Mataos 6
6
Mpʉ bʉr lé ejala le edwiibɨ Zyɛm ɨ
1«Diʼe ga ncye é lɔb esa lɛʼla. Adwiibɨ ga Zyɛm é mih mo bʉr, ó bɨn nkʉʼ beɔ. ǃBɨn si sa no nɛʼɛ, bɨn bé aŋa bi mpaŋ myɛna boo Sɔŋ win ndɨ é jobo kʉ ɨ.
2«Ebe no, ǃgo óbe ó lé edwe baanteʼenteʼe o bʉr mɔn nɛʼɛ, ato le elɛɛ sa yaa kʉ kʉ, mpʉ baanya-bɨkʉʉŋʉ lé esa é mompah mɨnjwɨʼla mɨn le moman mɨmpaʼa ɛ. Bé esa no ó, bʉr nkʉʼ seʼle be. Me elɛɛ bɨn cyecye ó nɛɛ: bɨha bʉr, bɨ bɛa bi myɛna mɔɔ. 3Sa gwar, ǃgo si dwe baanteʼenteʼe o bʉr mɔn nɛʼɛ, mbo emyɛl go, wé l'ayi gʉa sa mbo ejʉm sa ɛ, 4é l'efu ó, edwɛna lo, lé nkʉʼ syɛɛ é mofo. Sɔŋ go lé ebee sa yiyɛh ndɨ fela ɛ, nye ódwe go mpaŋ myɛna tɨ.»
Sikʉlʉ é lɔb mɨnjwɨʼla
(Lʉkas 11.2-4)
5«Jɔʼ bɨn lé ejwɨʼla e Zyɛm ɨ, asa ga mpʉ baanya-bɨkʉʉŋʉ lé esa ɛ. Bé ejwɨʼla-jwɨʼla ó, ocɨcyel é mompah mɨnjwɨʼla mɔɔ le moman mɨmpaʼa, ó bʉr, bé beŋɨ be. Me elɛɛ bɨn cyecye ó nɛɛ: bɨ bɛa bi mɔɔ myɛna. 6Sa gwar, gwɔɔ, é jɔʼ go lé ejɨ kpɛl sa Sɔŋ go mɨnjwɨʼla ɛ, niʼe é tiʼe yo, dible ebe, jwɨʼla e Sɔŋ go ndɨ é l'efo tʉŋlʉ ɨ. No ó, waa ndɨ ebee sa go lé esa é l'efo e, nye ódwe go mpaŋ myɛna.
7«É mɨnjwɨʼla bɨn ndɨ ejwɨʼla e Zyɛm ɨ, abul ga mokan ndɨ abe e nyɔm ɨ, mpʉ bʉr o ndɨ abe obuʼla ɛ, lé esa ɛ. Bé ebuʼla ó, ozyɛm bɔɔ, bé ókʉ ka joʼo be ó njɨ ebe mpuo mokan. 8Ebe no, abaŋa ga be, ebe, Sɔŋ win, nye ebɛa gʉa sa lé esa bɨn sɔɔlʉ ɨ, bɨn l'apa jaʼ nye ya.»
Mɨnjwɨʼla mo Da Yesʉs
(Lʉkas 11.2-4)
9«Ebe no, bɨn bɛɛ, dɨʼe jwɨʼla ga e Zyɛm é mbi wi:
“Sɔŋ wih ndɨ é jobo tʉŋlʉ ɨ, lɛʼla bʉr bɨbɛh ó, go ó Zyɛm ndɨ ti ɨ. 10Jwɨ̀ʼa yo, yé ntaʼ. Gwɨma yo, yé syɛŋɨ é si nwa, mpʉ nteme yé ndɨ é jobo tʉŋlʉ ɨ. 11Dweʼ bɨh muh mode mo jala e bɨh ɨ. 12Pɛʼɛ bɨbaa bɨ ebebe bɨh go di eniʼe é lɔb mɨsyem mɨh ɨ, mpʉ bɨh lé epɛʼ byaa bɨ bʉr o ndɨ esa bɨh ebebe e. 13Ato e bɨh é mobʉbla tʉŋlʉ. Syɛbɨ bɨh é mobo mo Bɨbla-mʉr. [Ebe, mojwɨ̀ʼa e nkul ndwe e moncɛnba, byé ó byo, to pyal é mɨmya mimyɛh. Amɛn!]”
14«ǃBɨn si pɛʼ bɨbaa bɨ ebebe bɨn bé a niʼe bʉr nɛʼɛ, Sɔŋ win ndɨ é jobo kʉ ɨ, nye nteme ópɛʼ bɨbaa nye a niʼe bɨn é lɔb bɨgwìh bin ɨ. 15Sa gwar, ǃbɨn si kʉ láa bɨbaa bɨ ebebe bɨn bé a niʼe bʉr nɛʼɛ, Sɔŋ win óláa bɨbaa nye a niʼe bɨn é lɔb motie bɨn bé a ntaa ɛ.»
Sikʉlʉ é lɔb eti mode lé edwiibɨ Zyɛm
16«No ó, é jɔʼ bɨn lé eti mode e, mʉr alwaare monceme mpʉ baanya-bɨkʉʉŋʉ lé esa-sa ɛ. Bé elwaare-lwaare monceme ó, lé ekpɛl lɛʼle bʉr ó, bé mu ó lé eti mode. Me elɛɛ bɨn cyecye ó nɛɛ: bɨ bɛa bi mɔɔ myɛna. 17No ó, ǃgwɔɔ si ti mode nɛʼɛ, jwɨ̀ŋɨ mpom go. Lama mulo. 18Go saʼ no é l'efu ó, go nkʉʼ di alɛʼle ó, go eti mode. Sɔŋ go nye ome ndɨ naa é l'efo e, nye ó go lé elɛʼle e. Sɔŋ go lé ebee sa go lé esa é mofo e, nye ójɛna e go mpaŋ myɛna.»
