2 SAMUẸLI 1:18-27

Ewọ degbèna yé ni plọn ovi Juda tọn lẹ ohàn ogá lọ tọn: dayi e go, yè wlan ẹn do owé Jasali tọn mẹ. Islaeli E, yè hù gigo towe to ofi ylaga towe lẹ ji! Nawẹ yè hẹn huhlọnnọ lẹ jai do le! A dọ ẹ to Gati mẹ blo, A sọ lá ẹ to alihogbo Aṣikelọni tọn lẹ ji blo; Viyọnnu Filistini lọ tọn lẹ nikã jaya, Viyọnnu whẹ́magbonọ lẹ tọn lẹ nikã jaglin. Mì osé Gilboa tọn lẹ, Mi dike ahún kavi jikun tin to mì ji blo, kavi danji avọ́ nunina lẹ tọn lẹ: Na awọ́yínu huhlọnnọ lẹ tọn finẹ yè zédlangbe tata te, Awọ̀yínu Sauli tọn yè ma yí amì do samisisána. Sọn ohùn alántọsiọ lẹ tọn mẹ, sọn ojó huhlọnnọ lẹ tọn mẹ, Ogá Jonatani tọn ma nọ gò do godo, Ohi Sauli tọn ma sọ nọ lẹ́gọ̀ agbá. Sauli po Jonatani po yín mẹvivó podọ vivinọ to ogbẹ́ yetọn lẹ mẹ, Podọ to okú yetọn mẹ yè ma klan yé gba; Yé yín awuyatọ hú akùn lẹ, Yé sọ yín sinsinyẹn hú kinnikinni lẹ. Mi viyọnnu Islaeli tọn lẹ, mi viavi do Sauli ji, Mẹhe nọ doavọ̀ mì to avọ̀vẹ̃ṣẹṣẹ mẹ po awuvivi po, Mẹhe nọ yí asọdonu sika tọn lẹ do aṣọvò mìtọn ji. Nawẹ yè hẹn huhlọnnọ lẹ jai to ogbla awhànfuntẹn tọn mẹ do le! Yè hù Jonatani to ofi yìaga towe lẹ ji. Yè hẹn nukunbia mi na we, nọvisunnu ṣie Jonatani: Vivinọ talala hiẹ ko yín hlan mi: Owanyi towe hlan mi yín nújiawu, Zizẹ̀ owanyi yọnnu lẹ tọn go. Nawẹ yè hẹn huhlọnnọ lẹ jai do le, Bọ sunnuwànu awhàn tọn lẹ sọ dọn!