Malɨka 7

ɄYesu ikaana imbʉlanɨsio vwɨmɨla inyiiho isa vakʉʉlʉ

(Mataayi 15:1-9)

1Pambele, aVafalisayi na vavʉlanɨsi va ndaghɨlo vamonga kuhʉma kʉ Yelusalemu vakakongʼhaana pa Yesu. 2Vakavaagha avavʉlanɨsɨvua vamonga vilia na mavoko amalamafu, kwekʉti kɨsila kwogha amavoko mʉ lwiho. 3Ʉlwakʉva aVayahudi vooni, kyongo aVafalisayi, navakalisagha kɨsila kwogha amavoko ndavʉle lwale lwiho lwa vakʉʉlʉ vaave. 4Kange, ʉmuunhu pano ahʉmile kʉ lɨghʉlɨlo, naalyanoghiile kulia kɨsila kwogha amavoko. Ni singi nyinga sino valyʉpiile, ndavʉle isa kʉsuka ifikombe, ifivʉghaana ni fingi.

5Pepano aVafalisayi na vavʉlanɨsi va ndaghɨlo vakamposia ʉYesu vakati, “Kɨki avavʉlanɨsɨvua vaako navivɨngɨlɨla inyiiho isa vakʉʉlʉ viitu, pano vilia na mavoko amalamafu?” 6ɄYesu akavamʉla akati, “Ʉmue mwe vakedʉsi! ɄNgʉlʉve kukilila ʉmʼbɨli ʉYesaya alyajovile se seene vwɨmɨla ʉmue, ndavʉle lɨlembilue,

‘Avaanhu ava vikʉnginia pa pa mʉlomo,

neke amoojo ghaave ghalɨ kʉtali nuune.

7Vikʉnyɨmɨka, neke ʉlwɨmɨko lwave lʉsila lʉvʉmbʉlɨlo,

ʉlwakʉva vivʉlanɨsia indaghɨlo sa vaanhu.’#Yesaya 29:13

8“Sa kyangʼhaani, ʉmue mʉsilekile indaghɨlo isa Ngʉlʉve, neke mugadɨlɨla inyiiho isa vaanhu.”

9ɄYesu akavavʉʉla kange akati, “Ʉmue muvona lʉnono kʉkʉsileka indaghɨlo sa Ngʉlʉve, neke mʉvɨngɨlɨlaghe inyiiho siinu! 10Ʉlwakʉva ʉNgʉlʉve kukilila kwa Moose alyatiile, ‘Ʉmwoghopaghe ʉvaaso nʉ mamaajo,’#Kuhʉma 20:12; Similisio sa Ndaghɨlo 5:16 kange alyatiile, ‘Ʉmuunhu jʉno ɨkʉmʉligha ʉviise nambe ʉngʼina anoghiile kubudua.’#Kuhʉma 21:17; Valeevi 20:9 11Neke ʉmue muvʉlanɨsia kuuti, ʉmuunhu ndepoonu ɨkʉmʼbʉʉla ʉviise nambe ʉngʼina kuuti, ‘Kɨno nɨveele nɨnoghiile kʉkʉkʉtanga, nɨhʉmisie, lɨtekelo kwa Ngʉlʉve.’ 12Apuo, mʉkʉmʼbɨɨka ʉmuunhu ʉjuo aleke kʉkʉvatanga avapaafi vaake, ʉlwakʉva mwiti ahʉmisie kwa Ngʉlʉve. 13Mʉ ʉluo mubenapʉla ɨlɨsio lya Ngʉlʉve, pano mugadɨlɨla inyiiho siinu sino mukwʉpɨngʼhana. Kange, mʉlɨ ni nyiiho inyinga ndavʉle isio sino nasihʉma kwa Ngʉlʉve.”

Lʉno lʉkʉmʼbɨɨka ʉmuunhu kuuva mʉlamafu

(Mataayi 15:10-20)

14ɄYesu akakemeela kange ɨlɨpʉgha ɨlya vaanhu akavavʉʉla akati, “Mʉmhʉlɨkɨsyaghe mweni, kange mʉsitangʼhaniaghe sino nijova. 15Nakwekɨlɨ ɨkɨɨnu kɨno ilia ʉmuunhu kɨno kɨkʉmpelela kuuva mʉlamafu, looli fino fihʉma nkate mwa mwene. 16Ʉnya kʉpʉlɨka, apʉlɨkaghe!”#7:16 Akadebe aka namwekale mʉ fitabu fimonga ifikʉʉlʉ.

17ɄYesu na vavʉlanɨsɨvua vaake vakalɨleka ɨlɨpʉgha, vakingila mʉ nyumba. Pe avavʉlanɨsɨvua vaake vakamposia ɨmhola ɨja kɨhwanɨkɨsio kɨla. 18ɄYesu akavavʉʉla avavʉlanɨsɨvua vaake akati, “Na jʉmue namʉkʉlʉtangʼhania? Namukagʉla kuuti, nakwekɨlɨ ɨkɨɨnu kɨno ilia ʉmuunhu kɨno kɨkʉmʼbɨɨka kuuva mʉlamafu? 19Ʉlwakʉva nakilʉta mʉ mwojo, looli kilʉta mʉ lɨleme, neke pambele kihʉma kʉnji.” Enendɨɨkɨ, alyavʉsisie ʉmwiko mʉ fyakʉlia fyoni.

