1 AHỌLU LẸ 5

1HILAMI ahọlu Tile tọn sọ do mẹdagun etọn lẹ hlan Sọlọmọni; na ewọ sè dọ yé ko sámina ẹn na ahọlu do otẹn otọ́ etọn tọn mẹ: na Hilami ko yín mẹyiwannanọ Davidi tọn dai de. 2Sọlọmọni sọ domẹhlan Hilami de, dọmọ, 3hiẹ yẹ́n len dọ Davidi otó ṣie ma sọgan dó ohọ̀ de na oyín OKLUNỌ Jiwheyẹwhe etọn tọn do na awhàn lẹ he tin lẹ́do e pé to awà lẹpo ji, kaka OKLUNỌ do yí yé do oglọ afọgbẹn afọ etọn lẹ tọn glọ. 4Ṣigba dinvie OKLUNỌ Jiwheyẹwhe ṣie ko na ogbọjẹ mi to awà lepo ji; mẹglatọ de ma tin gba kavi nujijọ oylan de. 5Bo, dayi e go, yẹn to lilẹn nado dó ohọ̀ de na oyín OKLUNỌ Jiwheyẹwhe ṣie tọn, dole OKLUNỌ dọ hlan Davidi otọ́ ṣie do, dọmọ, Visunnu towe, mẹhe yẹn na zé do ofìn towe ji to otẹn towe mẹ, ewọ wẹ na dó ohọ̀ lọ na oyín ṣie. 6Enẹwutu dinvie hiẹ ni degbè na yé ni zẹ̀ atin kedali lẹ na mi sọn Lebanọni; mẹmẹsi ṣie lẹ na sọ tin po mẹmẹsi towe lẹ po; ẹn na na azénkuẹ we na mẹmẹsi towe lẹ ẹdẹdi ehe hiẹ na dọ lepo: na hiẹ yọnẹn do mehe wàna nado zé whlẹtitli sẹ́jlẹ do Zidoninu lẹ go depope ma tin to míwlẹ ṣẹnṣẹn gba. 7E sọ wá jọ, whenuena Hilami sè ohó Sọlomọni tọn lẹ, wẹ ewọ jaya talala, bo dọmọ, Donanọ OKLUNỌ ni yín to egbé, he ko na hlan Davidi visunnu nuyọnẹnnọ de do omẹ planplan helẹ ji. 8Hilami sọ domẹhlan Sọlọmọni de, dọmọ, Yẹn ko sè owèn he hie do hlan mi: yẹn na wà ojlo towe lẹpo gbọn whlẹtitli kedali tọn tọn dali, po gbọn whlẹtitli fìli tọn po tọn dali. 9Memẹsi ṣie lẹ na hẹn yé jẹte sọn Lebanọni wá jẹ ohù tó: yẹn na basi yé do asalo le mẹ nado gbon ohù mẹ jẹ ofi he hiẹ na dèna mi, yẹn na sọ hẹn yé nado yín gbigbà to fine, hiẹ na sọ mọ yé yí: hiẹ na yí ojlo ṣie basi, to nina núdùdù na whédo ṣie mẹ. 10Mowẹ Hilami na whletitli kedali tọn po whlẹtitli fili tọn po Sọlọmọni kẹdẹdi ojlo etọn lẹpo 11Sọlọmọni sọ na ojlẹ fọtọ́n oko oli tọn Helami na nududù hlan whédo etọn, po ojlẹ fọton oko ami dagbe tọn po: le wẹ Solọmọni nọ na hlan Hilami to whèmẹ whèmẹ. 12OKLUNỌ sọ na nuyọnẹn Sọlọmọni, dile é gblọnadan nẹ̃ do; jijọho sọ tin to Hilami po Sọlọmọni po ṣẹnṣẹn; yé omẹ awelẹ sọ basi alẹ̀gbè de dopọ.

13Sọlọmọni ahọlu sọ fọ́n sẹ̀njọtọ lẹ de sọn Islaeli lẹpo mẹ; sẹ̀njọtọ lẹ lọ yin gbẹtọ fọtọ́n ogbàn. 14E sọ nọ do yé hlan yì Lẹbanọni, fọtọ́n ao to osùn de mẹ gbọn hamẹ hamẹ: osùn de yé tin to Lẹbanọni mẹ, osùn awe to whégbe: Àdonilami wẹ tin to sẹ̀njọtọ lẹ lọ ji. 15Sọlọmọni sọ tindo fọtọ́n kandegban he to agbàn lẹ hẹn, podọ fọtọ́n kanwe he yín whlẹdètọ lẹ to osé lẹ mẹ; 16dogọ́ ogándaho nukọntọ Sọlọmọni tọn lẹ he tin to azọ́n lọ ji, fọtọ́n atọ̀n po kanweko po, he hẹn gándùdù to omẹ he nọ wàna to azọ́n lọ me lẹ ji. 17Ahọlu sọ degbè, yé sọ dè zannu daho lẹ, zannu akuegégénu le, nado yí zannu ana tọn do tó dòdó ohò lọ tọn. 18Họdótọ Sọlọmọni tọn lẹ po hòdótọ Hilami tọn lẹ po po Gebalinu le po do yé, bo sọ wleawu whlẹtitli po zannu lẹ po tọn nado dó ohọ̀ lọ.

Currently Selected:

1 AHỌLU LẸ 5: BWL23

Highlight

Copy