA 1
1
1JUDA, afànumẹ Jesu Klisti tọn, nọvisunnu Jakobu tọn, hlan yé he yè ylọ lẹ; mẹyiwanna to Jiwheyẹwhe Otọ́ mẹ, he yè sọ whlá to Jesu Klisti mẹ: 2Lẹblanu, jijọho, po owanyi po, hlan mì ni to susu deji.
3Meyiwanna emi, whenuena yẹn yí vivẹnu lẹpo do wlanwe hlan mì gbọn whlẹngan he to ayà lọ tọn dali, é sọ jẹ na mi nado wlanwe hlan mì, bo sọ yì ohó do jlahomẹdona mì dọ mì ni hòavún zogbe na yise, he yè ko yí hlan mẹwiwe lẹ whladopo. 4Na mẹdele tin bo to linlin wá to nuglọ, ma sọawúhia, to hóho whenu yé he yè dè hlan whẹgbledo he mẹ, gbẹtọ ayihamawenọ, he to ojọmiọn Jiwheyẹwhe mítọn tọn diọ do wantúntún mẹ, bo sọ món Oklunọ Jiwheyẹwhe dopo akàn lọ, po Jesu Klisti Oklunọ mítọn po.
5Dinvie yẹn jlo nado flinnu mì, le mì tlẹ ko yón ehe whladopo, dọ le Oklunọ lọ, whenuena é whlẹn gbẹtọ lẹ de sọn aigba Egipti tọn ji vò, enẹgodo é và yé he ma yise lẹ súdo. 6Angeli he ma sọ nọte Jẹ ogántẹn yetọn lọsu mẹ lẹ, ṣigba bo jo rinnò jlọjlọ yetọn do, é sọ yé whlá to ogàn madopodo mẹ to zinvlu glọ hlan whẹ̀dida azán daho lọ tọn gbè. 7Yèdọ di Sọdọmi po Gọmọla po, po otodaho he lédo yé lẹ po, he yí yéde hlan gàlilọ, bo to tinton hodo agbasalan devo, yè zé do nukọn na ohia, yé to oya ahọsu miyọn madopodo tọn ji. 8Mọkẹdẹ ehelẹ ga to odlọkuku yetọn lẹ mẹ, to agbasalan hẹnflu, yé to ogán vlẹ, bo sọ to nùzan do mẹgángán lẹ go. 9Ṣigba Mikaẹli, ogán angẹli lẹ tọn lọ, whenuena é to wiwọ́hẹ lẹgba, é to tuklajẹ na osiọ Moṣe tọn, ma ha hẹn owhè núzinzan etọn tọn wá jẹ, adavo le é dọmọ, Oklunọ na wọhẹ we 10Ṣigba omẹ helẹ to nùzan do onú he yé ma yọnẹn go: ṣigba onú he yé yọnẹn gbọn jọwamọ dali, onú helẹ mẹ wẹ yé to yéde hẹngble te di gbékanlin. 11Dindọn hlan yé na yé ko jẹ afọ Kaini tọn ji, yé sọ yí awuvivì do dowezun hodo alibubu Balaami tọn na ale, bo sọ dọ̀n to nudindọn Kola tọn me. 12Ehelẹ wẹ osé whiwhla de to owanyi núdùdù mìtọn kọ̀n, whenuena yé to núdú hẹ mì, yé ma sinú nado to yéde kì: aslọ matin osìn wẹ yé, he jẹhọn to tùntùn pé; atin whenufẹ́do, bo matin sinsẹ́n, yé kú whlawe, yè sọ hòn adò na; 13agbowhẹn husìn tọn he to zinzinyẹn bo to fútúfutu winyan yede tọn tún jẹgbonu; sunwhlẹvu he to dindanpé, he yè yí yùdidi zinvlu tọn whlá hlan kakadoi. 14Enọku ga, ome ṣinawetọ sọn Adam whenu, dọdọdai ehelẹ tọn, dọmọ, Do ayi e go, Oklunọ ja po sọhadahogedégéde mẹwiwe etọn lẹ tọn po, 15nado hẹn whẹ̀dida sẹ to omẹ popo ji, podọ nado gblewhẹdo yé he yín mẹylankan lepo to yé ṣẹnṣẹn, na owalọ ylankan yẹtọn he yé ko yí kanyinylan do wà po oho logbologbo yetọn po, he mẹylankan ylandonọ lẹ ko dọ do e go. 16Ehelẹ wẹ hunhluntọ, whẹ̀gbènọ, he to zọnlinzin to wantúntún yede tọn me; onù yetọn sọ nọ to hógblo zingidi daho tọn dọ, bo nọ to mẹhòpón gbẹtọ lẹ tọn dohia na ale wutu.
17Ṣigba mìwlẹ, mẹyiwanna emi, mì nọ flin ohó he yè dọ jenukon gbọn apọsteli Jesu Klisti Oklunọ mitọn tọn lẹ dali; 18le ye dọ hlan mì, dọ, Mevlẹtọ lẹ na tin to ojlẹ godo tọn mẹ, mẹhe na to zọnlinzin to wantúntún ylankan yéde tọn mẹ. 19Ehelẹ wẹ ye he nọ klán yéde dovò, agbasanọ, he ma tindo Gbigbọ lọ. 20Ṣigba mile, mẹyiwanna emi, he hẹn mìde dote to yise wiwewiwe mìtọn ji, bo tó dẹ̀ho to Gbigbọ Wiwe mẹ, 21mì yí mìde whlá to owanyi Jiwheyẹwhe tọn mẹ, bo to tódo lẹblanu Jesu Klisti Oklunọ mítọn tọn hlan ogbẹ madopodo 22To mẹdele ji mì nọ wàlẹblanu, whenuena yé nudòn hẹ mì; 23mẹdelẹ, mì nọ yí osi do whlẹngan, bo nọ dọn yé sọn miyọn mẹ; bo tlẹ nọ gbẹwanna avọ̀ he agbasalan ko dodú ogo na.
24Dinvie hlan ewọ he sogan yí mì whlá sọn ahlidida mẹ, bo sọ hẹn mì wá gigo etọn nukọn to ayajijẹ daho mẹ matin apà, 25hlan Jiwheyẹwhe Whlengantọ mítọn dopo akàn lọ, gbon Jesu Klisti Oklunọ mítọn mẹ, wẹ gigo po gigodaho po, ahọludu po huhlọn po ni tin, jẹnukọnna ojle lepo, podọ dinvie, podọ jẹ whenu lọ lẹpo mẹ. Niṣẹ.
Currently Selected:
JUDA 1: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.