Mataayi 25

Ɨkɨhwanɨkɨsio ɨkya vahɨnja kɨjigho

1Pe ʉYesu akafikʉvavʉlagha avavʉlanɨsɨvua vaake akatisagha, “Ʉnsiki ʉghuo ʉVʉtwa vwa kʉkyanya vuhwananɨsɨvua na vahɨnja kɨjigho vano valyatolile itaala saave, vakalʉta kʉkʉmwʉpɨla ʉntolanʼdala. 2Avahɨnja vahaano mʉ veene valyale vajasu, avange vahaano valyale vanya lʉhala. 3Avajasu vala, valyagadile itaala saave kɨsila kʉgada amafuta agha kwongelesia. 4Looli avanya lʉhala vala valyagadile itaala saave palɨkɨmo na mafuta agha kwongelesia mʉ taala. 5Ʉlwakʉva ʉntolanʼdala akadɨɨla pikwisa, avahɨnja vala vooni sikavakola itʉlʉ, vakaghonelela. 6Mʉ kɨlo nkate, vakapʉlɨka avaanhu vijegheela viiti, ‘Vaya, vaya! Ʉntolanʼdala afiike, mʉhʉme tʉlʉte kʉkʉmwambɨlɨla.’ 7Nakalɨngi avahɨnja vala vooni vakasisimuka, vakalɨngʼhania itaala saave.

8“Pe avahɨnja avajasu vala vakavasʉʉma avanya lʉhala vakati, ‘Tusʉʉma mʉtʉtange amafuta madebe, itaala siitu sisima.’ 9Neke avanya lʉhala vala vakavamʉla vakati, ‘Ndali! Natʉngavapeele, ʉlwakʉva amafuta ghano tʉlɨ nagho, naghangatʉkwɨle ʉsue palɨkɨmo numue. Lʉnofu mʉlʉte kʉno vighʉsia, mʉkaghʉle jʉmue.’ 10Avajasu vala ye vilʉta kughʉla amafuta, ʉntolanʼdala akafika. Avahɨnja avange vala vano valilɨngʼhanisie, vakingila palɨkɨmo mʉ vʉtolani, ʉmʉlyango ghʉkadindua.

11“Pambele avajasu vala vakafika, vakavona ʉmʉlyango ghʉdindilue, pe vakati, ‘Ghwe ntwa! Ghwe ntwa! Tusʉʉma ʉtʉdindulile ʉmʉlyango!’ 12Neke ʉntolanʼdala akavamʉla akati, ‘Kyangʼhaani nɨkʉvavʉʉla, nanɨvamanyile!’ ” 13Pepano ʉYesu akavavʉʉla avavʉlanɨsɨvua vaake akati, “Lɨno, mʉvisaghe maaso, ʉlwakʉva namʉkagwile ɨkɨghono nambe ʉnsiki ghʉno ne Mwana ghwa Muunhu niligomoka.”

Ɨkɨhwanɨkɨsio ɨkya vavombi vano valyapelilue italanta

(Lʉʉka 19:11-27)

14ɄYesu akafijovagha akatisagha, “Kange, ʉVʉtwa vwa kʉkyanya vuhwananɨsɨvua nʉ muunhu jʉno alyakyʉlile. Ye akyale kukyʉla, akavakemeela avavombi vaake, akavapeela ɨkyʉma kyake kuuti nʉjʉnge afulusyaghe. 15Akavapeela nʉjʉnge kulɨngʼhana ni ngʉfu saake. Jʉmo akampeela italanta#25:15 Italanta: Ɨtalanta jɨmo jɨlyalɨngʼhiine nʉ lʉhombo ʉlwa mbombo ʉlwa muunhu jʉmo kʉ maaka kɨjigho na ghahaano na kukila. ihaano, ʉjʉnge italanta ivɨlɨ, ʉjʉnge ɨtalanta jɨmo, pe ʉmwene akakyʉla.

16“Ʉnsiki ghʉghuo ʉmʼbombi jʉno akapelilue italanta ihaano, akalʉta kufulusia, akakava italanta isingi ihaano. 17Najʉ mʼbombi jʉno akapelilue italanta ivɨlɨ, akafulusia italanta isingi ivɨlɨ. 18Neke jʉno akapelilue ɨtalanta jɨmo, akalʉta kugima ʉmwina, akasyɨla ɨtalanta jɨla ɨja ntwa ghwake.

