Ubwandilo 29

Jakobụ ịkufịka pa kāja ka Labanị

1Umwene Jakobụ alinkwendelela ni njila jāke, alinkwakufịka kukị̄su kya bāndu ba kubusōkelo ilịsuba. 2Bo ịkukelenganịa alinkukibona ikisịba kya mīsi palukubo kangi alinkugibona ni mịtị̄mo gya ng'ōsị mịtatu gilambalēle kifụkị ni kisịba, namanga pala pala po apa īng'ōsị syanwelaga. Ikisịba kilạ kila bị̄galangapo ilịbwe pa bwịna bwake. 3Linga imịtị̄mo gyosa gibūngēne po abatị̄mị basosyangapo ilịbwe po lelo basịnwesyege amīsi īng'ōsị, lelo linga sịnwelịle bālibụngụlụkisyaga pāpo kangi, kokuti ikisịba kingajaga bwasị.

4Po papo Jakobụ alinkubalālūsya alinkuti: Bamyitu mụfụmịle kūgu? Abēne balinkuti: Tufụmịle nkị̄su kya Halanị. 5Alinkubalālūsya alinkuti: Bule mụmmēnye Labanị umwana gwa Naholị? Balinkummwamụla balinkuti: Tummēnye. 6Alinkubalālūsya alinkuti: Bule agonịle? Abēne balinkuti: Ee, agonịle, nu mwanāke unndindwana Lahelị jula, ịkwịsa ni ng'ōsị. 7Alinkujoba nabo alinkuti: Kēta, ilịsuba lilipantu kōpe na kabalilo kakugigomokesya imịtị̄mo gyinụ ku kāja kakāli, nōngwa jāfịkị mụtịkuginwesya amīsi imịtị̄mo gyinụ ukuti gikalyege kangi kulukubo? 8Lolị abatị̄mị bala balinkummwamụla balinkuti: Tukabagila ukuginwesya bo imịtị̄mo gyosa gikabūngāna pamopēne, kangi bo tukasōsyapo ilịbwe pamwanya pa kisịba kya mīsi ukuti po imịtị̄mo gyosa ginwelege

9Bo akāli ịkujoba nabo, po papo Lahelị alinkufịka pa kisịba ni ng'ōsị sya gwịse; namanga jouju āsịtị̄maga. 10Bo Jakobụ ammbwene Lahelị umwana gwa Labanị ulị̄lūmbu gwa nna, alinkwakusegulapo ilịbwe pa kisịba, alinkwenda nukugunwesya untị̄mo gwa ng'ōsị sya Labanị ulīlūmbu gwa nna. 11Po papo Jakobu alinkumfịpa Lahelị, alinkulila na māsosị ga lusekelo, 12Jakobụ alinkummbūla Lahelị alinkuti: Une ndi ntānị gwako ndi mwana gwa Lebeka. Buno buno Lahelị alinkubopa alinkwakumpāngila ugwịse.

13Bo Labanị asịpilị̄ke īnōngwa sya Jakobụ umwana gwa ịlūmbu alinkusụmụka ukwakummwambilila, alinkuntāmbila alinkunnkụbatila alinkumfịpa, alinkwịsa nagwe kunyụ̄mba jāke. Po papo Jakobụ alinkumpāngila syosa Labanị. 14Umwene Labanị alinkummbūla alinkuti: Nalolị ugwe uli nkamụ gwangu gwa mwịlopa! Po papo Jakobụ alinkwịtūgala pa Labanị umwesị gumo.

Jakobụ ịkummbōṃbela Labanị kunōngwa ja Lahelị na Lēja

15Umwene Labanị alinkummbūla Jakobụ alinkuti: Sịkabagila ukuti ugwe umbōmbelege ịtolo īmbōmbo panōngwa ja kuti ulinkamụ gwangu. Mbūla kulōnda ukuti nguhōmbege bule? 16Umwene Labanị āli nabāna abalīndwana babili. Unkulūmba ali jo Lēja, unnāndi āli jo Lahelị. 17Umwene Lēja jo amāso gāke gāli mōnywa, lolị Lahelị jo alimmbūmbe ummbili, na kumāso kōpe āli nnụnụ. 18Jakobụ ālinnganịle Lahelị; po papo alinkummwamụla Labanị alinkuti: Nikukubōmbelaga ifyinja fịhāno na fịbili ukuti gwịse ūmbege umwanāko unndindwana Lahelị unnāndi, ukuja nkasị gwangu. 19Labanị alinkwamụla alinkuti: Kunụnụ ukuti ngupepo ugwe ukukīnda ukumpa umụ̄ndu uju ngaja bukamụ nagwe; nị̄tị̄ke bōmbaga. 20Po papo Jakobụ alinkumbōmbela ifyinja fịhāno na fịbili ukuti ammwege Lahelị; lolị ifyinja fyosa fịla fịlinkufwana masịku manāndi ịtolo papo ālinnganịle.

