Luka 2

Ukupāpịgwa kwa Jesụ

(Mat. 1:18-25)

1Mmasịku galagala umalafyale Kesale Agusịtị alinkulagila ululagilo ulwakuti babalịgwege abāndu ikị̄su kyake kyosa, basị̄mbịgwege mwa kalata. 2Bo kukwịsa ukubalịgwa ukutasị kukūku, Kịlene āli jo, nndindilila kị̄su gwa mụ Sịlịja. 3Po papo bōsa balinkubūka kukusị̄mbịgwa, uju kukāja kāke uju kukāja kāke. 4Jope Josefụ alinkufyuka ukufụma mụ Galịlaị, alinkufụma nkāja ka Nasaletị, ukubūka mụ Jụtaị, nkāja ka Ndabitị aka bịkuti Betelehemụ, namanga umwene āli gwa kikolo kya nyụ̄mba ja Ndabitị, 5alinkwakusị̄mbịgwa pamopēne nu nsịngilịgwa gwake, Malịja, uju āli nikifụba. 6Lelo bo bali kulakula, kalinkufịka akabalilo kākupāpila umwana. 7Alinkumpapa umwana unndumyana ugwa kwanda, alinkunnịembetēlela mmyenda, alinkunndambalika nkipōndo kya kulīlamo īng'ōmbe, papo bukālimo nabumo ubujo nnyụ̄mba ja bahēsya.

Abāndumị na batị̄mị

8Bālimo abatị̄mị bamo nkị̄su mụmo, aba bāgonaga mụ ngubo, bo bịkutị̄ma imịtị̄mo gyabo gya ng'ōsị. 9Po papo alinkubasetukila ugwandumị gwa NTWA, ubukulūmba bwa NTWA bulinkubamụlika. Balinkutetema fị̄jo. 10Lolị ugwandumị alinkubabūla alinkuti: Mụngatetemaga! Mmbatwalị̄le īndumị īnụnụ, ijakusekela fị̄jo abāndu bōsa. 11Liịsịku lya mụ̄syugu lilīli apāpị̄gwe Umpokị, Kilisịtị UNTWA, nkāja ka Ndabitị. 12Isị sịsakubanāngisyaga umwe syo isị: Mwịsakummwagaga umwana umfyele anịembetelelịgwe mmyenda alambalēle nkipōndo kya kulīlamo īng'ōmbe. 13Nakalīnga ịtolo kilinkuboneka pamopēne nu gwandumị ikilūndilo ikikulūmba kya bandumị ba kumwanya kịkuntụ̄fya ni nyīmbo Kyala ukuti:

14Īmikịgwege Kyala kumwanya,

ulutēngāno lujege pakị̄su,

kuli aba bankyelịle umwene.

15Lelo bo abāndumị basōkịlepo palapala bagomokịle kumwanya, abatị̄mị balinkujobesania balinkuti: Tubūke ku Betelehemụ tukasịkēte isị sịbonị̄ke isị UNTWA atubūlịle. 16Po papo balinkukūja ukubūka, balinkummwaga Malịja na Josefụ naju mwana bo alambalēle nkipōndo kya kulīlamo īng'ōmbe. 17Lelo bo bammbwene po balinkwenda nukusịfụmụsya mōsa isị bāpilị̄ke isya mwana jujuju; 18bōsa aba bāsịpilị̄ke balinkusị̄swiga isị abatị̄mị bababūlịle. 19Lolị Malịja jo alinkugabīka amasyu gōsa gagaga, alinkugị̄nogona mụndụmbụla jake. 20Po abatị̄mị balinkugomoka balinkummwimika nukumpāla Kyala kuli syosa isị bāpilị̄ke nukusịbona bo mụmo bāpāngilị̄gwe.

Jesụ ịkupēgwa īngamụ

21Lelo kubumalīkisyo bwa masịku lwele, bo abụ̄tị̄gwe kukyenị alinkupēgwa īngamụ ja Jesụ, iji ājijobịle ugwandumị bo nunna akāli nukukaba ikifụba.

Jesụ ịkutwalịgwa nnyụ̄mba īnyị̄kemo

22Po papo pakabalilo kakubōmbela ubunyago bwa kwelusịgwa, Josefụ na Malịja, bo mụmo ululagilo lwa Mose lwajīlị̄le, balinkummwega umwanịke ukuntwala ku Jelụsalemụ kukumpa UNTWA, 23bo apa sịsị̄mbị̄gwe mụngomēlesyo sya NTWA, ukuti umwana gwa kipānda gwesa unndumyana ịsakujobịgwaga ukuja kāndu kị̄kemo ka NTWA. 24Kangi balinkubūka kōpe na kukwịkemēsya utukūnde utukeke tubili bo mụno sịkulōndelịgwa mụngomēlesyo sya NTWA. 25Lelo ālimo jumo umụ̄ndu mụ Jelụsalemụ uju āli jo Sịmyonị īngamụ, umụ̄ndu jujuju āli nngolofụ antị̄laga Kyala, āliswịle Mbepo Mwịkemo, alinkugụ̄lila ulusūbisyo lwa Ịsịlaelị. 26Mbepo Mwịkemo ālimmbūlịle ātịle: Utịsakukubonaga ukufwa ugwe bo tāsị ukammbona ukāndambilengeko Kilisịtị gwa NTWA. 27Lelo bo Sịmyonị ansụkēnịe Mbepo alinkwịngila nnyụ̄mba īnyị̄kemo. Bo abapāpị bantwele umwanịke Jesụ nnyụ̄mba īnyị̄kemo nkummbōmbela isị syalōndịgwaga ukusịbōmba ukukōngana ni ndagilo, 28Sịmyonị alinkummwega umwanịke mmaboko gāke alinkugwa ulupị alinkuti: 29Lilino lelo gwe NTWA unndekesye ummbōmbị gwako, abūkege nulutēngāno bo papa gwajobịle: 30buno amāso gangu gabubwene ubupokị bwako, 31ubu ugwe utendekị̄sye bo bịkukēta abāndu bōsa, 32ulumụlị lwa kusetula isị usịganịle kubāpānja na kutwala kubakulūmba ku bāndu ba Ịsịlaelị.

