Malɨka 6

ɄYesu ikanua kʉvanave kʉ Nasaleti

(Mataayi 13:53-58; Lʉʉka 4:16-30)

1ɄYesu palɨkɨmo na vavʉlanɨsɨvua vaake vakavʉʉka kʉla, vakalʉta kʉ kɨkaaja kyake. 2Ye kɨfikile ɨkɨghono ɨkya Sabati, akalʉta mʉ sinagogi, akatengʉla kuvʉlanɨsia. Avaanhu vinga vano vakampʉlɨkɨsyagha, vakava videgha kyongo viiti, “Vʉkagʉsi vʉki ʉvʉ vʉno apelilue? Kange, fidegho fiki fino fivombeka mʉ ngʉfu saake? Ʉjʉ, asivwene kʉʉghi sooni isi? 3Ʉjʉ naghwe mpʉlʉla mbavo? Naghwe mwana ghwa Maliya, nava vanuuna vaake ghwe Yakovo, ʉYoose, ʉYuuda nʉ Simoni? Nava valʉmbʉ nave vano tukukalania pa kɨkaaja apa?” Vakankalalɨla.

4ɄYesu akavavʉʉla akati, “Ʉmʼbɨli mwoghopua imbale sooni, ʉlwene naikwoghopua na vaanhu ava mʉ kɨkaaja kyake na vanyalʉkolo vaake na mʉ nyumba jaake.” 5Ʉkuo ʉYesu naakavomba nambe kɨdegho kɨmo, ʉlwene akavɨɨka amavoko pa vatamu vadebe, akavasosia. 6Pe akadegha kyongo, ʉlwakʉva navalyamwɨtiike.

ɄYesu isuungʼha avavʉlanɨsɨvua vaake kɨjigho na vavɨlɨ

(Mataayi 10:5-15; Lʉʉka 9:1-6)

Pepano ʉYesu akava ilʉta mʉ fikaaja ifingi ivʉlanɨsia avaanhu. 7Akavakemeela avavʉlanɨsɨvua vaake kɨjigho na vavɨlɨ kuuti avasuungʼhe, akavapeela ʉvʉtavʉlɨlua ʉvwa kʉdaga amapepo amalamafu. Pe akavasuungʼha vavɨlɨ vavɨlɨ, 8-9akavavʉʉla akati, “Namʉngagadaghe ʉnkate, nambe ɨnyambe, nambe indalama, nambe ʉmwenda ʉghwa kwandʉlania. Ʉlwene mʉfwalaghe ifilatu na kukola ʉlʉkongooja.” 10Kange akavalaghɨla akati, “Mʉ nyumba jɨno kyavikʉvʉpɨla mukalaghe mumuo kuhanga pano muvʉʉka mʉ lɨkaaja ɨlio. 11Kange, pooni pano navikʉvʉpɨla nambe kʉkʉvapʉlɨkɨsia, pano muhʉma mʉkungʼunaghe ʉlʉngʼhʉnde lʉno lʉlɨ mʉ maghʉlʉ ghiinu,#6:11 Mʉkungʼunaghe ʉlʉngʼhʉnde lʉno lʉlɨ mʉ maghʉlʉ ghiinu: Kwe kʉvonia kuuti ʉNgʉlʉve avakanile avaanhu ava lɨkaaja lɨla, ʉlwakʉva vavakanile avasungʼhua vaake. kuuva kɨvalɨlo ɨkya nkole ʉghwa kʉkaana kukwʉpɨla ɨMhola ɨNofu.”

12Pepano avavʉlanɨsɨvua vaake vakavʉʉka vilʉta kupʉlɨsia kuuti, avaanhu vasyetʉke na kulaata inyɨvi saave. 13Neke vakadagagha amapepo minga, kange vakavapakagha amafuta avatamu vinga, vakasokagha.

Ɨmhola ɨja kʉbudua ʉYohani ʉMwofughi

(Mataayi 14:1-12; Lʉʉka 9:7-9)

14Imhola sa Yesu silyapʉlɨkiike imbale sooni, najʉ ntwa ʉHelode#6:14 Ntwa ʉHelode: Ʉntwa ʉjʉ ghwe Helode ʉAntipa jʉno ʉviise akalondagha kʉkʉmʼbuda ʉYesu ye mwana. Ʉntwa ʉjʉ alyatemile ɨkɨghavo ɨkya Galilaya kufika kʉ kɨghavo ɨkya Pelea mʉ vʉtwa vwa Looma. Ɨmba ɨlɨsio Helode kʉ Vʉghanʉle vwa Masio aMahesia. alyasipʉliike. Avaanhu vinga vakajovagha imhola isio, vamonga vakatisagha, “ɄYohani ʉMwofughi asyʉkile kuhʉma kʉ vafue, fye nambe alɨ ni ngʉfu isa kʉvomba ifidegho.” 15Avange vakatisagha, “Ghwe Eliya.” Vamo vakatisagha, “Ʉjʉ mʼbɨli, alɨ ndavʉle ʉmo mʉ vavɨli avakʉʉlʉ.” 16Neke ʉHelode ye apʉliike isio, akatisagha, “Ʉjʉ ghwe Yohani ʉMwofughi, jʉno ʉne nɨlyanʼdumwile ʉmutu, lɨno asyʉkile!”

