ZACARIAS 6
6
Guerrapaq tawa carretakuna rikusqanmanta
1Huktawanmi revelacionniypi qawachkaspay rikururqani guerrapaq tawa carretakunata, chay carretakunaqa lloqsiramurqa iskay bronce orqokunapa chawpinmantam. 2Chay punta kaq carretatam chutachkasqa puka niraq caballokuna. Iskay kaq carretatañataqmi chutachkasqa yana caballokuna. 3Kimsa kaq carretatañataqmi chutachkasqa yuraq caballokuna. Tawa kaq carretatañataqmi chutachkasqa muru-muru caballokuna. Chay caballokunaqa llapallankum kasqa kallpasapakama.
4Hinaptinmi ñoqañataq chay rimapayawaqniy angelta tapurqani:
—Taytay ¿ima ninantaq kayqa? —nispa.
5Chaymi angelñataq niwarqa:
—Kay tawantin guerrapaq carretakunaqa tawantin espiritukunam, paykunaqa lloqsichkanku Kay Pachapi Kamachikuq Señorpa ñawpaqninmantam. 6Chay yana caballokunapa chutasqan carretaqa richkan norte lawpi nacionmanmi, chay yuraq caballokunapa chutasqan carretañataqmi richkan intipa seqaykunan lawpi nacionman. Chay muru-muru caballokunapa chutasqan carretañataqmi richkan surlawpi nacionman —nispa.
7Chay kallpasapa caballokunam ganasllawanña lloqsirqaku tukuy kay pachapi kayman-wakman purimunankupaq hinaptinmi chay rimapayawaqniy angelñataq paykunata nirqa:
—Tukuy kay pachapiyá kayman-wakman purimuychik —nispa.
Chaymi caballokunaqa chaynata ruramurqaku.
8Chaymantañataqmi Tayta Dios qayarimuwarqa:
Qaway Zacarias, wak norte law nacionman lloqsiqkunam paykunapa contranpi piñakuyniymanta chayraq sonqoyta tiyaykachinku —nispa.
Josueyman corona hinachisqankumanta
9Tayta Diosmi rimapayawaspan kaynata niwarqa:
10—Riyá Heldaiman, Tobiasman hinaspa Jedaiasman, paykunamantayá mañakamuy qori-qollqenkuta. Hina chay punchawllataqyá pasay Sofoniaspa churin Josiaspa wasintapas. Paykunaqariki Babilonia nacionman preso pusasqa kasqankumantam kutiramunkuña. 11Chay qori-qollqe huñusqaykiwanmi rurachinki huk coronata hinaspam chay coronataqa churanki Josadacpa churin sacerdotekunapa jefen Josueypa umanman. 12Josueytam ñoqa Tayta Diospa nisqayta kaynata ninki: “Kayqayá chay Ikllimuqwan sutichasqa runaqa, paymi kikinpa sapinmanta ikllimuspan ñoqa Tayta Diospa temployta huktawan hatarichinqa. 13Payqa ñoqa Tayta Diospa temployta huktawan hatarirachispanmi reypa chaskinankunata chaskispa ancha reqsisqa kanqa, reypa tiyananpi tiyaykuspanmi gobiernanqa, chaynapim reypa tiyananpi sacerdote kanqa, iskayninwanmi payqa allinlla kanqa” nispa. 14Josueypa coronanqa Tayta Diospa templonpi churasqam kanqa. Chaypiqa kanqa Helem sutiyoq runata, Tobias sutiyoq runata, Jedaias sutiyoq runata hinaspa Sofoniaspa churin Henta yuyarinankupaqmi.
15—Karu-karu llaqtakunamanta runakuna hamuspam yanapakunqaku Tayta Diospa templon huktawan hatarichiypi. Chaynapim yachankichik ñoqataqa Llapallan Kamachiq Tayta Dios kachamuwasqanta, tukuy kaykunaqa pasakunqa yupaychasqanchik Tayta Diospa kamachikuyninkunata kasukuptikichikmi.
Currently Selected:
ZACARIAS 6: QUEAYA87
Highlight
Share
Copy
Want to have your highlights saved across all your devices? Sign up or sign in