33Ugwịse gwa mwanịke nunna balinkuswịga kunōngwa isị Sịmyonị annjobaga. 34Sịmyonị alinkubasaja kangi alinkujoba kwa Malịja unna alinkuti: Umwanịke uju asalị̄gwe na Kyala ukuja gwa lupyụto kangi gwabupokị bwa bāndu bị̄ngị mwa Ịsịlaelị, kangi bị̄ngị bịsakunkānaga, 35ulūbo lwịsakukulasaga lutụbusanịege mmōjo gwako jujugwe nụngwe, ukuti īnyịnogono sya kubutị̄tu sya bāndu bị̄ngị sịkị̄ngulịgwege.

36Ālịko unkụ̄ngụlụka unkị̄kulu umfwile uju īngamụ jake āli jo Ana, ali mwana gwa Fanwelị, ugwa kikolo kya Aselị; āli nkāngale fị̄jo. Ukufụma nkwegịgwa āgonịle nunndume ifyinja fịhāno na fịbili, 37mbufwile āgonịle mpaka ukwịsakufịka bo āli ni fyinja amalōngo lwele na fịna. Akāsōkāngamo nnyụ̄mba īnyị̄kemo alinkummbōmbela Kyala alinkufịpīka ifị̄ndu nukwịpụ̄ta pamụ̄sị na pakilo. 38Po papo alinkwịsa pakabalilo kāko, alinkugwa ulupị kwa Kyala alinkumfụmụsya kuli bōsa aba bāgụ̄lilaga ukubāngịgwa kwa Jelụsalemụ.

Ukugomokela ku Nasaletị

39Lelo bo bamalịle ukubōmba syosa ukukōnga bo mụno ululagilo lwa NTWA lwajīlị̄le balinkugomokela mụ Galịlaị kukāja kābo, Nasaletị. 40Po papo umwanịke alinkukula alinkuja namaka, alinkwịsula amahala; niịpyana lya Kyala lilinkuja nagwe.

Unndumyana Jesụ nnyụ̄mba īnyị̄kemo

41Lelo kukuti kyinja abapāpị ba Jesụ bābūkaga ku Jelụsalemụ kukulya ikyaka kya Pasa. 42Lelo bo Jesụ alinifyinja kalōngo nafịbili balinkubūka bo mụmo ulwịho lwajīlị̄le. 43Bo ikyaka kimalị̄ke balinkugomokela kukāja, lolị unndumyana Jesụ alinkusyala mụ mụ Jelụsalemụ. Sịsịsị syo bakāsịmēnye abapāpị bāke; 44bịnogonaga ukuti alịmo nkilūndilo kila, bo bēndịle ilị̄sịku lyosa balinkwanda ukunndōnda mbakamụ bābo na mbamanyānị bābo. 45Bakālimmwagịle po papo balinkugomoka ukubūka ku Jelụsalemụ kukunndōnda. 46Pị̄sịku lya butatu balinkummwaga nnyụ̄mba īnyị̄kemo atūgēle na bamanyịsị Abajụ̄ta, bo ịkubapilikisya nukubalālūsya isya kubalālūsya; 47bōsa aba bāpilikaga bo ịkujoba balinkuswịga fị̄jo ukusyaganịa kwake nukwamụla amalālūsyo. 48Lelo bo bammbwene bāswịgịle fị̄jo; unna alinkujoba nagwe alinkuti: Mwanāngu ko kuti fịkị ukuti utubōmbelege bo sịsịsị? Ugūso nanịne īndụmbụla syitu syali mmwanya pakukulōnda. 49Umwene alinkubāmụla alinkuti: Mwandōndaga fịkị? Mukāsịmēnye ukuti une kumbagị̄le ukuja nnyụ̄mba ja Tāta. 50Abēne balinkusịta ukusyaganịa isị ājobaga nabo. 51Po papo alinkwikilila nabo balinkwakufịka mụ Nasaletị, alinkwịlāmba kubapāpị bāke; Unna alinkusịbīka mụndụmbụla jake īnōngwa syosa sịsịsị. 52Jesụ alinkōngelela ukukula mmahala na mbukusị bwa mmbili, alinkukaba nubukundwe kwa Kyala na kubāndu.

Currently Selected:

Luka 2: NYB96

Highlight

Copy