Lucas 19

Jesusmantawan Zaqueomanta

1Jesusmi Jericó llaqta ukunta pasachkarqa. 2Chaypim impuesto cobraqkunapa kamachiqnin Zaqueo yacharqa, payqa apu runam karqa. 3Paymi Jesusta reqsiykuyta munarqa, ichaqa achkallaña runakuna kasqanraykum mana atirqachu, payqa taksalla sayayniyuqmi karqa. 4Chayraykum ñawparuspan purun higos sachaman seqarurqa, chayninta Jesús pasaptin reqsiykunanpaq. 5Jesusñataqmi chay sitioman chayaruspan altota qawarispan Zaqueota nirqa:

Zaqueo, chaylla uraykamuy, wasikipim kunan samasaq, nispa.

6Zaqueoñataqmi utqayman uray-kamuspan kusisqallaña wasinman pusarqa. 7Chayta rikuykuspankum Jesus-pa contranpi rimarqaku:

Huchasapa runapa wasinmanmi sama-pakuq yaykurun, nispanku.

8Zaqueoñataqmi sayariykuspan Señorta nirqa:

Señor, kapuqniykunatam partenta wakchakunaman qosaq, sichum engañaspay pimantapas suwakusqaytañataqmi tawa kuti mirayniyuqta kutichipusaq, nispa.

9Chaymi Jesusñataq nirqa: Kunanmi kay wasiman salvación chayaramun, kay runapas Abrahampa mirayninmanta kaqmi. 10#Mt 18.11.Runapa Churinqa chinkasqakunata maskaspa salvaqmi hamurqa, nispa.

Serviqninkunaman qollqeta saqeykuspan illaruq apumanta

11 # Mt 25.14-30. Jesusmi Jerusalenman hichpay-kuchkarqaña, uyariqnin runakunañataqmi Diospa munaychakuyninqa qallaykunantaña piensarqaku. Chayraykum kay rikchanachiyta 12paykunaman nirqa:

Ancha reqsisqa runam huklaw nacion-man rirqa rey kananpaq nombrarachikuspa kutimunanpaq. 13Manaraq richkaspanmi chunka serviqninkunata qayaykuspan sapakamaman achka qollqeta saqeykarirqa: “Kutimunaykamam kay qollqewan negociota ruwachkankichik”, nispan. 14Ichaqa llaqtamasinkunam payta cheqnispanku qepallanta huk comisionta pasachirqaku kaynata nimunankupaq: “Manam munanikuchu chay runa reyniyku kanantaqa”, nispanku.

15Chaywanpas rey kananpaq nombrarachikuspanmi llaqtanman kutimurqa, hinaspanmi qollqe saqesqan serviqninkunata qayachirqa, chaynapi sapakamapa qollqe mirachisqanta yachananpaq. 16Chaymi punta kaq hamuruspan nirqa: “Señor, qollqekiqa chunka kuti mastam mirarun”, nispa. 17Reyñataqmi nirqa: “Qamqa allin serviqniymi kanki, allintam ruwarunki. Asllata saqechkaptiypas allinta ruwasqaykiraykum chunka llaqtapi kamachikunaykipaq churasqayki”, nispa.

18Chaymantam hukpas hamuruspan nirqa: “Señor, qollqekiqa pichqa kuti mastam mirarun”, nispa. 19Chaymi reyñataq nirqa: “Qampas pichqa llaqtakunatam kamachinki”, nispa.

20Hukpas hamuruspanmi nirqa: “Señor, kayqaya qollqekiqa, sumaqta mantelpi kipuykuspaymi waqaycharqani 21qamta manchakusqayrayku; qamqa piña-piña runam kanki, mana qosqaykitam apakunki, mana tarpusqaykitam cosechankipas”, nispa.

22Chaymi reyñataq nirqa: “¡Mana imapaq valeq sirviente! Simillaykim condenarusunki. Chullalla rimaq kasqayta yachachkaspaykiqa, mana qosqayta apakuq kachkaptiyqa hinaspa mana tarpusqayta cosechaq kachkaptiyqa, 23qollqeytaqa bancomanchiki churamuwaq karqa, chaynapi kutimuspay mirayniyuqtaña chaskikunaypaq”, nispa.

24Chaynata niruspanmi chaypi kaqkunata kamachirqa: “Chay runamanta qollqeta qechuspa chunka kuti masta mirachiqman qoychik”, nispa. 25Hinaptinmi paykunañataq nirqaku: “Señor, paypaqa chunka kuti masñam kachkan”, nispanku.

26 # Mt 13.12; Mr 4.25; Lc 8.18. Chaymi reyñataq nirqa: “Kapuqniyuqqa astawanraqmi chaskinqa, mana kapuqniyuqmantam ichaqa aslla kapuqninpas qechusqaraq kanqa. 27Rey kanaypaq mana munaq enemigoykunatapas pusamuspaykichik qayllaypi wañuchiychik”, nispa.

Jerusalén llaqtaman Jesús yaykusqanmanta

(Mt 21.1-11; Mr 11.1-11; Jn 12.12-19)

28Chayta Jesús rimaruspanmi paykunapa ñawpaqninta Jerusalén llaqtaman rirqa. 29Olivos moqopa hichpanpi kaq Betfagé llaqtaman hinaspa Betania llaqtaman chayaruspanmi, iskay discipulonkunata kachaspan nirqa:

30Wak chimpa llaqtaman riychik, chayaruspaykichikmi tarinkichik manaraq pipapas sillakusqan watarayachkaq malta asnota, paskaramuspayá aysaramuychik. 31Sichum pipas: “¿Imapaqtaq paskachkankichik?” nisuptikichikqa, “Señormi necesitachkan”, nispam ninkichik.

32Chaymi rispanku Jesuspa nisqanta hinalla tariykurqaku. 33Asnota paskachkaptinkum dueñonkuna rikuruspanku nirqaku:

¿Imapaqtaq paskankichik? nispanku.

34Chaymi paykunañataq nirqaku:

Señormi necesitachkan, nispanku.

35Jesusman asnota chayarachispankum pachankuwan caronaykurqaku, hinaspam Jesusta sillaykachirqaku. 36Ñanta riptinmi llapa runakunañataq pachankuta mastarqaku. 37Olivos moqomanta Jerusalenman uraykuptinmi, llapallan qatiqninkunañataq kusikuymanta qaparispa tukuy rikchaq milagrokuna rikusqankumanta Diosta yupaychaspanku, 38#Sal 118.26.kaynata nirqaku: ¡Señorpa sutinpi hamuq Reyqa qapaqchasqayá kachun! ¡Hanaq pachapi hawkayay kachun! ¡Alto-altopiyá hatunchay kachun! nispanku.

39Runakuna ukumantam wakin fariseokuna, Jesusta nimurqaku:

¡Yachachikuq, kay discipuloykikunata upallachiy! nispanku.

40Chaymi Jesusñataq nirqa:

Sichum paykuna upallaruptinkuqa rumikunachá qaparinmanku, nispa.

41Jerusalenman hichpaykuspanmi, llaqtata qawarispan Jesús waqarqa: 42¡Ima allinraq kanman kay punchawpi hawkayaynikipaq kaqta entiendeptikiqa! Kunanmi ichaqa qanmanta pakasqaraq kachkan. 43Hamuchkanmi punchawkuna, enemigoykikuna muyurirususpayki cercota hatarichiptinku mana maynintapas lluptiyta atinaykipaq. 44Pasaypaq tuñichisqam kanki, runaykikunatapas lliwtam wañuchinqaku. Rumikikunapas manam chullapas perqasqaqa puchunqachu, salvaqniki Diosta mana reqsikusqaykirayku, nispan.

Templopi rantikuqkunata Jesús qarqosqanmanta

(Mt 21.12-17; Mr 11.15-19; Jn 2.13-22)

45Temploman Jesús yaykuspanmi, chaypi rantikuqkunata qarqoyta qallarispa 46#Is 56.7.#Jer 7.11.kaynata nirqa:

Qellqasqam kachkan: “Wasiyqa mañakuna wasim kanqa”, niq. Qamkunam ichaqa suwakunapa machaynintaña ruwarunkichik, nispa.

47 # Lc 21.37. Jesusmi templopi sapa punchaw yachachirqa, llapa sacerdotekunapa kamachiqninkunawan Diospa leynin yachachiqkuna hinaspa llaqtapa kamachiqninkunam Jesusta imayna wañurachiyta maskarqaku. 48Ichaqa manam imaynatapas atirqakuchu, llapa runakuna paypa yachachisqan uyariyta munasqankurayku.

Currently Selected:

Lucas 19: RCQ12

Highlight

Copy