Īmbōmbo Sya Batumịgwa 7

Amasyu ga Sịtefanị

1Po papo umpụ̄tị unkulūmba alinkunndālūsya alinkuti: Bule, bo sịli sịsịsị? 2Umwene Sịtefanị alinkujoba alinkuti: Mwe bāmyitu, na mwe bātāta, amụpilikisyege, Kyala Umwene bụkulūmba ālinsetukị̄le Tāta Abụlahamụ, bo ali mụ Mesopotamịja, bo akāli ukujēnga mụ Halanị. 3Kyala alinkummbūla alinkuti: Sōkangamo nkị̄su kyako na mbakamụgo, ubūkege kukị̄sụ iki ngukunāngisyaga jujune. 4Po papo alinkusōkamo nkị̄su kya Bakalịtaị, alinkwakutūgasya mụ Halanị. Lelo bo afwịle ugwịse, Kyala alinkunsāmịsya ukufụma kūko, alinkuntwala nkị̄su iki mụjēngịlemo umwe lilino. 5Kyala akālimpēle ubujo nabumo nkị̄su iki, kyope nikya kuti kifwanege lwene lu lujajo, lolị pope alimfị̄ngịle ukumpa ikị̄su iki, ukuti kịkujaga kyake, nulujụ̄ngụ lwake ulu lụkukōngaga, napapo pakabalilo kala akāli numwana. 6Umwene Kyala alinkummbūla alinkuti: Aba ndujụ̄ngụ lwako bịsakwegịgwaga ukubūka kubuhēsya kukị̄su ikya bāngi, kangi bịsakubabīkaga mbutumwa nukubāngalila ifyinja bāmịa bāna. 7Kangi Kyala alinkujoba alinkuti: Ikikolo iki bịsakukibōmbelaga, kyo nịsakukilōngaga jujune. Pānyụma pali sịsịsị, nịsakubasōsyangamo nkị̄su ikyo ukuti bị̄sege kukwịpụ̄ta kumyangu pabujo bububu. 8Po papo Kyala alinkwenda nukumpa ulwịtiko lwa bubụ̄tịgwa. Umwene Abụlahamụ alinkumpapa Ịsịhaka, alinkumbụ̄ta pị̄sịku lya lwele. Umwene Ịsịhaka alinkumpapa Jakobụ, umwene Jakobụ alinkubapapa abịsukulu bītu kalōngo na babili bala.

9Abene abīsukulu bītu bala balinkummulisya Josefụ mbutumwa mụ Egịpịtị panōngwa ja kabịnị. 10Lolị Kyala alinkuja nagwe, alinkumpoka mbutolwe bwake bōsa, alinkumpa ilị̄pyana na mahala nkyenị mwa Falao umalafyale gwa Egịpịtị, alinkummbīka nndindililị gwa Egịpịtị, na nnyụ̄mba jake jōsa. 11Po papo jilinkugwa īnjala nkị̄su kyosa kya Egịpịtị nikya Kanānị, bulinkujamo ubutolwe bu bwịngị. Abēne abị̄sukulu bītu balinkutolịgwa ukufyaga ifị̄ndu. 12Lolị Jakobụ bo apilị̄ke ukuti ifị̄ndu fịlịmo mw'Egịpịtị, po papo alinkubatuma ulwa kwanda abị̄sukulu bītu. 13Lelo ulwa bubili, po Josefụ alinkwịnāngisya kubamyabo, po papo Falao alinkwenda nukukimanya ikikolo kya Josefụ. 14Po papo Josefụ alinkutuma kukumbilikila ugwịse Jakobụ pamopēne nikikolo kyake kyosa, abāndu amalōngo mahāno na mabili na bahāno (75). 15Po papo Jakobụ alinkwịkilila ukubūka ku Egịpịtị, alinkwakufwila jūjo pamopēne na bị̄sukulu bītu. 16Imịbili gyabo gilinkupīmbịgwa ukwakufịka mụ Sịkemụ, gilinkubīkịgwa mwịpūmba ili Abụlahamụ ālyulịle nindalama kubanya Emolị mụ Sịkemụ.

17Lelo bo akabalilo kafịkịle aka lufị̄ngo, aka Kyala afị̄ngịle kwa Abụlahamụ, po papo abāndu bala balinkubāla balinkuja bị̄ngị fị̄jo mw'Egịpịtị, 18ukufịka papo abonekege umalafyale ujūngi mw'Egịpịtị, uju akālimmēnye Josefụ. 19Jo alinkukitwalila ulufụ̄ndo ikikolo kyitu, nukubāngalila abị̄sukulu bītu, nukubafịmbilisya ukubatāga abānābo abafyēle ukuti bafwege. 20Pakabalilo kāko alinkupāpịgwa Mose, āli mwana nnụnụ nkyenị mwa Kyala. Jo alinkuswilịgwa imyesị mịtatu nnyụ̄mba ja gwịse. 21Lelo bo atāgị̄gwe, po papo umwana gwa Falao unndīndwana, alinkuntōla, alinkunswila ukufwāna mwanāke. 22Umwene Mose alinkumanyịsịgwa amahala gōsa aga Bēgịpịtị. Alinkuja mfụmụke mmasyu na mụmbōmbo syake.

