Matthieu 21

Yésʉs lɨ́ enî ɨ́ Yerʉ́zalɛm

(Marc 11.1-11; Luc 19.28-44; Yʉánɛs 12.12-19)

1Jɔʼ bé á be, bé mû bǎʼ e Yerʉ́zalɛm yɨ́, Yésʉs ntɔ̂ʼ pyâl Bɛtfagée lɨ́ Ecwɨ́ʼ lé ólivier. Nye nzě lómo ómpʉ́n bé obá. 2Nye ó: «Tóʼ gá kwár dí bɨ̌n lɨ́ empǒm nɨ̌. Bɨ́n ópyâl tɨ̂ʼ nó, bɨ̌n bé ókpâhwǎ beě kamntʉl tyeelá le mâ kamntʉl wé bǎʼ e yê. Tiyɨɨ gá yê. Bɨ̌n a nzé mé e yǎ. 3Mʉ̂r dí bɨ́n yʉ́ʉ́ sɔ̂ʼ nó, yalaa gá nye ó: “Dâ ó dí egwɨ̂m byê.” Jɔʼ yaá ó nyé ngá kpâhwǎ bîr ó, bɨ̌n nʉ́aa byé ɨ́ báánâʼ yɨ̂ʼ wâ.»

4Yé ntɔ̂ʼ syɛ́ɛ nó, lɨ́ elóŋlǒ lɔ́ɔ́ ngwíha milɔ̌b mé Nzyɛ̌m á boo cɛma wɨ́, ó:

5«Lɛ́yɨ́ɨ́ gá bʉr ó Síon ó:

Njwɨ́ɨ gǒ ó dí enze kwá nyǒ nɨ̌!

Nye ɨ́ buú talǎ njwɨr.

Nyě nzé ó, kʉ́ kamntʉl; nye ɨ́ mâ kamntʉl ɨ́ kɛlɨ̂.»

6Ompʉ́n bé ntɔ̂ʼ tô, tó sáŋɔɔ̌ mpʉ̌ Yésʉs á lɛ́ɛ bé yɨ́. 7Bé ntɔ̂ʼ búla e kamntʉl ndu e mwân wé. Bê nzě kɛl byé mikán myɔ́ɔ́ ɨ́ mikoo, Yésʉs ntɔ̂ʼ kalwo tɨ̂. 8Sɔ́má bʉ̂r nzě tô le ejan míkán myɔ́ɔ́ ɨ́ nkpǎʼ e nkpǎʼ. Bʉ́ʉ́ nzě gɔ́na le etíʼe mémpúho bílɨ́ le ejanɔɔ mé ɨ́ nkpǎʼ. 9Le bʉr o b'á nze tô nye dóló, le baá bé á dû nye píhe bá, bé á be lɨ́ ebʉ̂ bítím. Bé á lɨlɛ́ɔɔ ó: «Kûm díʼee ɨ́ Mwân mé David. Mɨná gúmláá gá waá dí enze e díé mé Dâ nyá! Bʉr o dí ɨ́ jʉ́o kʉ́ bá, gúmláá gá nye.»

10Jɔ̌ʼ Yésʉs á nî ɨ́ Yerʉ́zalɛm yɨ́, nkana yɨ́yɛ̂h, yé ntɔ̂ʼ di ɨ́ gbǎ gbǎ gbǎ. Bâʼ bʉ̂r, bê nzě díila páʼ nyɔ́ɔ́ ó: «Nyâʼ mʉ̂r, nye nyá?» 11Nó éntumo e bʉ̂r, lé á yala e bé ó: «Yé ó Yésʉs, ngwíha milɔ̌b mé Nzyɛ̌m, mʉr Nazarɛ̂t ɨ́ sí Galilê.»

Yésʉs lɨ́ eso óbɛ́ma o bísɔ̂ʼ ɨ́ mpáh Nzyɛ̌m

(Marc 11.15-19; Luc 19.45-48; Yʉánɛs 2.13-22)

12Yésʉs ntɔ̂ʼ nî lɨ́ ebɛhɛɛ lé á be ɨ́ mpáh Nzyɛ̌m lɨ́. Nye ntɔ̂ʼ so bʉ̂r o b'á didi tɨ̂ʼ lɨ́ ebɛ́ma, le baá bé á nzɨnze lɨ́ ebwâm bá. Nye ntɔ̂ʼ nkɛŋ ótéble o bʉ̂r o b'á sisyɛ́ɛla bimɔnɨ́ bá sí, lôʼlo bídiá bi bʉ̂r o b'á bɨbɛ́ma mepɨbaa bá. 13Nye nzě lɛ́ɛ e bé ó: «Yê cɛmá ɨ́ Mekaná mé Nzyɛ̌m ó: “Mbɛ̌r wâm, wé óbe ó mbɛ̌r mínjɨʼla.” Nó bɨ̌n bɨɛ̌ dwir wé ó, ekul e bínzilngǎn!»

