Malɨka 1

ɄYohani inosia ɨsɨla ɨja Mʉtwa ʉYesu

(Mataayi 3:1-12; Lʉʉka 3:1-18; Yohani 1:19-28)

1ƗMhola ɨNofu ɨja Yesu Kɨlɨsite,#1:1 Kɨlɨsite: Lɨtavua mʉ njovele ɨja Kɨyunaani, mʉ Kɨebulania viiti, Mesiya, amatavua agha kwekʉti, jʉno apakilue amafuta (ɨmikue). Ɨmba kʉ Vʉghanʉle vwa Masio aMahesia. ʉMwana ghwa Ngʉlʉve,#1:1 ɄMwana ghwa Ngʉlʉve: Ɨmba ɨlɨsio Mwana ghwa Ngʉlʉve kʉ Vʉghanʉle vwa Masio aMahesia. jatengwile kupʉlɨsɨvua nʉ Yohani ʉMwofughi, 2ndavʉle lɨlembilue mʉ kɨtabu ɨkya mʼbɨli ʉYesaya pano ʉNgʉlʉve iiti,

“Lolagha, nɨkʉnsuungʼha ʉnyamhola ghwango

akʉlongolele,

ʉjuo ghwe ɨkʉkʉlɨngʼhanɨkɨsyagha ɨsɨla.”#Malaki 3:1

3“Ɨlɨsio lya muunhu lipʉlɨkɨka kuhʉma kʉ lɨhaka liiti,

‘Mʉnnosekesyaghe ʉMʉtwa ʉNgʉlʉve ɨsɨla

na kulɨngʼhania muno kyaikilila.’ ”#Yesaya 40:3

4Pepano ʉYohani ʉMwofughi akatengʉla kupʉlɨsia kʉ lɨhaka, kuuti avaanhu valataghe inyɨvi saave na kukwofughua, neke ʉNgʉlʉve avapyanɨle. 5Avaanhu kuhʉma mʉ lɨkaaja ɨlya Yelusalemu na mʉ kɨghavo kyoni ɨkya Yudea, vakalʉtagha kwa Yohani, vakalatagha inyɨvi saave, na kukwofughua mʉ kɨkogha ɨkya Yolidani.

6ɄYohani akafwalagha ʉmwenda ghʉno ghwatendilue nʉ lwaghe lwa ngamɨla,#1:6 Ngamɨla: Ɨkɨ, kɨkanu kɨvaha, kɨno kidɨmua vwɨmɨla ɨmbombo ɨja kʉpɨnda avaanhu na masigho. akipinyagha nʉ lʉkova ʉlwa ngʼhwembe mʉ nsana na kulia imhaasi nʉ vwʉki. 7Akapʉlɨsyagha akatisagha, “Ikwisa mʉmbele mʉlyʉne jʉno alɨ ni ngʉfu kukila ʉne, jʉno nanɨnoghiile nambe kuuva mʼbanda ghwa kʉhʉdʉla ʉtʉkova twa filatu fyake. 8Ʉne nɨkʉvofugha na malenga, neke ʉmwene ɨkʉvofughagha nʉ Mhepo ʉMwɨmɨke.”

ɄYesu ikwofughua na kughelua

(Mataayi 3:13–4:11; Lʉʉka 3:21-22; 4:1-13)

9Ifighono ifio, ʉYesu akahʉma kʉ kɨkaaja ɨkya Nasaleti mʉ kɨghavo#1:9 Kɨghavo, je ɨɨsi jɨno akalongosyagha ʉntwa ʉnʼdebe jʉno akavombagha mʉ vʉtavʉlɨlua vwa ntwa ʉmʼbaha ʉKaisali. Ɨmba kʉ Vʉghanʉle vwa Masio aMahesia. ɨkya Galilaya, akalʉta kwa Yohani na kukwofughua nʉ mwene mʉ kɨkogha ɨkya Yolidani. 10Ye ofughue, ʉnsiki ghʉghuo akahʉma mʉ malenga, akavona ʉvʉlanga vudinduka, najʉ Mhepo hwene ngʼhʉnda akiika pa mwene. 11Pe ɨlɨsio lɨkahʉma kʉkyanya lɨkati, “Ʉve veeve Mwanango mʉghanɨke, nɨkʉkeliile.”

12Pepano ʉMhepo akamʉlongosia ʉYesu kulʉta kʉ lɨhaka, 13akikala ifighono fijigho fine ighelua nʉ Setano. Ʉkuo alyale palɨkɨmo ni fikanu, avanyamhola vakava vikʉmʼbombela.

