Lʉʉka 1
1
Amasio amalongosi
1Kʉlyʉve mwoghopua Tiofilo:
Avaanhu vinga valembile imhola isa Yesu Kɨlɨsite,#1:1 Kɨlɨsite: Lɨtavua mʉ njovele ɨja Kɨyunaani, mʉ Kɨebulania viiti, Mesiya, amatavua agha kwekʉti, jʉno apakilue amafuta (ɨmikue). Ɨmba kʉ Vʉghanʉle vwa Masio aMahesia. ndavʉle silyavombiike kʉlyʉsue. 2Valembile imhola isi ndavʉle tʉlyapangilue na vano valyalolile na maaso ghaave, na kʉkʉsipʉlɨsia kuhʉma vʉ vʉtengʉlɨlo vwake. 3Mwoghopua Tiofilo, ʉlwakʉva nɨlondile vʉnono ʉvwakyangʼhaani vwa mhola sa Yesu kuhʉma kʉvʉtengʉlɨlo, lɨno na jʉʉne nɨvwene lʉnono kʉkʉkʉlembela isi sooni mʉ vʉtavɨke, 4kuuti ʉvʉkagʉle ʉvwakyangʼhaani vwa mhola sooni sino ʉvʉlanɨsivue.
Ʉvʉvɨli ʉvwa mhola ɨja kʉholua ʉYohani ʉMwofughi
5Ifighono fino ʉHelode alyale ntwa ghwa kʉ Yudea, kwealyale ʉntekesi#1:5 Ʉntekesi: Ɨmba ɨlɨsio Vatekesi kʉ Vʉghanʉle vwa Masio aMahesia. jʉmonga jʉno akatambʉlwagha Sakalia. Ʉjuo alyahʉmile mʉ kɨpʉgha ɨkya kɨtekesi ɨkya Abia. Ʉnʼdala ghwa Sakalia akatambʉlwagha Elisabeti. Ʉjuo alyahʉmile mʉ kɨkolo ɨkya kɨtekesi ɨkya Aloni. 6ɄSakalia nʉ Elisabeti valyale vagholofu pamaaso gha Ngʉlʉve, vakavɨngɨlɨlagha vʉnofu indaghɨlo sooni isa Mʉtwa ʉNgʉlʉve. 7Avaanhu ava valyale vasila mwana, ʉlwakʉva ʉElisabeti alyale mʉghʉmba, kange valyale vaghogholo.
8-9Kwevʉlyale ʉvʉtavɨke ʉvwa vatekesi ʉvwa kʉvomba ɨmbombo mʉ nyumba ɨnyɨmɨke ɨja kufunyila.#1:8-9 Nyumba ɨnyɨmɨke ɨja kufunyila: Ɨmba kʉ Vʉghanʉle vwa Masio aMahesia. Ʉnsiki ghʉmonga, mʉ vʉtavɨke ʉvuo lwale lwa kɨpʉgha kya Abia. Neke ɨkɨghono kɨmonga, akasalʉlua ʉSakalia kukwingila mʉ nyumba ɨnyɨmɨke ɨja Mʉtwa ʉNgʉlʉve, kuuti anyaanye ʉvʉfumba,#1:8-9 Ʉvʉfumba, kyale kɨɨnu kɨno vakanyanyagha kuleeta ʉlʉnuusi ʉlʉnono. pa kɨtekelelo ndavʉle lwale lwiho lwa vatekesi. 10Ye alɨ mʉnkate inyaanya, avaanhu vinga valyale kʉ lʉvɨɨka lwa nyumba ɨnyɨmɨke vikufuunya.
