ZAKARÍAS 14
14
Señor Diospa kamachikuq hamunan
1Señor Diospa taripanan p'unchaymi chayamushan, Jerusalenmi llat'anasqa kanqa, awqakunan qechusqakunata qhawashaqtiyki rakinakunqaku. 2Señor Diosmi Jerusalenta maqanankupaq llapa hatun suyukunata huñuykamunqa, hinan llaqtaqa hap'isqa kanqa, wasikunapas suwasqan kanqa, warmikunapas violasqan kanqa. Kuskan llaqtataqmi wak suyuman preso apasqa kanqa, puchuqkunallan llaqtamanta mana apasqachu kanqa.
3Chaymantataq Señor Diosqa lloqsispa chay hatun suyukunawan maqanakunqa, imaynan ñawpa awqa-tinkuypi maqanakurqan hinata. 4Chay p'unchaypin Señor Diosqa Jerusalén chimpa inti lloqsimuy cheqas Olivos Orqo patapi sayaykunqa. Hinan chay orqoqa iskayman ch'eqtasqa kanqa inti lloqsimuy ladomanta inti haykuy ladoman. Hatunllaña wayq'omanmi tukunqa, kuskan orqon wichayman suchurinqa, kuskannintaq urayman suchuykunqa. 5Chay wayq'oqa Azalkaman chayanqa, chaymi chayninta ayqekunkichis Judá rey Uziaspa kamachikusqan tiempopi pacha chhaphchikuqtin ayqekurqanku hinata. Chay qhepatan Apu Señor Diosniyqa hamunqa llapa angelkunawan kuska.
6Chay p'unchaypiqa manan inti k'anchaypas, chiripas, qasapas kanqachu. 7Chay p'unchayqa Señor Diospa reqsisqallanmi kanqa, chaypiqa manan p'unchay kasqanpas tuta kasqanpas reparakunqachu, aswanpas p'unchay hinan tutaqa k'anchanqa.
8Chay p'unchaypin Jerusalenmanta phawashaq unu phullpumunqa q'oñi mitapipas chiraw mitapipas, kuskanmi inti lloqsimuy lado Kachi Qochaman phawanqa, kuskantaq inti haykuy lado mama qochaman phawanqa.
9Señor Diosmi kay pachantinpi rey kanqa, llapa pachantinmi pay sapallan Diosta reqsinqaku, Señor Diospa sutinpitaqmi yupaychanqakupas.
10Llapa suyuntinmi pampaman tukunqa, Jerusalén uray Geba llaqtamanta Rimón llaqtakama. Jerusalentaqmi pampa moqo patapi kashanqa. Maypichus kananpi kashanqa Benjamín Punkumanta Ñawpa Punku nisqa Esquina Punkukama, hinallataq Hananeel Torremanta reypaq uvas saruna cheqaskama. 11Jerusalenqa manañan hayk'aqpas thunisqachu kanqa, aswanpas chaypiqa runakunan mana manchakuspa tiyanqaku.
12Señor Diosmi Jerusalenta maqaq llapa hatun suyukunata millay onqoywan muchuchinqa. Hinan kawsashaqtinku aychanku ismunqa, qallunkupas siminkupin apiyanqa. 13Chay p'unchaypin Señor Diosqa paykunata llaksanqa, hinan sapankanku runa-masinkuman hap'iparqokunqaku, hinaspan maqanakunqaku. 14Judá runakunapas Jerusalenpin maqanakunqa, hinaspan muyuriqninpi kaq hatun suyukunamanta qechunqa ancha askha qolqeta, qorita, p'achatapas. 15Runaman chayaq millay onqoyllataqmi hap'inqa caballokunatapas, mulakunatapas, camellokunatapas, asnokunatapas, karpa-karpankupi kashaq llapa uywakunatapas.
16Jerusalén contra hamuq hatun suyukunamanta kawsashaqkunataq sapa wata chayman wichanqaku Tukuy-atiyniyoq Señor Diosta Reyta hina yupaychanankupaq, Ch'uklla Ruwana Fiestata ruwanankupaqpas. 17Kay pacha mayqen suyutaqchus Jerusalenta mana wicharinqachu Tukuy-atiyniyoq Señor Diosta Reyta hina yupaychaq chayqa, manan chay suyupi paramunqachu. 18Egipto runakunachus mana rinqakuchu chayqa, manan chay suyupi paramunqachu. Ch'uklla Ruwana Fiestaman mana riq suyukunatan Señor Diosqa millay onqoywan muchuchin, chayllawantaqmi Egipto suyutapas muchuchinqa. 19Chaymi Egipto suyuq muchunanqa kanqa, hinallataq Ch'uklla Ruwana Fiestaman mana riq llapa hatun suyukunaq muchunanpas kanqa.
20Chay p'unchaypin caballokunaq campanillanpi qelqasqa kashanqa “Señor Diospaq T'aqasqa” niq. Señor Diospa wasinpi kaq mankakunataq altar qayllapi hatun qerukuna hina ch'uya kanqa. 21Tukuy mankan Jerusalenpipas Judapipas Tukuy-atiyniyoq Señor Diospaq t'aqasqa kanqa. Hinan sacrificio haywaq llapa hamunqaku, hinaspan chay mankakunata hoqarinqaku wayk'unankupaq. Manañan chay p'unchaypiqa Tukuy-atiyniyoq Señor Diospa wasinpi astawanpas qhatuq kanqachu.
Currently Selected:
ZAKARÍAS 14: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
