GENESIS 42

Joseypa wawqenkuna kawsay rantiq risqankumanta

1Jacobmi Egipto nacionpi kawsaykuna kasqanta yachaspa nirqa churinkunata:

—¿Imatataq rurachkankichik qawanakuspallaqa? 2Ñoqam uyarirqani Egipto nacionpiqa kawsaykuna kasqanta, rispayá rantimuychik chaynapi yarqaymanta ama wañurunanchikpaq —nispa.

3Chaymi Joseypa chunkantin wawqenkuna Egipto nacionman pasarqaku kawsaykunata rantimunankupaq. 4Jacobmi Joseypa wawqen Benjaminta mana kacharirqachu wawqenkunawan rinanpaq: “Yanqañataq imapas pasarunman” nispa. 5Israelpa churinkunam kawsaykuna rantimunankupaq wakin riqkunapiwan rirqaku Canaan lawpipas muchuy kasqanrayku.

6Joseymi karqa Egipto nacionpi munaychakuq, chayraykum llapa runakunaman kawsayta rantikuq. Joseypa wawqenkunam chayaruspanku paypa ñawpaqninpi qonqoranpa pampaman kumuykurqaku. 7Chaymi Josey wawqenkunata qawaykuspa reqsirurqa aswanqa manam reqsiqpas tukurqachu hinaspam piñasqa paykunata tapurqa:

—¿Maymantataq hamuchkankichik? —nispa.

Chaymi paykunañataq nirqa:

—Canaan lawmantam hamuchkaniku kawsaykunata rantinaykupaq —nispa.

8Joseyqa wawqenkunata reqsiruchkaptinpas paykunaqa manam Joseyta reqsirqakuchu. 9Chaymi Josey paykunamanta mosqosqanta yuyariruspa nirqa:

—Wateqaqkunam kankichik, kay nacionqa mana defiendesqa kasqanta qawaqmi hamurqankichik —nispa.

10Hinaptinmi paykunañataq nirqa:

—Señor, runallaykikunaqa kawsay rantiqllam hamurqaniku. 11Kay lliwchaykum kaniku huk runapa churillan, cheqap rimaq runakunam kaniku. Kay runallaykikunaqa manam wateqaq runakunachu kaniku —nispa.

12Chaymi Josey nirqa:

—Cheqaptapunim qamkunaqa nacionqa mana defiendesqa kasqan qawaq hamurqankichik —nispa.

13Hinaptinmi paykunañataq nirqa:

—Kay runallaykikunaqa chunka iskayniyoq wawqekunam kaniku, Canaan lawpi huk runapa churillanmi kaniku. Sullkaykum kachkan taytaykuwan hukninñataqmi chinkarun —nispa.

14Chaymi Josey nirqa paykunata:

—Nisqaypi hinam wateqaq kankichik. 15Kunanmi pruebasqa kankichik. Juranim Faraonrayku, mana sullka wawqekichik hamuptinqa manam lloqsinkichikchu kaymanta. 16Kachaychikyá huknikichikta chay wawqekichikta pusamunanpaq, qamkunañataqyá preso qepaychik rimasqaykichik cheqap kasqan pruebasqa kananpaq, mana chayqa juranim Faraonrayku, wateqaqmi kankichik —nispa.

17Hinaspam paykunata carcelman churarqa kimsa punchaw. 18Kimsa punchawmantam paykunata Josey nirqa:

—Kawsanaykichikpaq kaynata ruraychik: ñoqaqa Diostam respetani. 19Cheqap rimaq qarikuna kaspaykichikqa huknin wawqekichiktayá carcelpi presota dejaychik, wakinnikichikñataqyá riychik wasikichikman kawsayta apaspa familiaykichik mikunanpaq. 20Ichaqa sullka wawqekichiktam pusamuwankichik chaymi cheqap kanqa rimasqaykichik, mana chayna kaptinqa wañunkichikmi —nispa.

