Mbombo sa Vasungʼhua 12

ɄYakovo ibudua, ʉPeteli ikʉngua

1Mʉ fighono ifio, ʉntwa ʉHelode ʉAgilipa#12:1 Ʉntwa ʉHelode ʉAgilipa: Ɨmba ɨlɨsio Helode kʉ Vʉghanʉle vwa Masio aMahesia. akatengʉla kʉkʉvapumusia vamonga mʉ kɨpʉgha ɨkya vɨtɨki. 2Akamʼbuda nɨ bamba ʉYakovo#12:2 ɄYakovo, alyale nswambe ghwa Sebedaayi, kange alyale ʉmo mʉ vasungʼhua va Yesu kɨjigho na vavɨlɨ. ʉnkʉlʉ ghwa Yohani. 3Ye avwene aVayahudi vakeliile sino avombile, akankola najʉ Peteli. Ʉnsiki ʉghuo kyale kyɨmɨke kya makate ghano naghavɨkilue ɨkɨlʉle.#12:3 Kyɨmɨke kya makate ghano naghavɨkilue ɨkɨlʉle: Ɨkyɨmɨke ɨkɨ kɨlyale kivombeka ye kɨkilile ɨkɨghono ɨkya kyɨmɨke ɨkya Pasaka. Ɨkyɨmɨke ɨkya makate kɨlyale kivombeka ifighono lekelalʉbale. Ɨkyɨmɨke ɨkya Pasaka nɨ kyɨmɨke ɨkya makate ghano naghavɨkilue ɨkɨlʉle, fyoni fikatambʉlwagha Pasaka. Ʉluo lʉkavombekagha kukʉmbʉka ɨkɨghono kɨno aVaisilaeli valyahʉmile mʉ lʉpumuko kʉ Misili (Kuhʉma 12:17-20). 4Ye ankolile, akanʼdindila mʉ ndinde na kʉkʉmʼbɨɨka mʉ vʉloleleli vwa vasikali vano valyale vane vane mʉ fipʉgha fine, kuuti ifipʉgha ifi fyʉpɨngʼhanaghe kʉkʉmʉlolelela. ɄHelode akalondagha kuuti kyande kɨsilile ɨkyɨmɨke ɨkya Pasaka, amhɨghe ʉPeteli pamaaso gha vaanhu. 5ɄPeteli ye alɨ mʉ ndinde, ɨkɨpʉgha kya vɨtɨki kɨkava kɨkʉnsʉmɨla kwa Ngʉlʉve kɨsila kʉkatala.

6Pakɨlo kusisimukila ɨkɨghono kɨno ʉHelode ʉAgilipa alyalamwile kʉkʉmhɨgha ʉPeteli, ʉPeteli alyaghonile pakate pa vasikali vavɨlɨ akʉngilue amavoko ghaake ni nyololo ivɨlɨ mʉ mavoko gha vasikali vala. Pa mʉlyango ghwa kyʉmba kɨno alyadindilue ʉPeteli, pwevalyale avasikali avange vavɨlɨ vano vakalolelelagha. 7Nakalɨngi, ʉnyamhola ghwa Mʉtwa ʉNgʉlʉve akamwisila ʉPeteli, ʉlʉmuli lʉkamulika mʉ kyʉmba kɨla. Ʉnyamhola jʉla akansukania ʉPeteli mʉ mbafu na kʉkʉnsisimula, akamʼbʉʉla akati, “Ɨma ngʼhaningʼhaani!” Ʉnsiki ghʉghuo inyololo sino vakankʉngiile sikasangʉka paasi. 8Pe ʉnyamhola akamʼbʉʉla akati, “Ghupinye ʉlʉkova lwako, ʉfwale ni filatu fyako.” ɄPeteli ye amalile kuvomba ʉluo, ʉnyamhola akamʼbʉʉla akati, “Fwala ɨlɨkooti lyako, ʉmbɨngɨlɨlaghe.” 9Pe ʉPeteli akamʼbɨngɨlɨla ʉnyamhola jʉla, vihʉma mʉ ndinde. Neke isio sooni ye sivombeka, ʉPeteli naakakagwile kuuti sa kyangʼhaani, ʉmwene akasaghagha kuuti simwisiile inyivonelo. 10ɄPeteli nʉ nyamhola jʉla vakakila amalyango ghavɨlɨ aghanya vʉloleleli vwa vasikali. Pe vakafika pa mʉlyango ʉghwa kyʉma, ʉghwa kʉhʉmɨla mʉ ndinde kulʉngama mʉ lɨkaaja. Ʉmʉlyango ghʉla ghʉkadinduka ghwene, pe vakahʉma kʉnji. Ye valɨ mʉ mpuulo ghʉmonga vighenda, nakalɨngi ʉnyamhola jʉla akamʉleka ʉPeteli mwene.