11Pepano ʉnyamhola ghwa Mʉtwa ʉNgʉlʉve akamʼbonekela ʉSakalia. Ʉnyamhola ʉjuo alyɨmile ʉlʉbale ʉlwa ndio ʉlwa kɨtekelelo kɨla. 12ɄSakalia ye ɨkʉmwagha ʉnyamhola jʉla, lʉkamwagha ʉlʉdwesi. 13Neke ʉnyamhola jʉla akamʼbʉʉla akati, “Nʉngoghopaghe Sakalia, ʉNgʉlʉve apʉliike ʉlʉsʉʉmo lwako, ʉlwakʉva ʉnʼdala ghwako ʉElisabeti ɨkʉkʉpapɨla ʉmwana, neke ʉmwana ʉjuo ʉmpelaghe ɨlɨtavua avisaghe ghwe Yohani. 14Apuo ghuvisagha nʉ lʉkeelo, kange avaanhu vinga vivisagha nʉ lʉkeelo pano apapilue, 15ʉlwakʉva iliiva nʉ vʉvaha kuhʉma kwa Mʉtwa ʉNgʉlʉve. Ʉjuo naanganywisaghe nambe kɨmonga kɨno kighasia, looli ingʉfu isa Mhepo ʉMwɨmɨke siiva nʉ mwene kuhʉma pano alɨ mʉ lɨleme lya ngʼina. 16Ilikʉvagomosyagha aVaisilaeli vinga kwa Ngʉlʉve ʉMʉtwa ghwave. 17Ʉjuo ilikʉmʉlongolela ʉMʉtwa mʉ ngʉfu nɨ nhumbula ndavʉle alyale ʉEliya,#1:17 ɄEliya: AVayahudi vakahʉvɨlagha kuuti ilikwisa kange ʉmʼbɨli ʉEliya, kulɨngʼhania kukwisa kwa Kɨlɨsite (Malaki 3:1; 4:5-6). kusambania avapaafi na vaana vaave, avagalʉsi vaave nʉ vʉkagʉsi ndavʉle avagholofu. Kange, ilikʉvalɨngʼhania avaanhu kʉkʉmwʉpɨla ʉMʉtwa.”
18Pe ʉSakalia akati kwa nyamhola, “Ndepoonu kɨɨnu kɨki kɨno kɨkʉmhelela ʉne nɨkagʉle kuuti, amasio agha gha kyangʼhaani? Ʉlwakʉva ʉne nʉ nʼdala ghwango ifighono filʉtile.” 19Ye ajovile ʉluo, ʉnyamhola akamʼbʉʉla akati, “Ʉne neene Gabilieli, ne jʉno nikwɨma pamaaso gha Ngʉlʉve, ʉjuo ghwe jʉno asungʼhile ʉne kʉkʉkʉvʉʉla ʉve ɨmhola ɨjɨ ɨnofu. 20Lɨno, ʉlwakʉva naghwɨtiike sino nɨkʉvʉlile, ghuuva kɨnuunu. Naghujovagha kuhanga ɨkɨghono pano siliiva sivoneka isi, kyangʼhaani silivoneka ye ghʉfikile ʉnsiki ghwake!”
21Ʉnsiki ʉghuo avaanhu vala vano valyale kʉ lʉvɨɨka, vakava vikʉmʉghulila ʉSakalia kʉmo videgha, ʉlwakʉva alikalile nsiki mʉ nyumba ɨnyɨmɨke ɨja kufunyila. 22Ye ihʉma, akakunua kujova navo, pe aveene vakakagʉla kuuti, lʉvoniike lʉmonga mʉ nyumba ɨnyɨmɨke ɨja Ngʉlʉve. Neke ʉmwene akava ihʉfia lʉmonga na mavoko, akajigha kɨnuunu. 23Ye fisilile ifighono fyake ifya kʉvomba ɨmbombo ɨja kɨtekesi, akavuja kʉ kaaja.
24Pambele ʉnʼdala ghwa mwene ʉElisabeti, akava nkunue, akifisa mʉ nyumba ameesi ghahaano. Akijovasyagha mwene iiti, 25“Ʉlʉ lwe lʉno ʉMʉtwa ʉNgʉlʉve ambombiile ʉne, anyaghile na kʉkʉmbʉsɨkɨsia isoni pamaaso gha vaanhu.”
Ʉvʉvɨli ʉvwa mhola ɨja kʉholua ʉKɨlɨsite
26Ye ghʉfikile ʉmwesi ʉghwa ntanda mʉ vʉkunue vwa Elisabeti, ʉNgʉlʉve akansuungʼha ʉnyamhola ʉGabilieli mʉ kɨkaaja ɨkya Nasaleti, kɨno kyale mʉ kɨghavo ɨkya Galilaya, 27kwa mhɨnja jʉno akatambʉlwagha Maliya. Ʉmhɨnja ʉjuo alyatunilue nʉ Yosefu ʉmhʉma mʉ kɨkolo kya ntwa ʉDavɨdi.#1:27 ɄDavɨdi: Ɨmba ɨlɨsio Davɨdi kʉ Vʉghanʉle vwa Masio aMahesia. 28Ʉnyamhola ye afikile kwa Maliya, akati, “Nɨkʉkʉhʉngɨla ʉve ghwe jʉno ʉsʉngʉkilue, ʉMʉtwa ʉNgʉlʉve alɨ nuuve.”
