Ubwandilo 21

Ukupāpịgwa kwa Ịsịhaka

1Po papo UNTWA alinkunkumbuka Sāla bo mụmo ājobịle, alinkummbōmbela isị āfị̄ngịle nagwe. 2Sāla alinkuja ni kifụba, alinkumpāpila Abụlahamụ umwana unndumyana, mbukāngale bwake pa pakabalilo kāko Kyala ājobị̄le. 3Umwene umwana uju Sāla ālimpāpịle Abụlahamụ, jo ugwịse alinkumpa īngamụ ja Ịsịhaka. 4Abụlahamụ alinkummbụ̄ta kukyenị umwanāke Ịsịhaka bo ali na masịku lwele, bo mụmo Kyala alinndagilị̄le. 5Umwene Abụlahamụ āli ni fyinja imịa jimo (100) bo umwanāke Ịsịhaka ịkupāpịgwa. 6Sāla alinkuti, Kyala āmbēle une īseko sya lusekelo; gwesa uju ikupilikaga ịsakusekelaga pamopēne nanịne. 7Kangi alinkuti: Akālịko najumo ugwakummbūla Abụlahamụ ukuti: Sāla ịsakōngesyaga abāna. Lolị numpāpị̄le umwana unndumyana mbukāngale bwake.

8Umwene umwanịke alinkukula; po papo balinkunndekesya amabēle; pị̄sịku līlyo Abụlahamụ alinkupīja ifya kulya fya lusekelo.

Hagali na Isịmailị bịkukagịgwa

9Sāla alinkummbona Ịsịhaka ịkukịnilịgwa nu mwana uju Hagali Umwegịpịtị jula ālimpāpị̄le Abụlahamụ. 10Bo asịbwene sịsịsị alinkummbūla Abụlahamụ alinkuti: Unkage unkị̄kulu untumwa uju pamopēne nu mwanāke; namanga umwana gwa nkị̄kulu untumwa uju atịsakujabana ikilīngo nu mwanāngu Ịsịhaka. 11Sịsịsị syo syalimpelị̄le Abụlahamụ ukụsụlumanịa fị̄jo panōngwa ja kuti jōpe Isịmailị āli mwanāke. 12Lolị Kyala alinkummbūla Abụlahamụ alinkuti: Ungasụlụmanịaga panōngwa jamwanịke na panōngwa ja nkasịgo untumwa jula, syosa isị linga Sāla ịkusịlōnda kumyako usịbōmbege ịtolo bo mụmo ịkukubulila, buno mụ mwa Ịsịhaka mo aba nndujụ̄ngụ lwako bịsakufụmụkilaga. 13Jōpe na ju mwana gwa nkị̄kulu untumwa uju nịsakumpelaga ukuja kikolo kya bāndu, papo jōpe gwa nndujụngụ lwako. 14Po papo Abụlahamụ alinkusụmụka nulubūnju fị̄jo alinkwega ifyakulya nulupāle lwa mīsi alinkumpa Hagali, kangi alinkummbīka umwana pafịbeja fya Hagali, alinkunsụmụsya ukuti abūkege. Umwene Hagali alinkubūka, alinkwēmbēla mmatēngele ga ku Bēlị-syeba.

