Mataayi 27

ɄYesu itwalua kwa ntwa ʉPilato

(Malɨka 15:1; Lʉʉka 23:1-2; Yohani 18:28-32)

1Palwakɨlo ye kʉkiile, avavaha vooni ava vatekesi na vagojo vakapʉlɨngʼhana vʉle kyavikʉmʼbuda ʉYesu. 2Vakankʉnga, vakalʉta naghwope kwa Pilato, ʉntwa ghwave ʉMʉlooma.

ɄYuuda ikukʉnga

(Mbombo sa Vasungʼhua 1:18-19)

3ɄYuuda ʉmwohesi, ye avwene ʉYesu ahɨghilue kuuti abudue, akipɨɨka vwɨmɨla sino avombile. Pe akavagomokesia avavaha va vatekesi na vagojo indalama sila fijigho fitatu. 4Akavavʉʉla akati, “Nɨvombile inyɨvi kʉkʉmwohela ʉmuunhu ʉnsila nkole.” Neke aveene vakati, “Ɨnongua ɨjio jaako jʉʉve, ʉsue namwetʉle.” 5Pe ʉmwene akasitaagha indalama sila mʉ lʉvɨɨka lwa nyumba ɨnyɨmɨke ɨja kufunyila, akalʉta kukukʉnga.

6Avavaha va vatekesi vakatoola indalama sila, vakati, “Nalʉnoghiile kuvɨɨka indalama isi mʉ nyumba ɨnyɨmɨke ɨja Ngʉlʉve, ʉlwakʉva siveele sihombilue kukuungʼa ɨdanda ja muunhu.” 7Pe vakapʉlɨngʼhana, vakatoola indalama sila, vakaghʉla ʉmʉghʉnda ʉghwa mʼbʉmba fivɨgha kuuti mwe vasyɨlaghe avahesia. 8Fye nambe ʉmʉghʉnda ʉghuo nambe lɨno ghutambʉlua Mʉghʉnda ghwa Danda. 9Mʉ ʉluo lɨkava lɨkwɨlanɨsivue ɨlɨsio lɨno ʉmʼbɨli ʉYelemia alyalembile kuuti,

“Valyatolile indalama ifijigho fitatu,

sino aVaisilaeli valyɨtɨngʼhiine kuuti

indalama isio sikwɨliine kughʉlɨla ʉmuunhu ʉjuo.

10Vakaghʉlɨla ʉmʉghʉnda ghwa mʼbʉmba fivɨgha

ndavʉle alyandaghiile ʉMʉtwa.”#Sakalia 11:12-13; Yelemia 19:1-13; 32:6-9

ɄYesu ihɨghua kwa ntwa ʉPilato

(Malɨka 15:2-15; Lʉʉka 23:2-3, 18-25; Yohani 18:29–19:16)

11Pepano ʉYesu akɨɨma pa vʉhɨghi pa ntwa ʉPilato. Ʉntwa akamposia akati, “Asi, ʉve veeve Ntwa ghwa Vayahudi?” ɄYesu akamwamʉla akati, “Ʉve ʉjovile.” 12Pe avavaha va vatekesi na vagojo vakatengʉla kujova si nyinga isa kʉmpelela ʉYesu ahɨghue, neke ʉmwene naakamʉla kɨmonga. 13Pepano ʉntwa akamposia akati, “Ghwe! Naghupʉlɨka isi sooni sino vikwoleka kuuti ʉhokile?” 14ɄYesu naalyamwamwile kɨmonga. Apuo ʉntwa ʉPilato akadegha kyongo.