23Lelo bo ali nifyinja amalōngo mana, alinkwịnogona mụndụmbụla ukuti abūke kukubakēta abāmyabo abany'Ịsịlaelị. 24Lelo alinkwakwaga jumo ịkubōmbelịgwa īmbị̄bị, po papo alinkuntūla uju abonelịgwaga, alinkunkoma alinkwenda nukufwa umw'Egịpịtị. 25Umwene alinkwịnogona ukuti abāmyabo abany'Ịsịlaelị bịkusyaganịa ukuti Kyala ịkubapokaga ukwendela nkiboko kyake, lolị abēne balinkusịta nukusyaganịa. 26Ulwa kilābo alinkubabona abany'Ịsịlaelị babili bịkulwa, alinkugela ukubamanyanịa alinkuti: Mwe bāgwi! Umwe muli banyamụ̄ndu, mụkulwa fịkị mwe bābo batupu? 27Lolị jula ankomaga unnịne, alinkungụ̄tila Mose kulubafụ alinkuti: Jwanị uju akubīkịle ugwe ukuja nndagilị nukuja nndōngị gwitu? 28Kingamo kulōnda ukūngoga nanịne bo papo gwalinngogịle umw'Egịpịtị mmajolo? 29Bo apilị̄ke sịsịsị, Mose alinkubopa, alinkwakuja mbuhēsya nkị̄su kya Mịtyanị. Mo alinkwakupāpila abāna abalumyana babili.

30Lelo bo fị̄kīndịle ifyinja amalōngo mana, po papo ugwandumị alinkunsetukila ndungalāngala ulu lwali pị̄pị nikyamba Sịnai nkisyanju iki kyakaga umōto. 31Umwene Mose bo asịbwene sịsịsị, alinkuswịga fịjo kuli isị syabonị̄ke; lelo bo ịkusegelela ukuti akēte kanụnụ, alinkwaga ilịsyu lya NTWA lịkuti: 32Jo une ne Kyala gwa bāgụso, ne Kyala gwa Abụlahamụ, na Ịsịhaka na Jakobụ. Po papo Mose alinkutetema alinkutị̄la nukukētako. 33Kangi UNTWA alinkummbūla Mose alinkuti: Fụ̄laga ifịlato fyako mmalūndi, buno pabujo apa gwịmịlepo kị̄su kị̄kemo. 34Ngētịle nsịbwene īmbị̄bị isị bịkubōmbelịgwa abāndu bāngu mw'Egịpịtị, ningụ̄to jabo njipilị̄ke, lelo nịsịle kukubapoka. Po linino lelo ịsaga ngutume ku Egịpịtị.

35Mose jujuju jo jula abany'Ịsịlaelị bālinkānịle bātịle: Jwanị uju akubīkịle ugwe ukuja nndagilị nukuja nndōngị gwitu? Jo uju Kyala alinkuntuma ukwakuja nndagilị, kangi nukuja mpokị, ukwendela ngwandumị uju ālinsetukị̄le nkisyanju kila. 36Jo uju alinkubalōngosya abāndu ukusōkamo nkị̄su kya Egịpịtị bo ịkupela ifị̄swigu nifị̄ka mụ Egịpịtị, na mụnyanja Ifụbīfu, kangi na nndungalāngala ifyinja amalōngo mana. 37Jo Mose jujuju ābabūlịle abany'Ịsịlaelị ātịle: Kyala ịsakubasụmụkisyaga unkụ̄ngụlụka mbāmyinụ, uju ali bo jujujo. 38Bo abany'Ịsịlaelị bakomēne pamopēne nndungalāngala Mose jo uju ālịko pamopēne nabo. Ālịko kula pamopēne na ba bị̄sukulu bītu kangi nugwandumị jula ajobēge nagwe pakyamba Sịnai; jo uju āpēgị̄gwe amasyu amapelabūmị ukuti atupege uswe.

39Lolị jo uju abị̄sukulu bītu bakālōndaga ukumpilika, lolị balinkunsyokela, balinkunyonywa ukugomokela ku Egịpịtị. 40Balinkummbūla Alonị balinkuti: ịsaga utubūmbilege bakyala aba kutulōngolela nkyenị; namanga Mose uju ātusōsịsyemo nkị̄su kya Egịpịtị, tukamanya isị sịmmwagịle. 41Po papo mmasịku gāgo balinkubūmba ikifwanị kya ngwāta, balinkutwala kukifwanị kya ngwāta ifya kwịkemēsya, 42Kyala alinkubasị̄nda inyụma; alinkubatāga ukuti basịbombelege īndōndwa sya kumwanya, bo lilyo lisimbị̄gwe mwa kalata gwa bakụngụlụka ili lịkuti:

Mwe bāndu ba Ịsịlaelị!

