Gẹnẹsisi 11

1AIHỌN lẹpo sọ yín ogbè doponọ, podọ ohógbè doponọ.

2E sọ wá jọ, le yé sọ jẹgbejizọnlinji sọn whèzẹtẹn dali jei, yé mọ dànfafa de to aigba Sinali tọn ji; yé sọ sinai to finẹ. 3Yé sọ dọ hlan yénọzo, dọ, Mì tónyì, mì gbọ mí ni basi bliki, bo mẹ̀ yé dagbedagbe. Yé sọ tindo bliki na zannu, odòsẹn wẹ yé sọ tindo na wheyinyan. 4Yé sọ dọ hlan yénọzo dọmọ, Mì tònyì, mì gbọ mí ni do tòdalo de na mí, po atọhọ de po, ehe ota etọn na sò olọn, bo gbọ mí ni basi oyín de na mí; yè nikã vúnvún mí pó nukunmẹ aigba tọn lẹpo péte.

5OKLUNỌ sọ jẹte wá nadomọ tòdaho po atọhọ lọ po, ehe ovi gbẹtọ tọn lẹ ko do. 6OKLUNỌ sọ dọmọ, Dayi e go, akọ dopo wẹ gbẹtọ lẹ, ogbè dopo wẹ yé omẹ pó sọ tindo: ehe wẹ núhe yé ṣẹ̀ nado wà: to dinvie yè ma na whlẹn núde do yé gba, he yé ko lẹn nado wà. 7Mì tònyì, mì gbọ mí ni jẹte yì, bo wlu ogbè yetọn to finẹ, na yé nido yòn ogbè yénọzo tọn ba blo.

8Mowẹ OKLUNỌ vúnvún yé pó sọn finẹ yì nukunmẹ aigba lẹpo tọn: yé sọ jodo nado do otò lọ. 9Enẹwutu wẹ yè do ylọ oyín etọn dọ Babẹli: na finẹ OKLUNỌ bó ogbè aigba lẹpo tọn wlu te wutu; podọ sọn finẹ wẹ OKLUNỌ vúnvún yé pé hlan aigba lẹpo ji.

10Ehelẹ wẹ whẹndo Ṣẹm tọn: Sẹm yín owhè kanweko mẹho, bo sọ ji Alpaksadi, owhè awetọ osìngigò tọn godo: 11Ṣẹm sọ nò owhè fowekanweko to godo he é ji Alpaksadi, bo sọ ji visunnu po viyọnnu po.

12Alpaksadi sọ yín owhè gbàntòn meho bo ji Ṣela: 13Alpaksadi sọ nò owhè fowenukunatọ̀n bo ji visunnu po viyọnnu po.

14Ṣela sọ nò owhè ogbàn, bo ji Ebali. 15Ṣela sọ nọ̀ owhè fowenukunatọ̀n to godo he é ji Ebali, bo sọ ji visunnu po viyọnnu po.

16Ebẹli sọ nò owhè gbànnukunẹnẹ, bo ji Pelegi: 17Ebẹli sọ nò to godo he é ji Pelẹgi owhè fowegbàn, bo sọ ji visunnu po viyọnnu po.

18Pelẹgi sọ nọ̀ owhè ogbàn, bo ji Leu: 19Pelẹgi sọ nọ̀ to godo he é ji Leu owhè fọdeṣinẹnẹ, bo sọ ji visunnu po viyọnnu po.

20Leu sọ nò owhè gbànnukunawe, bo ji Selugi: 21Leu sọ nọ̀ to godo he é ji Selugi owhè fọdesinawe, bo sọ ji visunnu po viyọnnu po.

22Selugi sọ nò owhè ogbàn, bo ji Nahọli. 23Selugi sọ nọ̀ to godo he é ji Nahọli owhè fọde, bo sọ ji visunnu po viyọnnu po. 24Nahọli sọ nọ̀ owhè koatònnukunẹnẹ bo ji Tela; 25Nahọli sọ nọ̀ to godo he é ji Tela owhè kanwegbànatọ̀nnukunẹnẹ, bo sọ ji visunnu po viyọnnu po.

26Tela sọ nọ owhè kandegbàn, bo ji Ablam, po Nahọli po, po Halani po.

27Owhẹndo Tela tọn wẹ ehelẹ: Tela ji Ablam, po Nahọli po, po Halani po; Halani sọ ji Loti. 28Halani kú jẹnukọn na Tela otò etọn to aigba he ji é ji i te, to Uli Kaldetọ lẹ tọn. 29Ablam po Nahọli po sọ mọ asi na yéde: oyín asi Ablam tọn tọn wẹ Salai; oyín asi Nahọli tọn tọn wẹ Milka, viyọnnu Halani tọn, otò Milka tọn po otọ̀ Iska tọn po. 30Ṣigba, wẹ̀nsinọ wẹ Salai; é ma tindo ovi de gba.

31Tela sọ yí Ablam visunnu etọn, po Loti visunnu Halani tọn, visunnu visunnu etọn tọn, po Salai asi visunnu etọn tọn po, asi Ablam visunnu etọn tọn; yé sọ tòn hẹ yé yì sọn Uli Kaldetọ lẹ tọn mẹ, nado yì aigba Kenani tọn ji; yé wá Halani, bo sọ sinai to finẹ.

32Azán Tela tọn sọ yín owhè fọdeatọ́n: Tela sọ kú to Halani.

Currently Selected:

Gẹnẹsisi 11: BWL23

Highlight

Copy