15Lwale lwiho kwa ntwa pa kyɨmɨke ɨkya Pasaka kʉkʉnʼdindulila ʉnkʉngua jʉmo jʉno avaanhu vilonda kuuti ahʉme. 16Ʉnsiki ʉghuo, mʉ ndinde mwealyale ʉnkʉngua jʉmonga jʉno akatambʉlwagha Balaba. Ʉnkʉngua ʉjuo alyakagʉliike fiijo vwɨmɨla ʉvʉhosi vwake. 17Lɨno, avaanhu ye vakongʼhanile, ʉPilato akavaposia akati, “Asi, mʉ vakʉngua vavɨlɨ ava, ʉBalaba nʉ Yesu jʉno viiti ghwe Kɨlɨsite, mulonda nɨvadindulile veeni?” 18ɄPilato alyavaposisie ʉluo, ʉlwakʉva alyakagwile kuuti avavaha va Vayahudi valyale nɨ kɨvini nʉ Yesu, fye nambe valyantwalile kwa mwene kuuti ahɨghue.

19ɄPilato ye ikalile pa kɨtengo kyake ɨkya vʉhɨghi, ʉnʼdala ghwake akasuungʼha ɨmhola kwa mwene akati, “Nʉngamʼbombelaghe ʉlʉviivi lʉmonga ʉmuunhu ʉjuo ʉmʉgholofu, ʉlwakʉva pakɨlo nɨhangajiike kyongo mʉ njosi vwɨmɨla ʉmwene.”

20Neke avavaha va vatekesi na vagojo#27:20 Vagojo: Ɨmba kʉ Vʉghanʉle vwa Masio aMahesia. vakavahonga avaanhu kuuti, vansʉʉme ʉPilato anʼdindulile ʉBalaba na kʉkʉmhɨgha ʉYesu kuuti abudue. 21ɄPilato akavaposia kange akati, “Ghwe veeni jʉno mulonda nɨnʼdindulile mʉ vakʉngua vavɨlɨ ava?” Vakamwamʉla vakati, “ɄBalaba.” 22ɄPilato akavaposia kange akati, “Pe nɨmʼbombe kɨki ʉYesu jʉno viiti ghwe Kɨlɨsite?” Avaanhu vooni vakoova vakati, “Ʉnkomelele pa kɨkovekano!” 23ɄPilato akavaposia kange akati, “Ʉmuunhu ʉjʉ avombile lʉviivi lʉki?” Aveene vakaghina kukwova viiti, “Ʉnkomelele pa kɨkovekano!”

24ɄPilato ye akagwile kuuti naangandʉle ʉvʉlamʉsi vwa vaanhu, kange vatengwile ɨlyovo, akatoola amalenga, akoogha amavoko ghaake pamaaso gha vaanhu vooni kuvonia kuuti, ʉmwene namwale mʉ nkole ʉghuo. Akavavʉʉla akati, “Ʉne nɨlɨ nsila nkole vwɨmɨla kufua kwa muunhu ʉjʉ. Ʉluo lwinu jʉmue.” 25Avaanhu vooni vakamwamʉla vakati, “Ʉnkole ʉghwa kʉmʼbuda ʉmuunhu ʉjuo ghʉvisaghe ghwitu na vaana viitu!” 26Pepano ʉPilato akanʼdindulila ʉBalaba, neke akalaghɨla kuuti, ʉYesu akopue ni mijeledi, ye akopilue, akomelelue pa kɨkovekano.

Avasikali vikʉnnenela ʉYesu

(Malɨka 15:16-20; Yohani 19:2-3)

27Pepano avasikali va ntwa ʉPilato vakantwala ʉYesu mʉ lʉvɨɨka lwa nyumba ja ntwa, pe ɨkɨpʉgha kyoni ɨkya vasikali kɨkakongʼhaana, kɨkansyʉngʉtɨla ʉYesu. 28Vakamfuula amenda ghaake, vakamfwasia ɨsopeka ɨndangali, ndavʉle ɨja kɨtwa. 29Pe vakatenda ɨngeela ɨja mifua, vakamfwasia kʉ mutu, neke vakavɨɨka ʉlʉkwegho mʉ lʉvoko lwake ʉlwa ndio avonekaghe hwene ntwa. Pepano vakafughama pamaaso ghaake, vikʉmʼbenapʉla na kʉkʉnnenela viiti, “Kamwene ghwe Ntwa ghwa Vayahudi!” 30Pe vakamfunyila amati. Vakatoola ʉlʉkwegho lʉla mʉ lʉvoko lwake, vakantova kʉ mutu. 31Ye vanneniile, vakamfuula ɨsopeka jɨla, vakamfwasia amenda ghaake. Pepano vakantwala kʉkʉnkomelela pa kɨkovekano.