17-18ɄHelode jʉjuo, taasi alyavasungʼhile avaanhu kʉkʉnkola ʉYohani na kʉkʉnʼdindila mʉ ndinde, vwɨmɨla ʉHelodia ʉnʼdala ghwa nnuuna ʉFilipo. Ʉlwakʉva ʉYohani alyatiile, “Ʉve Helode, pano ʉpokile ʉnʼdala ghwa nnunaavo, ʉvombile lʉno nalʉnoghiile mʉ ndaghɨlo sa Ngʉlʉve.” 19Pepano ʉHelodia akankalalɨlagha ʉYohani na kʉkʉmwʉvɨla kuuti amʼbude, neke akakunwagha. 20ɄHelode akamwoghopagha ʉYohani, ʉlwakʉva alyantangʼhinie kuuti muunhu mʉgholofu, kange mwɨmɨke, pe akansighililagha. Kange, akavisagha nʉ lʉkeelo kʉkʉmpʉlɨkɨsia ʉYohani, neke sino asipʉliike, sikampumusyagha.

21Pe pambele ʉHelodia akajaagha ɨsɨla ɨja kʉmʼbudila. Ɨkɨghono kɨmonga, ʉHelode akava nɨ kɨkulukulu ɨkya kʉkʉmbʉka kuholua kwa mwene, akalɨngʼhania ʉlʉlio, akavakemeela avanjagɨla, avavaha va vasikali na vatambʉlɨke avange ava mʉ kɨghavo ɨkya Galilaya. 22Pe akingila ʉmwalɨve ghwa Helodia, akaseeja, akamhovosia ʉHelode na vagheesi vano pwevalyale. Pepano ʉntwa ʉHelode akamʼbʉʉla ʉmhɨnja jʉla akati, “Sʉʉma kɨno ghulonda, nɨkʉkʉpeela.” 23Kange akajɨɨgha akati, “Kɨno ghulonda ʉngasʉʉme, nɨkʉkʉpeela! Niiti, nambe vʉʉve vwe vʉtwa vwango, nighava pakate, lʉbale nɨkʉkʉpeela!”

24Ʉmhɨnja jʉla akalʉta kʉkʉmposia ʉngʼina kuuti asʉʉme kɨki. Ʉngʼina akati, “Ʉsʉʉme ʉmutu ghwa Yohani ʉMwofughi.” 25Ʉmhɨnja jʉla akagomoka ngʼhaningʼhaani kwa ntwa ʉHelode, akasʉʉma akati, “Nilonda ʉmheele lɨno lɨno ʉmutu ghwa Yohani ʉMwofughi mʉ lɨsinia.”

26Ʉntwa ʉHelode ye apʉliike ʉluo, akasukunala kyongo. Neke, ʉlwakʉva akajɨghile pamaaso gha vahesia vala, akakunua kukaana. 27Pepano ʉntwa ʉHelode akasuungʼha ʉnsikali aleete ʉmutu ghwa Yohani. Pe ʉnsikali akalʉta mʉ ndinde, akanʼdumula ʉYohani ʉmutu, 28akantwalɨla ʉmhɨnja jʉla ʉmutu mʉ lɨsinia, ghwope akampeela ʉngʼina. 29Avavʉlanɨsɨvua va Yohani ʉMwofughi, ye vapʉliike ɨmhola ɨjio, vakalʉta kutoola ʉmʼbɨlɨ ghwa Yohani vakaghʉvɨɨka mʉ mbiipa.

ɄYesu ilɨsia avaanhu imbilima ihaano

(Mataayi 14:13-21; Lʉʉka 9:10-17; Yohani 6:1-14)

30Neke avasungʼhua#6:30 Avasungʼhua: Ɨmba ɨlɨsio Vasungʼhua kʉ Vʉghanʉle vwa Masio aMahesia. vala vakagomoka kwa Yesu, vakamwoleka sooni sino vavombile na sino vavʉlanisie. 31Ʉnsiki ʉghuo avaanhu vinga vakatengʉla kupyanɨsania kulʉta kwa Yesu. Ʉlʉ lʉkampelela ʉYesu na vavʉlanɨsɨvua vaake kukunua kuuva nʉ nsiki ʉghwa kʉlia. Pepano ʉYesu akavavʉʉla avavʉlanɨsɨvua vaake akati, “Tʉlʉte pamonga pavʉsila vaanhu, tʉpʉʉme padebe.” 32Pe vakapanda ɨngalava vakavʉʉka vilʉta.

33Ye vivʉʉka, avaanhu vinga vakavaagha, vakakagʉla kʉno vilʉta. Pe avaanhu kuhʉma amakaaja ghooni vakalʉta lʉvɨlo vakatala kufika. 34ɄYesu ye ikwika mʉ ngalava, akalɨvona ɨlɨpʉgha lya vaanhu, akavavonela ɨkɨsa, ʉlwakʉva valyale hwene ngʼholo isila nʼdɨɨmi. Pe akatengʉla pikʉvavʉlanɨsia si nyinga.