21Po papo Jakobụ alinkummbūla Labanị alinkuti: Umbepo unkasị gwangu nēgane nagwe papo ifyinja fyangu ifị twalịtikēne ukukubōmbela fịmalị̄ke. 22Labanị alinkupīja ifyakulya fya lusekelo lwa pa bwegị alinkubabilikila abāndu bā bị̄ngị aba nkāja kala. 23Lelo pakilo, bo bwịlịle alinkummwega Lēja umwanāke unkulūmba, alinkumpa Jakobụ. Po papo Jakobụ alinkwegana nagwe. 24Labanị alinkummwega Sịlịpa untumwa gwake unndindwana alinkumpa umwanāke Lēja ukuti akajege mmbōmbị gwake. 25Bobukị̄le nulubūnju Jakobụ alinkunyomoka bo āgịle ukuti jo Lēja uju ēgēne nagwe; po papo alinkunndālūsya Labanị alinkuti: Syo sya fịkị isị umbōmbị̄le une? 26Ukamanya ukuti nakubōmbelaga ukuti nummwege Lahelị? Fịkị ūsyobịle buno buno? Umwene Labanị alinkummwamụla alinkuti: Nkị̄su kyitu mụno lukajamo ulwakuti unnāndi ēgịgwege bo akāli tāsị ukwegịgwa unkulumba. 27Umale tāsị nagwe unndūngu gumo, po jōpe na ju Lahelị nịsakukupaga linga kwịtika ukūmbōmbela une ifyinja ifị̄ngị fịhāno na fịbili. 28Po papo Jakobụ alinkwịtika. Bo Jakobụ amalịle unndūngu gumo na Lēja, po lelo Labanị alinkumpa umwanāke unndindwana Lahelị ukuja nkasị jōpe. 29Labanị alinkummwega Bịlịha untumwa gwake unndindwana, alinkumpa Lahelị ukuja mmbōmbị gwake. 30Buno buno Jakobu alinkummwega jōpe na Lahelị alinkuja nkasị gwake, alinkunngana fị̄jo. Ukunkīnda Lēja, Alinkummbōmbela Labanị ifyinja ifị̄ngị fịhāno na fịbili.

Abāna aba āpāpịle Jakobụ

31Bo UNTWA asịbwene ukuti Lēja mmbēngwe kunndume, po papo alinkumpa abāna, lolị Lahelị jo alinkuja nngūmba. 32Lēja alinkuja nikifụba, alinkupāpa umwana unndumyana. Alinkumpa īngamu ja Lubenị; papo ātigi UNTWA ammbwene ubutolwe bwangu, lilino po unndume gwangu ịkūnganaga. 33Alinkuja nikifụba kangi, alinkupāpa umwana unndumyana alinkwịnogona alinkuti, UNTWA āmbēle umwana ujūngi uju, pāpo apilị̄ke ukuti une mmbēngị̄gwe, buno buno alinkumpa īngamu ja Sịmyonị. 34Alinkwambilila kangi ikifụba kya butatu, alinkupāpa umwana unndumyana, alinkwịnogona alinkuti: Lilino po unndume gwangu ịkūnyumililaga une, papo numpāpị̄le umwana unndumyana ugwa butatu. Alinkumpa īngamu ja Lēbị (Lēbị kokuti ukūmīlilana). 35Alinkwambilila kangi ikifụba ikya buna alinkupāpa umwana unndumyana, alinkwịnogona alinkuti: Pakabalilo aka nịkummwimikaga UNTWA, buno buno alinkumpa umwanāke īngamụ ja Jụta, po papo alinkulekela papo ukupāpa.

Currently Selected:

Ubwandilo 29: NYB96

Highlight

Copy