Gẹnẹsisi 49

1JAKOBU sọ ylọ hlan visunnu etọn lẹ, bo dọmọ. Mì bé mìde plidopọ, na yẹn nido dọ na mì enẹ he na jọ dọ mì go to azán godotọn lẹ mẹ.

2Mì pli mìde, bo sè, mì visunnu Jakobu tọn lẹ emi;

Bo tùntóai hlan Islaeli otọ mítọn.

3Leubẹni hiẹ wẹ plọnji ṣie, hlọnhlọn ṣie, tintan huhlọn ṣie tọn;

Kiklo yẹyi tọn, po kiklo huhlọn tọn po,

4Wuwlunọ di osìn, hiẹ ma na tindo kiklo lọ gba ;

Na hiẹ hẹ́ji yì adíjzan ot towe tọn ji wutu:

Whenẹnu hiẹ flu i, ewọ hẹ́ji yì aimíọntẹn ṣie.

5Mẹmẹsunnu wẹ Simeoni po Levi po;

Awhànfunnu adingbàndido tọn wẹ ohi yetọn lẹ.

6A alindọn ṣie, a biọ linlẹn yetọn mẹ wá blo;

Hlan oplito yetọn, gigo ṣie, a yín mẹkọndopọhẹ blo;

Na to adisisa yetọn mẹ yé hù dawe de,

To ojlo yetọn titi mẹ yé ko gbòdọ̀nna oyín de.

7Dẹhodo adisisá yetọn yín, na é dobù;

Podọ pludopludo yetọn, na é yín oka:

Yẹn na klán yé to Jakobu mẹ,

Bo sọ gbà yé kija to Islaeli mẹ.

8Juda, hiẹ wẹ mẹmẹsunnu towe lẹ na nọ pa:

Alọ towe na tin to okò kẹ́ntọ towe lẹ tọn go;

Visunnu otò towe tọn lẹ na dé hlan odò to nukọn towe.

9Ovi kinnikinni de tọn wẹ Juda;

Visunnu ṣie, hiẹ ko héaga yì sọn wẹnyannu mẹ:

Ewọ fẹ yì odò, e pàvàva di kinnikinni de,

Podọ di kinnisi de; mẹnu wẹ na fọ́n ẹn tite?

10Ogánpò ma na tọ́nyì sọn Juda,

Kavi opò ogán tọn sọn afọ etọn le ṣẹnṣẹn,

Whẹpo Ṣilo do wá gba;

Hlan é dali wẹ tónusise gbẹtọ lẹ tọn na te.

11Bo nọ sín osvi etọn hlan ovọntin go.

Po kẹtẹkẹtẹvi etọn po hlan ovẹ̃ntin whanpẹnọ go:

E ko yàn avọ̀ etọn lẹ to ovẹ̃n mẹ:

Po awù etọn lẹ po to ohùn vẹ̃nsinsẹ́n lẹ tọn mẹ.

12Yè na yí ovẹ̃n do hẹn nukun etọn lẹ bia,

Bo sọ yí yìnnọ do hẹn adú etọn lẹ wé.

13Zẹbuluni na nọnọ̀ otòpa ohù tọn :

Ewọ wẹ na sọ tín na otọ̀pa ohún lẹ tọn de;

Agbègbè etọn na sọ tin to Zidoni ji.

14Kẹtẹkẹtẹ huhlọnnọ de wẹ Issakali,

He pàvàva to lẹngbọpó lẹ ṣẹnṣẹn:

15E sọ mọ otẹn gbigbọjẹ tọn dọ é yín dagbe,

Podọ aigba lọ yín nújlomẹ;

E sọ dé abò etọn nado hẹnagbàn,

Bo sọ lẹzùn devi de to pakazọn glọ.

16Dani wẹ na nọ dawhẹ̀na omẹ etọn lẹ,

Di dopo sọn whẹndo Islaeli tọn lẹ mẹ.

