Mbombo sa Vasungʼhua 14

ɄPaulo nʉ Balinaba vipʉlɨsia kʉ Ikonio

1ɄPaulo nʉ Balinaba ye valɨ mʉ lɨkaaja ɨlya Ikonio, vakingila mʉ sinagogi ndavʉle lwale lwiho lwave. Ye valɨ mula, vakapʉlɨsia vʉnofu imhola sa Yesu. Avaanhu vinga, aVayahudi na vano naVayahudi, vakamwɨtɨka ʉYesu. 2Neke aVayahudi vamonga vakakaana kʉkʉmwɨtɨka ʉYesu. Pe vakatengʉla kʉkʉvahonga avaanhu vano naVayahudi kuuti vavakalalɨlaghe avɨtɨki. 3Palɨkɨmo nʉluo, ʉPaulo nʉ Balinaba vakikalile ifighono finga kʉ Ikonio, vakapʉlɨsyagha imhola isa lʉsʉngʉ lwa Mʉtwa ʉYesu kɨsila vwoghofi, ʉlwakʉva vakamhʉvɨlagha ʉmwene. ɄMʉtwa akavapelela kuvomba ifidegho ni fivalɨlo kuhʉfia kuuti, ɨmhola jɨno vipʉlɨsia ja kyangʼhaani. 4Neke avaanhu va lɨkaaja lɨla vakabaghʉngʼhana, vamo vakava ʉlʉbale ʉlwa Vayahudi vano vakakanile kʉkʉmwɨtɨka ʉYesu, avange ʉlʉbale ʉlwa vasungʼhua.

5Pe aVayahudi avuo na vavaha vaave, palɨkɨmo na vaanhu vano naVayahudi, vakapʉlɨngʼhana kuuti, vavakʉfie ʉPaulo nʉ Balinaba na kʉkʉvabuda na mavue. 6ɄPaulo nʉ Balinaba ye vakagwile ʉluo, vakakɨmbɨlɨla mʉ ɨɨsi ɨja Likaonia, kʉ lɨkaaja ɨlya Lisitila nɨ lya Delibe na mʉ makaaja agha mʉ vʉpiipi. 7Ʉkuo vakapʉlɨsyagha ɨMhola ɨNofu ɨja Yesu.

ɄPaulo nʉ Balinaba vipʉlɨsia kʉ Lisitila na kʉ Delibe

8Mʉ lɨkaaja ɨlya Lisitila mwealyale ʉmuunhu jʉmonga jʉno alyale mʉlema amaghʉlʉ kuhʉma iholua, naalyaghelile kughenda nambe padebe. 9ɄPaulo ye ipʉlɨsia ɨlɨsio lya Ngʉlʉve, ʉmuunhu ʉjuo akava ɨkʉmpʉlɨkɨsia. Pe ʉPaulo akamʉlʉngʉvalɨla ʉmuunhu jʉla, akavona kuuti, alɨ nʉ lwɨtɨko ʉlwa kʉmpelela asooke. 10Pe ʉPaulo akajova fiijo akati, “Ɨma, sindamala!” Ʉmuunhu jʉla akɨɨma ngʼhaningʼhaani, akatengʉla pighenda.

11Avaanhu vinga vakakongʼhanile pala. Ye vasivwene sino avombile ʉPaulo, vakatengʉla kujova fiijo mʉ njovele jaave ɨja Kilikaonia viiti, “Amangʉlʉve ghatwisile mʉ kɨhwani kya vaanhu!” 12Pe vakati, ʉBalinaba ghwe ngʉlʉve ʉSeu, ʉPaulo ghwe ngʉlʉve ʉHelime,#14:12 ɄBalinaba ghwe ngʉlʉve ʉSeu, ʉPaulo ghwe ngʉlʉve ʉHelime: AVayunaani valyale na mangʉlʉve minga, ʉSeu alyale ghwe ngʉlʉve ʉmʼbaha kukila aghange ghooni, ʉnswambe alyale ghwe Helime. ɄHelime ʉjuo ghwe jʉno akaletagha imhola kuhʉma kwa Seu na mangʉlʉve aghange. ʉlwakʉva ghwe jʉno ajovagha. 13Ɨnyumba ɨja kufunyila kwa ngʉlʉve ʉSeu, jɨlyale kʉnji kʉ lɨkaaja. Pe ʉntekesi ʉghwa Seu akaleeta ingʼhambako pa mʉlyango ʉghwa lɨkaaja afwasisie ingeela isa malʉva. Ʉntekesi ʉjuo palɨkɨmo nɨ lɨpʉgha lya vaanhu vakalondagha kubuda ingʼhambako isio, kuuti lɨɨve lɨtekelo kwa Paulo nʉ Balinaba.