19“Ifighono finga ye fikilile, ʉntwa ghwave akagomoka. Pe akavakemeela avavombi vaake vala, kuuti nʉjʉnge ahʉfie kɨno afulwisie vwɨmɨla ɨkyʉma kyake. 20Ʉmʼbombi jʉno alyʉpiile italanta ihaano, akiisa ni talanta isingi ihaano. Akamʼbʉʉla ʉntwa ghwake akati, ‘Ghwe ntwa, ʉkamheliile italanta ihaano, lɨno nɨfulwisie italanta isingi ihaano.’ 21Ʉntwa ghwake akamʼbʉʉla akati, ‘Ʉvombile vʉnofu. Ʉve ʉlɨ mʼbombi nnofu, kange mhʉvɨlua! Ʉvombile vʉnofu pa mbombo ɨndebe, lɨno nɨkʉkʉvɨɨka kuuva mwɨmɨlɨli ghwa kyʉma kinga. Ghwise tʉhovoke palɨkɨmo.’

22“Ʉmʼbombi jʉno alyʉpiile italanta ivɨlɨ, ghwope akiisa ni talanta isingi ivɨlɨ. Akamʼbʉʉla ʉntwa ghwake akati, ‘Ghwe ntwa, ʉkamheliile italanta ivɨlɨ, lɨno nɨfulwisie italanta isingi ivɨlɨ.’ 23Ʉntwa ghwake akamʼbʉʉla akati, ‘Ʉvombile vʉnofu. Ʉve ʉlɨ mʼbombi nnofu, kange mhʉvɨlua! Ʉvombile vʉnofu pa mbombo ɨndebe, lɨno nɨkʉkʉvɨɨka kuuva mwɨmɨlɨli ghwa kyʉma kinga. Ghwise tʉhovoke palɨkɨmo.’

24“Pe akiisa ʉmʼbombi jʉno alyʉpiile ɨtalanta jɨmo, akamʼbʉʉla ʉntwa ghwake akati, ‘Ghwe ntwa, nɨkakagwile kuuti ʉve ʉlɨ mwʉmu, ghupeta pano nʉvyalile, ghukongʼhania pano nʉkesile. 25Mʉ ʉluo, noghopa kusofia ɨtalanta jaako, pe nasyɨla mʉ mwina. Lɨno, koogho ɨtalanta jaako ɨjɨ.’ 26Ʉntwa ghwake akamwamʉla akati, ‘Ʉve ʉlɨ mʼbombi mʼbiivi, kange ʉlɨ mwolo! Ʉkakagwile kuuti ʉne nipeta pano nanɨvyalile, nikongʼhania pano nanɨkesile, 27lɨno kɨki naghwavɨɨka indalama sango kʉ vano vifulusia, neke nɨtoole palɨkɨmo na sino sifulwike?’

28“Pepano ʉntwa jʉla akalaghɨla akati, ‘Mʉpoke ɨtalanta ɨjio, mʉmpeele ʉmʼbombi jʉla jʉno alɨ ni talanta kɨjigho. 29Ʉlwakʉva ʉmuunhu ghweni jʉno alɨ nafyo ipelua ifingi, neke iiva nafyo finga. Looli jʉno nsila kɨmonga, nambe ɨkɨdebe kɨno alɨ nakyo, ikunyua. 30Ʉmʼbombi ʉjʉ ʉnsila lʉvʉmbʉlɨlo, mʉntaaghe kʉnji kʉ ngʼhiisi, ʉkuo kwe ilɨlagha na kugwegwenʉla amiino vwɨmɨla ʉvʉvafi ʉvʉkome vʉno iiva navwo.’ ”

Ʉvʉhɨghi ɨkɨghono ɨkya vʉsililo

31ɄYesu akafikʉvavʉlagha avavʉlanɨsɨvua vaake iiti, “Ʉne ne Mwana ghwa Muunhu niliiva nisile mʉ vʉvaha vwango palɨkɨmo na vanyamhola vooni, nilikukala pa kɨtengo kyango ɨkya vʉvaha. 32Avaanhu kuhʉma ɨɨsi sooni vilikongʼhaana palyʉne. Na jʉʉne nilikʉvabaghʉla avaanhu ndavʉle ʉnʼdɨɨmi vʉle ibaghʉla ingʼholo kuuva paajo ni mhene. 33Ɨkʉsivɨɨka ingʼholo ʉlʉbale lwake ʉlwa kʉndio, imhene ʉlʉbale lwake ʉlwa kʉngʼhɨghɨ.