14Baántím le bʉr o b'á tɨtɨ́a bá, bê nzě sîhlě súm nyé á be ɨ́ mpáh Nzyɛ̌m yɨ́, nye ntɔ̂ʼ tiʼ bê. 15Ɨ́ mpʉ bé á bee bisyɛ́ɛla Yésʉs á sâ bí, le ejóʼǒ mpʉ bwá ó ntwǒm, bé á lɨlɛ́ɛ ó: «Hosána! #21.15: Nzyɛ̌m tíʼɨɨ mɨná gâ.: Kûm díʼee ɨ́ Mwân mé David!» yɨ́, nó ó mílémé mí ójwɨ́ɨ o mpáh Nzyɛ̌m le olɛ̂ʼla o métié, myé á lóno lɨ́ ebúʼ ɨ́ lúrúdú yɨ́. 16Bê nzě dî e né ó: «Nzê go lɨ́ ejóʼǒ sá bé dí elɛ́ɛ yɨ́ ɛ́?» Nye nzě kam ó: «Eee! Bɨ̌n bé á bé así láa mícɛmá mîʼ?

“Go á sâ ó, bwá ó ntwǒm, bé gúmlaa go;

bityéé bi dí edêhlɔɔ mébêl bí, byé dwêʼ go kûm.”»

17Nye ntɔ̂ʼ líʼe bê, tô kʉ̌l, tô Bétanî, gúmó nyé á to lɛŋ pum waá yɨ́.

Yésʉs lɨ́ esyɛ̌m lɨ́ figyê

(Marc 11.20-26)

18Ɨ́ dwiné mɛ́n, ɨ́ jɔ̌ʼ Yésʉs á be, nye mû lɨ́ ebúla lɨ́ etô nkana yɨ́, nye á be ó lɨ́ ejóʼo nzâ. 19Nye nzě beě lɨ́ figyê lɨ́ empah é nkpǎʼ. Nye ntɔ̂ʼ dyɛ̂l lɨ́ etó sáa mpúmó, akœ̌b bumó gwár tɨ̂. Nye á jaa kœb ó, njɨ biká e biká. Nye nzě lɛ́ɛ e lɨ́ figyê ó: «Abe e lʉ́ʉ́ dʉ́o bumó, yé ókǎ tyel ɨ́ go!» Tyé e tyé yaá nɛ́ɛ: lɨ́ figyê yaá, yé ntɔ̂ʼ dwɛ̂hla. 20Mbeá ómpʉ́n, bé á bee nó yɨ́, bé ntɔ̂ʼ buú kâm. Bé ó: «Wáǎ mbǐ lɨ́ figyê yɨ̂ʼ báná dwɛ̂hla ɨ́ tyé e tyé mpʉʼ yɨ̂ʼ ɛ̌?» 21Yésʉs nzě yala e bé ó: «Mě lɛ́ɛ́ bɨ́n lɨ́ otyeetye ó, bɨ́n dyɛ́ʼwó e Nzyɛ̌m, asóŋlo ɨ́ bɨ̌n bʉr o tɨ̂ʼ nó, sá bɨ́n ngá sâ yɨ́, yé ólaǎ sâ sáŋɔ́ɔ́ figyê yɨ́. Bɨ́n ólɛ́ɛ le ecwɨ́ʼ lɨ̂ʼ ó: “Mɔaa náǎ. Tó nkaŋa ɨ́ mâŋ” nɛ́ɛ: lé óbánǎ sâ ntémé nó! 22Nó sá yɨ́yɛ̂h bɨ́n ngá dî e búʼó yɨ́, bɨ̌n óbi yê.»

Mpóʼo mé Dâ Nzyɛ̌m ónyɨ̂n wó?

(Marc 11.27-33; Luc 20.1-8)

23Yésʉs nzě nî mpáh Nzyɛ̌m. Jɔʼ nyé á be lɨ́ edwe bʉ̂r milɛ́ʼlá yɨ́, ojwɨ́ɨ ó tɨ̂ʼ le otɔ́má bʉ̂r o b'Ɨ́zraɛ̂l, bê nzě dî e né ó: «Nzé á lómo go ó, go sâʼ bisá bî? Go ntémé pʉgʉ́ sâ byé e nkul jwɨ́ɨ mé nzé?» 24Yésʉs ntɔ̂ʼ yala e bé ó: «Mɛm ntémé, me múo nzě dî bɨ́n njɨ tíá mpwár. Bɨ́n sí kʉ́ gwá yala nó, ɨ́ jɔʼ yaá ó mé ngá twóolo bɨ́n díé é mʉ̂r dí edwe mé nkul jwɨ́ɨ ó, me sâʼ bisyɛ́ɛla byaá nyá yɨ́. 25Nzé á lómo Yʉánɛs lɨ́ edu bʉ̂r? Nzê Nzyɛ̌m ó b'á lómo nye ɛ̌? Nzê bʉr ɛ̌?»

