ZACARIAS 8
8
Tayta Diospa imam prometekusqanmanta
1-2Llapallan kamachiq Tayta Diosmi rimapayawaspan kaynata niwarqa:
Sion Moqopi *f**yachaqkunataqa
kikillaypaqña kananpaqmi kuyakuni.
Sion Moqopi yachaqkunataqa
piñakuywanmi kikillaypaqña kuyakuni.
3Tayta Diosmi kaynata niwarqa:
Ñoqaqa kutikusaqñam Sion Moqopi llaqtaman.
*f**Yachakunaypaqmi kutikusaqña Jerusalenman.
Jerusalen llaqtam sutichasqa kanqa
Cheqap Kaqkunapa Kanan Llaqtawan.
Chaynapim Llapallan Kamachiq Tayta Diospa orqonpas
sutichasqa kanqa Paypaq Sapaqchasqa Orqowan.
4Llapallan Kamachiq Tayta Diosmi niwarqa:
Jerusalen llaqtapa plazankunapiqa
samarinqakuraqmi machuchakunapas.
Jerusalen llaqtapa plazankunapiqa
samarinqakuraqmi payachakunapas.
Sinchi yuyaq kasqankuraykum
tawnachantinkamaraq samarinqakupas.
5Chay llaqtapa plazankunaqa
pukllaq qari wawakunawanmi huntarinqa.
Chay llaqtapa plazankunaqa
pukllaq warmi wawakunawanmi huntarinqa.
6Llapallan Kamachiq Tayta Diosmi niwarqa:
Chay tiempopiqa puchuq runaykunam admirakunqa.
Ñoqapaqmi ichaqa mana admirakuypaqchu kanqa.
Llapallan Kamachiq Tayta Diosmi nini chaynataqa.
7Llapallan Kamachiq Tayta Diosmi niwarqa:
Runaykunataqa ñoqapunim libramusaq
intipa qespimunan nacionkunamanta.
Runaykunataqa ñoqapunim libramusaq
intipa seqaykunan nacionkunamanta.
8Pusaramuptiymi Jerusalenpiña *f**yachakunqaku.
Chaynapim runaykunaña kanqaku.
Chaynapim kasaq confiakunanku Diosninku.
Chaynapim kasaq allin ruraq Diosninku.
9Llapallan Kamachiq Tayta Diosmi kaynata niwarqa:
—Qamkunaqariki Llapallan Kamachiq ñoqa Tayta Diospa temploy cimientasqa kasqan punchawkunapim uyarirqankichik ñoqamanta willakuqpa imam nisusqaykichikta, chaynaqa kallpanchakuychikyá temploy hatarichinaykichikpaq. 10Temploypa cimientonta manaraq churachkaptinkuqa manam runakunapas pagonkuta chaskirqakuchu, animalninkupa llamkasqanmantapas manam chaskirqakuchu, runakunapas enemigonkuraykum hawkaqa mayman puririytapas mana atirqakuchu, ñoqamiki llapa runakunataqa runamasinpa contranpi hatarirachirqani. 11Ichaqa runaykunamanta kunan puchuq runakunawanqa manam chay ñawpa tiempokunapi hinañachu rurasaq. Llapallan Kamachiq ñoqa Tayta Diosmi chaynata nini. 12Hawka kawsakuspañam paykunaqa imakunatapas tarpukunqaku, uvas plantankupas sumaqllatañam rururinqa, chakrankupas chaynataqmi rururinqa. Chakrakunapas sullakunapa sullarisqanmi kanqa, kay puchuq runakunamanmi tukuy kaykunata qosaq herencianku kananpaq. 13Juda castakunawan Israel castakuna, tukuy nacionnkunapim ñakasqa karqankichik, kunanmi ichaqa qamkunata salvaykuspay paykunapaq bendicion kanaykichikpaqña rurasqaykichik. Chaynaqa ama manchakuspayá kallpanchakuychik.
14—Llapallan Kamachiq ñoqa Tayta Diosmi kaynata nini: Abueloykichikkuna piñarachiwaptinmi paykuna castigaruyta tantearurqani, paykunataqa manamá llakipayarqanichu. 15Chayman hinam kunanpas tantearuni Jerusalen llaqtatawan Juda castakuna yanapaykuytaña. Chaynaqa amayá manchakuychikchu. 16Chaynaqa kayna kamachisqayman hinayá ruraychik: Qamkunaqa amayá llullanakuychikchu. Cortekichikkunapipas cheqap allin arreglotayá ruraychik. 17Runamasikichikpa contranpi mana allin ruraytaqa amayá piensaychikchu. Amataqmi kuyankichikchu yanqamanta juraytaqa. Tukuy chaykunataqa cheqninim. Chaynatam nini ñoqa Tayta Dios.
18-19Llapallan kamachiq Tayta Diosmi rimapayawaspan niwarqa:
—Tawa kaq killapi, pichqa kaq killapi, qanchis kaq killapi hinaspa chunka kaq killapi ayuno rurasqaykichikqa tikrakurunqa llumpay kusikuymanñam, Juda castakunapaqmi chay punchawkunaqa tikrakurunqa kusikuy fiestakunamanña. Chaynaqa munaypaqyá-munaychik cheqap kaqkunatawan hawka kawsakuytaña.
20—Llapallan Kamachiq ñoqa Tayta Diosmi kaynata nini: Hamunqakuraqmi achka-achka runakuna, chayamunqakuraqmi achka llaqtapi *f**yachaq runakuna. 21Hinaptinmi huklaw llaqtapi yachaq runakuna rinqaku huklaw llaqtapi *f**yachaqkunaman hinaspam paykunata ninqaku: “Hakuwá risun Tayta Diospa favornin mañakuq, Llapallan Kamachiq Tayta Diostayá ñoqawan kuska maskamusunchik” nispa. 22Hinaptinmi Jerusalen llaqtaman rinqaku achka-achka runakuna, rinqakutaqmi hatun nacionniyoq runakunapas, chaymanqa rinqaku Llapallan Kamachiq ñoqa Tayta Diosta maskaspa favorniyta mañakunankupaqmi. 23Chaynaqa Llapallan Kamachiq ñoqa Tayta Diosmi kaynata nini: Chay punchawkunapiqa huklaw nacionniyoq hinaspa sapaq idiomakuna rimaq chunka runakunam hapikurunqa Juda casta runamanta hinaspam payta ninqaku: “Qamkunawan riytam munaniku, uyarirunikum Dios yanapasusqaykichikta” nispa.
Currently Selected:
ZACARIAS 8: QUEAYA87
Highlight
Share
Copy
Want to have your highlights saved across all your devices? Sign up or sign in
