GENESIS 6

Runakuna huchallamanña qokurusqankumanta

1Kay pachapi runakuna mirayta qallariruptinkum nacemurqa paykunapa warmi churinkuna. 2Diospa churinkunam runakunapa warmi churinkunata buenamoza kasqanta qawaykuspanku llapallanmanta akllaspa casararqaku. 3Chaymi Tayta Dios nirqa:

—Manam wiñaypaqchu Espirituyqa runawan yachanqa, cheqaptapunim payqa runalla, kawsanqaqa pachak iskay chunkan watallatañam —nispa.

4Chay tiempokunapim qatiqnin hamuq tiempokunapiwan karqa kay pachapi hatunkaray runakuna. Hinaptinmi Diospa churinkuna, runakunapa warmi churinkunawan casarakuptinku paykunapa churinta wachakurqaku. Paykunam karqaku ñawpaqmantaraq kallpasapa chaynataq reqsisqa runakuna.

5Tayta Diosmi qawarqa kay pachapi runakunaqa llumpay mana allin rurayllapiña kasqankuta chaynataq piensasqankupas, lliw yuyayninkupas sapa punchaw mana allinllaña kasqanta. 6Hinaptinmi kay pachapi runata rurasqanmanta Tayta Dios pesakurqa chaynataqmi sonqonpipas llakikurqa. 7Chaymi Tayta Dios nirqa:

—Kay pachapi runakuna unanchasqaytam chinkarachisaq. Runamanta qallaykuspam uywa animalkunatapas, qasqonpa puriq animalkunatapas chaynataq alton pawaq animalkunatapas chinkarachisaq. Chaykuna rurasqaymantam pesakuni —nispa.

8Noeymi ichaqa Tayta Diospa favorecesqan karqa.

Noeypa buque rurasqanmanta

9Noeyqa karqa runamasinkunamantapas allin ruraq runam. Payqa mana faltayoq kaspam Diospa agradonpaq kawsarqa. 10Noeypa churinkunam karqa kimsa: Sem, Cam hinaspa Jafet.

11Diospa qayllanpim kay pachapi kaq runakuna lliw pierdekururqaku hinaspankum dañanakuyllapiña kawsarqaku. 12Runakuna huchallapiña kawsaptinkum kay pachaqa pierdesqallaña kasqanta Dios qawarqa. 13Chaymi nirqa Noeyta:

—Tantearunim llapa runakuna chinkarachiyta kay pachaqa paykunarayku dañanakuyllapiña kasqanrayku. Chaynaqa kay pachamantam paykunata puchukachisaq. 14Cipres sachamanta ruray hatu-hatun wasi kaqlla buqueta. Chaypa ukunpim achka cuartokunata ruranki hinaspam hawanta ukuntapas llusinki breawan yaku mana yaykunanpaq. 15Kaynatam ruranki: buquepa largonmi kanqa pachak kimsa chunkan metro, anchonñataqmi kanqa iskay chunka iskayniyoq metro parten, sayayninñataqmi kanqa chunka kimsayoq metro parten. 16Buquetam ruranki iskay altosniyoqta, huk ventanatañataqmi ruranki qatanpa medio metro ukunpi, punkuntapas rurankitaqmi waqtanpi. 17Ñoqam kacharimusaq sinchi parata kay pachaman yaku huntananpaq chaynapi kay pachapi llapallan kawsaqkunatapas chaynataq llapallan runakunatapas puchukarachinaypaq. Lliw kay pachapi kaqkunam wañurunqa. 18Qanwanmi ichaqa contratoyta rurani salvasqa kanaykipaq. Buquemanmi yaykunqa qanwan kuska churikikuna, warmiki chaynataq churikikunapas warmintinkama. 19Llapallan animalkunatapas castapuratakamam orqontin chinantinta buqueman yaykuchinki qanwan kuska kawsanankupaq. 20Alton pawaqkunatapas, uywa animalkunatapas, allpapi qasqonpa puriqkunatapas castapuratakamam yaykuchinki paresnintinta qanwan kuska kawsanankupaq. 21Apaykunkitaqmi tukuy rikchaq mikuytapas qamkuna mikunaykichikpaq chaynataq animalkunapaqpas —nispa.

22Noeymi lliwta rurarqa Diospa kamachisqanman hina.

Currently Selected:

GENESIS 6: QUEAYA87

Highlight

Copy