ɄYesu ɨkʉvakemeela avavʉlanɨsɨvua avatasi

(Mataayi 4:12-22; Lʉʉka 4:14-15; 5:1-11)

14Pambele ʉYohani akadindilua mʉ ndinde. Ye alɨ mʉ ndinde, ʉYesu akalʉta kʉ Galilaya ipʉlɨsia ɨMhola ɨNofu ɨja Ngʉlʉve, 15akatisagha, “Ʉnsiki ghʉno ghwavɨlilue ghʉfikile, kange ʉVʉtwa vwa Ngʉlʉve vʉlɨ piipi, mʉlataghe inyɨvi siinu na kukwɨtɨka ɨMhola ɨNofu ɨja Ngʉlʉve.”

16Ɨkɨghono kɨmonga, ʉYesu ye ighenda mʉlʉbale mʉ lɨsʉmbe ɨlya Galilaya, akavaagha avaanhu vavɨlɨ vanamuunhu, jʉmonga ghwe Simoni ʉjʉnge ghwe Ndeleeya. Avaanhu ava valyale valovi, vakava ni nyaafu vilova isamaki mʉ lɨsʉmbe. 17ɄYesu akavakemeela akavavʉʉla akati, “Mʉmbɨngɨlɨlaghe! Ʉne nɨkʉvavɨɨka kuuva valovi va vaanhu.”#1:17 Valovi va vaanhu, kwekʉti kʉkʉvaleeta avaanhu kwa Ngʉlʉve kuhʉma mʉ nyɨvi saave. 18Ʉnsiki ghʉghuo vakasileka inyaafu saave, vakamʼbɨngɨlɨla.

19ɄYesu akalʉta pavʉlongolo padebe, akamʼbona ʉYakovo nʉ Yohani avakina Sebedaayi valɨ mʉ ngalava#1:19 Ngalava: Ɨmba kʉ Vʉghanʉle vwa Masio aMahesia. vilɨngʼhania inyaafu saave isa kʉlovela isamaki. 20Voope akavakemeela, vakamʉleka ʉviise ʉSebedaayi mʉ ngalava palɨkɨmo na vavombi vaake, vakavʉʉka vikʉmʼbɨngɨlɨla ʉYesu.

ɄYesu idaga ɨlɨpepo

(Lʉʉka 4:31-37)

21ɄYesu na vavʉlanɨsɨvua vaake avuo,#1:21 Vavʉlanɨsɨvua vaake avuo: Ɨmba ɨlɨsio Vavʉlanɨsɨvua kʉ Vʉghanʉle vwa Masio aMahesia. vakalʉta kʉ lɨkaaja ɨlya Kapelenaumu. Ye kɨfikile ɨkɨghono ɨkya Sabati,#1:21 Sabati: Ɨmba kʉ Vʉghanʉle vwa Masio aMahesia. vakalʉta mʉ sinagogi,#1:21 Sinagogi: Ɨmba kʉ Vʉghanʉle vwa Masio aMahesia. ʉYesu akatengʉla kuvʉlanɨsia. 22Avaanhu vano mwevalyale vakadegha kyongo vwɨmɨla imbʉlanɨsio saake, ʉlwakʉva alyale ivʉlanɨsia hwene muunhu nya vʉtavʉlɨlua, naakavʉlanɨsyagha ndavʉle avavʉlanɨsi vaave ava ndaghɨlo.#1:22 Avavʉlanɨsi vaave ava ndaghɨlo: Avaanhu ava vakavʉlanɨsyagha indaghɨlo sa Ngʉlʉve. Ɨmba ɨlɨsio Vavʉlanɨsi va ndaghɨlo kʉ Vʉghanʉle vwa Masio aMahesia.

23Ʉnsiki ghʉghuo ye valɨ mʉ sinagogi ɨjio, mwealyale ʉmuunhu ʉnya lɨpepo ɨlɨlamafu, akakoola 24akati, “Ʉve ghwe Yesu ghwe Mʉnasaleti, tʉlɨ vʉki nuuve? Ghwisile kʉkʉtʉtipula? Nɨkagwile kuuti ʉve ʉlɨ Mwɨmɨke ghwa Ngʉlʉve.” 25ɄYesu akalɨhwetʉkɨla ɨlɨpepo ɨlɨlamafu akati, “Kɨmihe! Hʉma mwa muunhu ʉjʉ!” 26Ɨlɨpepo lɨla lɨkansukania kyongo, lɨkakoola, lɨkamʉleka.

