GENESIS 15

Abranwan Dios contrato rurasqanmanta

1Kaykunapa qepantam Abranman revelaspan Tayta Dios nirqa:

Abram, ama manchakuychu,

ñoqam waqaychasqayki,

anchatataqmi premiasqayki.

2Hinaptinmi Abramñataq nirqa:

—Señor Dios ¿Imapaqtaq imatapas qowankiman mana churiyoq kachkaptiyqa chaynataq Damasco llaqtayoq Eliezerlla wasiypi herenciay chaskiq kachkaptinqa? 3Manamá qowankichu churitaqa, uywasqay Eliezerchiki kanqa herenciay chaskiqqa —nispa.

4Chaymi Tayta Diosñataq nirqa:

—Manam paychu kanqa herenciayki chaskiqqa, churikipunim herenciayki chaskiqqa kanqa —nispa.

5Tayta Dios hawaman pusaruspanmi nirqa:

—Qaway cielokunapi lucerokunata, yupayyá atispaykiqa. Wakna mana yupay atinam kanqa miraynikikunapas —nispa.

6Abramqa Tayta Diosman iñisqanraykum mana huchayoqpaqña chaskisqa karqa. 7Paytam Tayta Dios nirqa:

—Ñoqam kani Tayta Dios. Caldea law Ur llaqtamantam horqomurqayki kay allpata herencia qonaypaq —nispa.

8Hinaptinmi Abramñataq nirqa:

—Señor Dios ¿imapitaq yachasaq kay allpaqa herenciay kananta? —nispa.

9Chaymi Diosñataq nirqa:

—Aparamuway kimsa watayoq vaquillatawan kimsa watayoq cabrata, apamuwaytaq kimsa watayoq carnerotawan kullkutapas chaynataq mallqo palomatapas —nispa.

10Chaymi Abram chaykunata Diosman aparuspan partirqa chawpimanta hinaspam churarqa sapa partisqanta chimpapurata, palomatawan kullkutam ichaqa mana partirqachu. 11Chaymi nakasqan animalkunapa hawanman ullachkukuna tiyaramuptin Abramñataq manchachirqa. 12Inti seqaykuytañam Abramta puñuy hapiruptin puñururqa hinaptinmi llumpay tutayay payta mancharirachirqa. 13Chaymi Abramta Tayta Dios nirqa:

—Cheqaptapunim miraynikikunaqa runapa allpanpi *f**yachanqaku hinaspam servinqaku chaypi kaqkunata, paykunaqa ñakarichisqataqmi kanqaku tawa pachak wata. 14Aswanqa servichikuqninku runakunatam castigasaq, hinaptinñam lloqsinqaku sinchi riquezayoq. 15Hinaptinmi hawkayaypi kawsaruspa yuyaq kaynikipiña wañukunki hinaspam pampasqa kaspa abueloykikunapa kasqanman rinki. 16Willkaykipa willkankunam kutimunqa kay allpaman. Amor runakunataqa huchallapiña kachkaptinkupas manaraqmi castigasaqchu —nispa.

17Inti seqaykuytaña sinchita tutayaruptinmi rikurirurqa huk qosnichkaq hornochapiwan lenguachkaq nina hinaspam partisqa animalkunapa chawpinta pasarqa. 18Chay punchawllapim Abranwan Tayta Dios rurarqa contratota, Diosmi nirqa:

—Miraynikikunamanmi kay allpata qosaq Egipto mayuchamanta Eufrates sutiyoq hatun mayukama. 19Qosqaykitaqmi Cain runakunapa, Cenaz runakunapa, Cadmon runakunapa, 20Het runakunapa, Feres runakunapa, Refaim runakunapa, 21Amor runakunapa, Canaan runakunapa, Gerges runakunapa hinaspa Jebus runakunapa allpantapas —nispa.

Currently Selected:

GENESIS 15: QUEAYA87

Highlight

Copy