29Ʉmwene ʉMaliya akahangajɨka kyongo mʉ mwojo ghwake, akiposia akati, “Ʉlʉhʉngɨlo ʉlʉ, kwekʉti kɨki!” 30Pepano ʉnyamhola akati, “Maliya, nʉngoghopaghe, ʉlwakʉva ʉNgʉlʉve akʉsʉngʉkiile. 31Lolagha, ghuuva nʉ vʉkunue, neke ghulipaapa ʉmwana ʉnʼdɨɨmi, ʉmpelaghe ɨlɨtavua avisaghe ghwe Yesu. 32Ʉmwana ʉjuo iliiva mʼbaha, kange itambʉlwagha Mwana ghwa Ngʉlʉve ʉMʼbaha ghwa fyoni. Neke ʉMʉtwa ʉNgʉlʉve ilikʉmpeela ʉvʉtavʉlɨlua ʉvwa kɨtwa, ndavʉle alyale ʉnkʉʉlʉ ghwake ʉntwa ʉDavɨdi. 33Kange, itemagha aVaisilaeli jaatu, ʉVʉtwa vwake navʉlasila lʉsiku.”#2 Samueli 7:13, 16; Danieli 7:14; Yesaya 9:7
34ɄMaliya akamposia ʉnyamhola akati, “Ʉne nanɨmmanyile ʉmʉghoosi, lɨno ʉlʉ kyande luuva ndaani?” 35Ʉnyamhola akamwamʉla akati, “ɄMhepo ʉMwɨmɨke ɨkʉkwisila, nasi ngʉfu sa Ngʉlʉve ʉMʼbaha ghwa fyoni sikʉkʉkupikila hwene lʉsulua, neke ʉmwana jʉno ilipapua iiva Mwɨmɨke, itambʉlwagha Mwana ghwa Ngʉlʉve.#1:35 Mwana ghwa Ngʉlʉve: Ɨmba kʉ Vʉghanʉle vwa Masio aMahesia. 36Lolagha, ghwope ʉnyalʉkolo ghwako ʉElisabeti mʉ vʉghogholo vwake alɨ nʉ vʉkunue vwa mwana ʉnʼdɨɨmi. Lɨno, ʉghʉ mwesi ghwake ghwa ntanda, kwa jʉno vatisagha mʉghʉmba! 37Ʉlwakʉva ʉNgʉlʉve nakwekɨlɨ kɨno kɨmʉlemile.” 38Pepano ʉMaliya akati, “Lolagha, ʉne nɨlɨ mʼbanda ghwa Mʉtwa ʉNgʉlʉve, fye lʉʉve kʉlyʉne ndavʉle ʉjovile.” Pe ʉnyamhola jʉla akavʉʉka ilʉta.
ɄMaliya ilʉta kʉkʉmhʉngɨla ʉElisabeti
39Ye fikilile ifighono ndafilɨngi, ʉMaliya akavʉʉka ilʉta ngʼhaningʼhaani kʉ lɨkaaja lɨmonga, lɨno lyale kʉ ɨɨsi ɨja fidunda ɨja Yudea. 40Ʉkuo akingila mʉ nyumba ɨja Sakalia, akamhʉngɨla ʉElisabeti. 41ɄElisabeti ye apʉliike ʉlʉhʉngɨlo lwa Maliya, ʉmwana akaneena nkate mʉ lɨleme lya mwene. Pepano ingʉfu isa Mhepo ʉMwɨmɨke sikamwisila ʉElisabeti, 42pe akatengʉla kujova kʉ ngʉfu akati, “Ʉfunyilue ʉve kukila avakɨjʉʉva vooni, kange afunyilue najʉ mwana jʉno ghulipaapa. 43Ʉne neene veeni pano najʉ ngʼina ghwa Mʉtwa ghwango isile kʉlyʉne? 44Ʉlwakʉva ye nipʉlɨka ʉlʉhʉngɨlo lwako, ʉmwana mʉ lɨleme lyango, anenile nʉ lʉkeelo. 45Kʉba ʉve ghwɨtiike kuuti, isio sino ʉMʉtwa ʉNgʉlʉve ajovile kʉlyʉve, sivombeka.”
