MATEO 18

Pitaq mas báleq

1Taqey tyempuchow disípulukuna shayámorqan Jesusman nirnin: —¿Pitaq mas báleq syelukunapa reynunchow?

2I Jesús juk wamrata qayarir, peykunapa chowpinman sheykatsir, 3i nerqan: —Tseqeypam niyaq, manatsun rurakayanki i tikrayanki wamrakunanow, manam syelukunapa reynunman yeykuyankitsu. 4Tseymi, meyqanpis key wamranow úshukoqqa, peymi mas báleq syelukunapa reynunchow. 5I meyqanpis juk wamrata keytanow chaskeqqa, noqatam chaskiman.

Ishkipaq okasyonkuna

6»I meyqanpis ichikkuna noqaman kreyeqta trompisatseqqa, mas allichi kanman kunkanman juk mulinu rumita warkurkurnin, i lamarpa jondunman jitarpi. 7¡Allaw mundu tronpiseykunapeq! Wananmi tronpeseykuna shayámunan, peru ¡allaw taqey nuna pipam shamun tronpisey!

8»Tseyreykur, makiki ó chakiki ishkineykipaq kawsanman, roquriykiy i jitarikiy qampita; allim yeykunkiman kaweyman koju ó manku, ishkey makikunawan ó ishkey chakikikunawan mana ushakaq ninaman jitashqa kaneykita. 9I nawiki kawsanman ishkineykipaq, jorqurikiy i jitarikiy qampita; allim yeykunkiman juklleylla nawikiwan kaweyman, ishkey nawiwan keykar nina wayiman jitashqa kaneykita.

10»Rikáyey ama despresyayeytsu keykunapita juknin ichikkunata; niyaqmi syeluchow angelninkunam wiñeypa rikáyan syeluchow keykaq Teytápa qaqllanta. 11Tseymi Nunapa Tsurenqa shamorqan oqrakashqakunata salbananpaq.

Oqrakashqa úshawan tinkutsikiy

12»¿Imataq nirápuyáshunki? Si juk nunapatsun kapun pachak úshankuna, i oqrakárin tseykunapita juk, ¿manaku jaqirin isqon chunka isqonta i eywan jirkakunapa asheq oqrakashqata? 13I tarirerqa, tseqeypam niyaq kushikun masmi taqeypaq isqon chunka isqon mana oqrakaqkunapita. 14Tseynowmi, syeluchow keykaq Teyteykikunapa muneynintsu, key ichikllankunapita juk oqrakánan.

Wawqita perdonanapaq

15»Tseyreykur, si wawqikitsun jutsallikun qampa kontreyki, eywey i piñapey qam i pey japalleykikunalla keykar; sitsun wiyashunki, ganarqonkim wawqikita. 16Mana wiyashuptikeqa, tsari jukta ó ishkaqta, ishkaq o kimaq testigukunapa llapan palabra musyayananpaq. 17Peykunata mana wiyaptenqa, iglesyata ní; i iglesyata mana wiyaptenqa, katsiy gentilpa i publikánupa. 18Tseqeypam niyaq patsachow llapan watayashqeykim, watashqa kanqa syeluchow; i llapan patsachow paskayanqeykim paskashqa kanqa syeluchow.

19»Yapeymi niyaq, si qamkunachow ishkaqtsun akwerduman churakáyanki patsachow imatapis mañakuyaneykipaq, syelukunachow keykaq Teytapam rurakashqa kayápushunki. 20Meychowmi keykáyan eyllukashqa ishkaq ó kimaq jutíchow, tseychowmi keyká peykunapa chowpinchow.

21Tseynam Pedru peyman witiykur nerqan: —Señor, ¿eyka kutitaq perdonashaq wawqíta noqapa kontrá jutsa ruraqta? ¿Qanchiskamatsuraq?

22Jesusnam nerqan: —Manam qanchis kutilla neqtsu, sinowqa qanchis chunka qanchis kutim.

Mana alli sirweqwan tinkutsikiy

23»Tseyreykurmi syelukunapa reynun juk rey niraq sirweqninkunawan kwenta ruraqnowmi. 24I kwentata rurar qalleykur, chunka waranqa talentu debeqninta chátsiyarqan. 25Keyta, mana pageyta pwediptin, señornin mandarqan rantikiykuyananpaq, warminta i tsurinkunatawan, i llapan kapoqninta, jaqanta pagakunanpaq. 26Tseynam taqey sirwikoq qonquriykur, rowarqan, nirnin: “Señor, pasensiyeyki katsun noqawan, i noqa llapantam pageykushqeyki.” 27Sirwikoqpa señornin, ankuparnin, kacharerqan, i jaqa keyninta perdoneykorqan.

28»Peru sirwikoq yarqurirna, tarerqan juk sirwikoq mayinta, jaqan karqan juk pachak denaryukuna; tsarirkur, qaporqan, nirnin: “Pagamey jaqáta.” 29Tseynam sirwikoq mayin chakinkunaman qonqurikiykur, rowarqan nirnin: “Pasensiyeyki katsun noqawan, i noqa llapantam pageykushqeyki.” 30Peynam munarqantsu, sinowqa eywarqan i karselman llawitserqan, jaqanta paganqanyaq.

31»Sirwikoq mayinkuna susedishqanta rikar, allápa llakikurkuyarqan, i eywayarna señorninta niyarqan llapan pasashqanta. 32Tseynam, señornin qayarir, peyta nerqan: “¡Malbádu sirwikoq! Llapan debimanqeykitam perdonarqaq, rowamaptiki. 33¿Manaku qampis ankupankiman karqa sirwikoq mayikita, noqa qamta ankupanqaqnow?” 34Tseynam señornin, piñashqa, entregeykorqan maqakoqkunaman, llapan jaqanta paganqanyaq. 35Tseynowmi selestyal Teytapis ruranqa qamkunawan si manatsun perdonayanki llapan shonquwan juklleyllapayan wawqikunapa ofensankunata.

Currently Selected:

MATEO 18: QUEAN

Highlight

Copy