34“Pepano ʉne ne Ntwa nilikʉvavʉʉla avaanhu vala vano valɨ lʉbale ʉlwa kʉndio, ‘Mwise ʉmue mwe vano mʉfunyilue nʉ Nhaata ghwango, mwingile mʉ vʉtwa vʉno ʉNgʉlʉve avalɨngʼhanɨkisie ngʼhaani kuhʉma ye ipela ɨɨsi. 35Ʉlwakʉva ye nɨlɨ nɨ njala, mʉkamheliile ɨkyakʉlia; ye nɨlɨ nɨ kyʉmɨlua, mʉkamheliile amalenga; ye nɨlɨ mʉgheesi, mʉkanhengeliile mʉ nyumba siinu. 36Kange ye nɨghajile, mʉkamheliile amenda; ye nɨlɨ ntamu, mʉkisile kʉkʉmbʉvʉsia; ye nɨlɨ mʉ ndinde, mʉkisile kʉkʉndola.’

37“Pe avagholofu viliiti, ‘Ghwe Mʉtwa, ʉnsiki ghʉlɨku ghʉno tʉkakwaghile ʉlɨ nɨ njala tʉkakʉpeela ɨkyakʉlia, nambe ye ʉlɨ nɨ kyʉmɨlua, tʉkakʉpeela amalenga? 38Kange, ʉnsiki ghʉlɨku ghʉno ye ʉlɨ mʉgheesi, tʉkakʉtengelela mʉ nyumba siitu; nambe ye ʉghajile, tʉkakʉpeela amenda? 39Ʉnsiki ghʉlɨku ghʉno ye ʉlɨ ntamu, tʉkakʉvʉvʉsia; nambe ye ʉlɨ mʉ ndinde, tʉkiisa kʉkʉkʉlola?’ 40Ʉne ne Ntwa nilikʉvamʉla niiti, ‘Kyangʼhaani nɨkʉvavʉʉla, sooni sino mʉkaale mʉkʉmʼbombela ʉmuunhu jʉno nantambʉlɨke mʉ vaanhu vango ava, mʉkambombiile ʉne.’

41“Pe nilikʉvavʉʉla vano valɨ lʉbale lwango ʉlwa kʉngʼhɨghɨ niliiti, ‘Vʉʉka apa ʉmue mwe vano ʉNgʉlʉve avaghunile! Lʉtagha kʉ lʉpumuko lwa mwoto ghʉno naghusima lʉsiku, kʉno ʉNgʉlʉve amʉlɨngʼhanɨkisie ʉSetano na vanyamhola vaake. 42Ʉlwakʉva ye nɨlɨ nɨ njala, namʉkamheliile ɨkyakʉlia; ye nɨlɨ nɨ kyʉmɨlua, namʉkamheliile amalenga; 43ye nɨlɨ mʉgheesi, namʉkanhengeliile mʉ nyumba siinu; ye nɨghajile, namʉkamheliile amenda. Kange, ye nɨlɨ ntamu, namʉkisile kʉkʉmbʉvʉsia; ye nɨlɨ mʉ ndinde, namʉkisile kʉkʉndola.’

44“Pepano voope viliiti, ‘Ghwe Mʉtwa, lɨɨghi pano tʉkakwaghile ʉlɨ nɨ njala, nambe ɨkyʉmɨlua, nambe ye ʉlɨ mʉgheesi, nambe ye ʉlɨ mʉghaju, nambe ye ʉlɨ ntamu, nambe ye ʉlɨ mʉ ndinde, neke ʉsue natʉkakʉtengeliile?’ 45Na jʉʉne nilikʉvamʉla niiti, ‘Kyangʼhaani nɨkʉvavʉʉla, sooni sino namʉkamʼbombiile ʉmuunhu jʉmonga mʉ vano navatambʉlɨke, namʉkambombiile ʉne.’ 46Pepano avahosi vililʉta kʉ lʉpumuko lʉno nalusila lʉsiku. Looli avagholofu vilikwingila kʉ vwʉmi ʉvwa kʉvʉsila kʉsila.”

Currently Selected:

Mataayi 25: wbi

Highlight

Copy