20Kange ʉYesu akajova akati, “Ɨkɨɨnu kɨno kihʉma mʉ mwojo, kye kɨno kɨkʉmpelela ʉmuunhu kuuva mʉlamafu. 21Ʉlwakʉva mʉ mwojo ghwa muunhu mwe muno sihʉma: inyisaghɨlo imbiivi, ʉvʉghendamwalu, ʉvʉhɨɨji, ʉvʉbudi, 22ʉvʉvwafu, ʉmwojo, ʉvʉviivi, ʉvʉsyangi, amasaka, ɨkɨvini, amaligho, amatuupa na kupunia. 23Inyɨvi sooni isi sihʉma nkate mwa muunhu, isio se sino sikʉmʼbɨɨka kuuva mʉlamafu.”

Ʉlwɨtɨko ʉlwa mʉkɨjʉʉva jʉno naalyale Mʉyahudi

(Mataayi 15:21-28)

24ɄYesu akavʉʉka pala, akalʉta mʉ makaaja gha Tiilo.#7:24 Mʉ makaaja gha Tiilo: Ifitabu fimonga ifikʉʉlʉ valembile, Tiilo nɨ Sidoni. Ʉkuo akingila mʉ nyumba ja muunhu jʉmonga, neke naakalondagha avaanhu vakagʉle. Poope avaanhu vakakagʉla kuuti alɨ mʉ lɨkaaja lɨla. 25-26Ʉkuo kwealyale ʉmʉkɨjʉʉva jʉmonga jʉno naalyale Mʉyahudi, alyale ghwa kʉ Foinike mʉ ɨɨsi ɨja Silia, alyale nʉ mwalɨve ʉnya lɨpepo ɨlɨlamafu. Ʉmʉkɨjʉʉva ʉjuo alyapʉliike imhola sa Yesu. Pepano akalʉta kwa Yesu, akafughama pa maghʉlʉ ghaake, akansʉʉma kuuti alɨdage ɨlɨpepo lɨno lɨlɨ mwa mwalɨve.

27Neke ʉYesu akamʼbʉʉla akati, “Ʉleke taasi avaana valie vikute, ʉlwakʉva nalʉnono kutoola ɨkyakʉlia ɨkya vaana na kʉkʉsitosekesia imbua.”#7:27 Ʉleke taasi avaana valie vikute ... na kʉkʉsitosekesia imbua: Mʉ njovele ɨjɨ, avaana ve Vayahudi nambe ve vavʉlanɨsɨvua, imbua ve vano naVayahudi. 28Neke ʉmʉkɨjʉʉva jʉla akamwamʉla ʉYesu akati, “Ghwe Nhaata, ʉjovile se seene, poope nasi mbua sasilia ifimenyʉkɨla fino vasangwisie avaana paasi pa meesa.” 29ɄYesu akamʼbʉʉla akati, “Vwɨmɨla ɨlɨsio lɨno ʉjovile, vujagha, ɨlɨpepo lɨmʉlekile ʉmwalɨvo.” 30Ʉmʉkɨjʉʉva jʉla akavʉʉka ivuja. Ye afikile kʉ kaaja, akamwagha ʉmwalɨve aghonile pa kɨtala, ɨlɨpepo lɨmʉlekile.

ɄYesu ɨkʉnsosia ʉmuunhu ʉnya mapʉle kange kɨnuunu

31ɄYesu akavʉʉka mʉ makaaja agha Tiilo kukilila mʉ lɨkaaja ɨlya Sidoni, pe akafika kʉ lɨsʉmbe ɨlya Galilaya na mʉ ɨɨsi ɨja Dekapoli.#7:31 Dekapoli, kwekʉti ɨɨsi jɨno jɨlɨ na makaaja kɨjigho. Aghuo ghaale makaaja ghano vakikalagha avaanhu vano naVayahudi. 32Ʉkuo vakamʉletela ʉmuunhu ʉnya mapʉle, kange kɨnuunu. Vakampelepesia ʉYesu amʼbɨɨke amavoko kuuti asooke.

33ɄYesu akamʼbʉsia ʉmuunhu jʉla mʉ kɨpʉgha ɨkya vaanhu, akaseghʉka naghwope pa vʉsyefu, akingisia ifyove fyake mʉ mbulughutu, akafuunya amati na kʉkʉmwabasia ʉlʉmili. 34Pepano ʉYesu akalola kʉkyanya, akasukunala, akamʼbʉʉla akati, “Efata,” kwekʉti, “Dinduka.” 35Pala pala imbulughutu saake sikadinduka nalʉ lʉmili lʉkavopoka, pe akatengʉla kujova vʉnono.

36ɄYesu akavakaana avaanhu vala kuuti, navangamʼbʉlaghe nambe muunhu sino avombile. Napano akavakanagha, aveene vakafikwɨsyagha ɨmhola kʉ vaanhu vooni. 37Avaanhu vakadegha kyongo vakati, “Imbombo sooni sino avombile nofu! Avanya mapʉle avapeliile kupʉlɨka na vakɨnuunu avapeliile kujova.”

Currently Selected:

Malɨka 7: wbi

Highlight

Copy