ɄYesu ikomelelua pa kɨkovekano

(Malɨka 15:21-32; Lʉʉka 23:26-43; Yohani 19:17-27)

32Ye valɨ mʉ sɨla vilʉta, vakatangʼhana nʉ muunhu jʉmonga jʉno akatambʉlwagha Simoni, ʉmhʉma mʉ lɨkaaja ɨlya Kileene. Avasikali vakamwʉmɨlɨsia kupɨnda ɨkɨkovekano kya Yesu. 33Ye vafikile pano pakatambʉlwagha Goligota, kwekʉti, Lɨngʼala lya Mutu, 34vakampeela ʉlʉhʉʉje ʉlʉhasɨngʼhanie nʉ nkota ʉghwa kʉsilisia ʉvʉvafi. Neke ye avonjile, akakaana kunyua. 35Vakankomelela pa kɨkovekano, pe vakavɨɨka ʉlʉsodolelo kuuti amenda gha Yesu atoole veeni. Lʉkavombeka enendɨɨkɨ, neke lɨkwɨlanɨsivue ɨlɨsio lɨno lɨlyajovilue nʉ mʼbɨli kuuti, “Vaghaviine amenda ghango, vasodoliile mʉlwa kʉtoola ɨsopeka jango.”#Sabuli 22:18#27:35 Lʉkavombeka ... ɨsopeka jango: Amasio agha namweghale mʉ fitabu fimonga ifikʉʉlʉ. 36Pe vakikala pala pala kuuti vamʉlolelelaghe. 37Pa kɨkovekano, kʉ mutu ghwake vakakomelela ɨkɨtapa kɨno kɨkavoniagha ʉnkole ghʉno vamʼbalile, valyalembile, “ɄJɄ GHWE YESU, ɄNTWA GHWA VAYAHUDI.”

38Ʉnsiki ghʉghuo avaanhu avange vavɨlɨ vano valyale vahɨjivabudi vakakomelelua palɨkɨmo nʉ Yesu, jʉmonga akava ʉlʉbale lwake ʉlwa kʉndio, ʉjʉnge kʉngʼhɨghɨ. 39Avaanhu vano vakava vikila pala vakasukaniagha amatu ghaave, vikʉmʉligha viiti, 40“Ʉve ghwe jʉno ghwatisagha ghulimemʉla ɨnyumba ɨnyɨmɨke ɨja Ngʉlʉve, neke ghujenga ifighono fitatu, nave ʉlɨ Mwana ghwa Ngʉlʉve, ghupoke, ghwike pa kɨkovekano!” 41Voope avavaha va vatekesi na vavʉlanɨsi va ndaghɨlo isa Moose palɨkɨmo na vagojo avange vakamwovelelagha vakatisagha, 42“Avapokagha avange, lɨno ikunua kukupoka jʉjuo! Asi, naghwe Ntwa ghwa Vaisilaeli! Lɨno iike pa kɨkovekano, neke na jʉsue tʉmwɨtɨke. 43Ʉmwene ɨkʉmhʉvɨɨla ʉNgʉlʉve, iiti Mwana ghwa Ngʉlʉve, lɨno nave ʉNgʉlʉve amʉghanile, ampoke.” 44Nava vahɨjivabudi vano vakakomelilue palɨkɨmo nʉ Yesu, voope vakamʉligha.