27Avaanhu vooni vakadegha kyongo, kange vakiposaniagha veene viiti, “Se nyɨki isi? Isi se mbʉlanɨsio imhia inya vʉtavʉlɨlua! Idaga amapepo amalamafu ghoope ghikʉnkʉnda!” 28Imhola sa Yesu sikakwɨla ngʼhaningʼhaani mʉ kɨghavo kyoni ɨkya Galilaya.

ɄYesu isosia avatamu vinga

(Mataayi 8:14-17; Lʉʉka 4:38-41)

29ɄYesu na vavʉlanɨsɨvua vaake ʉSimoni, ʉNdeleeya, ʉYakovo nʉ Yohani vakahʉma mʉ sinagogi, vakalʉta kʉ kaaja kwa Simoni nʉ Ndeleeya. 30Ye vafikile, vakamʼbʉʉla ʉYesu kuuti, ʉnkwive ghwa Simoni, kwekʉti ʉngʼina ghwa nʼdala, alɨ nɨ mhʉngʉ aghonile pa kɨtala. 31ɄYesu akaveela pa ntamu akankola ʉlʉvoko, akamwinula. Ʉnsiki ghʉghuo akasooka, akatengʉla kʉkʉvatengelela.

32Ye vwilile, ɨlɨjʉva lɨsemile vakava vikʉmʉletela avatamu vooni na vanya mapepo. 33Pe avaanhu vooni, ava mʉ lɨkaaja lɨla vakamema panji pa nyumba jɨno mwealyale ʉYesu. 34ɄYesu akavasosia avatamu vinga, vano valyale ni nhamu sino sili papinga. Akadaga amapepo minga, naakaghalekelagha ghajove nambe padebe, ʉlwakʉva ghalyantangʼhinie.

ɄYesu ikufuunya na kudalɨkɨla

(Lʉʉka 4:42-44)

35Ɨkɨghono ɨkya vʉvɨlɨ ye kʉkyale kuhenga, ʉYesu akasisimuka, akalʉta pamonga pa vʉsyefu, pavʉsila vaanhu, apuo akifunyagha. 36ɄSimoni na vanine vakatengʉla kʉkʉmʉlonda. 37Ye vamwaghile, vakamʼbʉʉla vakati, “Avaanhu vooni vikʉkʉlonda.” 38ɄYesu akati, “Tʉvʉʉke tʉlʉtaghe kʉ fikaaja fino fili piipi kwope nɨpʉlɨsie, ʉlwakʉva lwe lʉno nalisiile.” 39Pepano akalʉta imbale sooni isa mʉ kɨghavo ɨkya Galilaya, ipʉlɨsia mʉ masinagogi na kudaga amapepo.

ɄYesu ɨkʉnsosia ʉmuunhu ʉnya bʉʉba

(Mataayi 8:1-4; Lʉʉka 5:12-16)

40Ɨkɨghono kɨmonga, ʉmuunhu ʉnya bʉʉba akiisa kwa Yesu, akafughama, akampelepesia akati, “Nave ʉkeliile kʉkʉmbalasia, nisʉʉma ʉmbalasie.”#1:40 Ʉmbalasie: Indaghɨlo sa Moose silyale siiti, ʉmuunhu ʉnya bʉʉba iiva mʉlamafu, neke pano asokile iiva avaliile. 41ɄYesu akamʼbonela ɨkɨsa, akagholosia ʉlʉvoko lwake, akamwabasia akati, “Nikeela, valala.” 42Ʉnsiki ghʉghuo ɨbʉʉba jɨkavʉʉka mʉ mʼbɨlɨ ghwake, akavalala. 43-44Pepano ʉYesu akankaana akati, “Nʉngamʼbʉlaghe nambe muunhu imhola isi! Ʉlwene ʉlʉte ghuhʉfie kwa ntekesi,#1:43-44 Ntekesi: Ɨmba ɨlɨsio Vatekesi kʉ Vʉghanʉle vwa Masio aMahesia. ʉkahʉmie ɨlɨtekelo ndavʉle alyalaghiile ʉMoose, neke vʉʉve vwolesi kʉ vaanhu vooni kuuti ʉvalasivue.” #Valeevi 14:1-32

45Neke ʉmwene ye avʉkile, akalʉleka lʉno aveele ankanile, akatengʉla kukwɨsia ɨmhola ɨjio. Ʉluo lʉkampelela ʉYesu kukunua kukwingila mʉ makaaja pa vʉvalafu. Akavisagha kʉnji kʉ makaaja kʉvʉsila vaanhu. Kwope ʉkuo avaanhu ifipʉgha kuhʉma imbale sooni vakalʉtagha kwa mwene.

Currently Selected:

Malɨka 1: wbi

Highlight

Copy