15Bo amīsi gamalị̄ke ndupāle, Hagali alinkunndāmbalika umwana nkikolo mụmpịkị. 16Po papo umwene alinkutandamalapo, alinkwakwịtūgasya pāsi ukunịngana nu mwanāke, ubutalị bwali mbusopelo akabwe, papo ātigi; Ndikulōnda ukunkēta umwanāngu bo ịkufwa. Bo Hagali ị̄tūgēle ānịngēne nu mwana, po papo umwana alinkulila fị̄jo. 17Kyala alinkupilika ingụ̄to ja mwana, buno buno ugwandumị gwa Kyala alinkunkōlela Hagali ukufụma kumwanya alinkuti: Gwe Hagali fyo fịkị ifị fịkukutamya? Ungatị̄laga; buno Kyala apilị̄ke bo umwana ịkulila apa unndambalị̄ke. 18Sụmụka, umpīmbe umpagate; buno nịsakumpelaga ukuja kikolo ikikulūmba. 19Po papo Kyala alinkummwịgula amāso Hagali, alinkukibona ikisịba kya mīsi; alinkubūka, alinkwakwịsusya amīsi ndupāle lwake, alinkumpa umwanāke amīsi alinkunwa. 20Umwene Kyala alinkuja nagwe umwanịke, alinkukula, alinkugona mmatēngele alinkuja mmag'anyị gwa kufwima. 21Alinkwịtugala mmatēngele ga ku Palanị, unna alinkwakummwegela unkị̄kulu ukufụma nkị̄su kya Egịpịtị.

Ulufị̄ngo lwa Abụlahamụ na Abịmelekị

22Pakabalilo kala kala po Abịmelekị pamopēne na Fịkolị, unndōngosị gwake gwa bwịte, unkulūmba, balinkubūka kwa Abụlahamụ balinkuti: Kyala alinanụngwe mụli syosa isị kubōmba. 23Lilino lelo nịkuti ufị̄ngege ulufịngo kumyangu mụ ngamụ ja Kyala ukuti utisakūsyobamo une, na banāngu, pamo aba nndujụ̄ngụ lwangu. Bo mụmo une ngubōmbị̄le bwịla isya busubilịgwa mo nanụngwe gwịse umbōmbelege une kangi ni kị̄su iki mụno ujēngịlemo. 24Abụlahamụ alinkuti: Ena āngulapaga.

25Bo Abụlahamụ ịkwịbụnēsya isya kisịba kya mīsi iki ababōmbị ba Abịmelekị bāpokịle kumyake 26Abịmelekị alinkuti: Ngamanya uju asịbōmbị̄le sịsịsị Syo ukāmbūlamo sịku sịsịsị kangi ngasịpilikamo sịku ukwịsakufịka umụsyugu. 27Po papo Abụlahamụ alinkwegapo īng'osị sịmo ni ng'ōmbe alinkumpa Abịmelekị Po papo abāndu babili bababa balinkufị̄nga ulufị̄ngo. 28Abụlahamụ alinkutubīka pasịma utwana twa ng'ōsị utulama tuhāno na tubili ukufụma muntị̄mo gwake. 29Po papo Abịmelekị alinkunndālūsya Abụlahamụ alinkuti: Syo sịkunāngisya fịkị apa utubīkịle pasịma utwana twa ng'ōsị utulama tuhāno na tubili? 30Umwene Abụlahamụ alinkummwamụla alinkuti: Nātigi gwambilile utwana twa ng'ōsi utu ukufụma kumyangu. Ukuti to twịpelege ukuja bukētị kumyangu ubwakuti, jo une ne nakūmbịle ikisịba iki. 31Jo nōngwa iji ubujo bula balinkubupa īngamụ ja Bēlị-syeba, panōngwa ja kuti po apa bōsa bo babīli bāfị̄ngịle ulufị̄ngo. 32Buno buno bo bafị̄ngịle ulufị̄ngo pa kāja ka Bēlị-syeba: Abịmelekị na Fịkolị, unndōngosị gwake unkulūmba gwa bwịte balinkubūka, balinkugomokela ku kị̄su kya ba Fịlịsịtị. 33Abụlahamụ alinkubyalapo umpāndapānda pa bujo bwa Bēlị-syeba, alinkwịpụ̄ta ku NTWA Kyala uju alịko bwịla. 34Umwene Abụlahamụ alinkugona mbuhēsya nkị̄su kya ba Fịlịsịtị amasịku gāmị̄ngị.

Currently Selected:

Ubwandilo 21: NYB96

Highlight

Copy