Ʉlwɨmbo ʉlwa Maliya ʉlwa kʉmʉghinia ʉMʉtwa ʉNgʉlʉve
46Pe ʉMaliya akati,
“Nɨkʉmʉghinia ʉMʉtwa ʉNgʉlʉve,
nʉ mwojo ghwango ghwoni.
47Ʉmwojo ghwango ghʉlɨ nʉ lʉkeelo
mwa Ngʉlʉve ʉMpoki ghwango.
48Ʉlwakʉva avwaghile ʉvʉkotofu
vwa mʼbanda ghwake.
Lolagha, kutengʉlɨla lɨno avaanhu ava fisina fyoni,
vikʉnhambʉlagha ʉne kuuti nɨlɨ mfunyua.
49ɄMʉtwa ʉNgʉlʉve ʉnya ngʉfu sooni
ambombiile isa kʉdegha,
ɨlɨtavua lyake lyɨmɨke.
50Ʉvʉkoola vwake vwa fighono fyoni,
kʉ vooni vano vikʉmwɨmɨka.
51Ʉlʉvoko lwake ʉlʉnya ngʉfu,
lʉvombile imbombo imbaha,
avanya lughinio mʉ moojo ghaave, avapalasinie.
52Avavʉsisie avatwa mʉ fitengo fyave,
neke avinwile avakotofu.
53Avapeliile avanya njala ifiinu ifinofu,
neke avamofu avadagile valʉtaghe mavoko gheene.
54Avatangile avavanda vaake aVaisilaeli,
kukʉmbʉka ʉlʉfingo lwake ʉlwa kʉvasʉngʉkɨla,
55ndavʉle alyajovile kʉ vakʉʉlʉ viitu,
ʉAbulahamu ni fisina fyake fyoni amasiki ghooni.”
56Pe ʉMaliya akikala nʉ Elisabeti ameesi ghatatu ndɨɨkɨ, pambele akavuja kʉvanave.
Kupapua kwa Yohani ʉMwofughi
57Ʉnsiki ʉghwa Elisabeti kupaapa ghʉkafika, pe akapaapa ʉmwana ʉnʼdɨɨmi. 58Avabadɨngʼhani na vanyalʉkolo vaake ye vapʉliike kuuti, ʉMʉtwa ʉNgʉlʉve ansʉngʉkiile, vakava nʉ lʉkeelo palɨkɨmo nʉ mwene.
59Ɨkɨghono ɨkya lekelakwoni kuhʉma ipapua ʉmwana, vakiisa kʉ kɨvʉngo ɨkya kʉdumula ɨngola ɨja kɨdɨɨmi,#1:59 Kɨvʉngo ɨkya kʉdumula ɨngola ɨja kɨdɨɨmi: Ɨmba kʉ Vʉghanʉle vwa Masio aMahesia. ndavʉle lwale lwiho mʉ ndaghɨlo isa Ngʉlʉve kʉ Vayahudi. Neke vakalondagha pikʉmpeela ʉmwana ɨlɨtavua ɨlya viise, ɨlɨ Sakalia. 60Looli ʉngʼina ghwa mwana akavavʉʉla akati, “Ndali! Itambʉlwagha Yohani.” 61Aveene vakamʉla vakati, “Mʉ kɨkolo kyako nakwale nambe muunhu ʉnya lɨtavua ɨlio.” 62Pe vakamposia ʉviise piiti ɨkʉmpeela ʉmwana ɨlɨtavua iiva ghwe veeni. 63ɄSakalia akasʉʉma ɨkɨseghu ɨkya kʉlemba, akalemba ndɨɨkɨ, “Ɨlɨtavua lyake iiva ghwe Yohani.” Avaanhu vooni vakadegha. 64Pala pala ʉlʉmili lwake lʉkavopoka, akatengʉla kujova na kʉkʉmʉghinia ʉNgʉlʉve.