17Dani na tin di odàn de to aliho ji,

Olòpa de to omọ̀ ji,

He to adúhẹn afọgodo osọ́ tọn lẹ,

Mọ bọ hihétọ etọn jai gbọngodo.

18Yẹn ko dòngbànna whlẹngan towe, OKLUNỌ È.

19Gadi, awhànpa de na yẹnjẹ e ji: Ṣigba ewọ na yẹnjẹ afọgodo yetọn ji.

20Núdùdù etọn sọn Aṣeli na yín ojó,

E na sọ nọ hẹn núvivi ahọlu tọn lẹ wá.

21Naftali wẹ agbànlinsi he gbòkàn de:

E nọ na ohó dagbe lẹ omẹ.

22Ala sinsẹ́nnọ de wẹ Josefu,

Ala sinsẹ́nnọ de to tòsisá de dali;

Ala etọn lẹ dlẹnalọ hó adó ji.

23Gásẹtọ lẹ ko hẹnhòmẹgble nẹ badabada,

Bo sógá do e, bo dohòmẹkẹn ẹn:

24Ṣigba ogá etọn nọte to huhlọn me,

Yè sọ hẹn awà alọ etọn lẹ tọn lẹ yín sinsinyẹn,

Gbọn alọ Omẹ Gángán Jakobu tọn tọn lẹ dali,

Gbọn oyín lẹngbọhọhọtọ lọ tọn da li, zannu Islaeli tọn,

25Yèdọ gbọn Jiwheyẹwhe otọ́ towe tọn dali—ewọ ni gọalọna we!

Podọ gbọn Gánhunupo dali—ewọ ni dona we!

Odona olọn aga tọn lẹ,

Odona odògbo he pàvàva to oglọ tọn lẹ,

Odona anọ lẹ tọn lẹ, po adọ̀ tọn po.

26Odona otọ́ towe tọn lẹ

Yín hlọnhlọnnọ hú odona osé hótótọ lẹ,

Nújlojlo okọta madopòdo lẹ tọn lẹ:

Yé na tin to ota Josefu tọn,

Podọ to ahòndòmẹ ota ewọ he yín kinklan sọn mẹmẹsunnu etọn lẹ mẹ tọn tọn ji.

27Ohla he nọ dọ̀ntlẹn de wẹ Bẹnjamini:

To afọnnu é na hù wẹnyannú dù, Podọ to whèjai é na má ogbànna lọ.

28Ehe lẹpo wẹ whẹndo wiawe Islaeli tọn lẹ: ehe sọ wẹ enẹ he otọ́ yetọn dọ hlan yé bo sọ dona yé; omẹ dopodopo kẹdẹdile odona etọn te wẹ é dona yé. 29E sọ nasẹ yé, bo dọ hlan yé, dọ, Yẹn pó bépli hlan hẹnnumẹ ṣie lẹ de: mì disiọ ṣie dogọ́ otọ́ ṣie lẹ to aigbaslo he tin to danji Ẹfloni Hittinu tọn tọn mẹ, 30to aigbaslo he tin to danji Makpela tọn mẹ, he tin Mamle nukọn, to aigba Kenani tọn ji, he Ablaham hò dogó danji sọn Ẹfloni Hittinu si na nútindo ṣiọditẹn tọn de: 31finẹ yé disiọ Ablaham tọn po Sala asi etọn tọn po do; finẹ yé disiọ Isaki tọn po Lebeka asi etọn tọn po do; finẹ yẹn sọ disiọ Lea tọn do: 32danji lọ po aigbaslo lọ he tin to e mọ po, he yè hó sọn ovi Heti tọn lẹ si.

33Whenuena Jakobu donùna aṣẹnina visunnu etọn lẹ pó, é dòn afọ etọn daga biọ aimlọnnú mẹ, bo jo gbigbọ do, yè sọ bó ẹ pli hlan hẹnnumẹ etọn lẹ de.

Currently Selected:

Gẹnẹsisi 49: BWL23

Highlight

Copy