14Neke avasungʼhua#14:14 Avasungʼhua: Ɨmba ɨlɨsio Vasungʼhua kʉ Vʉghanʉle vwa Masio aMahesia. vala ʉBalinaba nʉ Paulo ye vapʉliike ɨmhola ɨjio, vakademʉla amenda ghaave,#14:14 Vakademʉla amenda ghaave: Vakavomba ʉluo kuhʉfia kuuti, navanoghiile kuhwananɨsɨvua nʉ Ngʉlʉve. vakalʉta lʉvɨlo kʉ lɨpʉgha lɨla vakajova fiijo vakati, 15“Mwe vaanhu ʉmue, kɨki muvomba isi? Na jʉsue tʉlɨ vaanhu ndavʉle jʉmue! Twisile kupʉlɨsia ɨMhola ɨNofu ɨja Ngʉlʉve, kuuti mʉleke kukwɨmɨka amangʉlʉve agha, amasila lʉvʉmbʉlɨlo, looli mʉvisaghe vaanhu va kʉmwɨmɨka ʉNgʉlʉve ʉmwʉmi. ɄNgʉlʉve ʉjuo ghwe mwene alyapelile ʉvʉlanga nɨ ɨɨsi, nɨ nyanja ni fingi fyoni fino mwefili. 16Mʼbʉkʉʉlʉ ʉNgʉlʉve alyavalekile avaanhu mʉ ɨɨsi nyinga vavɨngɨlɨlaghe sino vikeela aveene. 17Neke naakavʉhɨlile kukuhʉfia kʉ veene kuuti alɨ palɨkɨmo na veene. Ʉmwene ɨkʉvavombela inofu kʉkʉvapeela ɨfula kuuti ʉnsiki ʉghwa kʉpeta, mʉpetaghe, mʉvisaghe ni fiinu ifya kʉkwɨlana. Kange, ɨkʉvapeela ʉlʉtengaano mʉ moojo ghiinu.” 18Napano ʉPaulo nʉ Balinaba vakajovile amasio aghuo, jɨlyale mbombo nhalamu kʉkʉvasigha avaanhu vala kuhʉmia ɨlɨtekelo kʉ veene.

19Pambele vakiisa aVayahudi vamonga kuhʉma mʉ lɨkaaja ɨlya Antiokia nɨ lya Ikonio, vakavahonga avaanhu ava mʉ lɨkaaja lya Lisitila kuuti vaave lʉbale lwave. Pe vakantova ʉPaulo na mavue, vakakwesela kʉnji kʉ lɨkaaja, ʉlwakʉva vakasaghagha kuuti afwile. 20Neke avavɨngɨlɨli va Yesu ye vansyʉngʉtiile, ʉmwene akɨɨma, akagomoka mʉ lɨkaaja. Ɨkɨghono ɨkya vʉvɨlɨ ʉmwene nʉ Balinaba vakavʉʉka kʉla, vakalʉta kʉ lɨkaaja ɨlya Delibe. 21ɄPaulo nʉ Balinaba ye valɨ mʉ lɨkaaja ɨlya Delibe, vakapʉlɨsyagha ɨMhola ɨNofu. Avaanhu vinga vakava vavɨngɨlɨli va Yesu.

ɄPaulo nʉ Balinaba vigomoka kʉ Antiokia ɨja kʉ Silia

Pambele ʉPaulo nʉ Balinaba vakagomoka kʉ lɨkaaja ɨlya Lisitila, nɨ lya Ikonio nɨ lya Antiokia. 22Mʉ makaaja aghuo vakavakangasyagha avavɨngɨlɨli kuuti vajighaghe mʉ lwɨtɨko. Vakava vikʉvavʉʉla viiti, “Tʉnoghiile kukilila mʉ mhumuko nyinga kukwingila mʉ Vʉtwa vwa Ngʉlʉve.” 23Pooni pano pwekɨlyale ɨkɨpʉgha ɨkya vɨtɨki, ʉPaulo nʉ Balinaba vakavasalʉlagha avaloleleli. Vakifunyagha na kuvʉhɨɨla kulia mʉlwa kufuunya kʉkʉvavɨɨka mʉ mavoko gha Mʉtwa jʉno vikʉmwɨtɨka.

24Pambele ʉPaulo nʉ Balinaba vakakila mʉ ɨɨsi ɨja Pisidia, vakafika mʉ kɨghavo ɨkya Pamfilia, 25mʉ lɨkaaja ɨlya Pelige. Apuo vakapʉlɨsia ɨlɨsio lya Ngʉlʉve, pe vakalʉta kʉ Atalia. 26Kuhʉma kʉ Atalia vakapanda ɨngalava vigomoka kʉ Antiokia ɨja kʉ Silia. Ʉkuo kwe kʉno ʉlʉtasi ɨkɨpʉgha ɨkya vɨtɨki kɨkavɨmiike na kʉkʉvasʉmɨla ʉlʉsʉngʉ lwa Ngʉlʉve vwɨmɨla kuvomba ɨmbombo jɨno lɨno vamalile.

27Ye vafikile kʉ Antiokia, vakakongʼhania ɨkɨpʉgha ɨkya vɨtɨki, vakavavʉʉla sooni sino ʉNgʉlʉve avombile kukilila aveene na vʉle avadinduliile ʉmʉlyango avaanhu vano naVayahudi kʉkʉmwɨtɨka ʉYesu. 28Pe vakikala kʉ Antiokia palɨkɨmo na vavɨngɨlɨli ifighono finga.

Currently Selected:

Mbombo sa Vasungʼhua 14: wbi

Highlight

Copy