65Apuo avabadɨngʼhani vooni ava Sakalia, lʉkavavona ʉlʉdwesi. Imhola isi sikakwɨla mʉ ɨɨsi jooni ɨja fidunda ɨja Yudea. 66Neke avaanhu vooni vano valyapʉliike, vakasaghagha mʉ moojo ghaave piiti, “Lɨno, ʉmwana ʉjʉ iliiva ghwa ndaani?” Vakasaghagha ʉluo, ʉlwakʉva valyalʉtangʼhinie kuuti ʉMʉtwa ʉNgʉlʉve alɨ nʉ mwene.
Ʉlwɨmbo ʉlwa Sakalia ʉlwa kʉmʉghinia ʉMʉtwa ʉNgʉlʉve
67Pepano ingʉfu isa Mhepo ʉMwɨmɨke sikamwisila ʉSakalia, ʉviise ghwa mwana, pe akatengʉla kuvɨla akati,
68“Aghinwaghe ʉMʉtwa ʉNgʉlʉve ghwa Isilaeli,
ʉlwakʉva isile na kʉkʉvavanga avaanhu vaake.
69Atʉpeliile ʉMpoki ʉnya ngʉfu,#1:69 ɄMpoki ʉnya ngʉfu: Mʉ Kɨyunaani lɨlembilue, Ʉlʉpembe lwa vʉvangi. Mʉ Malembe aMɨmɨke ʉlʉpembe lwa ngʼhanu, kɨhwanɨkɨsio kya muunhu ʉnya ngʉfu nyinga.
kuhʉma mʉ kɨkolo kya mʼbombi ghwake ʉDavɨdi.
70Ndavʉle ʉNgʉlʉve alyajovile kuhʉma mʼbʉkʉʉlʉ,
kukilila avavɨli vaake avɨmɨke kuuti,
71alatʉpoka kʉ valʉgʉ viitu,
na kuhʉma mʉ mavoko gha vaanhu vooni vano vikʉtʉkalalɨla.
72ɄNgʉlʉve atʉsʉngʉkiile
ndavʉle alyafingiine#1:72 Alyafingiine: Ɨmba ɨlɨsio Lʉfingo kʉ Vʉghanʉle vwa Masio aMahesia. na vakʉʉlʉ viitu,
ikʉmbʉka jaatu ʉlʉfingo lwake ʉlwɨmɨke.#Sabuli 105:8; 106:45; Vʉtengʉlɨlo 17:7; Valeevi 26:42
73Ndavʉle alyajɨghile kwa nkʉʉlʉ ghwitu ʉAbulahamu kuuti,
ɨkʉtʉsʉngʉkɨlagha ʉsue,
74neke atʉpoke mʉ mavoko gha valʉgʉ viitu,
tʉmʼbombelaghe ʉmwene kɨsila vwoghofi,
75mʉ vwɨmɨke na mʉ vʉgholofu,
mʉ fighono fyoni ifya vwʉmi vwitu.
76Lɨno ʉve mwanango,
ghutambʉlwagha mʼbɨli ghwa Ngʉlʉve ʉMʼbaha ghwa fyoni,
ʉlwakʉva ʉkʉmʉlongolelagha ʉMʉtwa kuuti,
ʉnnosekesyaghe ʉmwene ɨsɨla,
77kʉkʉvavʉʉla avaanhu vaake kuuti,
vikava ʉvʉpoki pano ʉNgʉlʉve ɨkʉvapyanɨla amakole ghaave.
78Ʉlwakʉva ʉNgʉlʉve ghwitu nya lʉsʉngʉ kʉlyʉsue,
ʉlʉmuli lwake kuhʉma kʉkyanya, lutapɨkʉtʉmulikila,
79kʉkʉtʉmulikila ʉsue tweni,
ʉlwakʉva tʉlɨ mʉ ngʼhiisi ɨja vʉhɨghi vwa vʉfue,#Yesaya 9:1-2
na kʉkʉtʉlongosia mʉ sɨla ɨja lʉtengaano.”
80Neke ʉYohani akava ikʉla, na kughina kuuva ni ngʉfu mwa Mhepo ʉMwɨmɨke. Alikalile kʉ lɨhaka kuhanga ʉnsiki ghʉno akavoneka kʉ Vaisilaeli.
Currently Selected:
Lʉʉka 1: wbi
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