11Apuo ʉPeteli akakagʉla sino sihʉmiile akati, “Lɨno, nɨkagwile kuuti sa kyangʼhaani, ʉMʉtwa ansungʼhile ʉnyamhola ghwake amhoke mʉ mavoko gha Helode ʉAgilipa, na mʉ sooni sino aVayahudi vasaghagha kʉkʉmbombela fivi.” 12Ye akagwile isio, akalʉta kʉ kaaja kwa Maliya, ʉngʼina ghwa Yohani. ɄYohani ʉjuo ɨlɨtavua ɨlɨngɨ akatambʉlwagha Malɨka. Mʉ nyumba ɨjio valyakongʼhanile avaanhu vinga vikufuunya kwa Ngʉlʉve. 13ɄPeteli akahodesia kʉ mʉlyango ʉghwa lʉvɨɨka. Pe ʉmʼbombi jʉmonga ʉmhɨnja jʉno akatambʉlwagha Loda, akalʉta pa mʉlyango kupʉlɨkɨsia kuuti ghwe veeni. 14Ye akagwile kuuti lɨsio lya Peteli, akahovoka kyongo, akasyemua kudindula ʉmʉlyango. Akagomoka lʉvɨlo mʉ nyumba, akavavʉʉla avange akati, “ɄPeteli ɨmile pa mʉlyango!” 15Avange vala vakamʼbʉʉla vakati, “Neke ʉhasingʼhiine ʉlʉhala!” Ʉmhɨnja jʉla ye ajiighe ifikangasia kuuti se seene, aveene vakati, “Pamo iiva ghwe nyamhola ghwake jʉno ɨkʉmʉlolelela.”

16Ʉnsiki ʉghuo ghwoni ʉPeteli akava ifihodesia, pe vakalʉta, vakadindula ʉmʉlyango, vakavona lweli ghwe Peteli, vakadegha kyongo. 17ɄPeteli akagholosia ʉlʉvoko kuuti vajike kɨmihe. Pe akavavʉʉla vʉle ʉMʉtwa amhʉmisie mʉ ndinde. Kange akati, “Sino nɨvavʉlile, mʉmʼbʉlaghe ʉYakovo na vɨtɨki avange.” Pe ʉmwene akavʉʉka pala, akalʉta kʉvʉnge.

18Ye kʉkiile, avasikali vala lʉkavakola ʉlʉdwesi, ʉlwakʉva navakakagwile kuuti kɨhʉmiile kɨki kwa Peteli. 19ɄHelode akavalaghɨla avasikali kuuti vamʉlonde. Neke ye vakunilue kʉkʉmwagha, akavaposia avasikali vano vamʉlolelelagha ʉPeteli, neke aveene vakakunua ɨkya kʉjova. Pe akati vabudue. Pambele akavʉʉka kʉ Yudea, akalʉta kukukala mʉ lɨkaaja ɨlya Kaisalia.

Kufua kwa Helode ʉAgilipa

20ɄHelode ʉAgilipa alyavakalaliile kyongo avaanhu ava mʉ lɨkaaja ɨlya Tiilo nɨ lya Sidoni. Pe avaanhu mʉ makaaja aghuo vakapʉlɨngʼhana kuuti vatangʼhane nʉ Helode. Pe vakatala kulʉta kwa Bulasito kupʉlɨngʼhana kuuti avatange, ʉlwakʉva alyale mwɨmɨlɨli ghwa nyumba ja Helode, ghwope akɨtɨka. Pe vakalʉta kwa ntwa kuuti vapʉlɨngʼhanaghe. Valyavombile ʉluo ʉlwakʉva vakahʉvɨlagha ɨkyakʉlia kuhʉma mʉ ɨɨsi ɨja ntwa ʉjuo.

21Ɨkɨghono kɨno ʉntwa ʉHelode akapangile kuuti vatangʼhane, kɨkafika. ɄHelode akafwala amenda ghaake agha kɨtwa, akikala pa kɨtengo kyake ɨkya kɨtwa, akava ijova na vaanhu vano vakakongʼhanile pala. 22Avaanhu vala vakatengʉla kuuva nɨ njegheelo ɨja lʉkeelo viiti, “Ɨlɨ nalɨsio lya muunhu, looli lɨsio lya ngʉlʉve.” 23Pala pala ʉnyamhola ghwa Mʉtwa ʉNgʉlʉve akamʉghuna ʉHelode, akalɨvua na manyolo, akafua, ʉlwakʉva akakeliile vʉle avaanhu vakamʉghinisie, naakamʉghinisie ʉNgʉlʉve.

24Neke ɨlɨsio lya Ngʉlʉve lɨkava lifikwɨla imbale ni mbale, avaanhu vano vakamwɨtɨkagha ʉMʉtwa vakafikwongelelagha fiijo. 25ɄBalinaba nʉ Savʉli ye vamalile ɨmbombo jaave, vakavʉʉka kʉ Yelusalemu, palɨkɨmo nʉ Yohani jʉno ɨlɨtavua ɨlɨngɨ alyale ghwe Malɨka, vakagomoka kʉ Antiokia.

Currently Selected:

Mbombo sa Vasungʼhua 12: wbi

Highlight

Copy