Mataayi 28

Kusyʉka kwa Yesu

(Malɨka 16:1-10; Lʉʉka 24:1-12; Yohani 20:1-10)

1Ɨkɨghono ɨkya Sabati kɨkakila. Lɨno ye kuhenga, ɨkɨghono ɨkya kwasia mʉ mʉlʉngʉ, ʉMaliya ʉmhʉma mʉ lɨkaaja ɨlya Magidala palɨkɨmo nʉ Maliya ʉjʉnge, vakalʉta kulola ɨmbiipa. 2Nakalɨngi, kɨkahʉmɨla ɨkɨsenyeena ɨkɨvaha. Ʉnyamhola ghwa Mʉtwa akiika kuhʉma kʉkyanya, akaveela pa mbiipa, akabɨlʉkɨsia ɨlɨvue lɨla kʉlʉbale, akikalɨla. 3Ʉnyamhola ʉjuo alyale ivalatɨka hwene lʉmuli lwa fula, amenda ghaake ghalyale mavalafu, ghivalatɨka fiijo. 4Avasikali vano vakalolelelagha ɨmbiipa, vakoghopa na kutetema kyongo kuhanga vakava hwene vafwile.

5Neke ʉnyamhola jʉla akavavʉʉla avakɨjʉʉva vala akati, “Mʉleke pikwoghopa! Nɨkagwile kuuti, mʉkʉmʉlonda ʉYesu jʉno vakankomeliile pa kɨkovekano. 6Napwale apa, asyʉkile ndavʉle alyale ɨkʉvavʉʉla. Mwise mʉlole pano vakamʼbɨkile. 7Lɨno, mʉlʉte ngʼhaningʼhaani mʉvavʉʉle avavʉlanɨsɨvua vaake kuuti, ‘Asyʉkile kuhʉma kʉ vafue. Kange, alongwile kʉ Galilaya, ʉkuo mulʉta mʉkʉmʼbona.’ Mʉkʉmbʉkaghe sino nɨvavʉlile!”

8Avakɨjʉʉva vala vakavʉʉka ngʼhaningʼhaani pa mbiipa pala, vajiighe nʉ lʉdwesi kʉmo valɨ nʉ lʉkeelo ʉlʉkome. Vakava vilʉta lʉvɨlo kʉkʉvavʉʉla avavʉlanɨsɨvua va Yesu ɨmhola jɨla. 9Ye vilʉta, nakalɨngi ʉYesu akatangʼhana navo akati, “Mwe! Mʉghonile!” Pe avakɨjʉʉva vala vakaveela kwa Yesu, vakafughama, vakankola amaghʉlʉ ghaake vakamwɨmɨka. 10Pe ʉYesu akavavʉʉla akati, “Mʉleke pikwoghopa. Mʉlʉte mʉvavʉʉle avavʉlanɨsɨvua vango#28:10 Avavʉlanɨsɨvua vango: Mʉ Kɨyunaani lɨlembilue, avanyalʉkolo vango. valʉte kʉ Galilaya, ʉkuo kwe kʉno vikʉmbona.”

Avaloleleli va mbiipa vijova ʉvʉdesi

11Avakɨjʉʉva vala ye valɨ mʉ sɨla vilʉta, avasikali vamonga mʉ vano vakalolelelagha ɨmbiipa, vakalʉta kʉ vavaha va vatekesi mʉ lɨkaaja ɨlya Yelusalemu, vakavavʉʉla sooni sino sivombiike.

12Pepano avavaha va vatekesi vala palɨkɨmo na vagojo avange vakakongʼhaana. Vakapʉlɨngʼhana na kʉkʉvafunda avasikali vala, vakavapeela indalama nyinga, 13vakavavʉʉla vakati, “Ʉmue mʉtisaghe, ‘Avavʉlanɨsɨvua vaake visile pakɨlo, vahɨjile ʉmfimba ghwa Yesu ʉsue ye tʉghoneliile.’ 14ɄPilato angapʉlɨke ɨmhola ɨjio, ʉsue tujova nʉ mwene kuhanga lʉvoneke kuuti namʉlɨ nʉ nkole.” 15Pe avasikali vala vakʉpɨla indalama sila na kujova kʉ vaanhu ndavʉle vavʉlilue na vavaha vala. Imhola isio sikakwɨla imbale sooni isa Vayahudi, kange vajiighe vipanga nambe lɨno.

ɄYesu isuungʼha avavʉlanɨsɨvua vaake

(Malɨka 16:14-18; Lʉʉka 24:36-49; Yohani 20:19-23; Mbombo sa Vasungʼhua 1:6-9)

16Pambele avavʉlanɨsɨvua va Yesu kɨjigho na jʉmo vakalʉta kʉ Galilaya, pa kɨdunda kɨno ʉYesu alyavalaghiile. 17Ye vamwaghile, vakamwɨmɨka, neke avavʉlanɨsɨvua vamonga vakava ni nganighani kuuti ghwe Yesu. 18Pepano ʉYesu akaveela, akavavʉʉla akati, “ɄNgʉlʉve amheliile ʉvʉtavʉlɨlua vwoni, kʉkyanya na pa ɨɨsi. 19Lɨno, mʉlʉtaghe mʉvalʉngɨkaghe avaanhu mʉ ɨɨsi sooni, vaave vavʉlanɨsɨvua vango, mʉvofughaghe mʉ lɨtavua ɨlya Nhaata, nɨ lya Mwanaake nɨ lya Mhepo ʉMwɨmɨke. 20Mʉvavʉlanɨsyaghe kuvɨngɨlɨla sooni sino nɨvavʉlile ʉmue. Ʉne niiva palɨkɨmo numue ifighono fyoni, kuhanga ʉvʉsililo vwa ɨɨsi.”

Currently Selected:

Mataayi 28: wbi

Highlight

Copy