MALAKÍAS 1
1
1Kay simitan Señor Diosqa Israel llaqtaman profeta Malakiaswan willachirqan.
Israelta Diospa munakusqan
2Señor Diosmi Israel runakunata nin: Ñoqan munakurqaykichis, nispa.
Qankunataq ichaqa ninkichis: ¿Imaynatataq munakuwarqankiku? nispa.
Señor Diostaq nin: ¿Manachu Esauqa Jacobpa wawqen karqan? Chaypas Jacobtan munakurqani, 3Esautataq cheqnikurqani. Orqonkunatataq purunyachirqani, suyuntapas ch'inneq chacal nisqa animalkunapaqmi saqerqani, nispa.
4Esaupa miraynin Edom suyu runakunachus ninqa: Thunisqan kapuyku, chaypas wakmantan thunisqa kasqaykuta sayarichisaqku, nispa chayqa, Tukuy-atiyniyoq Señor Diosmi ninqa: Paykunaqa wakmanta sayarichinkumanmi, ñoqan ichaqa wakmanta thunisaq. Suyunkutan sutichanqaku: Millay Suyu, nispa. Paykunatapas ninqakun: Wiñaypaqmi Señor Diosqa qankunapaq phiñakushan, nispa.
5Israel runakunan chayta rikuspa ninkichis: ¡Ancha hatunmi Señor Diosqa Israel suyupipas wak suyukunapipas! nispa.
Sacerdotekunata Señor Diospa phiñarisqan
6Tukuy-atiyniyoq Señor Diosmi sacerdotekunata nin: Churiqa taytantan yupaychan, kamachipas patronnintan manchakun. Ñoqaqa Taytaykichismi kani, ¿imanaqtintaq mana yupaychawankichischu? Patronniykichismi kani, ¿imanaqtintaq mana manchakuwankichischu? Qankunan pisichawankichis, niwankichisraqtaq: ¿Imapitaq pisicharqaykiku? nispaykichis. 7Qankunaqa altarniypi qhelli mikhunata haywawaspaykichismi pisichawarqankichis.
Chaypas ninkichisraqtaq: ¿Imapitaq pisicharqaykiku? nispaykichis. Ñoqa Señor Diospa mesaytan pisicharqankichis. 8Ñawsa animalkunata sacrificanapaq haywawankichis chayqa, ¿allillanchu? Wist'u animaltapas onqosqa animaltapas haywawankichis chayqa, ¿allillanchu?
Riychis, kamachiqniykichisman apaychis. Payri, ¿kusisqachu chayta chaskisunkichis? nispa.
9Yaw sacerdotekuna, Diosmanta mañakuychis sumaqta qhawarimuwananchispaq. Chay hinakunata haywaqtiykichisqa, ¿chaskisunkichismanchu? Manapunin.
10Tukuy-atiyniyoq Señor Diosmi nin: ¡May allinchá kanman mayqennillaykichispas yupaychana wasiy punkuta wisq'awaqchis chayqa, altarniypi yanqa ninata amaña hap'ichinaykichispaq! Manan qankunawan kusikunichu, manan ofrendaykichistapas chaskisqaykichischu. 11Kay pachantin runakunan hatunchawanku. Hinantinmantan ñoqamanqa inciensota q'osñichimuwanku, ch'uya ofrendakunatapas haywamuwanku. Hatun suyukuna ukhupi runakunaqa hatunchawankun.
12Qankunataqmi pisichawankichis: Qhellin Señor Diospa mesanqa, mikhunanpas mana valeqmi, nispaykichis. 13Nillankichistaqmi: Ñan chaykunawanqa amikunchisña, nispa, hinata qhawarpariwankichis. Apamullawankichistaqmi salqa animalpa k'irisqan animalta, wist'u animalta, onqosqa animalta, hinaspataq sacrificiopi haywawankichis. Chaykunatari, ¿chaskisqaykichischu?
14Wakinmi uywa t'aqanmanta qhali orqo uywanta qowananpaq prometekun, ichaqa ch'achu kaspan ñoqa Señor Diosman mana allin animalta sacrificiopi haywawan. ¡Ñakasqa kachun chay runakunaqa! Ñoqaqa ancha hatun reymi kani, hatun suyukuna ukhupi runakunaqa manchakuwankun, nispa.
Currently Selected:
MALAKÍAS 1: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.