Bê nzě timle tíá nyaá páʼ nyɔ́ɔ́. Bé ó: «Mɨ́ná bé óyala gá ó: “Nzyɛ̌m ó b'á lómo nye” nó, nye óbáʼǎ dî e mɨná gá ó: “Á bɨ̌n bɨɛ bé á bé abûʼla nyé ɨ́ yé ɛ́?” 26Mɨ́ná yálá gá ó: “Bʉr ó b'á lómo nye” nó, mɨná bé ókpɛ́ɛ gá entumo e bʉ̂r ɨ́ jɔʼ yaá, ebě, bʉr bɨ́bɛ̂h, bé bûʼlá ó, Yʉánɛs á be ó ngwíha milɔ̌b mé Nzyɛ̌m.» 27Bé ntɔ̂ʼ yala e Yésʉs ó: «Bɨ̌h bé agʉ́a.» Yésʉs, nye e bé ó: «Yé bé nó wá, me ntémé, me ákóʼó lɛ́ɛ bɨ́n díé é mʉ̂r dí edwe mé nkul jwɨ́ɨ ó, me sâʼ bisyɛ́ɛla bínɨ̌ nyá.»

Kɨkɛna bwán óbá

28Yésʉs, nye e bé ó: «Bɨ̌n bé lɨ́ epahlě sá yɨ̂ʼ nyá? Yé á be ó e nyʉ́ʉ́ mʉ̂r á be e bwá ó bʉrʉ̂m obá nyá. Nye nzě lɛ́ɛ e waá esôʼ ó: “Mwân wǎm, tó séǎ syɛ́ɛ́ ɨ́ pemé yâm mûh ɨ́ dʉ́ó lɨ̂.” 29Nyɨɛ nzě yala e sɔ́ŋ ó: “Mé atô yâm.” Píe tɨ̂, nye nzě jʉba, ntɔ̂ʼ tô, tó séa ɨ́ pemé yaá. 30Sɔ́ŋ nzě laa, tó bee nyʉ́ʉ́ mwân, le elɛ́ɛ ntémé e né jwɨʼ gwár nyé á lɛ́ɛ mwân esôʼ yɨ́. Nyɨ́haá nzě yala e né ó: “Yé ó nó, dâ! Me ótô.” Sâ gwár, nyɨɛ l'atô. 31Ɨ́ bwán óbá baá, waá wáa á sâ gwɨ́má mé sɔ́ŋ nyá?» Bê nzě yala e né ó: «Waá esôʼ.»

Yésʉs nzě kǎ lɛ́ɛ e bé ó: «Mě lɛ́ɛ́ bɨ́n lɨ́ otyeetye ó, onwɨa ó mɔnɨ́ tœ́a le bisadága bi bʉ́bá, bé ó ngá nyɛɛ́ pyâl e bɨ̌n ɨ́ Mpóʼo mé Nzyɛ̌m. 32Ebě, Yʉánɛs á nze páʼ wɨ́n ó, lɨ́ elɨ̂lɛʼle bɨ́n tîtyěl nzɨ̌, bɨ̌n l'abûʼla nyê. Tó kœb ó, onwɨa ó mɔnɨ́ tœ́a le bisadága bi bʉ́bá bɨ́ɛ, bé á si dyɛ̂ʼwo e né. Bɨ̌n bɨɛ ntémé lɨ́ ebee nó, bɨ̌n bé á bé atúmo míkoo e mebébe mɨ́n, nkʉ̂ dwira míléme, le ebúʼlǎ lɔ́ɔ́ wé.»

Kɨkɛna bíbɨ́bla bílóbila

(Marc 12.1-12; Luc 20.9-19)

