GENESIS 23

Sarapa wañukusqanmantawan pampakusqanmanta

1Pachak iskay chunkan qanchisniyoq watata Sara kawsaruspam 2wañukurqa Quiriat-arba llaqtapi, chaypa huknin sutinqa Hebronmi. Chayqa kachkan Canaan allpapim, chaymi Abraham rirqa Saramanta llakikuspa waqaq. 3Chaymi Abraham warminpa ayanta dejaykuspa rirqa Hetpa castankunawan rimaq:

4—Forasterom kani qamkuna ukupi. Rantikuwaychik allpata sepulturapaq chaypi warmiyta pampanaypaq —nispa.

5Hetpa mirayninkunañataqmi payta nirqaku:

6—Señorniyku, uyariykuwayku: qamqa kanki Diospa akllasqan kamachikuqmi, allinnin sepulturapiyá pampay señoraykitaqa, pampanaykitaqa manam mayqanniykupas michakusqaykikuchu —nispa.

7Hinaptinmi Abraham hatariykuspa Het casta runakunapa qayllanpi kumuykuspan 8nirqa:

—Sichu munankichik warmiypa ayan pampanayta hinaspaqa uyariykuspayá rimapayaykaysiwaychik Zoharpa churin Efronta 9chaynapi chakranpi kaq Macpela sutiyoq machayta rantikuwananpaq. Allin preciotam pagasaq chawpikichikpi pampakunayku sitio kananpaq —nispa.

10Efronqa Hetpa castankunawanmi huñunakuypi tiyachkarqa. Llaqtapa zaguan punkunta llapallan yaykuqkuna uyarichkaptinkum Hetpa mirayninkunapa qayllanpi. Abrahamta Efron contestarqa:

11—Manam, qollqepaqraqchu qoyki señorniy. Qoyllam-qoykuyki chakrataqa, qoykitaqmi chaypi kaq machaytapas, llaqtaypi kaqkunapa qawasqantam qoyki, chaynaqa pampamuyá ayallaykitaqa —nispa.

12Hinaptinmi Abraham chay allpapi runakunapa ñawpaqninpi huktawan kumuykurqa. 13Hinaspam chay allpapi kaq runakunapa qayllanpi Efronta nirqa:

—Ruegakuykim uyariykuwanaykipaq. Chay chakrapa preciontaqa chaskiykuwayá chaynapi warmiypa ayanta pamparamunaypaq —nispa.

14Chaymi Abrahamta Efronñataq nirqa:

15—Señorniy uyariykuway. Tawa kilo parten qollqem cuestan kay allpaqa, ñoqanchikpiqa ¿mayna achkamá chayqa? Warmikipa ayantaqa pampamuyá —nispa.

16Chaymi Abraham “anri” nirqa Efrompa nisqanta. Rimanakusqankuman hinamá Hetpa castankuna uyarichkaptin Abraham pesarqa tawa kilo parten qollqeta imaynam negociantekunapa pagananku precioman hina. 17Chaymi Abrahampaña karqa Mamrepa chimpan Macpela lawpi kaq Efrompa kasqan chakraqa, paypañataqmi karqa chaypi kaq machaypas hinaspa chakra ukupi kaq sachakunapas. 18Hetpa castankuna chaynataq llaqtapa zaguan punkun lliw yaykuqkuna qawachkaptinkum Abraham dueñoña karqa.

19Kaykunata allicharuspanmi Abraham warmin Sarapa ayanta pamparqa Mamrepa chimpan Macpela machaypi, chay Mamre llaqtapa huknin sutinmi karqa Hebron. Chayqa kachkan Canaan allpapim. 20Chaynapim Hetpa castankunamanta rantisqan chakrawan machaypas Abrahampaña karqa pampakunankupaq.

Currently Selected:

GENESIS 23: QUEAYA87

Highlight

Copy