GÉNESIS 9
9
Diospa Noewan rimanakusqan
1Diostaq Noeta churinkunatapas saminchaspa nirqan:
—Askhata miraychis, kay pachata hunt'aykuychis. 2Qankunatataq anchatapuni manchakusunkichis kay pacha lliw animalkuna, phalaq animalkunapas, hayk'an pampanta suchuqkunapas, mama qocha lliw challwakunapas, chaykunaqa makiykichispiñan. 3Chaykunaqa mikhunaykichispaqmi kanqa, hinallataq yuyukunapas q'omer yurakunapas. Lliwtan qoykichis. 4Yawarnintin aychatan ichaqa ama mikhunkichischu, yawarpin kawsayqa kashan. 5Runa wañuchiqtaqa huchachasaqpunin, animaltapas runatapas, runa masinta wañuchiqtapas. 6Runa wañuchiqtaqa runallataqmi wañuchinqa, Diospa rikch'ayninman runaqa ruwasqa kasqanrayku, 7qankuna ichaqa askhata miraychis, kay pachata hunt'aykuychis, nispa.
8Diosmi Noeta churinkunatawan nillarqantaq:
9—Ñoqan kunan qankunawan mirayniykichiswanpas rimanakuni, 10hinallataq tuyuq wasimanta qankunawan lloqsimuq llapa kawsashaqkunawanpas rimanakuni: phalaq animalkunawan, uywakunawan, salqa animalkunawanpas. 11Qankunawanmi rimanakuni, manañan astawan millp'uq unu kanqachu llapa kawsashaqta p'uchukachinapaq, kay pachatapas p'ampachinapaq. 12Kaymi kanqa qankunawan lliw kawsaqwan wiñay-wiñaypaq rimanakusqay señal: 13K'uychiyta phuyupi sayachini, kaymi kay pachawan rimanakusqay señal kanqa. 14Kay pachaman phuyuchimuqtiytaq phuyupi k'uychiyqa rikhurinqa. 15Chaymi yuyarisaq qankunawan lliw kawsaqwanpas rimanakusqayta, manañataq astawan kanqachu millp'uq unu lliw kawsaqta p'uchukachinapaq. 16Phuyupi k'uychiy kaqtinmi, ñoqa chayta rikuspay ñoqawan kay pachapi lliw kawsaqwanpas rimanakusqayta yuyarisaq, nispa.
17Diosmi Noeta nirqan:
—Kaymi kay pachapi kaq lliw kawsaqwan rimanakusqay señal churasqa, nispa.
Noepa machasqan
18Tuyuq wasimanta lloqsimuq Noepa churinkunataq karqan Sem, Kam, Jafetpiwan. Kamtaq Canaanpa taytan karqan. 19Chay kinsantinmi Noepa churinkuna, paykunaq mirayninmi kay pachantinman mast'arikurqan.
20Noemi chakra llank'ayta qallarirqan, hinaspan uvas chakrata ruwarqan. 21Vinota ukyaspataq macharqapurqan, hinaspan karpan ukhupi q'alalla wikch'urayasharqan. 22Canaanpa taytan Kamtaq taytanpa q'ala-kayninta rikurqan, hinaspan hawapi kashaq iskaynin wawqenkunaman chayta willamurqan. 23Hinaqtinmi Semqa Jafetpiwan qatanata hoqarirqanku, hinaspanmi iskayninku chayta rikrankuman churaykukuspa, mana qhepankuta qhawaspa qhepanpamanta rispa, taytankuta qataykurqanku, chay hinapin taytankuq q'ala-kayninta mana rikurqankuchu.
24Noetaq ch'aki sonqo kapuspan, yacharqan sullk'akaq churinpa chay hinasqanta.
25Chaymi nirqan:
—¡Ñakasqa kachun Canaán!
¡Wawqenkunaq kamachinpa kamachin kachun! nispa.
26Nillarqantaq:
—¡Sempa Diosnin Señorqa saminchasqa kachun,
Canaantaq Sempa kamachin kachun!
27¡Jafet-ta Dios hatunchachun,
Sempa karpankunapitaq tiyachun,
Canaantaq Jafetpa kamachin kachun! nispa.
28Noetaq kawsarqan millp'uq unu qhepamanta kinsa pachak phisqa chunkayoq watata, 29hinaspan wañukapurqan isqon pachak phisqa chunkayoq watayoq kashaspa.
Currently Selected:
GÉNESIS 9: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