ɄYesu ifua pa kɨkovekano

(Malɨka 15:33-41; Lʉʉka 23:44-49; Yohani 19:28-30)

45Kutengʉla akavalɨlo aka ntanda pamwisi, ɨngʼhiisi jɨkakupikila ɨɨsi jooni kuhanga kufika akavalɨlo aka budikalʉbale. 46Ʉnsiki ʉghwa kavalɨlo aka budikalʉbale ndɨɨkɨ ʉYesu akakoola fiijo akati, “Eloi, Eloi, lama sabakitani?” Kwekʉti, “Ngʉlʉve ghwango, Ngʉlʉve ghwango, ongo ʉndekile?”#Sabuli 22:1 47Avaanhu vamonga vano valyɨmile pala ye vapʉliike ʉYesu ijova amasio aghuo, vakati, “Ʉjʉ ɨkʉnkemeela ʉmʼbɨli ʉEliya.”#27:47 Ɨkʉnkemeela ʉmʼbɨli ʉEliya: ɄEliya ijovua apa ʉlwakʉva aVayahudi vinga valyale viiti ʉEliya naalyafwile nambe padebe. Ʉlwene ʉNgʉlʉve alyantolile mʉ ɨɨsi ye ajiighe mwʉmi, akalʉta naghwope kʉkyanya. Kange, valyale vihʉvɨɨla kuuti ʉEliya ilikwisa kange mʉ ɨɨsi (2 Vatwa 2:11; Malaki 4:5). 48Ʉnsiki ghʉghuo ʉmuunhu jʉmonga mʉ veene akalʉta lʉvɨlo, akatoola ɨkyenda, akasuvika mʉ lʉhʉʉje ʉlʉkali, akakɨvɨɨka mʉ lʉlaasi, akamʼbesekesia ʉYesu pa mʉlomo kuuti amiime. 49Neke avange vala vakati, “Ʉleke kʉkʉmpeela, tʉlole nave ʉEliya ikwisa kʉkʉmpoka!” 50Pe ʉYesu akakoola kange fiijo, akakʉngʉka.

51Nakalɨngi, ʉmwenda#27:51 Ʉmwenda: Ʉmwenda ʉghʉ ghwe ghʉno ghʉlyaghavinie Pavwɨmɨke na Pavwɨmɨke pa Pavwɨmɨke mʉ nyumba ɨnyɨmɨke. Ʉmwenda ʉghuo ʉvʉtali ghʉlyale ni mita kɨjigho kɨmo na lekelakwoni, ʉvʉkome ghʉlyale imita budikalʉbale. Kange, ghʉlyale nʉ mʉghindi ghwa sentimita itatu. ghʉno ghʉlyaghavinie pavɨlɨ ɨnyumba ɨnyɨmɨke ɨja Ngʉlʉve,#27:51 Ɨnyumba ɨnyɨmɨke ɨja Ngʉlʉve: Ɨmba ɨlɨsio Nyumba ɨnyɨmɨke ɨja kufunyila kʉ Vʉghanʉle vwa Masio aMahesia. ghʉkademʉka pavɨlɨ kuhʉma kʉkyanya kufika paasi. Ɨɨsi jɨkasukanɨka na manhalavue ghakabajʉka. 52Imbiipa sikasyɨlʉka, avɨmɨke vinga vano valyafwile vakasyʉka. 53Pambele ʉYesu ye asyʉkile, avɨmɨke avuo vakingila mʉ lɨkaaja ɨlyɨmɨke ɨlya Yelusalemu, vakavoneka kʉ vaanhu vinga.

54Pe ʉmʼbaha ghwa vasikali#27:54 Ʉmʼbaha ghwa vasikali: Ʉjʉ alyale mʼbaha ghwa kɨpʉgha ɨkya vasikali kɨlʉndo. palɨkɨmo na vala vano valyale vikʉmʉlolelela ʉYesu ye vavwene ɨɨsi jisukanɨka ni singi sino sikahʉmiile pala, vakoghopa kyongo, vakati, “Kyangʼhaani, ʉmuunhu ʉjʉ akaale Mwana ghwa Ngʉlʉve!”