Paykunam chaynata ruraspanku 21ninakurqaku:

—Cheqaptapunim huchallikururqanchik wawqenchikpa contranpi. Ruegakuwachkaptinchikmi ñakariyninta qawachkaspa mana uyarirqanchikchu chayraykum ñoqanchikman kay ñakariy hamuruwanchik —nispa.

22Chaymi Ruben paykunata nirqa:

—¿Manachum nirqaykichik: “Ama huchallikuychikchu warmapa contranpi” nispay? ichaqa manam kasuwarqankichikchu, kunanmi vidanmanta pagachkanchik —nispa.

23Paykunaqa manam yacharqakuchu rimasqankutaqa Josey entiendesqanta, Joseywan wawqenkuna rimaptinmi huk runa tikrarqa paykunapaq. 24Joseymi paykunamanta rakikuykuspan waqarqa, chaymantam paykunaman kasqan kutispan rimapayarqa hinaspam Simeonta qawachkaptinku presochaspa chaqnachirqa. 25Chaymantam runankunata Josey kamachirqa wawqenkunapa costalninman trigota huntachinankupaq chaynataq sapakamapa qollqenkutapas costalninkuman kutiykachinankupaq hinaspa qoqawchanankupaq. Chaynatamá paykunapaq rurarqaku. 26Joseypa wawqenkunam kawsaykunata asnonkuman cargakuykuspa kutirqaku. 27Samasqankupiñam asnonman mikuchinanpaq costalninta huk kaqnin kichaykuspan tarirurqa qollqenta. 28Chaymi nirqa wawqenkunata:

—Qollqeytam kutiykarachimuwasqa, costalniypim kasqa —nispa.

Hinaptinmi mancharikuywan katkatataspanku ninakurqaku.

—¿Imatataq Diosqa rurawachkanchik? —nispanku.

29Canaan lawman chayaspam taytanku Jacobman willakurqaku paykunata tukuy ima pasamusqanmanta:

30—Egipto nacionpi kamachikuq runam piñasqa rimapayawarqaku nacionnin wateqaq kasqaykuta piensaspan. 31Chaymi ñoqayku nirqaniku: “Manam wateqaqkunachu kaniku, ñoqaykuqa cheqap rimaq qarikunam kaniku. 32Taytaykupa churinkunam kaniku chunka iskayniyoq, hukninmi chinkarun, sullkaykuñataqmi taytaykuwan Canaan lawpi kachkan” nispa. 33Chay nacionpi kamachikuq runam niwarqaku: “Kaynapim reqsisqaykichik cheqap runakuna kasqaykichikta: huknin wawqekichikta ñoqawan saqeychik hinaspa kutiychik familiaykichik mikunanpaq kawsayta apaspa, 34pusamuwankichikmi sullka kaq wawqekichikta chaynapi wateqaqkuna mana kasqaykichikta chaynataq cheqap rimaq runakuna kasqaykichikta yachanaypaq. Chayñam wawqekichikta kacharisaq, chayñam negociotapas rurakunkichik kay nacionpi” nispa.

35Chaynata niruspa costalninkuta vaciaptinkum sapakamapa qollqenku kipusqa kachkasqa chaymi taytankupiwan qollqenkuta qawaykuspanku mancharikururqaku. 36Chaymi taytanku Jacob paykunata nirqa:

—Manaña churiyoqtachu dejaruwankichik, Joseyqa manam kanñachu nitaqmi Simeonpas kaypiñachu. Benjamintapas qechuruwaytam munachkankichik. Tukuy kaykunaqa ñoqapa contraypim —nispa.

37Chaymi taytanta Ruben nirqa:

—Mana kutirachimuptiyqa iskay churiykunatachá wañurachinki, qoykuwayá Benjaminta ñoqam kutichimusaq —nispa.

38Hinaptinmi pay nirqa:

—Manam churiyqa rinmanchu qamkunawanqa, wawqen wañuruptinmi payqa sapallanña qeparun, chay risqaykichikpi imapas pasaruptinqa waqasqallaypichá kay machuqa wañukusaq —nispa.

Currently Selected:

GENESIS 42: QUEAYA87

Highlight

Copy