JOHANU 17

1ONÚ helẹ wẹ Jesu dọ, zizé nukun etọn daga hlan olọn, é dọmọ, Otò, ojlẹ lọ wá; pagigona Ovi towe; na Ovi lọ nido pagigona we: 2yèdọ dile hiẹ na asè ẹ to agbasalan lẹpo ji dọ nudepope hiẹ na ẹn ewọ ni na ogbè madopodo yé. 3Podọ ehe wẹ ogbè madopodo, dọ ye ni ylihiẹ sokede Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti. 4Yẹn ko pagigona we to aihọn mẹ; yẹn ko dotana azọn he hiẹ na mi nado wà lọ. 5Dinvie, Otọ́ È, yí dewe titi do pagigona mi po gigo lọ po he yẹn ko tindo to de we whẹpo aihọn do jọ. 6Yẹn ko do oyín towe hia omẹ he hie na mi sọn aihọn mẹ lẹ: towe we yé, hiẹ sọ yí yé na mi; yé ko sọ yín ohó towe. 7Yé ko yọnẹn dinvie dọ, nudepope he hiẹ ko na mi de we wẹ é sọn. 8Ná ohó he hiẹ na mi lẹpo wẹ yẹn ko na hlan yé; yé ko yí yé, bo sọ yọnẹn hézéhezé do, de we we yẹn sọn wá, yé ko sọ yise dọ hiẹ wẹ do mi hlan 9Yen hodè na yé; yen ma hodè na aihọn gba, ṣigba na mẹhe hie yí na mi lẹ; na towe we yé. 10Podọ towe wẹ onú he yín ṣie lepo, towe lẹpo sọ wẹ ṣie; yè sọ to gigopana mi to yé mẹ. 11Dinvie yẹn ma sọ tin to aihọn mẹ ba, ṣigba ehelẹ tin to aihọn mẹ, yen sọ ja de we. Oto Wiwe, whlá yé he hiẹ na mi lẹ to oyín dewe tọn mẹ, na yé ni yín dopo, yèdọ dile mìwlẹ te. 12Whenuena yẹn tin to ye de, yẹn whla yé he hiẹ na mi to oyín towe mẹ: yen sọ hò yé, dopo sọn yé mẹ ma dòn, adavo visunnu vivà tọn; na owé wiwe lọ nido yín didi. 13Dinvie yẹn ja de we; onú hele wẹ yẹn dọ to aihọn mẹ, na yé nido tindo ayajijẹ ṣie to gigọ́ mẹ to yéde mẹ. 14Yẹn ko na ohó towe yé; aihọn sọ gbẹwanna yé, na yé ma yín aihọn tọn wutu, yèdọ dile yẹn ma yín aihọn tọn. 15Yẹn ma basi okanbiọ dọ, hiẹ nido fò yé sọn aihọn mẹ gba, ṣigba dọ hiẹ ni whlá yé sọn oylan mẹ. 16Ye ma yin aihọn tọn, yèdọ dile yẹn ma yín aihọn tọn do. 17Lè yé wé to nugbo towe mẹ: ohó towe wẹ nugbo. 18Dile hiẹ do mi hlan aihọn mẹ; yèdọ mọwẹ yẹn do yé hlan aihọn mẹ. 19Na yé tọn wutu wẹ yẹn lè dẽ wé, na yé lọsu ga nido yín lilẹwé to nugbo lọ mẹ. 20Yẹn ma sọ hodè na ehelẹ kẹdẹ gba, ṣigba na yé ga he na yí mi se gbọn ohó yetọn mẹ lẹ; 21na yé omẹ pó nido yin dopo; yèdọ dile hiẹ, Otọ́, te to yẹn mẹ, bo yẹn tọ hie mẹ, na yewle ga nido yín dopo to mìwlẹ mẹ: na aihọn nido yise dọ hiẹ wẹ do mi hlan. 22Podọ gigo he hiẹ na mi, yẹn ko na hlan yé; na yé nido yín dopo, yèdo dile mìwlẹ yín dopo do. 23Yen to yé mẹ, podọ hie to yen mẹ; na yè nido hẹn ye yín pipe to dopo mẹ; na aihọn nido yọnen dọ hie we do mi hlan, bo sọ yìwanna yé, yedo dile hiẹ yiwanna mi do. 24Otọ́, Enẹlẹ he hiẹ na mi lẹ yẹn jlo dọ ofì he yen te yéwle ga ni tin to dẽ; na yé nido to gigo ṣie he hiẹ ko na mi pọ́n: na hie yiwanna mi jẹnukọnna jijo aihon tọn. 25Otọ́ dodónọ È, aihọn ma yon we: ṣigba yẹn yón we, ehelẹ sọ yonen do hiẹ wẹ do mi hlan. 26Yẹn sọ hen oyín towe zùn yinyonẹn hlan yé, bo nasọ hẹn ẹn zun yinyonẹn: na owanyi ehe hiẹ do yiwanna mi, nido tin to yé mẹ, podọ yẹn to yé mẹ.

Currently Selected:

JOHANU 17: BWL23

Highlight

Copy