55Ye sivombeka isi sooni, pwevalyale avakɨjʉʉva vinga vano valyɨmile patali padebe vilola. Avakɨjʉʉva avuo ve vano vakamʼbɨngɨliile ʉYesu kuhʉma kʉ Galilaya na kʉkʉntengelela. 56Mʉ vakɨjʉʉva avuo, mwealyale ʉMaliya ʉmhʉma mʉ lɨkaaja ɨlya Magidala, ʉMaliya ʉngʼina ghwa Yakovo nʉ Yosefu palɨkɨmo nʉ nʼdala ghwa Sebedaayi.

ɄYesu ivɨkua mʉ mbiipa

(Malɨka 15:42-47; Lʉʉka 23:50-56; Yohani 19:38-42)

57Ye jɨfikile ɨvwilile, akiisa ʉmuunhu jʉmonga ʉmmofu, ɨlɨtavua lyake alyale ghwe Yosefu, ʉmhʉma mʉ lɨkaaja ɨlya Alimataya. Ʉmuunhu ʉjʉ alyale mʼbʉlanɨsɨvua ghwa Yesu. 58ɄYosefu akalʉta kwa Pilato kusʉʉma ʉmfimba ghwa Yesu. ɄPilato akavavʉʉla avasikali vaake kuuti vampeele ʉmfimba ghʉla. 59Pepano ʉYosefu akalʉta, akatoola ʉmfimba ghwa Yesu, akaghʉniengelela nʉ mwenda ʉghwa kʉsyɨlɨla, mʼbalafu. 60Pe akaghʉvɨɨka mʉ mbiipa jaake ɨmhia jɨno alyabughwile mʉ lɨnhalavue, akabɨlʉkɨsia ɨlɨvue ɨlɨkome pa mʉlyango ghwa mbiipa, akavʉʉka ilʉta. 61Ʉnsiki ʉghuo ʉMaliya ʉmhʉma mʉ lɨkaaja ɨlya Magidala nʉ Maliya ʉjʉnge valikalile pala valʉngiime kʉ mbiipa.

Avasikali vilolelela ɨmbiipa

62Ɨkɨghono ɨkya vʉvɨlɨ kɨno kyale kya Sabati, avavaha va vatekesi na Vafalisayi vakakongʼhaana kwa Pilato. 63Pe vakamʼbʉʉla vakati, “Ghwe ntwa, tukʉmbʉka kuuti ʉnsyangi jʉla ye mwʉmi, akajovile kuuti, ‘Fingakile ifighono fitatu kuhʉma nifua, nisyʉka.’ 64Lɨno, tusʉʉma ʉvavʉʉle avasikali vaako valolelelaghe ɨmbiipa kuhanga ɨkɨghono ɨkya vʉtatu. Tʉngaleke kuvomba ʉluo, avavʉlanɨsɨvua vaake ndepoonu vilʉta kuhɨɨja ʉmʼbɨlɨ ghwake, neke vavasyange avaanhu kuuti asyʉkile. Nave lʉvombeke ʉluo, ʉvʉdesi ʉvuo vuuva vʉviivi kukila ʉvwa kwanda.”#27:64 Ʉvʉdesi ... ʉvwa kwanda: Avalongosi va Vayahudi vakatisagha ʉvʉdesi ʉvwa kwanda ʉvwa Yesu vwe vʉla vʉno akijolekagha kuuti ʉmwene ghwe Kɨlɨsite. 65ɄPilato akavamʉla akati, “Mʉtoole avasikali. Mʉlʉte mʉlolelelaghe ɨmbiipa kʉ ngʉfu siinu sooni.” 66Pepano vakalʉta kʉ mbiipa, vakavɨɨka ɨkɨvalɨlo pa lɨvue, kuuti napeangavisaghe ʉmuunhu ʉghwa kʉvungulusia. Pe vakavaleka pala avasikali kuuti valolelelaghe.

Currently Selected:

Mataayi 27: wbi

Highlight

Copy