ZACARIAS 14
14
Jerusalen llaqtaqa imaynam nacionkunawan kananmanta
1—Yaw Jerusalen llaqta, hamuchkanñam ñoqa Tayta Diospa castiganay punchawqa, chay punchawpiqa tukuy imaykikunatam llaqtapa chawpinpi rakinakunqaku. 2Chay punchawkunapiqa llapallan nacionkunatam hatarirachisaq qampa contraykipi peleanankupaq, paykunaqa chay llaqtata venceruspam wasikunatapas salteanqaku, chaypi *f**yachaq warmikunatapas abusarunqakum hinaspam chay llaqtayoqkunapa partenta presochasqata pusanqaku, chaynapim puchuqllanña chay llaqtapiqa qeparunqaku. 3Ichaqa chay nacionkunapa contranpiqa ñoqa Tayta Diospunim lloqsisaq paykunawan peleanaypaq, ñoqaqa lloqsisaq guerrapi peleachkaq hina peleanaypaqmi. 4Chay punchawpiqa ñoqam sayaykusaq Aceitunas Sachakunapa Kanan Moqopi, chay moqoqariki kachkan intipa qespimunan lawman qawaq Jerusalen llaqtapa chimpanpim. Chay moqoqa iskaymanmi rakikurunqa, chaynapim chay rakikuruq hatu-hatun wayqoqa chutarikunqa intipa qespimunan lawmanta intipa seqaykunan lawman. Chaynapim chay rakikuq moqopa hukninqa suchurinqa norte lawman, hukninñataqmi suchurinqa surlawman. 5Qamkunañataqmi ayqenkichik chay rakinarachisqay moqopa hatu-hatun wayqonta, chay wayqoqariki chayanqa Azal lawkamam. Qamkunaqa ayqenkichik pacha kuyuy karuptin abueloykichikkunapa ayqesqanpi hinaraqmi, chay pacha kuyuyqariki karqa Juda nacionpi Rey Uzias gobiernachkaptinraqmi. Yupaychasqaykichik ñoqa Tayta Diosqa hamusaq ñoqallapaqña llapallan sapaqchasqa kaqkunapiwanmi —nispa.
6Chay tiempopiqa punchawpas kanqa mana sumaq kanchiqmi, manataqmi kanqachu chiripas nitaq qasapas. 7Chay punchawqa kanqa Tayta Diospa reqsisqallanmi. Chay punchawpiqa manam yachanqakuchu punchaw kasqanta nitaq tuta kasqantapas, tutaykuqtapas hinallaraqmi achkiyqa kanqa. 8Hina chay punchawpitaqmi Jerusalen llaqtamantapas yakukuna kallpayta qallaykunqa, parten yakum kallpanqa intipa qespimunan lawpi Kachi Qocha lawman, partenñataqmi kallpanqa intipa seqaykunan lawpi Mediterraneo Lamar Qocha lawman. Chay yakuqa poqoypipas hinaspa chirawpipas hinallam kallpanqa. 9Chay tiempopiqa tukuy kay pachapim kikin Tayta Diospuni gobiernanqa. Chaynapim sapallan Tayta Dios reqsisqa kanqa, sutinpas hina sapallanpam kanqa. 10Chay tiempopiqa lliw Israel nacionmi pampaña rikurirunqa, Geba llaqtamanta qallaykuspam Jerusalen llaqtapa surlawninpi tarikuq Rimon llaqtakama chaynaqa kanqa. Chaynapim Jerusalen llaqtaqa karunqa altoneqpiña. Chay llaqtapim runakuna *f**yachanqaku Benjamin Zaguan punkumanta qallaykuspa ñawpaq tiempopi kaq punkunta pasaspa Esquina sutiyoq zaguan punkukama. Norte lawmantañataqmi qallaykamunqa Hananeel sutiyoq runapa torren lawmanta hinaspam chutarikunqa reypa uvas saruchinan lawkama. 11Arí, Jerusalen llaqtaqa runakunapa *f**yachasqanñam kanqa, manañam huktawan tunichisqañachu kanqa, aswanqa chaypi *f**yachaqkunapas hawkañam kawsakunqaku.
12Ichaqa Jerusalen llaqtapa contranpi guerrawan hatariq nacionkunataqa Tayta Diosmi castiganqa kayna ñakariykunawan. Chay nacionniyoq runakunapaqa sayachkaptillankuraqmi cuerponkupi aychanku ismurunqa, chaynallataqmi paykunapaqa nawinkupas hina uchkullanpi ismurunqa, paykunapaqa qallunkupas hina simillankupim ismurunqa. 13Chay tiempopiqa Tayta Diosmi llapa runakunapa hawanman kachaykunqa huk manchakuy pantayta, sapakamam soldadomasinpa makinta hapirunqa hinaspam tuksinakurunqaku. 14Chaynapim Juda lawpi *f**yachaqkunapas peleanqaku Jerusalen llaqtapi hinaspam paykunaqa muyuriqninkupi kaq llapallan nacionkunapa tukuy imankunatapas huñurunqaku, achka-achkatam huñurunqaku qori-qollqemanta alhajakunatapas hinaspa pachakunatapas. 15Chay runakunaman wichiykuq hina ñakariyllam wichiykunqa chay runakunapa campamentonpi kaq caballokunamanpas, mulakunamanpas, camellokunamanpas, asnokunamanpas hinaspa llapallan animalkunamanpas.
16Jerusalen llaqtapa contranpi hatariq nacionniyoq runakunamanta puchuqkunam watan-watan rinqaku Llapallan Kamachiq Tayta Dios reyninku adoraqña. Chayman rispankum paykunaqa ruramunqaku Ramada sutiyoq fiestatapas. 17Sichum kay pachapi runakunamanta pipas mana Jerusalen llaqtata riptinqa hinaspa Llapallan Kamachiq reyninku Tayta Diostapas mana adoraptinkuqa manam para chayanqachu chakrankuman. 18Egipto nacionniyoq runakunapas mana chayman riptinkuqa manam paykunamanpas para chayanqachu, paykunamanpas Tayta Diosmi kachaykunqa huk hatun ñakariyta imaynam chay Ramada sutiyoq fiestamanpas mana riy munaq nacionkunata castigasqanman hina. 19Chayna castigasqamá kanqa Egipto nacionpas chaynataq llapallan nacionkunapas Ramada sutiyoq fiestaman mana riyta munaspankuqa. 20Chay tiempopiqa caballokunapa campanillachankunapas qellqasqakamam kanqa “Tayta Diospaq Sapaqchasqa” niq sutiwan. Tayta Diospa templonpi kaq yanukuna mankakunapas kanqa altarpa ñawpaqninpi kaq medianokuna hina Tayta Diospaq sapaqchasqañam. 21Jerusalen llaqtapi hinaspa Juda nacionpi kaq llapallan mankakunapas kanqa llapallan kamachiq Tayta Diospaq sapaqchasqañam, chaynapim animalninku ofreceq hamuqkunapas chay mankakunawan servichikuspa ofrecesqanku aychata yanunqaku. Chay tiempopiqa llapallan kamachiq Tayta Diospa templonpiqa manañam kanqachu negociante runakunaqa.
Currently Selected:
ZACARIAS 14: QUEAYA87
Highlight
Share
Copy
Want to have your highlights saved across all your devices? Sign up or sign in