33Yésʉs nzě lɛ́ɛ e bé ó: «Jóʼláá gá yʉ́ʉ́ kɨkɛna: yé á be ó e nyʉ́ʉ́ mʉ̂r, kúm pemé. Nye á si lî pemé óraisin, nye nzě sumǒ kôʼ lɨ́ ekɛ̌b pemé yaá ɨ́ nká, pû bɨ́, sâ pǎr, súm émân mpúmó, nzě sumǒ tólóm mbɛ̌r édwéelě pemé yaá tɨ̂, nzě líʼe yé e bilóbila byé, ó byé jɨ́jana nye ɨ́ swɨɨ ékpɛm. Píe tɨ̂, nye nzě ja nzɨ́, tô ɨ́ tyen. 34Jɔʼ mpúmó pemé á be, nye mû sí tɨ̂ yɨ́, nye nzě lómo ósyɛ̂l o mésá bé ó, bé tôʼ nʉa wé páʼ mpúmó kwá bilóbila byaá. 35Bilóbila byaá bíɛ nzě mɛ̂r bʉ̂r o mílʉ́mlʉ́ baá, bé ntɔ̂ʼ bíŋɔɔ nyâ, ɨ́ bíŋɔɔ bíŋɔɔ; jʉ́ŋɔɔ nyʉ́ʉ́; lúmɔɔ nyʉ́ʉ́ ntémé e mekóʼ. 36Nye nzě báʼǎ lómo bʉ́ʉ́ ɨ́ buo buo, laǎ bím nyé á nyɛɛ lómo yɨ́. Bilóbila byaá, byê nzě báʼǎ sâ bé jwɨʼ gwár bé á pa sâ bʉ́ʉ́ yɨ́. 37Jɔʼ épíhe, nye ntɔ̂ʼ kǎ lómlo bé mwân wé. Nye ɨ́ nye mʉr tɨ̂ʼ ó: “Bilóbila bî, byé ódwáawo yɨ́ɛ mwân wǎm.” 38Tó kœb ó, bilóbila byaá, mbeá byé á bee mwân wé waá lɨ́ enze yɨ́, byé ntɔ̂ʼ lɛ́ɛla páʼ nyɔ́ɔ́ ó: “Beyɨɨ gá, medilá me kúm pemé ó mâ! Ntáʼ gâ, mɨná jʉ́ʼoo gá nye. Bilíʼé byé bíbyɛ̂h, byé nkʉ̂ sûʼla byaá gá bíná.” 39Bê nzě nkɛ́ɔɔ nyê, guhɔɔ nyé mpómo pemé, jʉ́ŋɔɔ nyé gʉ̂.

40«Á nó, bɨ̌n bɨɛ̌ bee ó, kúm pemé ká nze nó, nye ósâ bílóbila byaá nyá?» 41Bê nzě yala e né ó: «Nye ójʉ̂ bʉ̂r o b'á sâ nye ebébe bá ó jʉ̂ jʉ́ʼóo, ajɨ̂ʼ bé nkoó, nzě pɛ̂h bílóbila biswîh, byaá ngá kʉkomo nyé mpumó tɨ̂ʼ ɨ́ jɔʼ yɨ́yɛ̂h swɨɨ ékpɛm ngá pyâl yɨ́. Nye ókǎ tímle byé pemé yaá.»

42Yésʉs ntɔ̂ʼ lɛ́ɛ e bé ó: «Yê cɛmá ɨ́ Mekaná mé Nzyɛ̌m ó:

“Ekóʼ óswim ó mbɛ̌r bé á bene lɨ́,

lé ó b'á ka sûʼla ekóʼ e dí esúʼo médwii me sɔ́ŋ lɨ́.

Yé á syɛ́ɛ nó ó ɨ́ nkul mé Nzyɛ̌m.

Yé ó sá mɨ́ná dí ekâm gá yɨ́!”

Bɨ̌n bé á bé así láa pêh yaá?»

Yésʉs nzě kɛl mékǎn mâʼ ó: 43«Sá tɨ̂ʼ ó mé dí elɛ́ɛ bɨ́n ó, Nzyɛ̌m múo nzě dwih Mpóʼo nyé kwá nyɨ́n yɨ́. Nyé okǎ tyêl Mpóʼo nyaá kwá bʉr o ngá séa nyé syɛ́ɛ́ bá. 44[Mʉr nyɨnyɛ̂h ócwe lɨ́ ekóʼ laá nyá, óbîʼ. Waá ékóʼ ngá bíla nyá, ósiǐ noʼ.]»

45Jɔʼ nyé á lwib e bé nó yɨ́, ojwɨ́ɨ o mpáh Nzyɛ̌m le oFarizyɛ̂n, bé ntɔ̂ʼ kǎ gʉ́a ó, nkúná nye á sâ bikɨkɛna byaá ó, dumo e bê. 46Bé ntɔ̂ʼ táare ésáa ménzɨ̌ mé émɛ̂r Yésʉs. Sâ gwár, bé á be ó, lɨ́ ekpɛ́ɛ éntumo e bʉ̂r, ebě, bɨ́ɛ, bé á nʉnʉa Yésʉs ó mpʉ ngwíha milɔ̌b mé Nzyɛ̌m.

Currently Selected:

Matthieu 21: ozm

Highlight

Copy