1 AHỌLU LẸ 2

1DINVIE azán Davidi tọn lẹ dọ̀n sẹpo bọ é na do kú; e sọ nasẹ Sọlọmọni visunnu etọn, dọmọ, 2Yẹn jei aliho aihọn lẹpo tọn ji: enẹwutu hiẹ ni yín huhlọnnọ, bo do dewe hia di sunnu; 3bo yìn asẹ OKLUNỌ Jiwheyẹwhe towe tọn, nado nọ zinzọnlin to aliho etọn lẹ ji, nado nọ yìn osẹ́ndoai etọn lẹ, po gbèdide etọn lẹ po, po whẹ̀dida etọn lẹ po, po aṣedai etọn lẹ po, kẹdẹdi enẹ he yè kàn do osẹ́n Moṣe tọn mẹ, na hiẹ nido dota to ehe hiẹ to wiwà lẹpo mẹ, podọ to fidepope hiẹ lé dewe hlan: 4Na OKLUNỌ nido hẹn ohó etọn he é dọ gbọn yẹn tọn dali lódo, dọmọ, Eyín ovi towe lẹ́ payi hlan aliho yetọn, nado nọ zinzọnlin to nukọn ṣie to nugbo mẹ po ayiha yetọn lẹpo po po alindọn yetọn lepo po, omẹ dopo ma na dẹ́n we (wẹ é do) to, ófin Islaeli tọn ji gba. 5Mọwẹ hiẹ yọnẹn ga núhe Joabi visunnu Zeluia tọn wà hlan mi, yèdọ núhe é wa hlan awhàngán awe awhànpa Islaeli ton lẹ tọn lẹ, hlan Abnẹli visunnu Nẹli tọn, podọ hlan Amasa visunnu Jeteli ton, mẹhe é hù, bo kòn ohùn awhàn tọn dai to jijoho mẹ, bo sá ohùn awhàn tọn do gbaja etọn go, he tin to alinkan etọn, podọ do afọpa he tin to afọ etọn lẹ go. 6Enẹwutu wà kẹdedi nuyọnẹn towe, a dike ota wéwé etọn jẹte yì kutòmẹ to jijọho mẹ blo. 7Ṣigba do dagbewa hia hlan visunnu Balzilai Gileadinu lọ tọn lẹ, bo gbọ yé ni tin to yé he to núdù to tafo towe kọ̀n lẹ mẹ: na mọwẹ yé wá dè do whenuena yen họ̀nyì sọn Absalọmi nọvisunnu towe de. 8Bo, dayi e go, Ṣimei visunnu Gela tọn, Benjamininu, Bahulimi tọn, tin to de we, mẹhe yí dẹhodo adinọ de do hodẹ̀do mi to azán he gbè whenuena yen jei Mahanaimi: ṣigba é jẹte wá nado pé mi to Jodani, yẹn sọ whle hlan ẹn gbọn OKLUNỌ dali, dọmọ, Yẹn ma na yí ohi do hù we gba. 9Enẹwutu dinvie a hẹn en matin whẹgbledo blo, na nuyọnẹntọ de we hiẹ; hiẹ na sọ yọn núhe hiẹ mọjẹ nado wà hlan ẹn, bọ hie na sọ hẹn ota wéwe etọn jẹte wá kutòmẹ po ohùn po. 10Davidi sọ damlọn hẹ otọ́ etọn le, yè sọ di i do tòdaho Davidi tọn me. 11Azán he Davidi dùahọlu to Islaeli ji lẹ yín owhè kande: owhè ṣinawe é do dùahọlu to Heblọni mẹ, owhè ogbàn po atọ̀n po é do dùahọlu to Jelusalẹm mẹ.

