Malika 16

Ukusyuka kwa Jesụ

(Mat. 28:1-10; Luk. 24:1-12; Joh. 20:1-10)

1Lelo po papo bo akīndịle sabāti, ba Malịja ugwa mụ Magatala na Malịja unna gwa Jakobụ, na Salome, balinkūla īnyēmba īnụ̄nga ukuti babūke kukumpaka. 2Nulubūnju fị̄jo pị̄sịku ilịtasị ilya panndūngu, balinkubūka kwịpūmba bo ilị̄suba lisōkịle. 3Balinkujobesanịa balinkuti: Jwanị ịkwakutusegulilaga ilị̄bwe pakifịgo kya ịpūmba? 4Lelo bo bịkukēta, balinkwaga ilị̄bwe lisegulị̄gwe, namanga lyali īnywamụ fị̄jo. 5Lelo bo bịkwịngila mwịpūmba, balinkummbona unndumyana uju āfwele unselekesye umwelụ atūgēsye kukị̄līlo, balinkunyomoka fị̄jo. 6Umwene alinkuti: Komma ukunyomoka, mụkunndōnda Jesụ gwa mụ Nasaletị, uju ākōmelị̄gwe pakikohekano, asyukịle akajamo mụno; kēta apa bālinndambalị̄ke. 7Lolị amụbūkege mụkababūlege abafụ̄ndịgwa bāke na ju Petelị mụkātigi: Ịkubatalilangapo ukubūka mụ Galịlaị, mo mwịsakwakummbonaga bo mụmo ābabulị̄le. 8Po papo balinkusōka mwịpūmba, balinkubopa, namanga bātetemaga, kangi ikīswigu kyabāgị̄le, balinkusịta nukummbūla umụ̄ndu najumo papo bātị̄laga.

Jesụ ịkunsetukila Malịja gwa mụ̄ Magatala

(Mat. 28:9-10; Joh. 20:11-18)

[ 9Umwene Jesụ bo asyukịle nulubūnju pị̄sịku ilịtasị ilyapanndūngu, alinkutala ukunsetukila Malịja gwa mụ Magatala, uju alinsōsịsyemo īmbepo īnyalị ịhāno na ịbili. 10Po papo umwene Malịja alinkubūka alinkwakubabūla aba bājaga nagwe bwịla, aba bāsụlụmēnịe bālilaga. 11Bo bapilị̄ke ukuti mūmị, nukuti ansetukị̄le, balinkusịta nukwịtika.

Jesụ ịkubasetukila abafụ̄ndịgwa babili

(Luk. 24:13-35)

12Pānyụma pali isị bo ịjandusēnịe, alinkubasetukila abafụ̄ndịgwa babili aba bēndaga ukubuka mmịgūnda. 13Balinkubūka balinkwakubabūla abị̄nābo; bope na bababa balinkusịta nukwịtika.

Jesụ ịkubasetukila bala kalōngo na jumo

(Mat. 28:16-20; Luk. 24:36-49; Joh. 20:19-23; Batu. 1:6-8)

14Ulwanyụma kangi alinkubasetukila bala kalōngo na jumo bo batūgēle pakulya; alinkubūmanịla panōngwa ja kusịtakwịtika kwabo nubukafụ bwa ndụmbụla syabo, papo bakābịtikaga aba bālimmbwene bo asyukịle. 15Alinkubabūla alinkuti: Amụbūkege nkị̄su kyosa, mụkalụmbililege īnōngwa īnụnụ kufịpelịgwa fyosa. 16Uju linga ịkwịtika ịkuti nukōsịgwa jo ịsakupokịgwaga, lolị uju linga atịkwịtika jo ịsakulōngịgwaga po papo. 17Lolị aba bịkwịtika bịsakupēgịgwaga amaka ga kupela ifị̄ka bo ifị: Bịsakusịsōkesyaga īmbepo īnyalị mụngamụ jangu, bịsakujobelaga mụndimị īmbya. 18Bịsakusịkolaga ịtolo īnjoka; linga bịkunwa fịmo ifya kugoga, fịtịsakubabōmbelaga nafịmo, kangi bịsakubabikangapo amaboko ababịne, lelo po bēnde nukupona.

Jesụịkwegịgwa ukufyuka kumwanya

(Luk. 24:50-53)

19Po papo lelo bo Untwa Jesụ ajobịle nabo, alinkwegịgwa ukufyuka kumwanya, alinkwịtūgasya kukiboko ikị̄līlo kya Kyala. 20Po papo abēne balinkubūka balinkwakulūmbilila mōsamōsa, umwene alinkuja pamopēne nabo pambōmbo jabo, alinkulikasya ilịsyu nifị̄ka ifị fyakōnganaga nalyo.]

Currently Selected:

Malika 16: NYB96

Highlight

Copy