Mpaŋ okum e l'ogbaa
(Lʉkas 11.33-34)
19«Daʼ maʼ ga okum e l'ogbaa win é si nwa, gumo osyoʼ le myeŋle lé elɨr bɨsɔʼɔ, mɨndiblʉ bʉ mobe le edíbe e. 20Maʼa ga okum e l'ogbaa win é lal mo Zyɛm, gumo osyoʼ le myeŋle ndɨ alɨr bɨsɔʼɔ, mɨndiblʉ abʉ mobe, díbe e. 21Maʼa ga okum e l'ogbaa win gʉ, ebe, gumo okum win ndɨ ɨ, tɨʼ nteme ó mɨleme min, myé óbe e!»
Diʼe ga é myɛn tʉŋlʉ
(Lʉkas 11.34-36)
22«Dih, lé ó, é nyʉl mʉr tʉŋlʉ mpʉ elama. Ebe no, yé be ó, dih lo, lé ó mbɨmbɨa nɛʼɛ, lɛɛ ó, nyʉl go nyiwɛh ókʉ be ó é myɛn tʉŋlʉ. 23Ebe no, ǃɨ dih lo be lé esyɛb, abe mbɨmbɨa nɛʼɛ, nyʉl go nyiwɛh óbe ó é l'edurʉ tʉŋlʉ. Yé be ó, myɛn go a niŋe ó, go e we é nyʉl ɨ, wi lihba edurʉ nɛʼɛ, edurʉ laa, lé óbe ó, laa le antimentime!»
Mʉr esaŋɔ mojoʼo
(Lʉkas 16.13)
24«Abe e mʉr ndɨ e nkul esea e l'ojwɨ̀ʼa oba é jɔʼ gwar, ebe, nye ónwim nuu, kpɛl nuu; nkʉ ntɔʼ ó, nye ódwaabe nuu; pyeh nuu. No ó, bɨn bé abe e nkul esea e Zyɛm syɛɛ, sea e l'Okum-e-l'ogbaa é jɔʼ gwar.»
Asyɛl ga ba e bɨn bʉr o tɨ, tiibe e nyɔmlʉ nkʉ mompor
(Lʉkas 12.22-32)
25«Ebe no, me elɛɛ bɨn ó nɛɛ: asyɛl ga ba e bɨn bʉr o tɨ, tiibe e nyɔmlʉ [ndwe e monyʉla mɨn]. Asyɛl ga ba nteme e monyʉl mɨn, tiibe e mompor. Zê bɨn bé agʉa ó, mʉr, nye abe njɨ ede, le nteme ó, kubo nyʉl, wé e nyɔm, laa mompor ɛ? 26Dwɛʼa ga bɨnɔn lé epiili kʉ ɨ. Byé ali bɨpeme nkʉ bè. Byé ato é mɨngol yʉʉ gumo. Byé abe e mode mɨkɛɛla é monkuna. Sɔŋ win ndɨ é jobo kʉ ɨ, nye ó ndɨ edwe bye mode. Bɨn bé é bul buo dime, laa bɨnɔn. 27Zé é sama yin ndɨ e nkul eko elu egwar é molu mo tiʼ ye ebe ba nye lé esyɛl é leme e? 28Ebe yé bɨn lé esyɛl ba e monyʉl mɨn, tiibe e mompor ɨ? Paʼ dwɛʼ ga mpʉ ofulawa lé eto le ebuʼba le esam é bɨpeme e. Ofulawa baa, bé abe lé esea syɛɛ, nkʉ tie mɨkan. 29Me elɛɛ bɨn ó nɛɛ: dam be Salomɔŋ é jɔʼ nye a be e l'okum e l'ogbaa we e, nye a baabœrɔ mompor é mbɨa mbɨa, mpʉ Zyɛm lé ebœr ofulawa baʼ ɛ. 30Bɨka, byé etiʼe muh. Byé nteme, byé ó sa yé óguhɔ omɛn é duro e. Zyɛm pa taare bœr bɨka mompor, a dwɛʼra e bɨn! Yé, yé ósa ó, nye l'ayi bœr bɨn, laa naa ɛ? A twaʼbe buʼo yin ɛ! 31Ebe no, asyɛl ga ba e bɨn bʉr o tɨ, tiibe e mɨlɔb mɨnɨ. Alɛɛ ga ó: “A bɨna bé óde-de ga máa monyɔmlʉ le máa monyʉla ee? A bɨna bé óbwar-bwar ga yé ee?” 32Bʉr o bɨkul bɨfih bibyɛh, bé ekʉ ka du ó njɨ bɨsɨa byaa. To kœb ó, Sɔŋ win ndɨ é jobo kʉ ɨ, nye ebɛa gʉa ó, bɨn nteme bé ejɨ bye bibyɛh. 33Sa efoʼ, kʉ bul saa ga eni é jwɨ̀ʼa ye#6.33 Myʉʉ mɨnjʉ̌m mɨtila mɨ lwib grɛk myɛɛ lɛɛ ó: «É bɨjɔʼ é buobuo.», ndwe le ekœʼ ebò e cyen é l'ocɨcyel. Bɨsa bibyɛh bɨn lé ejɨ bɨnɨ, Zyɛm óloŋlo bɨn bya. 34Ebe no, mʉr asyɛl ga ba e nye mʉr tɨ, tiibe e sa yé ósyɛɛ omɛn ɨ, ebe, omɛn, wé eyeʼbe wé mʉr tɨ. Mɨtuu mɨ moho, myé jala ó, e lɨha dobo.»
Currently Selected:
Mataos 6: ozmBad
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