12Sọlọmọni sọ sín ofìn Davidi otọ́ etọn tọn ji; yè sọ hẹn ahọludù etọn lódo talala 13Whenẹnu we Adonija visunnu Haggiti tọn sọ wá Bati-seba onọ Sọlọmọni tọn de. Ewọ sọ dọmọ, Jijọho hiẹ do wá? E sọ dọmọ, Jijọho tọn wẹ 14E sọ dọ humọ dọmọ, Yẹn tindo núde nado dọ hlan we. Ewọ sọ dọmọ, To didọ. 15Ewọ sọ dọmọ, Hiẹ yọnẹn dọ ahọludù lọ ṣie wẹ, podọ Islaeli lẹpo wẹ zé nukunmẹ yetọn lẹ do ogo e, dọ yẹn ni do dùahọlu: sọgan yè lẹ ahọludù lọ pé, yè sọ hẹn yín nọvisunnu ṣie tọn na etọn é yín sọn OKLUNỌ de. 16Dinvie yẹn biọ ovẹ̀nú dopo sọn de we, a whlẹn do mi blo Ewọ sọ dọ hlan ẹn dọmọ, To didọ. 17E sọ dọmọ, Yẹn vẹ̀ we doho hlan ahọlu Sọlọmọni, (na é ma to na dọ lala na we gba,) dọ ewọ ni na mi Abisagi Sunaminu hlan asi. 18Bati-seba sọ dọmọ, Dagbedagbe; yẹn na dọhó hlan ahọlu na we. 19Enẹwutu Bati-seba yì ahọlu Sọlọmọni de, nado dọhó hlan ẹn na Adonija. Ahọlu sọ fọ́ntite nado pé e, bo dẹ́ ede hlan ẹn, bo sọ sinai do ofìn etọn ji, bo hẹn ofìn de nado yín titẹ́ na onọ ahọlu tọn; ewọ sọ sín adusilọ etọn mẹ. 20Whenẹnu wẹ é dọmọ, Yẹn to kanbiọ pẹvi de biọ sọn de we; a whlẹn do mi blo. Ahọlu sọ dọ hlan ẹn dọmọ, Onọ ṣie, to bibiọ: na yẹn ma na whlẹn do we gba. 21E sọ dọmọ, Gbọ yè ni yí Abisagi Sunaminu lọ na Adonija nọvisunnu towe hlan asi. 22Ahọlu Sọlọmọni sọ gblọn bo dọ hlan onọ etọn dọmọ, Etẹwutu wẹ hiẹ to Abisagi Sunaminu lọ biọ na Adonija? biọ ahọludù lọ nẹ̃ ga; na ewọ wẹ nọvisunnu ṣie daho; yèdọ nẹ́, podọ na Abiatali yẹwhenọ lọ, podọ na Joabi visunnu Zeluia tọn. 23Whenẹnu wẹ ahọlu Sọlọmọni whle gbọn OKLUNỌ dali, dọmọ, Jiwheyẹwhe ni wà mọ hlan mi, podọ humọ ga, eyín Adonija ma ko dọ ohó he do ogbẹ́ etọn lọsu go. 24Enẹwutu dinvie dile OKLUNỌ to ogbè, mẹhe hẹn mi lódo, bo sọ zé mi do ofìn Davidi otọ́ ṣie tọn ji, mẹhe ko basi owhé de na mi, dile é gblọnadan do, magblemagble yè na hù Adonija to egbé. 25Ahọlu Sọlọmọni sọ domẹhlan gbọn alọ Benaia visunnu Jehọiada tọn tọn mẹ; ewọ sọ jẹ e ji, bọ é kú. 26Podọ hlan Abiatali yẹwhenọ lọ ahọlu dọmọ, Hẹn we yì Anatoti, jẹ odàn towe titi ji; na hiẹ tin jẹna okú: ṣigba yẹn ma to na hù we to ojlẹ he mẹ gba, na hiẹ to alki OKLUNỌ Jiwheyẹwhe tọn hẹn to Davidi otọ́ ṣie nukọn wutu, podọ na yè bianukunna hiẹ to popo mẹ fie yè bianukunna otọ́ ṣie te wutu. 27Mowẹ Sọlọmọni dè Abiatali tón sọn yínyín yẹwhenọ hlan OKLUNỌ mẹ; na ewọ nido hẹn ohó OKLUNỌ tọn di, ehe é dọ gbọn owhé Eli tọ́n tọn dali to Ṣilo mẹ. 28Linlin sọ wá Joabi de: na Joabi ko lẹ́ do Adonija godó; le é ma tlẹ lé do Absalọmi godo. Joabi sọ họ́nyì Gohò OKLUNỌ tọn lọ kọ̀n, bo tẹ́ do azò agbà tọn lẹ go. 29Yè sọ dọ na ahọlu Sọlọmọni dọmọ, Yè hẹn Joabi họ́nyì Gohọ́ OKLUNỌ tọn lọ kòn, bo, dayi e go, ewọ tin to agbà lọ go. Whenẹnu wẹ Sọlọmọni do Benaia visunnu Johọiada tọn hlan, dọmọ, Yì, jẹ e ji. 30Benaia sọ wá Gohò OKLUNỌ tọn lọ kọ̀n, bo dọ hlan ẹn dọmọ, Le wẹ ahọlu dọ, Tọ́n wá. Ewọ sọ dọmọ, Lala; ṣigba yẹn na kú to ofi Benaia sọ vọ́ ohó hẹn wá ahọlu de, dọmọ, Le wẹ Joabi dọ, le wẹ é sọ gblọnna mi. 31Ahọlu sọ dọ hlan ẹn dọmọ, Wà dole e dọ do, bo jẹ e ji, bo di i; na hiẹ nido dè ohùn lọ sè, ehe Joabi kòndai matin whẹhó, sọn yẹn ji podọ sọn owhé otọ́ ṣie tọn ji. 32OKLUNỌ sọ gò ohùn etọn do ota etọn lọsu ji, na é jẹ omẹ dódónọ pọntenọ awe hú ewọ ji, bo yí ohi do hú yé wutu, bọ Davidi otọ́ ṣie ma yón ẹn, nado yọnẹn, Abnẹli visunnu Nẹli tọn, awhàngán awhànpa Islaeli tọn tọn, po Amasa po visunnu Jetẹli tọn, awhàngán awhànpa Juda tọn tọn. 33Mọwẹ ohùn yetọn na gò do ota Joabi tọn ji, podọ do ota okún etọn tọn ji kakadoi: ṣigba hlan Davidi, podọ hlan okún etọn, podọ hlan owhe etọn, podọ hlan ofìn etọn, wẹ jijoho na tin kakadoi sọn OKLUNỌ de. 34Whenẹnu wẹ Benaia visunnu Jehọiada tọn lọ hẹji yì, bo jẹ e ji, bo hù i; yè sọ di i do owhé etọn titi gbè to zùngbo lọ mẹ. 35Ahọlu sọ dè Benaia visunnu Jehọiada tọn lọ do otẹn etọn mẹ do awhànpa lọ ji: Zadọki yẹwhenọ we ahọlu sọ dè do otẹn Abiatali tọn mẹ. 36Ahọlu sọ domẹhlan bo ylọ na Ṣimei, bo dọ hlan ẹn dọmọ, Dó ohọ̀ de na we do Jelusalẹm mẹ, bo nọnọ̀ finẹ, a tọ́n sọn flẹn yì fidepope blọ. 37Na azán he gbè hiẹ yì gbonu, bo juyì tòpẹsẹ Kidlọni gododọ̃n, hie ni yọnẹn na nugbo dọ hiẹ na kú nugbonugbo: ohùn towe na sọ tin to ota towe lọsu ji. 38Ṣimei sọ dọ hlan ahọlu dọmọ, Didọ lọ yín dagbe: le ahọlu klunọ ṣie dọ do, mọwẹ mẹmẹsi towe na wà do. Ṣimei sọ nò Jelusalẹm mẹ azán susu. 39E sọ wá jọ to opòdo owhè atọ̀n tọn, wẹ mẹmẹsi awe sọn Ṣimei tọn lẹ mẹ sí yì Lakisi, visunnu Maaka tọn, aholu Gati tọn. Yè sọ dọ na Ṣimei, dọmọ, Dayi e go, mẹmẹsi towe lẹ tin to Gati mẹ 40Ṣimei sọ fọ́ntite, bo blapana kẹtẹkẹtẹ etọn bo yì Gati to Lakisi de, nado din mẹmẹsi etọn lẹ: Ṣimei sọ yì bo hẹn mẹmẹsi etọn lẹ sọn Gati wá. 41Yè sọ dọ ẹ na Sọlọmọni do Ṣimei ko yì sọn Jelusalẹm jẹ Gati, yè sọ vó hẹn ẹn gò. 42Ahọlu sọ domẹhlan bo ylọ na Ṣimei, bo dọ hlan ẹn dọmọ, Bé yẹn ma hẹn we whle gbọn OKLUNỌ dali, bo sọ sahẽlu hlan we, dọmọ, Yọnẹn na nugbo, dọ to azán he gbè hiẹ tón yì, bo zinzọnlin dlu yì ofi depope, hiẹ na kú nugbonugbo? bọ hiẹ sọ dọ hlan mi dọmọ, Didọ he yẹn sè lọ yin dagbe? 43Etẹwutu wẹ hiẹ ma ko payi whiwhle OKLUNỌ tọn go, po gbèdide he yẹn ko yí do nasẹ we po? 44Ahọlu sọ dọ humọ hlan ṣimei dọmọ, Hiẹ yọ́n ylankanwiwà lẹpo he ayiha towe yin kunnudetọ hlan, he hiẹ wà hlan otọ́ ṣie Davidi: enẹwutu OKLUNỌ na gọ́ ylankanwiwà towe do ota towe lọsu ji. 45Ṣigba ahọlu Sọlọmọni na yín donanọ, podọ ofìn Davidi tọn na yín hẹn lódo to OKLUNỌ nukọn kakadoi. 46Mowẹ ahọlu degbèna Benaia visunnu Jehọiada tọn; ewọ sọ tónjẹgbonu, bo jẹ e ji, bọ ewọ kú. Yè sọ hẹn ahọludù lódo to alọ Sọlọmọni tọn mẹ.

Currently Selected:

1 AHỌLU LẸ 2: BWL23

Highlight

Copy