35Ye vwilile, avavʉlanɨsɨvua vaake vakalʉta kwa Yesu vakati, “Apa tukalile pe lʉnyika pasila kɨmonga, kange vwilile, 36ʉvatavʉle avaanhu ava valʉtaghe mʉ fikaaja fino fili piipi vaghʉle ifyakʉlia.” 37Neke ʉYesu akavamʉla akati, “Mʉvapeele ʉmue ɨkyakʉlia.” Voope vakati, “Avaanhu ava vinga! Nambe twale tʉʉve ni dinali filʉndo fivɨlɨ#6:37 Dinali filʉndo fivɨlɨ, salɨngʼhiine nʉ lʉhombo ʉlwa mʼbombi jʉmo kʉ meesi lekelakwoni. kughʉla amakate agha kʉlia avaanhu ava, nasaale sikwɨla.” 38Akavaposia akati, “Mʉlɨ na makate ghalɨngi? Mʉlʉte mʉlole.” Ye valolile, vakamʼbʉʉla vakati, “Tʉlɨ na makate ghahaano ni samaki ivɨlɨ.”

39ɄYesu akavavʉʉla kuuti, vavatavɨke vooni mʉ fighavo fighavo vikale pa lɨsoli ɨlyololo. 40Vakikala mʉ fipʉgha fipʉgha, fimonga avaanhu kɨlʉndo, ifingi fijigho fihaano. 41ɄYesu akatoola amakate ghala ghahaano ni samaki sila ivɨlɨ akalola kʉkyanya, akahongesia kwa Ngʉlʉve. Akamenyʉlania amakate ghala, akavapeela avavʉlanɨsɨvua vaake vavaghavɨle avaanhu, nasi samaki soope vakavaghavɨla, 42vooni vakalia vakikuta. 43Avavʉlanɨsɨvua va Yesu vakakongʼhania ifisighasi fya makate ni samaki, vakamemia indɨɨlo kɨjigho ni vɨlɨ. 44Avaanhu vano valyaliile, avakɨnhaata veene valyale imbilima ihaano.

ɄYesu ighenda pakyanya pa malenga

(Mataayi 14:22-33; Yohani 6:16-21)

45Ʉnsiki ghʉghuo ʉYesu akavalaghɨla avavʉlanɨsɨvua vaake kuuti vapande ɨngalava, valongolaghe kulʉta ɨmwambo ɨjɨngɨ, kʉ lɨkaaja ɨlya Betisaida, pano ʉmwene ihwesia ɨlɨpʉgha. 46Ye ahwesisie, akalʉta kʉ kɨdunda kukufuunya.

47Ye vwilile, ɨngalava jɨkava pakate pa lɨsʉmbe, ʉYesu alyale mwene kʉ kɨdunda. 48Akavaagha avavʉlanɨsɨvua vaake vitata kughendesia ɨngalava, ʉlwakʉva ɨmhepo jɨkavagomosyagha kʉmbele. Ye kutapihenga, ʉYesu akava ilʉta kʉ vavʉlanɨsɨvua vaake kʉmo ighenda pakyanya pa malenga, akalondagha pikʉvakilingʼhania. 49-50Neke vooni ye vamʼbwene ighenda pakyanya pa malenga, vakasaagha kuuti lɨsyʉka, vakoghopa kyongo, vakakoola.

Ʉnsiki ghʉghuo ʉYesu akavavʉʉla akati, “Kangala, neene, namʉngoghopaghe!” 51Pe akingila mʉ ngalava, ɨmhepo jɨkalitama. Avavʉlanɨsɨvua vaake vakadegha kyongo, 52ʉlwakʉva navalyavʉtangʼhinie ʉvʉfumbue vwa Yesu mʉ kɨdegho ɨkya kwongelesia amakate, amoojo ghaave ghaale muumu kʉkʉlʉtangʼhania.

ɄYesu isosia avatamu mʉ ɨɨsi ɨja Genesaleti

(Mataayi 14:34-36)

53Ye valovwike ɨlɨsʉmbe, vakafika mʉ ɨɨsi ɨja Genesaleti, vakajɨtwala ɨngalava pa vwɨmo. 54Ʉnsiki ghʉla ghʉla ye vahʉmile mʉ ngalava, avaanhu vakankagʉla ʉYesu, 55vakalʉta ngʼhaningʼhaani mʉ ɨɨsi jɨla jooni, vakavapɨnda avatamu mʉ fitala na kʉkʉvatwala kʉno vapʉliike kuuti kwale ʉYesu. 56Kwoni kʉno ʉYesu akalʉtagha nkate na kʉnji kʉ makaaja na kʉ fikaaja, avaanhu vakavavɨkagha avatamu vaave mʉ maghʉlɨlo. Vakampelepesyagha ʉYesu kuuti, avalekaghe avatamu vabasyaghe nambe ʉlʉvilo lwa mwenda ghwake. Vooni vano vakabasyagha, vakasokagha.

Currently Selected:

Malɨka 6: wbi

Highlight

Copy