Kali mwandwalilaga une ifịnyamāna fya kubōlịgwa

nifya kwịkemēsya,

kukabalilo ka fyinja amalōngo mana

nndungalāngala mụla?

43Himma,

mụtwele jēne ji hēma ja Moloka,

nulutōndwa lwa Kyala gwinụ Lefanị,

ifịfwanị ifị mwabūmbịle ukuti mụfịbōmbelege,

panōngwa jijiji, nịsakubasamịkisyaga kubatalị

ukukīnda mụ Babelị.

44Nndungalāngala mụla abīsukulu bītu bāli nihēma jila jasịsịmịkisyaga ukujako kwa Kyala. Jātendekesị̄gwe bo mụmo Kyala ālinndagị̄le Mose ukuti ajitendekesyege ukukōngana nikifwanị iki ākibwene. 45Jo iji abị̄sukulu bītu bāpokanịlaga bo bali na Joswa balinkubūka najo bo bịkukikaba ikị̄su ikya fikolo ifị̄ngị, ifị Kyala āfikagaga nkyenị mmyabo. Jilinkujapo ukwịsakufịka mmasịku ga Ndabitị, 46Ndabitị uju akābịle ilị̄pyana nkyenị mwa Kyala, uju alinkunsūma Kyala ukuti ammwịtikisyege ukunjengela ubujo bwa kutūgasyapo Kyala gwa Jakobụ. 47Lolị umwene Solomonị jo uju ālinnjēngị̄le īnyụ̄mba Kyala.

48Lolị umwene Kyala unkīnde atịkutūgala

mụnyụ̄mba isị sịjēngị̄gwe na bāndu, bo lilyo ịkujoba unkụ̄ngụlụka ịkuti;

49Kumwanya kyo kikota kyangu ikya butwa,

lolị ikị̄su ko kakota ka kubīkapo amalūndi gangu,

jo nyụ̄mba nngị iji mụkūnjēngelaga?

Bo ịkuja UNTWA,

pamo po pōkị apa nịkutūkisyaga une?

50Kali ngaja jo une nāpelịle fyosa fịfịfị?

51Mwe balukānị umwe, mwe basịtakubụ̄tịgwa īndụmbụla nimbulukutu, mwe mụkummwila bwịla Mbepo Mwịkemo, bo mụmo abị̄sukulu bīnụ bābōmbị̄le, mo mụmo mụkubōmbela nanụmwe. 52Kali jo nkụ̄ngụlụka aliku uju bakamfwimamo abị̄sēmwe? Abēne balinkubagoga bala bātumịgwe na Kyala kukufumụsya nganị ukwịsa kwa Nngolofụ, uju nanụmwe lilino mụnndīlị̄le nkunngoga. 53Umwe mwalwambilịle ululagilo bo mụmo babatwalị̄le abāndumị, lolị mụlinkusịta ukulukōnga.

Sịtefanị ịkugogịgwa

54Lelo bo bapilike sịsịsị, po papo sịlinkubalasa mụ̄nda, balinkwịmemena. 55Umwene lolị Sịtefanị bo ị̄swile Mbepo Mwịkemo po papo alinkukēta kumwanya, alinkububona ubukulūmba bwa Kyala, alinkummbona na Jesụ bo īmịle kukiboko ikị̄līlo kya Kyala, 56alinkujoba alinkuti: Kēta nkubwene kumwanya kwịgwịke, nummbwene jope na nnyamụndu īmịle kukiboko ikị̄līlo kya Kyala. 57Abēne balinkujwega fị̄jo, balinkusịndila īmbulukutu syabo, balinkummotokela palikimo; 58balinkunsōsyamo nkāja, lelo bo bansōsịsyemo balinkuntịka namabwe. Abēne abakētị balinkugibika imyenda gyabo mmalundi ga nndumyana jumo, uju bātigi Saulị īngamụ. 59Lelo bo bịkuntịka Sịtefanị namabwe, po papo alinkukolela alinkuti: Gwe NTWA Jesụ āmbililaga īmbepo jangu. 60Po papo alinkufụgama, alinkukōlela ilịsyu ilịkulūmba alinkuti: Gwe NTWA, ungababalilaga īmbị̄bị isị; lelo bo ajobịle lilīli, alinkufwa.

Currently Selected:

Īmbōmbo Sya Batumịgwa 7: NYB96

Highlight

Copy